1. ¿Kʼu yuʼun mu xijkoʼolaj xchiʼuk li chonbolometike?

LI Jeovae mu xijkoʼolaj la spasutik xchiʼuk li chonbolometike, yuʼun oy kʼusi laj yakʼbutik ti stuk noʼox jeche, jaʼ li jol koʼontontike. Taje jaʼ jech akʼbatik ek li Adan xchiʼuk Evae, yuʼun kʼalal muʼyuk la xchʼunbeik smantal Jeovae, chopol laj yaʼi sbaik xchiʼuk la snakʼ sbaik.

2. Li jol koʼontontike, ¿kʼuxi xkoʼolaj-o li ta stsʼotobil varkoe? (Kʼelo li lokʼol ta slikebale).

² Li buchʼutik muʼyuk xchanubtasoj lek li sjol yoʼontonike, xuʼ xichʼ koʼoltasel ta jkot varko ti mu xtun li stsʼotobile. Toj xibal me sba mi muʼyuk ta xichʼ meltsanele, yuʼun kʼalal tsots tsyukʼilan sba li nabe xchiʼuk mi oy tsots ikʼe xuʼ yan-o xa sbe stam batel li varkoe. Pe mi lek xtun li stsʼotobile jaʼ chkoltaat li buchʼu tstsʼot batel yoʼ lekuk tukʼ xanav li varkoe. Taje jaʼ jech xkoʼolaj li jol koʼontontike, yuʼun mi lek jchanubtasojtike xuʼ lek sbeiltasutik xchiʼuk chalbutik mi oy kʼusi lek o mi chopol yakal ta jpastik. Pe sventa lekuk sbeiltasutike skʼan ti jechuk-o jchanubtastike.

3. ¿Kʼusi xuʼ xkʼot ta pasel mi muʼyuk lek ta jchanubtas li jol koʼontontike?

 ³ Kʼalal muʼyuk ta jchanubtas li jol koʼontontike, muʼyuk me chalbutik mi oy kʼusi chopol yakal ta jpastik (1 Tim. 4:1, 2). Jech xtok, xuʼ me xlik jnoptik ti «lec li cʼusi chopole» (Is. 5:20). Li Jesuse xi laj yalbe li yajchankʼoptake: «Chkʼot skʼakʼalil ti skotol li buchʼutik tsmiloxuke tsnopik ti tspasik chʼul abtelal ta stojolal Diose» (Juan 16:2). Taje jaʼ jech la snopik li buchʼutik la smilik li jchankʼop Estebane xchiʼuk jaʼ jech tsnopik li buchʼutik jech tspasik li avi eke (Ech. 6:8, 12; 7:54-60). Epal krixchanoetik ti oy srelijionik eke milvanemik xchiʼuk chalik ti jaʼ la sventa chichʼik-o ta mukʼ li Diose. Pe ti melel xkaltike, muʼyuk yakal chchʼunbeik li smantaltak Diose (Éx. 20:13). Taje jamal chakʼ ta ilel ti loʼlabilik yuʼun li sjol yoʼontonike.

4. ¿Kʼusi xuʼ jpastik yoʼ mu sloʼlautik li jol koʼontontike?

⁴ ¿Kʼusi xuʼ jpastik yoʼ mu sloʼlautik li jol koʼontontike? Li Vivliae yichʼoj beiltaseletik xchiʼuk mantaletik ti «toj jtunel sventa chanubtasel, tukʼibtasel, beiltasel xchiʼuk tojobtasel ta tukʼilal» (2 Tim. 3:16). Jaʼ yuʼun, sventa jechuk jnopbentik kʼuchaʼal li Jeovae, skʼan jchanubtas li jol koʼontontike, ti jchantik lek li Vivliae, ti jnopbetik skʼoplale xchiʼuk ti xkakʼ ta jkuxlejaltike. Mi jech ta jpastike, muʼyuk ta sloʼlautik li jol koʼontontike. Jkʼeltik batel kʼu yelan tskoltautik li mantaletik xchiʼuk li beiltaseletik yuʼun Jeova yoʼ jchanubtas li jol koʼontontike.

5, 6. ¿Kʼusi sbalil ta jtatik mi ta jchʼuntik li smantaltak Jeovae?

⁵ Mu baluk noʼox ti jchantik xchiʼuk ti xkojtikintik li smantaltak Jeovae, yuʼun mi ta jkʼan ta jtabetik sbalile skʼan jkʼantik xchiʼuk ti jtsaktik ta venta skotol orae. Xi jamal chalbutik li skʼop Diose: «¡Contrainic li cʼusitic chopole! ¡Jaʼ cʼanic li cʼusi leque!» (Amós 5:15). Li kʼusi xuʼ skoltautike jaʼ mi la jchantik snopel jech kʼuchaʼal tsnop li Jeovae. Jnoptik noʼox avaʼi ti chabat ta doktor ta skoj ti oy xa sjayibal kʼakʼal ti mu x-och lek avayele. Vaʼun li doktore chalbot ti oy kʼusitik skʼan xavikta slajesele, ti skʼan xapas ejersisioe xchiʼuk ti oy kʼusitik skʼan xajel li ta akuxlejale. ¿Mi mu jechuk ti chatojbe tajek ta vokol li doktor kʼalal chavakʼ venta ti oy sbalil li kʼusi laj yalbot akʼo xapase?

⁶ Li Jpasvanej kuʼuntike yakʼojbutik mantaletik yoʼ mu jpastik jtosuk mulil xchiʼuk sventa xlekub li jkuxlejaltike. Jech kʼuchaʼal liʼe, li Vivliae chal ti mu stakʼ jutik kʼope, ti xij-elkʼaje, ti xijmulivaje, ti jsaʼtik kʼope xchiʼuk ti mu jpastik li espiritismoe, ¿mi mu jechuk ti toj ep sbalil mi ta jchʼuntike? (Kʼelo Proverbios 6:16-19; Apok. 21:8). Kʼalal chkiltik ti oy sbaliltak mi ta jchʼunbetik li smantaltak Jeovae, ta xchʼi li kʼanelal kuʼuntik ta stojolale xchiʼuk mas ta jkʼuxubinbetik li smantaltake.

7. ¿Kʼuxi tskoltautik kʼalal ta jchantik li loʼiletik ta Vivlia xchiʼuk ti jnopbetik skʼoplale?

⁷ Sventa xkichʼ jpʼijiltik xchiʼuk ti jchʼunbetik li smantaltak Jeovae, mu persauk ti oy kʼusitik chopol jnuptantike. Kʼalal ta jchantik ta Vivlia li kʼusi kʼot ta stojolal junantik krixchanoetik xchiʼuk ti jnopbetik skʼoplale, xuʼ ep kʼusi jchantik. Xi chal li Proverbios 1:5: «Li bochʼo bij ti xaʼibe lec smelole, ta to xbijub batel». Li chanubtasel taje jaʼ yakʼoj stuk li Jeovae xchiʼuk mu kʼusi xkoʼolaj-o. Jnoptik ta sventa li kʼusi la snuptan David ta skoj ti muʼyuk la xchʼunbe smantal Dios xchiʼuk ti mulivaj xchiʼuk li Betsabee (Bat-seba) (2 Sam. 12:7-14). Kʼalal ta jkʼeltik li loʼil taje, nopbo batel skʼoplal li sjakʼobiltak liʼe: «¿Kʼusi la spas jechuk li David  yoʼ mu xil svokole? ¿Kʼusi van ta jpas ti jechuk xkʼot ta jtojolale? ¿Mi chijatav batel jech kʼuchaʼal la spas li Josee o mi jaʼ ta jchanbe li David ti yal ta mulile?» (Gén. 39:11-15). Kʼalal ta jnopbetik skʼoplal li vokoliletik xuʼ jnuptantike, mas to ta jpʼajtik li kʼusitik chopole.

8, 9. 1) ¿Kʼu yuʼun jtunel tajek li jol koʼontontike? 2) ¿Kʼuxi ta jtabetik sbalil li beiltaseletik yuʼun Jeovae?

⁸ Melel onoʼox ti ta jpʼajtik li kʼusitik spʼajoj Jeovae. Pe ¿kʼusi van ta jpastik kʼalal muʼyuk jamal chal Vivlia mi lek o mi chopol li kʼusi ta jpastike? ¿Kʼuxi ta jnaʼtik kʼusi tskʼan akʼo jpastik li Jeovae? Yoʼ jnaʼtik kʼusi ta jpastike, baʼyel skʼan jchanubtastik lek li jol koʼontontike.

⁹ Li Jeovae skʼanojutik tajek, jaʼ yuʼun yakʼojbutik beiltaseletik sventa jchanubtas li jol koʼontontike. Jaʼ yuʼun xi chalbutike: «Vuʼun li Mucʼul Diosun avuʼune, vuʼun ta jchanubtasot cʼusi lec ta pasel ta sventa alequilal; vuʼun ta jtojobtasot bu beal tscʼan chatam batel» (Is. 48:17, 18). Kʼalal lek ta jnopbetik skʼoplal li beiltaseletik yuʼun Jeova xchiʼuk mi chkakʼtik akʼo kʼotuk ta koʼontontike, jaʼ chlik stukʼibtas xchiʼuk chchanubtas li jol koʼontontike. Vaʼun, jaʼ tskoltautik yoʼ lekuk kʼusitik xkʼot ta nopel kuʼuntik.

10. 1) ¿Kʼusi jaʼ li jun beiltasele? 2) ¿Kʼuxi la stunes beiltaseletik li Jesuse?

¹⁰ Li jun beiltasele jaʼ jun pʼijubtasel ti tskoltautik yoʼ lekuk kʼusi xkʼot ta nopel kuʼuntik ta sventa li kʼusi ta jpastike. Jaʼ yuʼun, sventa xkaʼibetik smelolal kʼusi tsnop Jeova xchiʼuk ti kʼu yuʼun yakʼojbutik mantaletike, skʼan xkaʼibetik smelolal li beiltaseletik yakʼojbutik ta Vivliae. Ti kʼu sjalil ay ta balumil li Jesuse, jamal laj yakʼbe yil yajchankʼoptak kʼusi xuʼ xkʼot ta pasel ta skoj ti kʼu yelan tspas stalelalike xchiʼuk li kʼusitik tspasike. Jech kʼuchaʼal liʼe, albatik ti muʼyuk lek mi la snakʼ skʼakʼal yoʼontonike yuʼun xuʼ slikesik-o kʼop. Jech xtok, mi oy kʼusi chopol tsnopike xuʼ chjochatik batel li ta mulivajele (Mat. 5:21, 22, 27, 28). Kʼalal chkakʼ ta jkuxlejaltik li beiltaseletik yuʼun Jeovae, jaʼ jech ta jchanubtas li jol koʼontontike xchiʼuk lek kʼusi chkʼot ta nopel kuʼuntik ti jaʼ jech chkichʼtik-o ta mukʼ li Jeovae (1 Kor. 10:31).

11. ¿Mi koʼol sjol yoʼonton skotol li ermanoetike?

¹¹ Mu jkotoltikuk ti koʼol kʼusi chkʼot ta nopel kuʼuntike. Akʼo mi lek xchanubtasoj sjol yoʼonton li ermanoetike, xuʼ van jelel kʼusi xkʼot ta nopel yuʼunik ta jujuntal. Jnopbetik skʼoplal ta sventa li yuchʼel poxe, li Vivliae muʼyuk chal ti chopol chil Jeova mi chkuchʼtik jutebuk poxe, pe jamal chal ti spʼajoj li yakubele xchiʼuk mi chʼabal spʼisol chkuchʼtike (Prov. 20:1; 1 Tim. 3:8). Jaʼ yuʼun chaʼa, ¿mi jaʼ noʼox skʼan jtsaktik ta venta ti kʼu yepal chkuchʼtik poxe? Moʼoj, yuʼun maʼuk noʼox bal mi lek chaʼi sba li jol koʼontontike, yuʼun skʼan jtsakbetik ta venta li sjol yoʼonton ermanoetike.

12. ¿Kʼu yuʼun skʼan jtsaktik ta venta li kʼusi chal Romanos 14:21?

¹² Li Pabloe laj yakʼ kiltik ti skʼan jtsaktik ta venta li sjol yoʼonton yantike, xi laj yale: «Jaʼ mas lek mu xichʼ tiʼel bekʼet, yuchʼel vino o ti xichʼ pasel yan kʼusitik ti tsmak-o yok li avermanoe» (Rom. 14:21). Jnopbetik skʼoplal ti oy jun ermano ti mu skʼan xuchʼ pox ta skoj ti muʼyuk lek chaʼi li sjol yoʼontone, ¿mi mu jechuk ti ta sjunul koʼontontik muʼyuk ta xkuchʼtik pox yoʼ mu jmakbetik yoke? Epal ermanoetike xuʼ van nopem xaʼiik yuchʼel pox kʼalal maʼukik toʼox stestigotak Jeovae, pe avie yiktaojik xa xchiʼuk jpʼel ta yoʼontonik ti muʼyuk xa chuchʼik jutebuke. ¿Mi mu jechuk ti mu jkʼantik ti smak yokik  xchiʼuk ti sta tsots svokolike? (1 Kor. 6:9, 10). Jaʼ yuʼun, ta skoj ti jkʼanoj li kermanotike, muʼyuk ta jsujtik yoʼ xuchʼ jutebuk pox mi chalbutik ti mu skʼane.

13. ¿Kʼusi la spas Timoteo yoʼ skolta yantik ta xchʼamel li lekil aʼyejetike?

¹³ Kalbetik skʼoplal li Timoteoe, li stuke laj yichʼ sirkunsision kʼalal tetik xa ox 20 sjabilale. Akʼo mi toj kʼux ta spasel taje, ta sjunul yoʼonton la spas yoʼ mu smakbe yok li judaetik ti chcholbe mantale, yuʼun jaʼ la xchanbe stalelal li jtakbol Pabloe (Ech. 16:3; 1 Kor. 9:19-23). Li voʼotike, ¿mi ta sjunul koʼontontik ta jpastik li kʼusi lek chaʼiik yantike?

14, 15. 1) ¿Kʼusi skʼan jpastik yoʼ xijyijub ta mantale? 2) ¿Kʼuxi snitojbe sba skʼoplal ti yijutik ta mantal xchiʼuk ti xijkʼanvane?

¹⁴ Jkotoltik skʼan xkiktatik komel «li kʼusitik kʼun ta chanel ta sventa li Kristoe» xchiʼuk ti xkakʼtik persa xijyijub batel ta mantale (Evr. 6:1). Pe taje mu xtal ta stuk noʼox, sventa xijyijub ta mantale skʼan xkakʼ kipaltik, jaʼ xkaltik, ti skʼan x-epaj li yojtikinobil kuʼuntike xchiʼuk ti masuk xijpʼijube. Jaʼ yuʼun, ep ta velta chkichʼtik albel ti akʼo jchantik skotol kʼakʼal li Jvivliatike (Sal. 1:1-3). Kʼalal ta jchantik skotol kʼakʼal li Vivliae, jaʼ tskoltautik yoʼ xkaʼibeik smelolal li smantaltak xchiʼuk li beiltaseletik yuʼun Jeovae. ¿Mi jech oy ta koʼontontik spasel?

¹⁵ Li mantal mas tsots skʼoplal skʼan jchʼuntike, jaʼ ti xijkʼanvane. Xi laj yalbe yajtsʼaklomtak li Jesuse: «Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:35). Li xchaʼitsʼin Jesus ti jaʼ li Santiagoe, xi laj yalbe skʼoplal li mantal taje: «Li mantal chal [ajvalile]» (Sant. 2:8). Xi laj yal ek li Pabloe: «Li skʼoteb ta pasel mantale jaʼ li kʼanelale» (Rom. 13:10). Muʼyuk labal sba chkaʼitik ti toj tsots skʼoplal li kʼanelale, yuʼun li Vivliae jamal chal ti «jaʼ kʼanelal li Diose» (1 Juan 4:8). Ta sat Jeovae, li kʼanelale maʼuk noʼox chkaʼitik ta koʼontontik yuʼun skʼan xkakʼtik ta ilel. Jaʼ yuʼun xi laj yal li Juane: «Laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon sventa jtatik li kuxlejal ta stojolale» (1 Juan 4:9). Jech oxal, kʼalal chkakʼtik ta ilel ti jkʼanojtik li Jeovae, li Jesuse, li kermanotaktik xchiʼuk li yan krixchanoetike, jaʼ svinajeb ti yijutik ta mantale (Mat. 22:37-39).

16. Kʼalal chijyijub batel ta mantale, ¿kʼu yuʼun mas xa tsots skʼoplal chkiltik li beiltaseletik yuʼun Jeovae?

 ¹⁶ Li mantaletike tukʼ kʼusi chalbe skʼoplal, jaʼuk li beiltaseletike chichʼ tunesel ta skotol li kʼusitik ta jpastike. Jaʼ yuʼun, kʼalal chijyijub ta mantale mas tsots skʼoplal chkiltik li beiltaseletike. Jnopbetik skʼoplal li kʼoxetike, kʼalal bikʼitik toe mu xaʼibeik smelolal ti toj xibal sba mi mu xtojobik saʼel li yamigoike, jaʼ yuʼun persa ch-akʼbatik mantaletik yuʼun stot smeʼik yoʼ xchabiatike (1 Kor. 15:33). Pe kʼalal yantik xa xchʼiik tale, chlik rasonajikuk xchiʼuk chaʼibeik smelolal li beiltaseletik ta Vivlia sventa stʼujik lek li yamigoike (kʼelo 1 Korintios 13:11; 14:20). Jaʼ jech li voʼotik eke, kʼalal ta jnopilanbetik skʼoplal li beiltaseletik yuʼun Jeovae, koʼol xa chlik jnoptik kʼuchaʼal li Jeovae xchiʼuk xuʼ jpat koʼontontik ti lek tsbeiltasutik li jol koʼontontike.

17. ¿Kʼu yuʼun xuʼ xkaltik ti lek kʼusi xuʼ xkʼot ta nopel kuʼuntike?

¹⁷ Li voʼotike spas kuʼuntik skotol li kʼusi lek chil Jeovae, ¿kʼu yuʼun jech chkaltik? Yuʼun skotol li beiltaseletik xchiʼuk li mantaletik ta Vivliae chkoltavan «sventa lekuk chapal li yajtunel Diose xchiʼuk sventa xtojobuk spasel skotol li lekil abtelale» (2 Tim. 3:16, 17). Jech oxal, skʼan xkakʼ kipaltik sventa jnaʼtik li «kʼusi tskʼan yoʼonton Jeovae» (Efes. 5:17). Jaʼ yuʼun, skʼan jtunestik lek li abtejebaletik akʼbilutike, jech kʼuchaʼal li Índice de las publicaciones Watch Tower, li Saʼobil sventa xchanik mas li stestigotak Jeovae, li Watchtower Library o li VIVLIOTEKA TA INTERNET yuʼun Watchtower xchiʼuk li aplikasion JW Library. Kʼalal ta jtunestik taje, jaʼ tskoltautik yoʼ jtabetik lek sbalil kʼalal chijchanunaj ta jtuktik xchiʼuk li ta kutsʼ kalaltike.

18. ¿Kʼusitik sbalil ta jtatik kʼalal ta jchʼuntik li mantaletik xchiʼuk li beiltaseletik yuʼun Jeovae?

¹⁸ Toj ep sbaliltak ta jtatik kʼalal ta jchʼuntik li beiltaseletik xchiʼuk li mantaletik yuʼun Jeovae, xi chal li Salmo 119:97 kʼalal ta 100: «Li vuʼune toj lec jcʼanoj ta jyalel li amantaltaque; jaʼ batem o coʼnton snopilanel sbejel cʼacʼal. Scotol cʼacʼal liʼ oy o ta coʼnton; li vuʼune ep xa libijub jech chac cʼu chaʼal li cajcontrataque. Vuʼun xa ep la jnaʼ jech chac cʼu chaʼal li jchanubtasvanejetic cuʼune, yuʼun jaʼ batem coʼnton ta snopilanel o li chanubtaseletic avuʼune. Vuʼun xa ep la jnaʼ jech chac cʼu chaʼal li moletique, yuʼun jaʼ la jchʼun li mantaletic avuʼune». Kʼalal ta jnopilanbetik skʼoplal li smantaltak xchiʼuk li beiltaseletik yuʼun Jeovae, chijpʼijub yuʼun, chijtojob snopel xchiʼuk lek xkaʼibetik smelolal li kʼusitike. Jaʼ yuʼun, mi ta jtunestik li mantaletik xchiʼuk li beiltaseletik yoʼ jchanubtas li jol koʼontontike lek tsʼakal ta «jtabetik staylej li Kristoe» (Efes. 4:13).