Li yajtsʼaklomtak Kristoe skʼan ta smeloluk noʼox ti kʼu yelan chchabi sbaike xchiʼuk ti spak skʼoplalike. Pe skʼan me stsakik ta venta li beiltaseletik ta Vivliae. Taje chkoltaatik sventa xakʼik venta ti muʼyuk lek mi tstunesik pistola, rifle o yan abtejebaletik sventa xchabi sbaike. Jkʼelbetik batel skʼoplal jaytosuk kʼusitik xuʼ skoltautik sventa lekuk kʼusi xkʼot ta nopel kuʼuntik.

Li Jeovae chʼul chil li xkuxlejal krixchanoetike. Li David ti jaʼ jtsʼibajom yuʼun salmoe snaʼoj ti jaʼ Jeova «li nioʼ sventa cuxlejale» (Sal. 36:9). Jech oxal, mi oy junuk ermano tsnop kʼuxi tspak skʼoplal o chchabi li kʼusitik oy yuʼune, skʼan xakʼ persa bu kʼalal xuʼ yuʼun sventa mu xmilvan xchiʼuk ti mu sta smul ta smalel chʼichʼe (Deut. 22:8; Sal. 51:14).

Melel onoʼox ti ep kʼusitik xuʼ xichʼ tunesel sventa xichʼ milel li jun krixchanoe. Pe mas anil chmilvan li pistola o riflee, manchuk mi yolbaj jech ta jpastik o mi moʼoj. * Jech xtok, mi oy jun j-elekʼ ti xiʼem tajeke xchiʼuk mi laj yakʼ venta ti oy spistola li krixchanoe, xuʼ me mas tsots xbat xchiʼuk xuʼ oy buchʼu xcham.

Kʼalal slajeb xa ox akʼobal kuxul li Jesuse, laj yalbe yajchankʼoptak ti akʼo saʼ junuk yespadaike, pe maʼuk sventa xchabi-o sbaik (Luk. 22:36, 38). Pe kʼalal jech laj yale, yuʼun oy kʼusi tsots skʼoplal chakʼbe xchanik: ti mu saʼik kʼope, manchuk mi tstsakatik ta kʼop yuʼun epal krixchanoetik ti oy yabtejebike (Luk. 22:52). Kʼalal la syayijes ta espada smoso bankilal pale li Pedroe, xi  albat yuʼun li Jesuse: «Tikʼo ochel ta sna li avespadae». Vaʼun oy kʼusi tsots skʼoplal akʼbat xchanik, ti jaʼ jun beiltasel ti skoltaojutik-o li avi eke, taje jaʼ liʼe: «Skotol li buchʼu chakʼ espadae, ta espada chlaj ek» (Mat. 26:51, 52).

Jech kʼuchaʼal chal Miqueas 4:3, li yajtuneltak Diose chlik ‹spasik ta asarona li yespadaike xchiʼuk li slansaike ta spasik ta jos›. Li yajtuneltak Jeovae ojtikinbilik ti mu snaʼ saʼik kʼope. Yakal chchʼunik li tojobtasel la stsʼiba jtakbol Pablo ti akʼbat snaʼ yuʼun Diose, ti xi chale: «Mu me chopoluk kʼusi xapakbe abaik sutel [...], junuk me avoʼontonik xchiʼuk skotol li krixchanoetike» (Rom. 12:17, 18). Ep tajek laj yil svokol li Pabloe, jech xtok, laj yal ti la ‹snuptan j-elekʼetike› (2 Kor. 11:26). Pe skotol ora la stsak ta venta li beiltaseletik ta Vivlia kʼalal la xchabi sbae. Yuʼun jaʼ la spat yoʼonton ta stojolal li Diose xchiʼuk li pʼijilal ti te ta jtatik ta Vivliae, ti «jaʼ mu sta jech [slekil] li abtejebal sventa pleitoe» (Ecl. 9:18).

Li yajtuneltak Diose mas tsots skʼoplal chilik li kuxlejale, jaʼ mu sta li kʼusitik oy yuʼunike. «Maʼuk tsta-o xkuxlejal [jun krixchano] li kʼusitik oy yuʼune» (Luk. 12:15). Mi oy bu la jnuptik j-elekʼ ti yichʼoj spistola o yan yabtejebe, skʼan me ta slekiluk koʼontontik jkʼopontik. Pe mi mu xchʼun albele, skʼan me oyuk jpʼijiltik xchiʼuk jchʼuntik li tojobtasel laj yal Jesus liʼe: «Mu xapakbeik li buchʼu toj chopole». Taje jaʼ smelolal ti xuʼ van xkakʼbetik li kʼusi tskʼane (Mat. 5:39, 40; Luk. 6:29). * Pe mas onoʼox lek mi ta jkʼel jbatike. Xuʼ mu jnuptantik j-elekʼetik mi muʼyuk chkakʼtik ta ilel li kʼusitik oy kuʼuntike xchiʼuk mi snaʼojik jlakʼnatik ti muʼyuk ta jsaʼtik kʼop ta skoj ti jaʼutik stestigo Jeovae (Prov. 18:10; 1 Juan 2:16).

Li yajtunelutik Diose ta jtsakbetik ta venta sjol yoʼontonik li yantike (Rom. 14:21). Mi laj yichʼ naʼel ti oy junuk ermano ta tsobobbail oy spistola sventa chchabi sba ta stojolal yantike, xuʼ van oy ermanoetik ti labal to chaʼiike o ti chopol chilike. Ta skoj ti kʼanvanemutike, tstij koʼontontik ti jaʼ jpastik li kʼusi lek chaʼiik li yantike, maʼuk li kʼusi lek chkaʼi jtuktike, akʼo mi chal smantal ajvalil ti xuʼ oyuk kuʼuntike (1 Kor. 10:32, 33; 13:4, 5).

Li yajtunelutik Diose chkakʼtik persa ti lekuk ta chanel jtalelaltike (2 Kor. 4:2; 1 Ped. 5:2, 3). Jnoptik noʼox avaʼi ti oy jun ermano ti oy spistola sventa chchabi sba ta stojolal yantike. Mi te oy-o yuʼun akʼo mi laj xa yichʼ albel tojobtasel ta Vivliae, muʼyuk xa me lek ta chanbel stalelal. Jaʼ yuʼun, mu xuʼ oy kʼusi sbain spasel ta tsobobbail xchiʼuk mu xuʼ sta junuk matanal ta tsobobbail. Jaʼ jech chkʼot ta stojolal ek li buchʼu persa oy spistola ta skoj li yabtele. Mi jech staoj yabtele, jaʼ lek ti saʼ yane. *

Jaʼ yuʼun, ta jujuntal me skʼan jnoptik kʼuxi ta jchabi jbatik xchiʼuk li kutsʼ kalaltike, li kʼusitik oy kuʼuntike xchiʼuk ti kʼusi abtelal ta jchʼamtike. Pe kʼalal ta jnoptik kʼusi ta jpastike, skʼan me jtsaktik ta venta li beiltaseletik ta Vivliae, ti te chvinaj ti oy spʼijil Dios xchiʼuk ti chkʼanvane. Li buchʼutik yijik xa lek ta mantale chchʼunik li beiltaseletik ta Vivliae, jaʼ yuʼun, muʼyuk tstunesik pistola, rifle o yan abtejebal sventa xchabi sbaik ta stojolal li yantike. Snaʼojik lek ti ta onoʼox staik jun oʼontonal ta sbatel osil mi jaʼ la spat yoʼontonik ta stojolal li Diose xchiʼuk mi chchʼunik li beiltaseletik ta Vivliae (Sal. 97:10; Prov. 1:33; 2:6, 7).