LI LEKIL amigoile jaʼ jun mukʼta matanal, pe sventa xjalij li amigoinel taje skʼan jchabitik. ¿A ti mi oy xa ta vokol ti kʼu yelan xkil jbatik xchiʼuk li kamigotik une? ¿Kʼusi xuʼ jpastik sventa xlekub yan velta ti kʼu yelan xkil jbatike? Li ta Vivliae ta jtatik slekil kʼelobiltak. Yuʼun oy buchʼutik ti lek laj yamigoin sbaike xchiʼuk ti laj yil svokolike, akʼo mi jech, lek-o laj yil sbaik. Jkʼeltik kʼusi xuʼ jchanbetik.

Kʼalal maʼuk toʼox ajvalil li Davide, jaʼ toʼox jun jkʼel chij xchiʼuk ep slekil amigotak la sta. Xuʼ van jaʼ chtal ta joltik li Jonatane (1 Sam. 18:1). Pe oy yan yamigotak xtok, jech kʼuchaʼal li j-alkʼop Natane. Akʼo mi muʼyuk chal Vivlia kʼusi ora lik yamigoin sbaik, pe jnaʼojtik ti spatoj yoʼonton ta stojolal Natan li Davide xchiʼuk ti jaʼ jun lekil amigoil laj yile, ¿kʼuxi laj yakʼ ta ilel? Jaʼo kʼalal laj yalbe ti oy ta yoʼonton tsmeltsanbe stemplo li Jeovae. Taje jamal chakʼ ta ilel ti tsots skʼoplal chil kʼusi tsnop li Natane, ti jaʼ beiltasbil yuʼun li xchʼul espiritu Jeovae (2 Sam. 7:2, 3).

Pe oy kʼusi kʼot ta pasel ti laj yakʼ ta vokol li lekil amigoinel yuʼunike. Yuʼun li Davide la xchiʼin ta vayel li Betsabee (Bat-seba) xchiʼuk la yal mantal ti akʼo yakʼik ta milel li smalale, ti Urias sbie (2 Sam. 11:2-21). Li Davide spʼajoj  li choplejale xchiʼuk jal xa ti tukʼ yoʼonton yakʼoj sba ta stojolal li Jeovae. Akʼo mi jech, la pas li tsatsal mulil taje. ¿Kʼu yuʼun ti jech la spase? ¿Mi yuʼun van mu xakʼ venta ti tsots li smul la spase? ¿Mi laj van snop ti muʼyuk chil li Diose?

¿Kʼusi van tspas li Natane? Mi xi van la snope: «Jaʼ lek ti yan-o buchʼu xalbe ti tsots li smul la spase, yuʼun ep buchʼutik snaʼoj. Jech xtok, ¿kʼu yuʼun ti ta jtikʼ jba li ta skʼope xchiʼuk ti xlik jkontrain jbakutik ta skoj noʼox taje? Maʼuk noʼox, xuʼ van xkakʼ ta vokol li jkuxlejale, yuʼun li Davide oy xa buchʼu la smil ti muʼyuk smule».

Pe jaʼ yajkʼopojel Dios li Natane. Mi te noʼox tsʼijile te xvulvun-o li sjol yoʼontone, jech xtok muʼyuk bu chchaʼta yav ti lek xil sbaik xchiʼuk li Davide. Yuʼun namajem xa ta stojolal Dios li Davide xchiʼuk chtun yuʼun koltael sventa lekuk xil sbaik yan velta xchiʼuk li Jeovae. Chtun yuʼun koltael ta stojolal junuk slekil amigo jech kʼuchaʼal li Natane. Jaʼ yuʼun li j-alkʼope kʼot ta nopel yuʼun ti chalbe David li kʼusi tsnop Jeovae, sventa jech spase la stunes jun skʼelobil ti chkʼot ta yoʼonton li buchʼu abtejem ta jchabichije. Jaʼ jech la skolta David yoʼ xaʼibe smelolal kʼu to stsatsal li smul la spase xchiʼuk ti oyuk kʼusi spas sventa xchapane (2 Sam. 12:1-14).

¿Kʼusi van xuʼ xapas mi la spas smul junuk avamigoe? Xuʼ van xi chavale: «Pe mi laj kalbe li smule xuʼ van sok ti kʼu yelan xkil jbakutike. Jech xtok, mi laj kalbe li moletik ta tsobobbaile, ti jaʼ li buchʼu xuʼ skoltaike, xkoʼolaj ti ta jvalopatin yaʼele». ¿Kʼusi van chanop chapas?

Li Gianni ti laj kalbetik skʼoplal ta slikebale, xi chvul ta sjole: «Laj kakʼ venta ti oy kʼusi yakal chkʼot ta pasele. Mu xa noʼox skʼan xalbun kʼusi oy ta yoʼonton li Maurizioe. Vaʼun kʼot ta nopel kuʼun ti ta jchiʼin ta loʼile, akʼo mi jnaʼoj ti mu kʼunuk ta pasele. Jech xtok, snaʼoj xa skotol, jaʼ yuʼun, ¿kʼusi van xuʼ xkalbe ti mu snaʼ li stuke? ¿Kʼu van yelan chaʼi li kʼusi chkalbee? Pe kʼalal la jnopbe skʼoplal skotol li kʼusi jchanojkutike, jaʼ la stsatsubtasbun li koʼontone. Yuʼun li Maurizioe jaʼ jech la spas kʼalal jaʼo chtun kuʼun laj yile. Mu jkʼan ti chopol xaʼi sba kuʼune, pe tsots tajek skʼoplal ti jkoltae, yuʼun jkʼanoj tajek».

Xi chal li Maurizio eke: «La xchiʼinun ta loʼil ta sjunul yoʼonton li Giannie, xchiʼuk melel skotol li kʼusi laj yalbune. Jnaʼoj lek ti mu stakʼ xkakʼbe xkuchin Gianni xchiʼuk Jeova li kʼusi yakal ta jnuptan ta skoj li kʼusi muʼyuk lek la jpase. Jaʼ yuʼun, kʼot ta nopel kuʼun ti ta jchʼam li tukʼibtasele, vaʼun ta kʼunkʼun lik lekubuk ti kʼu yelan xkil jbakutik xchiʼuk li Jeovae».

Koltaat yuʼun yan yamigotak kʼalal jaʼo laj yil svokol li Davide. Jun li yamigo taje jaʼ li Husaie, xi chal li Vivliae: «Lec scʼopan sba xchiʼuc li Davide» (2 Sam. 16:16; 1 Crón. 27:33). Yaʼeluke jaʼ bankilal yaj-abtel xchiʼuk bakʼintike jaʼ tspas li kʼusitik mu stakʼ xaʼiik li yantike.

Kʼalal tsatsal pojbat ajvalilal yuʼun xnichʼon li Davide, epal j-israeletike jaʼ laj yakʼ sbaik ta stojolal li xnichʼone, ti jaʼ li Absalone. Maʼuk noʼox valopatinat yuʼun li xnichʼone, yuʼun jech la spasik junantik yamigotak xtok. Yanuk li Husaie tukʼ-o laj yakʼ sba ta stojolal li Davide. Jech xtok, kʼalal jatav batel li Davide ay saʼatuk yuʼun li Husaie. Maʼuk noʼox, yuʼun laj yakʼ ta vokol xkuxlejal sventa slajesbe skʼoplal li kʼop la slikes li xnichʼon Davide. Ti jech la spase maʼuk noʼox ta skoj ti jaʼ bankilal j-abtel yuʼun ajvalile, moʼoj, yuʼun jaʼ ta skoj ti tukʼ yakʼoj sba ta stojolal li yamigoe (2 Sam. 15:13-17, 32-37; 16:15-17:16).

Tspat tajek koʼontontik ti jmoj lek tsobolutik xchiʼuk li kermanotaktike. Ti jech lek tsobolutike maʼuk noʼox ta skoj ti jech skʼan jpastike o ta skoj ti jaʼ li kʼusi jbainojtik ta tsobobbaile. Kʼalal oy kʼusi ta jpastik ta stojolal li kermanotaktike, xi chkalbetik yaʼeluke: «Kamigoot, pe maʼuk ta skoj ti yuʼun persa skʼan lek xakilote, moʼoj, jaʼ ta skoj ti batsʼi jkʼanojot ta melele».

 Jun ermano ti Federico sbie, jaʼ jech laj yaʼi kʼalal koltaat sventa stam sba likel ta mantal yuʼun li yamigo ti Antonio sbie. Xi chal li Federicoe: «Kʼalal kʼot ta tsobobbail li Antonioe, lik noʼox kamigoin jbakutik. Jtunelunkutik ta tsobobbail jchaʼvoʼalkutik xchiʼuk ta jkʼupinkutik ti koʼol chi-abtejkutik ta stojolal Jeovae. Ta tsʼakale laj yichʼ biiltasel ta mol li stuke. Jech oxal, maʼuk xa noʼox kamigo, yuʼun jaʼ li buchʼu xuʼ jchanbe stalelal xtoke». Pe ti kʼusi une, li Federicoe oy kʼusi chopol la spas. Akʼo mi laj noʼox saʼ koltael, pe mu xa xuʼ xtun ta prekursor mi jaʼuk li ta jtunel ta tsobobbaile. ¿Kʼusi la spas li Antonioe?

Xi to chal li Federicoe: «Laj kakʼ venta ti xaʼibe xkʼuxul jvokol li Antonioe. La yakʼ tajek persa ti spatbun koʼontone xchiʼuk ti skoltaun sventa jtam jba likel ta mantale. Muʼyuk bu la stenun ta yoʼonton. Yuʼun nopolik noʼox tstij koʼonton ti jtsatsubtas jba ta mantale xchiʼuk chalbun ti mu xilubtsaje». Xi chal li Antonio eke: «La jchʼakbe mas yorail sventa jchiʼin jbakutik ta loʼil xchiʼuk li Federicoe. Yuʼun ta jkʼan ti ta sjunuluk yoʼonton xalbun li kʼusi oy ta yoʼontone xchiʼuk li xkʼuxul chaʼi svokole». Ta tsʼakale lekub ta mantal li Federicoe xchiʼuk och yan velta ta prekursor xchiʼuk ta jtunel ta tsobobbail. Xi chal li Antonioe: «Avie mu xa jmojuk jtsobobbailkutik, akʼo mi jech, mas to lek ti kʼu yelan xkil jbakutike».

¿Kʼu van yelan chavaʼi aba ti jech svalopatinot junuk avamigo kʼalal jaʼo chtun tajek avuʼune? Ta melel, mu kʼusi jech xkʼuxul kʼalal jech chkʼot ta jtojolaltike. ¿Mi x-akʼ van avuʼun ta perton? ¿Mi chlekub to van ti kʼu yelan xavil abaike?

Jnopbetik skʼoplal li kʼusi kʼot ta stojolal Jesus kʼalal junchib xa noʼox kʼakʼal liʼ oy ta Balumile. Jal tajek la xchiʼin sbaik xchiʼuk li yajtakboltake xchiʼuk stuk xa noʼox jech ti kʼu yelan lek laj yil sbaike. Jaʼ yuʼun xi laj yalbe li yajtakboltake: «Kamigooxuk xa» (Juan 15:15). Pe ¿kʼusi kʼot ta pasel kʼalal ay tsakatuk li Jesuse? Jaʼ ti jatav batel skotol li jtakboletike, vaʼun stuk xa laj yiktaik komel. Li vaʼ akʼobal taje, li Pedroe laj yal ta jamal ti muʼyuk onoʼox bu chikta li jchanubtasvanej yuʼune, pe bu chata,  te noʼox ta yakʼobalile oxib to velta xi laj yalbe skʼoplal li Jesuse: «¡Mu xkojtikin maʼ li vinike!» (Mat. 26:31-33, 56, 69-75).

Jech oxal, li Jesuse te xa ta sjol ti stuk xa kʼalal tsnuptan li slajeb prevae. Ti voʼotikuk jech kʼot ta jtojolaltik taje xuʼ van chopol tajek laj kaʼi jbatik xchiʼuk yayijem van kom li koʼontontike. Pe li Jesuse mu jechuk laj yaʼi sba. Yuʼun kʼalal la xchiʼinan ta loʼil yajtakboltak kʼalal echʼem xa ox jayibuk kʼakʼale, muʼyuk bu laj yakʼ ta ilel ti chopol chaʼi sbae o ti kapem xa sjole. Muʼyuk bu laj yalbe ta sat yajchankʼoptak li kʼusi vokol chaʼiik spasele o li kʼusi kʼot ta pasel kʼalal jun xa ox akʼobal skʼan xchame.

Ta melel, mu jechuk la spas li Jesuse. Yuʼun laj yalbe ta jamal Pedro xchiʼuk yantik jtakboletik ti jaʼo yamigotake xchiʼuk ti jech-o spatoj yoʼonton ta stojolalike. Maʼuk noʼox, yuʼun laj yakʼbe komel yajchankʼoptak li abtelal ta chanubtasvanej ti mas mukʼ ta spʼejel Balumile. Vaʼun li jchankʼopetike laj yakʼbeik yipal ti bu kʼalal xuʼ yuʼunik sventa spasik li abtelal akʼbatike (Ech. 1:8; Kol. 1:23). Ep tajek kʼusitik la xchanik ta sventa ti kʼu yelan akʼbatik ta ilel kʼanelal yuʼun li Jesuse.

Jun ermana ti Elvira sbie lik skʼopik xchiʼuk li yamiga ti Giuliana sbie, pe mu xchʼay-o ta sjol ti kʼu yelan lek laj yakʼ ta ilel stalelal li yamigae. Xi chal li Elvirae: «Kʼalal laj yalbun ti chopol la laj yaʼi sba kuʼun Giuliana ta skoj ti kʼu yelan la jpas jtalelale, batsʼi muʼyuk lek laj kaʼi jba, akʼo mi oy onoʼox srasonal ti ch-iline. Pe li kʼusi kʼot tajek ta koʼontone jaʼ ti mas chat yoʼonton ta jtojolale. Tsvul yoʼonton ta sventa li kʼusi chkʼot ta jtojolal ta skoj li jtalelale, xchiʼuk ti kʼajomal noʼox ta jyayijes jba jtuke. Mu xchʼay-o ta jol ti maʼuk laj yakʼ ta yoʼonton li xkʼuxul svokol laj kakʼbee. La jtojbe tajek ta vokol Jeova ti laj yakʼbun jun kamiga ti mas to skʼanojun jech kʼuchaʼal skʼanoj sba stuke».

Ta sventa li kʼusi laj xa jchantike, ¿kʼusi xuʼ jpastik mi oy ta vokol ti kʼu yelan xkil jbatik xchiʼuk junuk kamigotike? Li jun lekil amigoile ta sjunul yoʼonton chchiʼinutik ta loʼil ta sventa li jkʼoptike, pe muʼyuk bu tsyayijesvan xtok. Tukʼ chakʼ sba jech kʼuchaʼal Natan xchiʼuk Husai akʼo mi oy kʼusi tsots ta jnuptantik. Jech xtok, oy ta yoʼonton chakʼutik ta perton jech kʼuchaʼal la spas li Jesuse. ¿Mi jaʼ jech atalelal kʼuchaʼal taje?