Li Reoboame jaʼ stot li Salomon ti ajvalilaj 40 jabil ta Israele (1 Rey. 11:42). Li Salomone cham ta sjabilal 997 kʼalal maʼuk toʼox jkʼakʼaliltike, vaʼun li Reoboame bat ta Sikem ti jaʼ te xkom ta snorteal Jerusalen yoʼ xichʼ biiltasel ta ajvalile (2 Crón. 10:1). ¿Mi xiʼem van ta skoj ti chichʼbe yabtel stot ti jaʼ jun pʼijil vinik echʼe? ¿Mi echʼ van ta sjol ti ta onoʼox xkʼot yorail chichʼ akʼel ta preva mi xchapaj yuʼun li tsatsal kʼopetike?

Kʼalal och ta ajvalil li Reoboame, xuʼ van mu toj lekuk kʼu yelan oy li jteklum Israele. Mu ta sjaliluke, laj yichʼ kʼoponel yuʼun junantik bankilaletik li ta jteklume xchiʼuk jamal albat li kʼusi tsvul-o yoʼontonike, xi laj yalike: «Li atote toj tsots la smozoinuncutic. Jaʼ yuʼun liʼ ta orae yochbuncutic jutuc cabtelcutic li voʼote, jech xuʼ liʼ chituncutic o ta atojol ec, yuʼun xcoʼlaj xchiʼuc alal icatsil ta cuchel chcaʼicutic li cʼusi spasojbuncutic atote» (2 Crón. 10:3, 4).

Xuʼ van mu xa snaʼ kʼusi tspas li Reoboame, yuʼun mi jaʼ la spas li kʼusi oy ta yoʼonton li krixchanoetike xchiʼuk mi muʼyuk xa mas kʼusi tskʼananbee, xuʼ van chiktaik skʼupinel junantik kʼusitik li yutsʼ yalal xchiʼuk li bankilaletik yuʼune. Pe mi muʼyuk la xchʼune, xuʼ van xlik stoy sbaik li krixchanoetike. Jaʼ yuʼun, baʼyel ay skʼopon li moletik ti jaʼik toʼox li jtojobtasvanejetik yuʼun stote. Ta tsʼakale, ay skʼanbe tojobtasel li buchʼutik koʼol sjabilalike xchiʼuk albat ti akʼo tsotsuk spasanan ta mantale, vaʼun jaʼ la xchʼunbe, xi laj yalbe li jnaklejetike: «Me ol avicatsic laj yacʼboxuc li jtote, li vuʼune xjelov to yalal chacacʼboxuc. Me nucul laj yacʼboxuc li jtote, chicote lec chacacʼboxuc ti oy lec staqʼuinal sniʼe» (2 Crón. 10:6-14).

¿Kʼusi chakʼ jchantik taje? Jaʼ ti skʼan jchʼuntik li tojobtasel chakʼbutik li buchʼutik oy xa sjabilalike xchiʼuk ti yijik lek ta mantale. Ta skoj ti ep kʼusi yiloj ta xkuxlejalike, ep sbalil xuʼ jtatik xchiʼuk xuʼ stojobtasutik sventa mu jnuptan jvokoltike (Job 12:12).

Ta skoj ti ep buchʼu muʼyuk lek laj yaʼiik li kʼusi kʼot ta nopel yuʼun li ajvalil Reoboame, lik stoy  sbaik ta stojolal. Jaʼ yuʼun li ajvalile la stsob skotol li yajsoltarotak yoʼ xbat stsakik ta kʼope. Pe li Jeovae la stak batel li j-alkʼop Semaya sventa xi xalbe li Reoboame: «Mu me xbat spasic pleito xchiʼuc li achiʼiltaquic ta israelale. Acʼo suticuc batel ta snaic. Ti jech icʼot ta pasele yuʼun jech onoʼox jnopoj» (1 Rey. 12:21-24). *

¿Mi te noʼox van smeyoj skʼob chkom li ajvalile? Xuʼ van ilin tajek. Jech xtok, ta skoj ti laj yal ti chakʼanbe nukul ti oy «lec staqʼuinal sniʼe», ¿kʼusi van la snopik li jnaklejetik kʼalal laj yilik ti muʼyuk la spajes li jtoybaetike? (Koʼoltaso xchiʼuk 2 Crónicas 13:7). Akʼo mi jech, li ajvalil xchiʼuk li yajsoltarotake la xchʼunik li kʼusi «iʼalbatic yuʼun li Mucʼul Diose, isutic batel ta snaic».

¿Kʼusi chakʼ jchantik taje? Mu ventauk mi xkichʼtik labanel, jaʼ mas lek ti jchʼuntik li kʼusi chal Jeovae. Mi jech ta jpastike, lek me chilutik xchiʼuk chakʼbutik sbendision (Deut. 28:2).

Li Reoboame la xchʼunbe smantal li Jeovae xchiʼuk muʼyuk la stsak ta kʼop li ajvalil ta nortee. Li kʼusi noʼox lik spase jaʼ ti lik yakʼbe lek smuroaltak junantik jteklumetik xchiʼuk la slikes yan jteklumetik xtok ta Juda xchiʼuk li ta Benjamine (2 Crón. 11:5-12). Pe li Reoboame mu skotoluk ora la xchʼunbe smantal li Jeovae. Li ajvalilal ta norte ti jaʼ sventainoj li Jeroboame, lik yichʼik ta mukʼ li jecheʼ diosetike. Ta skoj taje, oy junantik jnaklejetike chbatik ta Jerusalen yoʼ xbat yichʼik ta mukʼ li Jeovae akʼo mi jaʼ sventainoj li Reoboame (2 Crón. 11:16, 17). La stsak-o lek yip li ajvalilal yuʼun Reoboam ta skoj ti la xchʼun mantale.

Oy kʼusi kʼot ta pasel kʼalal stsakoj xa ox lek yip li ajvalilal yuʼun Reoboame, yuʼun laj yikta xchʼunbel smantaltak Jeova xchiʼuk lik yichʼ ta mukʼ li jecheʼ diosetike. Pe ¿kʼu yuʼun ti jech la spase? ¿Mi jaʼ van la xchanbe smeʼ ti jaʼ j-amon antse? (1 Rey. 14:21). Mu ventauk li kʼusi tijbat-o yoʼonton spasele, yuʼun sjunul li jteklume jaʼ jech lik xchanik ek. Li Jeovae toj chopol laj yil, jaʼ yuʼun laj yakʼ ti x-och ta skʼob epal jteklumetik ta Juda li ajvalil ta Ejipto ti Sisak sbie akʼo mi lek yakʼojbe toʼox smuroal li Reoboame (1 Rey. 14:22-24; 2 Crón. 12:1-4).

Li Sisake bat stsak ta kʼop li Jerusalen yoʼ bu tspas mantal li Reoboame. Pe kʼalal te xa ox oyike, li Jeovae la stak batel li j-alkʼop Semaya yoʼ xi xalbe li Reoboam xchiʼuk li bankilaletik yuʼune: «Ta sventa ti laj acomtsanicune, jech ec li vuʼune la jcomtsanoxuc ec; laj cacʼoxuc ta scʼob li Sisaque». ¿Kʼusi van la spas Reoboam kʼalal laj yaʼi li kʼusi laj yal Jeovae? Lek la xchʼam li tukʼibtasele, yuʼun xi chalbe skʼoplal li Vivliae: «Li banquilaletic yuʼun israeletique xchiʼuc li ajvalile la sbicʼtajes sbaic, jech laj yalic: ‹Jaʼ melel cʼusi chal li Mucʼul Diose›». Li Jeovae muʼyuk laj yakʼ ti xichʼ lajesel li Jerusalen ta skoj ti la sbikʼtajes sba li Reoboame (2 Crón. 12:5-7, 12).

Li Reoboame jech-o la sventain batel li snitilulal Juda xchiʼuk Benjamine. Kʼalal jutuk xa ox skʼan xchame, laj yakʼ ta ilel slekil yoʼonton ta stojolal skotol xnichʼnabtak xchiʼuk ep laj yakʼananbe smoton. Ti jech la spase, jaʼ van sventa mu stoy sbaik ta stojolal xnichʼon ti jaʼ li Abiase xchiʼuk ti jaʼ ch-och ta ajvalil yuʼune (2 Crón. 11:21-23). Laj yakʼ ta ilel spʼijil akʼo mi muʼyuk toʼox jech la spas li ta slikebale.

Li Reoboame muʼyuk lek ilat yuʼun Jeova akʼo mi lek kʼusitik la spas. Xi chal li Vivliae: «Chopol yabtel [la spas]». ¿Kʼu yuʼun jech chichʼ albel skʼoplal li Reoboame? Jaʼ ta skoj ti maʼuk ta sjunul yoʼonton tun ta stojolal li Jeovae (2 Crón. 12:14).

Toj lek ti jnopbetik skʼoplal liʼe: akʼo mi oy jayibuk velta la xchʼunbe smantal Jeova li Reoboame xchiʼuk ti lek kʼusitik la spas ta stojolal li steklumale, muʼyuk la spas ta yamigo li Jeovae mi jaʼuk laj yakʼbe yipal yoʼ lekuk x-ilate. Ta skoj taje, chopol kʼusitik la spas xchiʼuk laj yichʼ ta mukʼ jecheʼ diosetik. Kʼalal laj yichʼ tukʼibtasel li Reoboam xchiʼuk  ti la xchʼame, ¿mi jaʼ ta skoj ti sutesoj yoʼonton ta melele? ¿Mi jaʼ van ta skoj ti tskʼan lek x-ilat yuʼun li Jeovae o mi jaʼ van ta skoj ti persa albat yuʼun li yantike? (2 Crón. 11:3, 4; 12:6). Ta mas tsʼakale, laj onoʼox spas yan velta li kʼusitik chopole. Mu xkoʼolaj jsetʼuk kʼuchaʼal li smoltot ti jaʼ li ajvalil Davide, yuʼun akʼo mi la spas tsatsal muliletik: la sutes yoʼonton ta melel, la stoybe skʼoplal li melel yichʼel ta mukʼ Diose xchiʼuk skʼanoj tajek li Jeovae (1 Rey. 14:8; Sal. 51:1, 17; 63:1).

Toj tsots skʼoplal kʼusi chakʼ jchantik li sloʼil Reoboame. Yuʼun sventa lek xilutik li Jeovae, maʼuk noʼox bal mi ta jchabi kutsʼ kalaltik xchiʼuk ti oy kʼusitik chkakʼ ta koʼontontik stael ta mantale. Li kʼusi mas tsots skʼoplale, jaʼ ti baʼyel xkakʼ ta jkuxlejaltik li yichʼel ta mukʼ Jeovae.

Sventa spas kuʼuntik taje, skʼan jechuk-o jkʼantik li Jeovae. Kalbetik junuk skʼelobil, sventa mu xtupʼ li kʼokʼe skʼan jchuchbetik-o skʼakʼal. Jaʼ jech li voʼotik eke, sventa mu xtupʼ li kʼanelal kuʼuntik ta stojolal Jeovae, skʼan jpasilantik orasion, mu xijpaj ta xchanel li Jvivliatike xchiʼuk ti jnopbetik skʼoplale (Sal. 1:2; Rom. 12:12). Kʼalal jkʼanojtik tajek li Jeovae, jaʼ tskoltautik sventa mu jpastik li kʼusitik chopole, jech xtok, jaʼ tskoltautik yoʼ jsutes koʼontontik ta melel kʼalal mi la jpas jmultike. Mu xijkoʼolaj jsetʼuk kʼuchaʼal li Reoboame, yuʼun li voʼotike tukʼ chkakʼ jbatik ta stojolal li Jeovae (Jud. 20, 21).