LI Dianae oy xa mas ta 80 sjabilal xchiʼuk ipaj ta Alzheimer li smalale (jtos chamel ta jchinabtik). Ti kʼu to sjalil kuxie te laj yakʼik ta snail li buchʼutik oy xa sjabilalike. Maʼuk noʼox, yuʼun cham xchaʼvoʼal yalab xtok li Dianae xchiʼuk ipaj ta kanser ta xchuʼ. Akʼo mi jech, muʼyuk laj yikta sba ta tsobajel xchiʼuk li ta cholmantale. Jaʼ yuʼun li ermanoetik ta stsobobbaile chalik ti jech-o xkuxet yoʼonton li ermanae.

Li ermano Johne tun mas ta 43 jabil ta jkʼelvanej ta sirkuito, skʼanoj tajek ti jech chtun ta stojolal Jeovae. Pe laj yikta ta skoj ti skʼan xchabi jun yutsʼ yalal ti ipaje. Kʼalal ch-ilat ta asamblea yuʼun li ermanoetik ti voʼne xa xojtikine, chalik ti muʼyuk la jelem-oe, yuʼun jech-o xmuyubaj.

¿Kʼuxi ti jech-o xmuyubajik li Diana xchiʼuk Johne? ¿Kʼuxi xa noʼox ti xuʼ xmuyubaj li jun yajtunel Jeova akʼo mi oy kʼusi snuptan o ti xikta li yabtel ta stojolal Dios ti skʼanoj tajeke? Xi tstakʼ li Vivliae: «Toj xcuxet noʼox yoʼntonic [...] ta stojol Mucʼul Dios li bochʼotic lec [o tukʼ] yoʼntonique» (Sal. 64:10). Sventa xkaʼibetik smelolale, ta jkʼeltik echʼel kʼusi chakʼbutik li melel xkuxetel oʼontonale xchiʼuk li kʼusi maʼuk chakʼ jmuyubajeltik ta melele.

Stalel onoʼox ti oy kʼusitik xijmuyubaj-o yuʼune, jech kʼuchaʼal kʼalal chijnupune, kʼalal chkil kalab jnichʼnabtike o kʼalal ta jtatik junuk matanal ta spasbel yabtel Diose. Chakʼ jmuyubajeltik, yuʼun te likem talel ta stojolal Jeova. Jaʼ la slikes li nupunele, ti xkil kalab jnichʼnabtike xchiʼuk jaʼ chakʼbutik li kabteltik ta s-organisasione (Gén. 2:18, 22; Sal. 127:3; 1 Tim. 3:1).

Akʼo mi jech, bakʼintike jlikel noʼox ti xijmuyubaj yuʼune. Yuʼun yikʼaluk van xcham jnup jchiʼiltik o ti xmukul sativane (Ezeq. 24:18; Os. 3:1). Xuʼ van mu xchʼunbeik smantal stot smeʼik li alab nichʼnabiletike xchiʼuk ti mu xchʼunbeik smantal Diose, vaʼun ti xlokʼik ta tsobobbaile. Jech kʼuchaʼal li xnichʼnab j-alkʼop Samuele muʼyuk bu tukʼ tunik ta stojolal Jeova. Li ajvalil David eke la spas smul, jaʼ  yuʼun ep laj yil svokol ta yutsʼ yalal (1 Sam. 8:1-3; 2 Sam. 12:11). Kʼalal jech ta jnuptantike chjel ta at-oʼonton li muyubajele.

Jaʼ jech ek ta sventa li kʼusi jbainojtik ta s-organisasion Jeovae, yikʼaluk van xkiktatik ta skoj ti chij-ipaje, ti oy kʼusi chlik jbain ta kutsʼ kalaltike o ti oy kʼusi jel ta s-organisasion Jeovae. Ep ermanoetik chalik ti tsnaʼik tajek ti kʼu toʼox yelan tunike.

Jamal xvinaj ti oy kʼusitik muʼyuk jal xijmuyubaj-o yuʼune. Pe li kʼusi la snuptanik Samuel, David xchiʼuk yantike chakʼ ta ilel ti oy kʼusi yan chakʼ xkuxetel koʼontontike, akʼo mi oy kʼusi xjel ta anil ta jkuxlejaltik o kʼalal ta jnuptantik vokolile.

Li Jesuse snaʼoj lek kʼu yelan li melel muyubajele. Kʼalal te toʼox ta vinajele, lek tajek li xkuxlejale. Xi laj yale: «Scotol cʼacʼal xcuxet coʼnton ta stojol» Jeova (Prov. 8:30). Pe kʼalal tal ta balumile, la snuptan tsatsal vokoliletik. Akʼo mi jech, la skʼupin spasbel li kʼusi tskʼan yoʼonton Stote (Juan 4:34). ¿Kʼusi koltaat sventa xkuch yuʼun li vokolil kʼalal jutuk xa ox skʼan xchame? Xi chal li Vivliae: «Kuch yuʼun milel ta jtel teʼ sventa vokolil [...] ta sventa li xkuxetel oʼontonal ti te akʼbil ta yelovale» (Evr. 12:2). Ta jkʼelbetik batel skʼoplal chaʼtos kʼusi laj yal Jesus ta sventa li xkuxetel oʼontonale, jaʼ xkaltik, li melel muyubajele.

Oy jun veltae, xmuyubaj tajek sutik tal ta cholmantal li 70 ta voʼ yajchankʼoptak Jesuse, yuʼun la spasik skʼelobiltak juʼelal xchiʼuk la slokʼesik pukujetik. Pe xi albatik yuʼun li Jesuse: «Mu me jaʼuk xkuxetuk-o avoʼontonik taje, ti la xchʼunik amantalik li pukujetike, jaʼ kuxetuk-o avoʼontonik ti teuk tsʼibabil ta vinajel li abiike» (Luk. 10:1-9, 17, 20). Melel onoʼox ti xijmuyubaj kʼalal ta jkʼupintik spasel li kabteltik ta s-organisasion Jeovae, pe li kʼusi mas tsots skʼoplale jaʼ ti lekuk xilutik li Jeovae, taje jaʼ chakʼbutik li melel muyubajele.

Jun velta kʼalal yakal chchanubtas epal krixchanoetik li Jesuse, xi tsots laj yal jun juda ants kʼalal laj yil ti toj lek chchanubtasvane: ‹¡Xmuyubaj noʼox li ants ti la svokʼesote!›. Pe xi laj yal li Jesuse: «Moʼoj, ¡jaʼ xmuyubajik noʼox li buchʼutik chaʼiik li skʼop Diose xchiʼuk ti tspasik li kʼusi chale!» (Luk. 11:27, 28). Melel onoʼox ti xmuyubajik kʼalal lek stalelal yalab  xnichʼnabik li totil meʼiletike. Pe mas to xmuyubajik kʼalal chchʼunbeik smantal Jeovae.

¿Kʼusi ti mas xkuxet-o koʼontontike? Jaʼ ti jnaʼojtik ti lek chilutik li Jeovae. Melel onoʼox ti muʼyuk xijmuyubaj kʼalal ta jnuptantik jtosuk vokolile, pe maʼuk skʼan xal ti mu xa stakʼ xijmuyubaj xtoke. Kʼalal chkuch kuʼuntik xchiʼuk mi tukʼ chkakʼ jbatik ta stojolal Jeovae, jaʼ mas xijmuyubaj-o (Rom. 5:3-5). Jvules ta joltik xtok ti chakʼbutik xchʼul espiritu mi ta jpat koʼontontik ta stojolale, vaʼun jaʼ chakʼ ti xkuxet noʼox koʼontontike (Gal. 5:22). Jaʼ yuʼun xi chal li Salmo 64:10: «Toj xcuxet noʼox yoʼntonic [...] ta stojol Mucʼul Dios li bochʼotic lec [o tukʼ] yoʼntonique».

Laj xa kaʼitik ti kʼu yuʼun jech-o xmuyubajik li Diana xchiʼuk John kʼalal la snuptanik vokolile. Xi chal li Dianae: «La jpat koʼonton ta stojolal Jeova jech kʼuchaʼal tspat yoʼonton ta stojolal stot smeʼ li jun olole». Xi to chale: «Yakʼojbun sbendision Jeova chkaʼi ti jech-o ximuyubaj ta cholmantale». Jaʼ jech li John eke, chal ti laj yichʼ biiltasel ta jchanubtasvanej li ta Chanob vun sventa Xchanubtasel Jtuneletik ta 1998, taje jaʼ koltaat-o sventa masuk to xchanbe skʼoplal li Vivliae. Koliyal taje jaʼ koltae sventa xmuyubajuk noʼox xchiʼuk ti baxboluk-o ta cholmantal kʼalal laj yikta li yabtel ta jkʼelvanej ta sirkuitoe. Laj yal ti muʼyuk vokol laj yaʼi xchiʼuk yajnil kʼalal laj yiktaike, yuʼun jpʼel onoʼox ta yoʼonton tspasik li kʼusi ch-akʼbat sbainik yuʼun li Jeovae. Xi chalike: «Jun tajek koʼontonkutik ti jech la jpaskutike».

Ep yajtuneltak Diose xchʼunojik ti melel li kʼusi chal Salmo 64:10. Kalbetik skʼoplal jun nupultsʼakal ti tunik mas ta 30 jabil li ta Betel ta Estados Unidose xchiʼuk ti laj yichʼik albel ti chlik tunikuk ta prekursor espesiale. Xi chalike: «Stalel onoʼox ti chkat koʼontontik kʼalal chkiktatik spasel li kʼusi jkʼanojtik tajeke. Pe skʼan ti mu jechuk-o xkat koʼontontike». Ta anil noʼox lik xchiʼinik ta cholmantal li ermanoetik ta tsobobbail ti bu chtunike. Xi to chalike: «Jamal chkalbekutik Jeova li kʼusi oy ta koʼontonkutike. Kʼalal chkilkutik kʼu yelan tstakʼ j-orasionkutike, mas ximuyubajkutik xchiʼuk tspat tajek koʼontonkutik. Kʼalal muʼyuk toʼox jal te oyunkutik ta tsobobbaile, lik tunikuk ta prekursor jlom ermanoetik. Maʼuk noʼox, yuʼun chʼiik ta mantal chaʼvoʼ ti buchʼu chkakʼbekutik estudioe».

Melel onoʼox ti chkat koʼontontik bateltike, jaʼ yuʼun tsots chkaʼitik ti xijmuyubajuk noʼox skotol kʼakʼale. Pe tspat tajek koʼontontik li kʼusi chal Jeova ta Salmo 64:10. Akʼo mi oy jvokol chkaʼitik, pe xuʼ jpat koʼontontik ti «toj xcuxet noʼox yoʼntonic [...] ta stojol Mucʼul Dios li bochʼotic lec [o tukʼ] yoʼntonique». Jaʼ xkaltik, mu ventauk ti kʼusi ta jnuptantike xuʼ xijmuyubaj mi tukʼ chkakʼ jbatik ta stojolal Jeovae. Jech xtok, jmalaojtik tajek ti xkʼot ta pasel ti chakʼ ayanuk achʼ vinajel xchiʼuk achʼ balumil li Jeovae. Vaʼun naka xa tukʼik li yajtuneltake xchiʼuk xkuxet noʼox yoʼontonik sbatel osil ta sventa li kʼusitik ch-akʼbatike (Is. 65:17, 18).

Jnoptik avaʼi: li ta achʼ balumile muʼyuk xa chij-ipaj xchiʼuk oy noʼox kipaltik chijsakub. Jech xtok, chchʼay ta joltik skotol li kʼusi chopol jnuptanojtike xchiʼuk li kʼusitik syayijesoj koʼontontike. Xi chalbutik ta jamal li Jeovae: «Li pocoʼe muʼyuc xa bochʼo ta snaʼ o; muʼyuc xa bochʼo ta snopilan o». Maʼuk noʼox, yuʼun chkiltik yan velta li buchʼutik chamem kuʼuntike. Ta smiyonal xa noʼox krixchanoetik chmuyubajik tajek, jech kʼuchaʼal laj yaʼiik stot smeʼ li chʼin tseb ti 12 sjabilal ti laj yichʼ chaʼkuxesel yuʼun Jesuse, yuʼun «mu xa snaʼ kʼusi tspasik ta skoj ti xmuyubajik ta jyalele» (Mar. 5:42). Chkʼot skʼakʼalil ti naka xa tukʼ skotol li krixchanoetike xchiʼuk ti «toj xcuxet noʼox yoʼntonic [...] ta stojol Mucʼul Dios» ta sbatel osile.