¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

Li totil meʼiletik ti jaʼik jyanlumetike, ¿kʼu yuʼun skʼan stsakik ta venta kʼusi kʼopal chkʼopojik-o li yalab xnichʼnabik sventa skoltaik ta mantale?

Li alab nichʼnabiletike xuʼ van jaʼ te xchanik yan kʼop li ta chanune xchiʼuk ta stojolal li yan krixchanoetike. Kʼalal chchanik yan kʼope ep kʼusitik xuʼ lek staik. Li totil meʼiletike skʼan snopik bu junukal tsobobbail chbatik, mi jaʼ li ta tsobobbail ti bu chkʼotik ta nakleje o mi jaʼ li ta skʼop stukike. Skʼan stsakik ta venta bu junukal tsobobbail xuʼ chchanik lek li kʼusitik melel chal Vivliae xchiʼuk ti bu xuʼ xchʼiik-o lek ta mantale. Li yajtsʼaklomtak Kristoe skʼan me jaʼ mas tsots skʼoplal xilik li kʼusitik chtun yuʼun li yalab xnichʼnabike, maʼuk li kʼusi lek chaʼi stukike (w17.05, paj. 9-11).

Li Jesuse xi la sjakʼbe li Pedroe: «¿Mi mas akʼanojun ti jaʼ mu sta li kʼusitik liʼe?». ¿Kʼusi smelolal «li kʼusitik liʼe»? (Juan 21:15)

Yikʼaluk van jaʼ laj yalbe skʼoplal li choyetik ti la stsakike o li pʼolmal ta sventa li choye. Kʼalal cham xa ox li Jesuse, lik abtejuk yan velta ta tsak choy li Pedroe. Li yajtsʼaklomtak Kristoe skʼan skʼelik lek ti mu jaʼuk xbat ta yoʼontonik li yabtelike (w17.05, paj. 22, 23).

Li Abraane, ¿kʼu yuʼun laj yalbe yajnil ti akʼo xal ti jaʼ sbankile? (Gén. 12:10-13)

Li Abraane jaʼ xchaʼixlel ta melel li Sarae. Ti lajuk yal Sara ti jaʼ smalale, xuʼ van laj yichʼ-o milel li Abraane, vaʼune muʼyuk xa bu x-ayan li nitilulal ti yaloj onoʼox Dios ti jechuke (wp17.3, paj. 14, 15).

¿Kʼusi la stunes Elias Hutter sventa xchanik evreo kʼop li yajchanuntake?

Tskʼan ti xakʼik venta yajchanuntak li jujupʼel kʼop ta evreo ta Vivliae xchiʼuk ti jeleluk xvinaj xchiʼuk li stsʼak ta slikeb o ta slajeb jujupʼel kʼope. Jaʼ yuʼun, kʼalal la spas imprimire jaʼ mas lek xvinaj o mas mukʼtik sletrail la spas li jujupʼel kʼop ta evreoe, jaʼ mu jechuk la spasbe li stsʼak ta slikeb o ta slajeb jujupʼel kʼope. Li ta Traducción del Nuevo Mundo de las Santas Escrituras (con referencias) ta españole jaʼ jech la spas li ta tsʼibetik ta yok vune (wp17.4, paj. 11, 12).

¿Kʼusi skʼan stsak ta venta jun yajtsʼaklom Kristo sventa tsnop mi tstunes pistola, rifle o yan abtejebal sventa xchabi sba ta stojolal li yantike?

Li Jeovae chʼul chil li xkuxlejal krixchanoetike. Li Jesuse muʼyuk laj yalbe yajchankʼoptak ti akʼo saʼ junuk yespadaik sventa xchabi-o sbaike (Luk. 22:36, 38). Li yajtuneltak Diose chlik ‹spasik ta asarona li yespadaike›. Mas tsots skʼoplal li xkuxlejal jun krixchanoe, jaʼ mu sta li kʼusitik oy yuʼune. Skʼan jtsakbetik ta venta sjol yoʼontonik li yantike xchiʼuk ti chkakʼtik persa ti lekuk ta chanel jtalelaltike (2 Kor. 4:2) (w17.07, paj. 31, 32).

Li Mateo xchiʼuk Lukase, ¿kʼu yuʼun mu xkoʼolaj li kʼusi laj yalik ta sventa li xkuxlejal Jesus kʼalal bikʼit toʼoxe?

Li Mateoe jaʼ mas laj yakʼ ta yoʼonton yalbel skʼoplal li Josee. Jech kʼuchaʼal liʼe, laj yalbe smelolal kʼu yelan laj yaʼi sba Jose kʼalal laj yaʼi ti xchiʼinoj xa yol li Mariae, chalbe skʼoplal xtok kʼalal chiʼinat ta loʼil yuʼun jun anjel sventa x-albat ti akʼo jatavuk batel ta Ejipto xchiʼuk ti sutuk talel ta tsʼakale. Jaʼuk li Lukase jaʼ mas laj yakʼ ta yoʼonton yalbel skʼoplal li Mariae. Laj yal ti ay svulaʼan li Elisabete xchiʼuk li kʼusi laj yal kʼalal kom ta templo li Jesuse (w17.08, paj. 32).

¿Kʼusitik yakʼoj ta vokol Vivlia ti kʼu sjalil jelavem talele?

Li smelolal jujuchop kʼop yichʼ tunesel ta Vivliae jelem ti kʼu sjalil jelavem talele. Kʼalal chjel li ajvaliletike chjel yuʼunik ek li kʼope. Xchiʼuk oy kontrainel sventa muʼyukuk ta xichʼ jelubtasel ta skʼop skotol krixchanoetik li Vivliae (w17.09, paj. 19-21).

¿Mi oy van kaj-anjeltik ta jujuntal ti chchabiutike?

Muʼyuk. Melel onoʼox ti xi laj yal Jesus ta sventa li yajchankʼoptake: «Ti yaj-anjelik te ta vinajele te skʼelojbeik-o sat li Jtot ta vinajele» (Mat. 18:10). Pe taje maʼuk skʼan xal ti oy junuk kaj-anjeltik ti chchabiutik ta skʼelobil juʼelal ta jujuntale, moʼoj, ti kʼusie, jaʼ ti oy tajek ta yoʼontonik yajtsʼaklomtak Kristo li anjeletike (wp17.5, paj. 5).

¿Kʼusi sbi li kʼanelal ti mas mukʼ skʼoplale?

Kʼalal jaʼ tspasat ta mantal yuʼun li tukʼil beiltaseletik yuʼun Diose, li kʼanelal ti Agápe sbie jaʼ li kʼanelal ti mas mukʼ skʼoplale. Li kʼanelal taje maʼuk noʼox chakʼ ti oyuk kʼusi xkaʼi ta koʼontontik yuʼun li yantike, moʼoj, yuʼun jaʼ chakʼ ti oyuk kʼusi jpastik ta yutsil koʼontontik ta stojolalike (w17.10, paj. 7).