¿Mi akʼupinoj skʼelel Li Jkʼel osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼusi chantos xuʼ jpastik sventa lekuk xijkʼejine?

Vaʼlikutik lek sventa jtoytik lek li svunal jkʼejimoltike, kichʼtik lek ikʼ, jachʼ lek li ketike xchiʼuk tsotsuk xijkʼejin. Mi jech ta jpastike, mas to tsots chlokʼ kuʼuntik (w17.11, paj. 5).

¿Kʼusi chakʼ jchantik ta sventa ti bu laj yichʼ akʼel li jteklumetik sventa nakʼobbail ta Israel xchiʼuk ti kʼu yelan oy li sbeleltake?

Ta sjunlej li lume oy vakib jteklumetik sventa nakʼobbail xchiʼuk lek chʼubabil li sbeleltake. Vaʼun, mas kʼun xchiʼuk mas anil xuʼ sta mi oy buchʼu chbat spoj sba tee (w17.11, paj. 14).

¿Kʼu yuʼun jaʼ jun lekil matanal yakʼojbutik Dios li pojelale?

Yuʼun xuʼ jtatik-o kuxlejal sbatel osil xchiʼuk xuʼ spojutik lokʼel li ta mulil xchiʼuk li ta lajelale. Akʼo mi jsaʼ mulilutik, li Diose la stak talel Jesus ta skoj ti skʼanojutik tajeke (wp17.6, paj. 6, 7).

¿Kʼuxi jnaʼojtik ti jaʼ chalbe skʼoplal xchaʼkuxesel Jesus li kʼusi chal ta Salmo 118?

Muʼyuk la xchʼunik ti jaʼ Mesias li Jesuse xchiʼuk la smilik. Sventa xkʼot li ta chikin na ti mas tsots skʼoplale, persa laj yichʼ chaʼkuxesel (w17.12, paj. 9, 10).

¿Mi persa skʼan oyuk sderecho ta ba nichʼonil li jun krixchano sventa xkʼot ta snitilul li Mesiase?

Bakʼintike, li snitilulal Mesiase te chlik talel ta stojolal li ba nichʼoniletike, pe mu skotoluk velta jech. Li judaetike snaʼojik taje xchiʼuk la xchʼamik; jech kʼuchaʼal liʼe, la xchʼamik ti te chlik talel ta stojolal David ti jaʼ xkʼox nichʼon li Jesee (w17.12, paj. 14, 15).

¿Kʼusi beiltaseletik chakʼ Vivlia sventa mu masuk xij-ipajutike?

Li ta Smantal Moisese chal ti skʼan chʼakel lokʼel li buchʼutik tsots ipike, ti spok skʼobik mi la spikik animae xchiʼuk ti smuk li yikʼobalike. Jech xtok, skʼan xichʼ sirkunsision li ololetik kʼalal oy xa ox ta xvaxakibal kʼakʼal svokʼele, stao lek ti jech tspasike yuʼun jaʼ sventa lek sikub xchʼichʼel li jun olole (wp18.1, paj. 7).

¿Kʼu yuʼun muʼyuk chopol ti jkʼan jba jtuktik uni jutukuke?

Skʼan jkʼantik li jchiʼiltaktik jech kʼuchaʼal jkʼanoj jba jtuktike (Mar. 12:31). Jech xtok, skʼan ti «akʼo skʼan yajnilik li malaliletik jech kʼuchaʼal skʼanoj sbekʼtal stukike» (Efes. 5:28). Pe xuʼ me muʼyuk kʼusi lek stij koʼontontik spasel kʼalal ta jkʼan jba jtuktike (w18.01, paj. 23).

¿Kʼusi xuʼ jpastik sventa xijtsatsub li ta mantale?

Skʼan jchantik li Skʼop Diose, jnopbetik skʼoplal xchiʼuk kakʼ ta jkuxlejaltik li kʼusi ta jchantike. Jchʼuntik li beiltasel chakʼ chʼul espiritue xchiʼuk jtojbetik ta vokol xchiʼuk jchʼamtik li tojobtasel chakʼbutik li ermanoetike (w18.02, paj. 26).

¿Kʼu yuʼun mu stakʼ jsabetik smelolal ta kʼanaletik xchiʼuk ta tʼunolajel li kʼusi chkʼot ta pasel ta tsʼakale?

Oy jayibuk srasonal, pe li mas tsots skʼoplale jaʼ ti spʼajoj tajek li Diose (wp18.2, paj. 4, 5).

¿Kʼusi skʼan jpastik kʼalal oy xa buchʼu stakojutik ta ikʼele?

Skʼan xkʼot ta pasel kuʼuntik mi la jchʼamtik junuk takel ta ikʼele (Sal. 15:4). Mu me jsutestik kʼop kʼalal oy buchʼu tstakutik ta ikʼele. Yuʼun mi jech la jpastike, jecheʼ noʼox me ch-echʼ svokol kuʼuntik li ermano ti xchapanoj xa ox van li veʼlile (w18.03, paj. 18).

¿Kʼusitik xuʼ xchanbeik Timoteo li ermanoetik ti yichʼojik biiltasele?

Li Timoteoe oy ta yoʼonton li yantike xchiʼuk jaʼ mas tsots skʼoplal laj yil li kʼusitik ta mantale. Jech xtok, tsots abtej ta stojolal Jeova xchiʼuk la spas li kʼusi la xchane. Chʼi-o talel ta mantal xchiʼuk la spat yoʼonton li ta beiltasel chakʼ xchʼul espiritu Jeovae. Jkotoltik xuʼ me jchanbetik stalelal li Timoteoe (w18.04, paj. 13, 14).