¿Mi akʼupinoj skʼelel Li Jkʼel osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼusi sprevailtak oy ta Vivlia ti xaʼibe xkʼuxul jvokoltik li Diose?

Kʼalal laj yil svokolik ta mosoinel ta Ejipto li j-israeletike, li Diose snaʼoj ti chil svokol li steklumale xchiʼuk kʼux chaʼi ek (Éx. 3:7; Is. 63:9). Ta skoj ti jaʼ jech la spasutik kʼuchaʼal slokʼole, xuʼ xkaʼibetik xkʼuxul svokol li yantike. Akʼo mi oy bakʼintik ti mu jta-o chkaʼitik li xkʼuxul yoʼonton Diose, ta onoʼox xaʼi li xkʼuxul jvokoltike (wp18.3, paj. 8, 9).

¿Kʼuxi la skolta krixchanoetik li Jesus sventa stsal yuʼunik li kʼusi chopol tsnopik ta stojolal yantike?

Li judaetik ta skʼakʼalil Jesuse muʼyuk jmoj oyik ta skoj ti spʼajoj sbaik tajeke xchiʼuk ti oy kʼusi chopol tsnopik ta anil ta stojolal li yantike. Li Jesuse jamal laj yalbe yajchankʼoptak ti skʼan yutsʼ yalal xil sbaik ta jujuntale (w18.06, paj. 9, 10).

¿Kʼusi chakʼ jchantik li kʼusi kʼot ta stojolal Moises ti muʼyuk xjelav ta Albil Balumile?

Li Moisese lek laj yamigoin sbaik xchiʼuk li Jeovae (Deut. 34:10). Pe oy kʼusi kʼot ta pasel kʼalal te xa ox van 40 jabil yakalik ta xanbal ta takixokol balumil li j-israeletike, yuʼun laj yalik yan velta ti chʼabal yaʼalike. Jaʼ yuʼun li Diose laj yalbe Moises ti akʼo xalbe mantal li ton sventa akʼo lokʼuk tal voʼe, pe li Moisese mu jechuk la spas yuʼun la smaj ta snamteʼ li tone. Li Jeovae ilin ta stojolal li Moisese. Xuʼ van jaʼ toj chopol laj yil ti muʼyuk xchʼunbat li smantale o ta skoj ti muʼyuk xichʼ ichʼel ta mukʼ li skʼelobil juʼelal la spase (Núm. 20:6-12). Li loʼil liʼe chakʼ jchantik ti skʼan jchʼunbetik smantal li Jeovae xchiʼuk ti jaʼuk noʼox xkichʼtik ta mukʼe (w18.07, paj. 13, 14).

¿Kʼusi chopol xuʼ xkʼot ta pasel mi jaʼ noʼox ta jkʼelbetik spat xokon li yantike?

Oy oxtos kʼusi tstsakik ta venta li krixchanoetik ti chopol-o kʼusi tsnopik ta stojolal li yantike: kʼalal jelel stsʼunbalike, kʼalal oy stakʼinike xchiʼuk kʼalal jelel sjabilalike. Toj tsots skʼoplal ti mu jnoptik ta anil kʼusi chopol ta stojolal yantik jech kʼuchaʼal tspas li Jeovae (Ech. 10:34, 35) (w18.08, paj. 8-12).

¿Kʼuxitik xuʼ xkoltavanik ta tsobobbail li ermanoetik ti oy xa sjabilalike?

Kʼalal mi laj yichʼ jelbel kʼusi sbainoj li ermano ti oy xa sjabilale, toj ep-o me sbalil ch-ilat yuʼun li Jeovae xchiʼuk xuʼ skolta li yantike. Xuʼ skolta li malaliletik ti maʼukik stestigo Jeovae, li buchʼutik chibajemik ta mantale, xuʼ xakʼ chanubtaseletik ta Vivlia xchiʼuk xuʼ skolta sba li ta jeltos cholmantal chichʼ pasele (w18.09, paj. 8-11).

¿Kʼusitik xuʼ jtatik li ta abtejebaletik sventa xijchanubtasvane?

Junantik abtejebaletike jaʼ li tarjeta ti chalbe skʼoplal li jw.org, li vunetik sventa takel ta ikʼele, li vaxakib tratadoetik ti kʼun tajek ta tunesele, li revista Li Jkʼel osil ta toyol xchiʼuk li ¡Despertade! Jech xtok xuʼ te jtatik foyetoetik, chaʼlik livro sventa xkakʼtik-o chanubtasel xchiʼuk chanib videoetik ti jtunelik tajeke, jech kʼuchaʼal li video ¿Kʼu yuʼun skʼan jchantik li Vivliae? (w18.10, paj. 16).

¿Kʼusi skʼan spas li jun yajtsʼaklom Kristo sventa sman li kʼusi melel jech kʼuchaʼal chal li Proverbios 23:23?

Muʼyuk onoʼox ta jmantik ta takʼin li kʼusi melele. Pe skʼan onoʼox xkakʼ kipaltik xchiʼuk jtunes lek jkʼakʼaltik sventa jtatike (w18.11, paj. 4).

¿Kʼusi chakʼ jchantik li kʼusi la spas ta stojolal yajnil li Osease?

Akʼo mi ep ta velta mulivaj li Gomere, li Osease laj onoʼox yakʼ ta perton xchiʼuk muʼyuk laj yikta li yajnile. Mi oy jun yajtunel Jeova ti mulivaje, pe mi kʼot ta nopel yuʼun ti muʼyuk chtuchʼ snupunel li buchʼu chʼabal smule xchiʼuk mi laj to xchiʼin sbaik ta vayele, jaʼ me skʼan xal ti laj xa yakʼ ta pertone. Vaʼun mu xa me stakʼ xtuchʼ snupunelik jech kʼuchaʼal chal li Vivliae (w18.12, paj. 13).