¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼusi jtosukal mulil laj yalbe skʼoplal Jesus li ta mantaletik ta jtatik ta Mateo 18:15 kʼalal ta 17?

Jaʼ skʼoplal kʼalal chlik skʼopik chaʼvoʼ krixchano ti xuʼ xchapan stukike. Pe mi mu xchapaj ta skoj ti toj tsots li skʼopike xuʼ me xichʼ lokʼesel ta tsobobbail li buchʼu ch-ilbajinvane. Xuʼ van yuʼun loʼlavan ta skoj ti tskʼan tspas kanal takʼine o ti batsʼi chchopol kʼoptavane (w16.05, paj. 7).

¿Kʼuxi xuʼ jtabetik lek sbalil li chanel Vivliae?

Oy ep kʼusitik xuʼ jpastik, skʼan me mu jnoptik ti maʼuk jventatike, jnoptik kʼuxi xuʼ jtabetik sbalil, xi jakʼbe jbatike: «¿Kʼuxi xuʼ jtunes sventa jkolta-o yan krixchanoetik?». Jech xtok xuʼ jtunestik li kʼusitik oy kuʼuntik sventa jsabetik lek skʼoplal li kʼusi laj xa jkʼeltike (w16.05, paj. 24-26).

¿Mi chopol ti x-okʼ jun yajtsʼaklom Kristo kʼalal mi oy buchʼu cham yuʼune, pe ti snaʼoj ti oy chaʼkuxesele?

Akʼo mi xchʼunoj ti oy chaʼkuxesel li jun yajtsʼaklom Kristoe, maʼuk skʼan xal ti muʼyuk xa kʼux chaʼi kʼalal oy buchʼu chcham yuʼune. Li Abraane kʼux laj yaʼi xchiʼuk la smil sba ta okʼel kʼalal cham li Sarae (Gén. 23:2). Ta kʼunkʼun ta xchʼay batel li at-oʼontone (wp16.3, paj. 4).

Li kʼusi akʼbat yil yuʼun Dios li Ezequiele, ¿buchʼu skʼoplal li vinik ti yichʼoj jun yabtejeb sventa tsʼibajele xchiʼuk li vakib viniketik ti yichʼoj yabtejebike?

Jaʼ skʼoplalik li anjeletik ta vinajel ti koltavanik sventa xichʼ lajesel li Jerusalene xchiʼuk jaʼik li buchʼutik ta xkoltavanik sventa xichʼ akʼbel slajeb ta Armajedon li xchopol balumil Satanase. Li vinik ti yichʼoj jun yabtejeb sventa tsʼibajele, avie jaʼ skʼoplal li Jesuse xchiʼuk jaʼ chakʼbe smarkail xkaltik li epal krixchanoetike (w16.06, paj. 16, 17).

¿Kʼusitik kuchem tal yuʼun li Vivliae?

Baʼyel, oy-o Vivlia akʼo mi voʼne xa laj yichʼ tsʼibael li ta papiro xchiʼuk li ta pergaminoe. Xchibal, li jbabeetik ta relijion xchiʼuk li politikaetike tskʼanik ox tslajesik. Xchiʼuk yoxibal, tskʼan ox tsjelik li kʼusi chale (wp16.4, paj. 4-7).

¿Kʼusi stakʼ spas jun yajtsʼaklom Kristo sventa sjutukajes li kʼusitik oy yuʼune?

Jpasbetik junuk slistail li kʼusitik chtun kuʼuntike, mu jmantik li kʼusi muʼyuk chtun kuʼuntik ta melele, jchaptik lek ti kʼu yepal ta jlajestik takʼin jujun xemana o jujun ue, jchontik o jkʼelantik li kʼusi muʼyuk xa chtun kuʼuntike, jsutestik me skotol li kiltike, mu jaʼuk xbat ta koʼontontik li abtele xchiʼuk jnoptik kʼusi stakʼ jpastik sventa masuk jcholtik mantal (w16.07, paj. 10).

Jech kʼuchaʼal chal Vivliae, ¿kʼusi ti xjelav to yutsil ti jaʼ mu sta li oroe?

Li ta Job 28:12 xchiʼuk 15 te chal ti li spʼijil Diose jaʼ mas toj lek, jaʼ mu sta li oro o platae. Kʼalal ta jkʼeltik batele, kakʼtik persa ti bikʼituk xkakʼ jbatik xchiʼuk ti jtsatsubtastik li xchʼunojel koʼontontike (w16.08, paj. 18, 19).

¿Mi lek van ti chakʼ chʼiuk yisim ta sjunul xokon sat li jun yajtsʼaklom Kristoe?

Ta junantik lume mu chopoluk chilik, jaʼ noʼox venta mi lek smeltsanojike, yuʼun muʼyuk tsokes li lekil aʼyej ta sventa Ajvalilal yuʼun Diose. Pe oy junantik ermanoetike jaʼ lek chaʼiik ti muʼyuk jech chchʼiesike (1 Kor. 8:9). Pe li ta junantik lume muʼyuk bu lek chilik mi chakʼ chʼiuk yisimik ta sjunul xokon satik li stestigotak Jeovae (w16.09, paj. 21).

¿Kʼuxi jnaʼojtik ti maʼuk noʼox jecheʼ loʼil li sloʼilal David xchiʼuk Goliate?

Te van 2.70 metrouk snatil li krixchano mas nat nabil skʼoplal li ta jkʼakʼaliltike, pe li Goliate 15 sentimetro to mas nat, maʼuk jecheʼ loʼil yuʼun la staik jun voʼneal tsʼib ti chalbe skʼoplal li «snitilulal Davide». Jech xtok, kʼalal laj yalbe skʼoplal David li Jesukristoe chakʼ iluk ti kuxi ta melele. Taje jaʼ chakʼ iluk ti melel onoʼox li kʼusi kʼot ta pasele, yuʼun staojbeik sprevailtak (wp16.5, paj. 13).

¿Kʼusi sjelbenal li yojtikinobile, li pʼijilale xchiʼuk ti xkaʼibetik smelolale?

Li yojtikinobile jaʼ kʼalal oy ep kʼusi xkojtikintike o jnaʼtike. Jech xtok, kʼalal xkaʼibetik smelolale jaʼ ti xkaʼitik kʼuxi tsnit sba skʼoplal li kʼusi jnaʼojtike. Pe li buchʼu oy lek spʼijile, lek xtojob ta stunesel li kʼusi xojtikine xchiʼuk li kʼusi xaʼibe smelolale, vaʼun lek kʼusi chkʼot ta pasel yuʼun (w16.10, paj. 18).