¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

Kʼalal chal tal mantal li s-organisasion Jeovae, ¿kʼu yelan skʼan xchʼamik li jkʼelvanejetik ta sirkuitoe, li moletike xchiʼuk skotol li buchʼutik oy kʼusi sbainojike?

Skʼan xchʼunik ta anil. Xiuk sjakʼbe sbaike: «¿Mi ta jtijbe yoʼonton ermanoetik sventa tukʼuk xakʼ sbaik ta stojolal li Jeovae? ¿Mi ta jchʼun ta anil li mantaletik chakʼ tal li s-organisasion Diose?» (w16.11, paj. 11).

¿Bakʼin ochik ta skʼob Mukʼta Babilonia li yajtsʼaklomtak Kristoe?

Jaʼo kʼalal mu toʼox jaluk xchamel li slajeb jtakbole. Vaʼun, oy buchʼutik lik kʼotikuk ta jnitvanejetik ta relijion. Li relijion Katolika xchiʼuk li ajvalil ta Romae lik skolta sbaik talel sventa tspukbeik skʼoplal li jecheʼ chanubtasele xchiʼuk la spas ti bu kʼalal xuʼ yuʼunik sventa mu xchikintabatik li melel yajtsʼaklomtak Kristo ti xkoʼolajik ta trigoe. Pe lik kolikuk tal jutuk ta skʼob Mukʼta Babilonia li buchʼutik tʼujbil chbatik ta vinajel kʼalal skʼan toʼox li sjabilal 1914 (w16.11, paj. 23-25).

¿Kʼu yuʼun toj tsots skʼoplal li kʼusi la spas li Lefèvre dʼÉtaplese?

Li ta slikebaltik 1520, li Lefèvree la sjelubtas ta francés kʼop li Vivliae, taje jaʼ sventa oyuk yuʼunik ek li krixchanoetik ti muʼyuk tsots skʼoplalike. Lek kʼun laj yalbe smelolal li Vivliae, taje jaʼ jech la xchanik ek li Martín Luteroe, li William Tyndale xchiʼuk li Juan Calvinoe (wp16.6, paj. 10-12).

¿Kʼusi skʼan xal ti «chkakʼ jnopbentik ta stojolal [li] bekʼete» xchiʼuk ti «chkakʼ jnopbentik ta stojolal chʼul espiritue»? (Rom. 8:6)

Li buchʼu chakʼ snopben ta stojolal li bekʼete, jaʼ tspas li kʼusi chopol tskʼan yoʼontone xchiʼuk jaʼ xa noʼox chal-o batel. Jaʼuk li buchʼu chakʼ snopben ta stojolal chʼul espiritue, chakʼ ti akʼo xbeiltasbat snopben yuʼun Jeova ta xchʼul s-espiritu xchiʼuk ti xchan snopel jech kʼuchaʼal tsnop li Jeovae. Mi te chkakʼ jnopbentik ta stojolal bekʼete, jaʼ sventa lajelal; mi jaʼ ta stojolal li chʼul espiritue, jaʼ sventa kuxlejal xchiʼuk jun oʼontonal (w16.12, paj. 15-17).

¿Kʼusitik skʼan jpastik sventa stsal kuʼuntik li vul oʼontonale?

Jaʼ baʼyel jpastik li kʼusitik mas tsotsik skʼoplale, oyuk ta joltik ti oy kʼusi mu spas kuʼuntike, jchʼakbetik yorail jujun kʼakʼal sventa jkuxtik, jkʼupintik li spasbentak Jeovae, muyubajkutik noʼox, jpastik ejersisio xchiʼuk vaykutik lek (w16.12, paj. 22, 23).

¿Kʼusi skʼan xal ti «laj yichʼ ikʼel batel sventa muʼyuk bu chil lajelal» li Enoque? (Evr. 11:5)

Xuʼ van li Jeovae ta slekil yoʼonton laj yikʼ batel ta lajelal li Enoque, jaʼ xkaltik ti muʼyuk xaʼi kʼuxi kʼunkʼun vay batel ta lajelale (wp17.1, paj. 12, 13).

¿Kʼu yuʼun toj tsots skʼoplal ti bikʼituk xkakʼ jbatike?

Mi bikʼit kakʼoj jbatike, ta jnaʼtik ti oy noʼox spajeb li kʼusi spas kuʼuntike. Sventa xkichʼtik ta mukʼ li yantike xchiʼuk ti jkʼuxubintike, skʼan me jkʼel-o li jtalelaltike xchiʼuk ti maʼuk noʼox ta jnop ta jtojolal jtuktike (w17.01, paj. 18).

¿Kʼuxi jnaʼojtik ti la sbeiltas jtsop jbeiltasvanej ta baʼyel siglo li Jeovae xchiʼuk ti jaʼ jech tsbeiltas li avi eke?

Li chʼul espiritue la skolta jtsop jbeiltasvanej ta baʼyel siglo sventa xaʼibeik lek smelolal li chanubtaseletik ta Vivliae, koltaatik yuʼun anjeletik sventa xchapanik li cholmantale xchiʼuk laj yakʼ sbaik ta beiltasel yuʼun li Skʼop Diose. Skotol taje, jaʼ jech chkʼot ta pasel li avi eke (w17.02, paj. 26-28).

¿Kʼusitik tstij koʼontontik yoʼ oyuk tajek sbalil xkiltik li pojelale?

Jaʼ li chantos liʼe: buchʼu laj yakʼ, kʼu yuʼun laj yakʼ, kʼusi la spas sventa xakʼ, xchiʼuk mi chtun onoʼox kuʼuntik ta melel. Tsots skʼoplal ti jnopbetik skʼoplal li kʼusitik taje (wp17.2, paj. 4-6).

Li jun yajtsʼaklom Kristoe, ¿mi stakʼ to van sjel li kʼusi snopoj xa ox tspase?

Skʼan onoʼox xkʼot ta pasel li kʼusi chkaltike, akʼo mi jech, bakʼintike skʼan van jnopbetik skʼoplal yan velta li kʼusi jnopojtik xa oxe. Kʼalal la sjel stalelalik xchiʼuk ti la skomtsanik spasel kʼusitik chopol li jnaklejetik ta Ninivee, li Jeovae la sjel li kʼusi toʼox snopoj tspasbee. Kʼalal oy kʼusi chjel ta jkuxlejaltik o mas to chkaʼibetik smelolal jtosuk aʼyeje, xuʼ van skʼan jeltik li kʼusi skʼan jpastike (w17.03, paj. 16, 17).

¿Kʼu yuʼun muʼyuk lek mi chijloʼiltavane?

Yuʼun jaʼ noʼox xuʼ jtsatsubtastik batel li jkʼoptike. Akʼo mi oy jrasontik o mi muʼyuk, maʼuk xa me te chchapaj-o jkʼoptik mi oy buchʼu chopol chijkʼopoj ta stojolale (w17.04, paj. 21).