1. ¿Kʼu yuʼun toj tsots skʼoplal ti xkichʼtik voʼe? (Kʼelo li lokʼol ta slikebale).

TA SMILAL xa noʼox chichʼik voʼ jujun jabil li buchʼutik ta jchanubtastik ta Vivliae. Taje te tsakal skʼoplal epal kerem tsebetik xchiʼuk ololetik ti ta sbikʼtal onoʼox van laj yichʼik chanubtasel yuʼun li stot smeʼike. ¿Mi avichʼoj xa voʼ ek li voʼote? ¡Toj lek ti jech la apase! Taje toj tsots skʼoplal ti jechuk jpastik sventa xijkolutike (Mat. 28:19, 20; 1 Ped. 3:21).

2. Akʼo mi tsots kʼusi chlik jbaintik kʼalal chkakʼ jbatik ta stojolal Jeovae, ¿kʼu yuʼun skʼan mu xijxiʼo?

² Ep tajek bendision chata kʼalal chavichʼ voʼe. Pe oy me kʼusi tsots chlik abain xtok. ¿Kʼusi taje? Yuʼun kʼalal la avichʼ voʼe, xi lajakʼbate: «Ti oy xa xchʼunel avoʼonton li ta pojelal laj yakʼ Jesuse, ¿mi asutesoj xa avoʼonton xchiʼuk mi avakʼoj xa aba ta stojolal Jeova sventa xapasbe li kʼusi tskʼan yoʼontone?», vaʼun xi la atakʼe: «¡Jech!». Kʼalal la avichʼ voʼe jaʼ te la avakʼ ta ilel ti avalojbe xa ta jamal Jeova ti jaʼ xa yuʼun li akuxlejale, ti solel chakʼan-oe xchiʼuk ti jaʼ xa chapas-o li kʼusi tskʼan yoʼontone. ¿Mi jaʼ van lek ti muʼyukuk la avakʼ aba ta stojolal li Jeovae? Moʼoj. Yuʼun jaʼ li kʼusi mas lek xuʼ jpastike. Muʼyuk yan kʼusi xuʼ jpastik, mi muʼyuk chijtun ta stojolal Jeovae, xkoʼolaj ti jaʼ lek chkiltik ti jaʼuk spasutik ta mantal li  Satanase. Li stuke jaʼ xa xlaj-o ti jechuk xapase, yuʼun mu skʼan ti xakole. Tskʼan ti xaten ta avoʼonton li kuxlejal ta sbatel osile, ti xavakʼ aba ta stojole xchiʼuk ti xapʼaj li ajvalilal yuʼun Jeovae.

3. ¿Kʼusitik bendision ataoj ta skoj ti avakʼoj xa aba ta stojolal li Jeovae?

³ Nopbo skʼoplal skotol li bendisionetik ataoj ta skoj ti avakʼoj xa aba ta stojolal li Jeovae xchiʼuk ti avichʼoj xa voʼe. Avie xuʼ xa ta sjunuluk avoʼonton xi xaval eke: «Li Mucʼul Diose liʼ xchiʼinojun, jech muʼyuc chixiʼ. ¿Cʼusi xuʼ yuʼun chispasbicun li cristianoetique?» (Sal. 118:6). ¡Muʼyuk kʼusi xkoʼolaj-o ti liʼ oyutik ta stojolal li Jeovae xchiʼuk ti lek chilutike!

4, 5. 1) ¿Kʼu yuʼun voʼotik oy ta jba jtuktik ti xkʼot ta pasel kuʼuntik li kʼusi kalojbetik ta jamal li Jeovae? 2) ¿Kʼusi ta jnuptan jkotoltik?

⁴ Mi avakʼoj xa aba ta stojolal Jeovae, voʼot xa me oy ta aba xa-abtej batel sventa lekuk xavil aba xchiʼuk li Jeovae xchiʼuk ti xata li akolebale. Mu xanop ti bal xa-o ta skoj ti tsots ch-abtejik ta mantal li atot ameʼe, vaʼun ti xuʼ xakʼboxuk jsetʼuk xchʼunel yoʼontonik jech kʼuchaʼal kʼalal chakʼboxuk arexto osile. ¿Kʼu yuʼun toj tsots skʼoplal ti xanopbe skʼoplal taje? Yuʼun mu xanaʼ kʼusi xuʼ xanuptan li ta tsʼakale. Jech xtok, xuʼ van kʼoxot toʼox kʼalal la avichʼ voʼe, pe avi ti lachʼi xa tale xuʼ van jelel xa kʼusitik chlik akʼupin o yan-o xa kʼusitik tsujoxuk ta spasel li achiʼiltake. Xi laj yalbe smelolal jun chex tsebe: «Kʼalal chʼinutik toe, muʼyuk bu chopol chkaʼitik mi muʼyuk ta jloʼtik ek li pastel chakʼik ta j-eskuelatik ta skoj li skumpleanyo junuk jchiʼiltike; muʼyuk chopol chkaʼitik ti jaʼutik stestigo Jeovae. Pe kʼalal chijchʼi talele xchiʼuk kʼalal mas xa ch-ayan ta koʼontontik ti oyuk buchʼu jchiʼintik ta vayele, jaʼ te skʼan jpʼeluk ta koʼontontik ta melel ti jaʼ mas lek ti ta jchʼunbetik li smantaltak Jeovae».

⁵ Veno, jkotoltik onoʼox oy kʼusitik ta jnuptantik ti muʼyuk bu jech kilojtik-oe. Yuʼun ep kʼusitik chkʼot ta pasel ta stojolalik ek li buchʼutik mukʼtik xa chichʼik voʼe. Xuʼ van oy kʼusitik snuptan ta snupunelik, tstsakatik ta jtosuk chamel o chil svokolik ta skoj li yabtelike. Mu junuk buchʼu kolem kuʼuntik; jkotoltik chkiltik prevaetik ti xuʼ van tsots xa chkaʼitik ti tukʼuk-o xkakʼ jbatik ta stojolal li Jeovae (Sant. 1:12-14).

6. 1) ¿Kʼusi smelolal ti mu yuʼunuk oy kʼusi chakʼanbe sutel ta xkʼexol ti la avakʼ aba ta stojolal li Jeovae? 2) ¿Kʼusi chakʼ achan li Filipenses 4:11 kʼalal ta 13?

⁶ ¿Kʼusi van xuʼ skoltaot sventa tukʼuk-o xavakʼ aba ta stojolal Jeova akʼo mi oy kʼusitik xanuptane? Jaʼ ti xavules ta ajol ti mu yuʼunuk oy kʼusi chakʼanbe sutel ta xkʼexol ti la avakʼ aba ta stojolale. ¿Kʼusi skʼan xal taje? Jaʼ ti xi la avalbe yaʼeluk li Ajvalil ta vinajelbalumile: «Chitun-o ta atojolal kʼusiuk xkʼot ta jtojolal; akʼo mi xikta-oxuk li jtot jmeʼe o li kamigotake, pe li voʼone muʼyuk onoʼox bu chkiktaot» (Sal. 27:10). Jech xtok, sventa xkʼot ta pasel avuʼun li kʼusi la avalbe ta jamal li Jeovae, xuʼ me xakʼanbe avipal ti kʼusi ora chtun avuʼun chavaʼie (kʼelo Filipenses 4:11-13).

7. ¿Kʼusi skʼan xal ti jaʼ ‹chapas li kʼusi chata-o akolebale, ti chaxiʼ xchiʼuk ti chanike›?

⁷ Oy tajek ta yoʼonton Jeova ti xakʼot ta yamigoe. Pe skʼan tsotsuk xavakʼ avip sventa jechuk-o lek xavil aba achiʼuk; jech xtok, skʼan tsots xa-abtej sventa xata li akolebale. Xi chal li Filipenses 2:12: «Pasik-o me li kʼusi chata-o akolebalike, xiʼanik xchiʼuk nikanik». ¿Kʼusi skʼan xal kʼalal «xiʼanik xchiʼuk nikanik» xie? Jaʼ ti skʼan xanop lek kʼusi chapas sventa jechuk-o lek xavil aba xchiʼuk li Jeovae xchiʼuk ti tukʼuk-o xavakʼ aba ta stojolal akʼo mi xavil avokol. Jech xtok, skʼan me jechuk-o xakʼel aba, yuʼun mu jaluk kʼusi xuʼ xkʼot ta jtojolaltik mi muʼyuk la jchabi jbatike. Vuleso ta ajol ti ep buchʼutik tsʼujemik  ta mulil akʼo mi jal xa yochelik ta mantale. Vaʼun chaʼa, ¿kʼusi xuʼ skoltaot sventa jaʼuk xapas ‹li kʼusi chata-o akolebale›?

8. 1) ¿Kʼusitik xuʼ jchantik kʼalal chijchanunaj ta jtuktike? 2) ¿Kʼu yuʼun tsots skʼoplal ti xijchanunaje?

⁸ Sventa xijkʼot ta yamigo li Jeovae, skʼan jchikintatik li kʼusi chale xchiʼuk ti jchiʼintik ta loʼile. ¿Kʼusi xuʼ jpastik sventa jchikintabetik li Jeovae? Li kʼusi mas tsots skʼoplale jaʼ ti jchan Jvivlia ta jtuktike. Pe maʼuk noʼox skʼan jkʼeltik li Vivliae, skʼan jkʼeltik xtok li yan jvuntike o li videoetike xchiʼuk ti jnopbetik skʼoplal li kʼusi ta jchantike. Kʼalal chijchanunaje maʼuk sventa epuk kʼusi jkomes ta joltik jech kʼuchaʼal chakomtsan ta ajol li stakʼobiltak aeksamene. Moʼoj, kʼalal chijchanunaje xkoʼolaj kʼuchaʼal chijbat ta paxyal ti ep kʼusitik chakʼ jchantik ta sventa stalelal Jeova kʼalal oy kʼusitik yan chkiltik tee. Mi jech la apas taje, mas me chanopaj ta stojolal li Jeovae, vaʼun ta me xnopaj tal ta atojolal ek (Sant. 4:8).

9. ¿Kʼusitik lek tunem avuʼun kʼalal chachanunaje?

⁹ Li s-organisasion Jeovae ep kʼusitik slokʼesoj sventa xachanunaj ta atuk. Jkʼeltik avil kʼusi xuʼ xata li ta jpajinatik ta Internet ta jw.org. Li bu chal «Jóvenes» xie oy jvokʼ ti bu chal «Actividades para estudiar la Biblia», taje jaʼ tskoltaot sventa xachan loʼiletik ta Vivlia ti totsik tajek skʼoplale. Oy yan jvokʼ ti bu chal guías de estudio, mi la och ti bu chal «¿Qué enseña realmente la Biblia?» xie, te chata lekil mantaletik ti jaʼ tstsatsubtas xchʼunel avoʼonton xchiʼuk jaʼ tskoltaot sventa kʼunuk xavaʼi yalbel smelolal li kʼusi achʼunoje. Maʼuk noʼox, li ta revista ¡Despertad! ta avril ta 2009 ti bu chal: «Los jóvenes preguntan. ¿Cómo disfrutar la lectura de la Biblia?» xie, jaʼ tskoltaot sventa xanaʼ kʼusitik yan xuʼ xapas kʼalal chachanunaj ta atuke. Kʼalal chachanunaj xchiʼuk chanopbe skʼoplal li kʼusitik chachane, jaʼ me tskoltaot sventa jaʼuk xapas li kʼusi chata-o akolebale (kʼelo Salmo 119:105).

10. ¿Kʼu yuʼun toj tsots skʼoplal ti spasik orasion skotol li buchʼutik yichʼojik xa voʼe?

¹⁰ Laj xa kiltik kʼuxi xuʼ jchikintabetik li Jeovae. Pe, ¿kʼusi van skʼan jpastik mi ta jkʼan ta jkʼopontik une? Skʼan jpastik orasion. Li yajtsʼaklomutik Kristoe maʼuk noʼox ta jpastik orasion ta skoj ti jech nopem xkaʼitike o ti jaʼ sventa lekuk xbat kuʼuntik li  kʼusitik ta jpastike. Moʼoj, jech ta jpastik ta skoj ti ta jkʼan ta jkʼopontik ta melel li Jpasvanej kuʼuntike. Jech xtok, oy tajek ta yoʼonton tskʼan chaʼi akʼop ek li stuke (kʼelo Filipenses 4:6). ¿Kʼusi xuʼ xapas mi oy kʼusi chavul-o avoʼontone? Xi chal li Vivliae: «Acʼbo sventain Mucʼul Dios scotol li avocole» (Sal. 55:22). Ta smiyonal xa noʼox ermanoetike jaʼ koltaatemik yuʼun li orasione. Jaʼ yuʼun, xuʼ xachʼun ti jaʼ tskoltaot li voʼot eke.

11. ¿Kʼu yuʼun skʼan jechuk-o xatojbe ta vokol li Jeovae?

¹¹ Skʼan skotol ora jpastik orasion, maʼuk noʼox kʼalal ta jkʼantik koltaele. Pe oy to yan kʼusi tsots skʼoplal skʼan jpastik. Xi chal li Vivliae: «Tojik ta vokol» (Kol. 3:15). Xuʼ van jaʼ xbat ta koʼontontik yuʼun li jvokoltike, vaʼun ti jaʼ xa xchʼay ta koʼontontik li epal bendision chakʼbutik li Jeovae. ¿Kʼu yuʼun mu xavakʼ ta avoʼonton xatojbe ta vokol jujun kʼalal bal oxtosuk li kʼusi chakʼbote? Xi chal jun chex tseb ti Abigail sbie xchiʼuk ti 12 toʼox sjabilal kʼalal laj yichʼ voʼe: «Muʼyuk buchʼu liʼ ta Balumil mi jaʼuk ta vinajel ti mas to skʼan jtojbetik ta vokol li kʼusi chakʼbutike. Skʼan jtojbetik ta vokol skotol ora li kʼusitik yakʼojbutike. Lek tajek chkaʼi snopel li kʼusi laj yalbeikun ta jkoje, xi laj yalbeikune: ‹Jnopbetik skʼoplal li kʼusitik la jtojbetik ta vokol Jeova li voljee. Ti jaʼuk noʼox chakʼbutik Jeova li kʼusi la jtojbetik ta vokole, ¿kʼu van yepal oy kʼusitik kuʼuntik avi ti jechuke?›». *

12, 13. ¿Kʼu yuʼun skʼan xanopbe skʼoplal kʼu yelan aviloj atuk ti toj lek yoʼonton li Jeovae?

¹² Li Jeovae la skolta li ajvalil David sventa xkuch yuʼun li kʼusitik la snuptane. Laj yil ta xkuxlejal stuk ti toj lek li Jeovae. Jaʼ yuʼun, xi laj yale: «Qʼuelavilic, pasic preva avaʼyic, toj lec li Mucʼul Diose. Toj jun noʼox yutsil li bochʼo jaʼ noʼox spatoj yoʼntonic o ta stojole» (Sal. 34:8). Li versikulo taje chakʼ jchantik ti tsots skʼoplal ti jkʼel ta jkuxlejal jtuktik ti toj lek li Jeovae. Kʼalal chakʼel li Vivliae, li jvuntike xchiʼuk kʼalal chabat li ta jtsobajeltike, ep buchʼutik chavojtikinan ti jaʼ koltaatik yuʼun Dios sventa tukʼuk xakʼ sbaike. Pe mu baluk noʼox taje, yuʼun sventa xachʼi ta mantale skʼan xakʼel atuk kʼu yelan chkoltavan li Jeovae. ¿Kʼuxitik aviloj atuk ti toj lek yoʼonton li Jeovae?

¹³ Jtos ti kʼu yelan kiloj jkotoltik ti toj lek yoʼonton li Jeovae jaʼ ti yikʼojutik tal ta stojolale xchiʼuk ta stojolal li Xnichʼone. Xi laj yal li Jesuse: «Muʼyuk buchʼu xuʼ yuʼun chtal ta jtojolal mi muʼyuk bu ikʼbil tal yuʼun li Totil ti la stakun tale» (Juan 6:44). ¿Mi jaʼ van yikʼojot tal ek li Jeovae? Xuʼ van xi snop junuk chex kerem o tsebe: «Jaʼ noʼox stukik jtot jmeʼ ikʼatik tal yuʼun li Jeovae, jech oxal, muʼyuk xa chkakʼbe yipal li voʼone». Pe vuleso ta ajol ti kʼalal la avakʼ aba ta stojolal li Jeovae, laj avakʼ ta ilel ti lek tajek xavil aba achiʼuke. Jaʼ yuʼun, xojtikinot lek. Xi chal kaʼitik li Vivliae: «Mi oy buchʼu skʼanoj li Diose ojtikinbil me yuʼun li Diose» (1 Kor. 8:3). Jech oxal, epuk tajek sbalil xavil ti liʼ oyot ta s-organisasion Jeovae.

14, 15. ¿Kʼu yuʼun mas tstsatsub xchʼunel avoʼonton kʼalal chachol mantale?

¹⁴ Kʼalal chavil kʼuxi tskoltaot ta cholmantal xchiʼuk ta aeskuela li Jeovae, jaʼ te chavakʼ venta xtok ti toj lek yoʼontone. Oy ep buchʼutik vokol chaʼiik xcholbel mantal li xchiʼiltakik ta chanune, yuʼun mu snaʼik kʼusi chtakʼbatik sutel. Xuʼ van jaʼ jech vokol chavaʼi ek, mas to mi toj epik li achiʼiltake. ¿Kʼusi van xuʼ skoltaot mi jech chanuptane?

¹⁵ Li kʼusi xuʼ skoltaote jaʼ ti xanopbe skʼoplal  kʼu yuʼun achʼunoj ti melel li kʼusitik chachane. Li ta jpajinatik ta Internet ta jw.org oy ep mantaletik ti xuʼ skoltaot ta snopbel skʼoplal li kʼusitik achʼunoje, ti kʼu yuʼun achʼunoje xchiʼuk ti kʼuxi xuʼ xavalbe smelolale. ¿Kʼu yuʼun mu xachʼakbe yorail sventa xasaʼ li koltaeletik taje? Mi achʼunoj lek ti jaʼ melel li kʼusitik chachan ta Vivliae xchiʼuk mi chachapan lek abae, mu xa me stakʼ chavaʼi ti jech mu xavalbe skʼoplal li Jeovae (Jer. 20:8, 9).

16. ¿Kʼusi xuʼ skoltaot sventa mu xaxiʼ ta xcholel li mantale?

¹⁶ Akʼo mi lek chachapan aba, pe xuʼ van jech-o chaxiʼ jutuk kʼalal chacholbe mantal li achiʼiltak ta chanune. Xi chal jun ermana ti 18 sjabilale xchiʼuk ti laj yichʼ voʼ kʼalal 13 toʼox yichʼoje: «Akʼo mi jchʼunoj lek ti jaʼ melel li kʼusi ta jchan ta Vivliae, pe vokol tajek chkaʼi ta yalel». Vaʼun chaʼa, ¿kʼusi koltaat sventa junuk noʼox yoʼonton kʼalal chchol mantale? Xi chal kaʼitike: «Li jchiʼiltak ta chanune lek noʼox chaʼiik yalel li kʼusitik tspasike, jaʼ yuʼun xi la jnope: ‹¿Kʼu yuʼun mu jechuk jpas ek?›. Jech oxal, kʼalal oy kʼusi yakal ta jloʼiltakutike chkalbeik chaʼoxbeluk ta anil li kʼusi la jpas kʼalal ay kakʼ estudioe. Vaʼun, bakʼintike tsjakʼbeikun kʼu yelan li chanubtasel ta Vivlia chkakʼe. Kʼalal jech ta jpase mas kʼun chkaʼi yalbel skʼoplal li Vivliae xchiʼuk jun koʼonton chikom kʼalal jech ta jpase».

17. ¿Kʼu yuʼun toj tsots skʼoplal ti muuk xijxiʼ kʼalal chkalbetik skʼoplal li kʼusi ta jchantike?

¹⁷ Mi chavichʼ ta mukʼ xchiʼuk mi oy ta avoʼonton li yantike, xuʼ me jech spasik ta atojolal ek. Kʼelavil kʼusi laj yal Olivia ti 17 sjabilale xchiʼuk ti kʼox toʼox kʼalal laj yichʼ voʼe, xi chale: «Chixiʼ toʼox tajek mi likem jchuvaj xilik ta skoj jrelijion mi laj kalbe skʼoplal Vivlia kʼalal jaʼo oy kʼusi ta jloʼiltakutik xchiʼuk li jchiʼiltak ta chanune». Pe kʼunkʼun lik jeluk li snopbene, maʼuk xa laj yakʼ ta yoʼonton li kʼusi van chalik li yantike, xi la snope: «Epal kerem tsebetike mu xojtikinik li stestigotak Jeovae, xuʼ van kʼajomal noʼox xojtikinikun li voʼone. Jaʼ yuʼun, mi lek laj kakʼ ta ilel jtalelale xuʼ lek xilik li mantale. Yuʼun mi te noʼox xitsʼijet xchiʼuk mi mu xkalbeik jpʼeluk li kʼusi ta jchane o mi chixiʼ tajek ta yalele, xuʼ van snopik ti mu lekuk chkaʼi ti jaʼun stestigo Jeovae. Xuʼ van oy kʼusi chopol xlik yalik-o. Pe mi chkakʼ ta ilel ti jchʼunoj ta melel li kʼusi ta jchane xchiʼuk mi jun noʼox koʼonton kʼalal chkalbe skʼoplale, xuʼ me mas xichʼikun ta mukʼ».

18. ¿Kʼusitik skʼan xapas sventa xata li akolebale?

¹⁸ Laj xa jchantik talel ti oy kʼusi toj tsots skʼoplal abainoje: jaʼ ti xapas li kʼusi chata-o akolebale. Laj kiltik ti sventa spas avuʼun taje, skʼan xakʼel li Avivliae, ti xanopbe skʼoplale, ti xapas orasione xchiʼuk ti xanopbe skʼoplal li bendisionetik ataoje. Mi la apas skotol taje, mas me jpʼel ta avoʼonton chachʼun ti jaʼ avamigo li Jeovae. Vaʼun jaʼ me tstij avoʼonton sventa xaval batel li kʼusitik achʼunoje (kʼelo Salmo 73:28).

19. ¿Kʼu yuʼun mu jecheʼuk noʼox mi laj kakʼtik persa spasel li kʼusi ta jta-o jkolebaltike?

¹⁹ Xi laj yal li Jesuse: «Mi oy buchʼu tskʼan chtal ta jtojolale akʼo sten ta yoʼonton xkuxlejal, akʼo xkuch li jtel teʼ sventa vokolile xchiʼuk akʼo stsʼakliun-o batel» (Mat. 16:24). Jech kʼuchaʼal chkiltike, skʼan xkakʼ jkuxlejaltik ta stojolal Jeova xchiʼuk xkichʼtik voʼ sventa jtsʼaklitik li Jesuse. Mi jech la jpastike, ta busanbil noʼox bendisionetik ta jtatik li avie xchiʼuk ta jtatik kuxlejal ta sbatel osil li ta achʼ balumile. Jaʼ yuʼun, oy lek srasonal kuʼuntik ti ‹jechuk-o jpastik li kʼusi ta jta-o jkolebaltike›.