¿Mi anaʼoj xa?
¿Kʼuxi tstsan skʼokʼik li krixchanoetik ta voʼne kʼalal oy bu nom chbatike?
LI TA Genesise chal ti Jeovae laj yalbe Abraan ti akʼo bat yakʼ milbil matanal ti nom tajeke. Xi chal li Vivliae: «Li Abrahame la stsac li siʼ sventa chchicʼbeic o smoton Diose. Laj yacʼbe xqʼuech batel li Isaaque. Te laj yichʼ batel noxtoc xcuchilo xchiʼuc scʼocʼ, jech ibatic xchibalic» (Gén. 22:6).
Li Vivliae muyuk chalbe skʼoplal kʼu toʼox yelan tstsan skʼokʼik li krixchanoetik ta voʼnee. Vaʼun chaʼa, ¿mi yuʼun baʼyel la stsan skʼokʼik li Abraan xchiʼuk Isaak vaʼun ti tsanal laj yichʼik batele? Xi laj yal jun vinik ti lek xchanojbe skʼoplal Vivliae: «Ti yuʼunuk laj yichʼ batel skʼokʼike tupʼ ta be ti jechuke, yuʼun nom tajek ti bu batike. Jech oxal, yikʼaluk van laj yichʼik batel li kʼusitik jtunel yuʼunike sventa jaʼ to te kʼot stsan li skʼokʼike».
Pe li yan buchʼutik xchanojbeik skʼoplal xtoke chalik ti mu kʼunuk ta tsanel kʼokʼ li ta voʼnee. Jech oxal, kʼalal xuʼ yuʼunike tstunesik yan akʼal ti tsanal xa onoʼoxe. Xuʼ van tskʼanbeik yakʼal o xupetal skʼokʼ slakʼnaik. Jech oxal, epal krixchanoetik ti xchanojbeik skʼoplale chalik ti baʼyel la saʼik batel akʼal ti tsanem jutuk kʼalal skʼan toʼox stotsik batel ta xanbal li Abraane. Chalik xtok ti xuʼ van laj yichʼik batel ta jun uni pʼin ti oy yakʼile (Is. 30:14). Jech oxal chaʼa, xuʼ van la stunes akʼal xchiʼuk takin siʼ yoʼ stsan skʼokʼik kʼalal jaʼo tun yuʼunik li Abraane.