LI Gayo xchiʼuk li yan yajtsʼaklomtak Kristo ta slajebtik xa batel baʼyel sigloe ep kʼusitik la snuptanik. Yuʼun oy junantik ti chaʼiik mantal eke tskʼan tskʼunibtasik xchiʼuk tskʼan chchʼakik li ermanoetike, xchiʼuk tspukik batel jecheʼ chanubtaseletik (1 Juan 2:18, 19; 2 Juan 7). Oy jun vinik ti Diotrefes sbie ‹chopol chalbe batel skʼoplalik› li jtakbol Juan xchiʼuk li yan ermanoetike. Maʼuk noʼox, yuʼun mi jsetʼuk skʼan xchʼam li ermanoetik ti tsvulaʼanik li tsobobbailetike; chalbe batel yantik xtok ti jaʼuk jech spasik eke (3 Juan 9, 10). Jaʼ jech yakal chkʼot ta pasel kʼalal takbat tal karta yuʼun Juan li Gayoe. Li karta taje la stsʼiba ta sjabilaltik 98 li Juane xchiʼuk «Yoxibal Skarta Juan» la sbiin li ta Tsʼibetik ta Griego Kʼope.

Li Gayoe tukʼ-o tun ta stojolal Jeova akʼo mi ep la snuptan vokoliletik. ¿Kʼuxi laj yakʼ ta ilel ti tukʼ yoʼontone? ¿Kʼu yuʼun skʼan ti jechuk jtalelaltik eke? ¿Kʼuxi xuʼ tskoltautik li skarta Juane?

Li buchʼu la stsʼiba li Yoxibal Skarta Juane, xi chalbe sba skʼoplale: «Voʼon li molune». Li Gayoe snaʼoj xa onoʼox ti jaʼ li Jtakbol Juane yuʼun jaʼ jech ch-ile kʼuchaʼal jun nichʼonil ta mantal ti lek kʼanbile. Xi albat skʼoplal yuʼun li Juane: «Jaʼ li buchʼu kʼanbile, ti ta melel jkʼanoje». Ta tsʼakale albat xtok ti lekuk noʼox oye; jech kʼuchaʼal ti lek oy ta mantale. Kʼuchaʼal chkakʼtik ventae lek tajek xojtikin Gayo li Juane, jech oxal jech laj yalbe li kʼusitik taje (3 Juan 1, 2, 4).

Akʼo mi muʼyuk chal ta skarta Juan kʼusi yabtel li Gayoe, pe xuʼ van jaʼ jun jkʼelvanej ta tsobobbail. Li Juane la skʼupil kʼopta ti lek snaʼ xcham ermanoetik ta sna akʼo mi mu xojtikinan. Jaʼ jech laj yil Juan ti tukʼ yoʼontone. Yuʼun kʼalal lek snaʼ xchʼamvanik li yajtuneltak Diose jaʼ jech chakʼik ta ilel ti tukʼ yoʼontonike (Gén. 18:1-8; 1 Tim. 3:2; 3 Juan 5).

Ti laj yichʼ albel skʼoplal ti lek xchʼamvan ta sna li Gayoe, jaʼ chakʼ ta aʼiel ti oy ermanoetik ti nopolik noʼox te chkʼotik li ta tsobobbailetik ti bu oy li Gayoe xchiʼuk ti jaʼ te likemik batel ti bu oy li Jtakbol Juane. Vaʼun kʼalal tsutik batele, chalbeik Juan li kʼusi chilik li ta tsobobbailetike. Xuʼ van jaʼ jech chaʼi kʼu yelan oy li ermanoetike.

Ta melel, li yajtsʼaklomtak Kristo taje jaʼ mas tskʼanik ti chkomik ta vayel ta sna li ermanoetike. Yuʼun li tee batsʼi muʼyuk smelol li naetik chakʼik ta chʼome, muʼyuk tstsakvanik ta venta xchiʼuk toj echʼ noʼox mulivajel. Jech oxal, li jxanviletik ti oy spʼijilike chchʼamunbik sna yamigoik kʼalal chbatik li ta lum  taje. Yan li yajtsʼaklomtak Kristoe ta sna ermanoetik chkomik.

Li Juane la skʼanbe Gayo ti akʼo xakʼ ta ilel slekil yoʼonton yan veltae, ¿kʼu yuʼun? Yuʼun laj yalbe ti akʼo stak batel ‹jech kʼuchaʼal lek chil Dios› li buchʼutik te ayike. Taje jaʼ skʼan xal ti skʼan xakʼbe skotol kʼusitik chtun yuʼunik jaʼ to mi kʼotik ti bu xa chbatike. Taje jech xa onoʼox spasojbe yan ermanoetik li Gayoe, jech oxal albat Juan ti lek snaʼ xkʼanvane xchiʼuk ti tsots xchʼunel yoʼontone (3 Juan 3, 6).

¿Buchʼutik van ti chchʼam ta sna li Gayoe? Xuʼ van misioneroetik, jkʼelvanejetik ta tsobobbailetik o jaʼ li buchʼutik tstak batel li Juane. Buchʼuuk onoʼox, yuʼun li yajtsʼaklomtak Kristo taje jaʼ te chbatik ta sventa li lekil aʼyejetike. Xi laj yal li Juane: «Jaʼ ta skoj sbi Dios ti jech [batike]» (3 Juan 7). Jaʼ yuʼun jaʼ yermanoik li yajtsʼaklomtak Kristo taje xchiʼuk staik-o ti lekuk tajek xchʼamike. Xi la stsʼiba li Juane: «Li voʼotike persa skʼan jchʼamtik li krixchanoetik taje, sventa jmoj jchiʼin jbatik ta abtel ta sventa li kʼusi melele» (3 Juan 8).

Li karta la stsʼiba Juane jaʼ sventa stojbe ta vokol li Gayoe, pe maʼuk noʼox ta sventa taje, yuʼun jaʼ sventa skolta ta skoj ti oy kʼusi tsots tsnuptane. Yuʼun li Diotrefes ti chaʼi mantal eke, mi jsetʼuk skʼan xchʼam li ermanoetike xchiʼuk chalbe batel yantik xtok ti jaʼuk jech spasik eke (3 Juan 9, 10).

Akʼo mi xuʼ ox van te xkomik ta sna Diotrefes li tukʼil yajtsʼaklomtak Kristoe, pe mu skʼan te xkomik. Yuʼun li stuke jaʼ noʼox tskʼan ti jaʼuk bankilal li ta tsobobbaile; mi jsetʼuk bu lek chchʼam li kʼusitik chal Juane, yuʼun jaʼ noʼox chopol chalbe batel skʼoplal xchiʼuk jech tspasbe xtok li yan ermanoetike. Li Juane muʼyuk laj yal ti jaʼ jun jecheʼ jchanubtasvaneje, akʼo mi jech, li Diotrefese mu onoʼox skʼan xichʼbe ta mukʼ li yabtel yichʼoj li jtakbole. Jaʼ batem ta yoʼonton ti oyuk ep kʼusitik yuʼune xchiʼuk mu jechuk stalelal kʼuchaʼal li yajtsʼaklomtak Kristoe, jaʼ jech laj yakʼ ta ilel ti xuʼ van muʼyuk tukʼ yoʼontone. Li kʼusi kʼot ta pasele chakʼ jchantik ti xuʼ van xchʼak tsobobbail li buchʼutik tstoy sbaike xchiʼuk ti jaʼ noʼox batem tajek ta yoʼontonik saʼel li kʼusi tskʼan stukike. Jaʼ yuʼun xi laj yalbe Gayo li Juane: «Mu me jaʼuk xachan spasel li kʼusi chopole» (3 Juan 11). Taje jaʼ jech chalbutik ek.

Li Juane chalbe skʼoplal jun vinik ti lek ta chanbel stalele xchiʼuk ti jelel tajek stalelal kʼuchaʼal li Diotrefese, li yajtsʼaklom Kristo taje Demetrio sbi. Li Juane laj yal ti lek chichʼ albel skʼoplal yuʼun li ermanoetike. Xi to laj yale: «Jech jamal chkalbekutik skʼoplal ek xchiʼuk anaʼoj ti jaʼ melel li kʼusi jamal chkalkutike» (3 Juan 12). Xuʼ van li Demetrioe tskʼan ti akʼo xkoltaat yuʼun li Gayoe. Jaʼ yuʼun li karta taje jaʼ koltavan sventa xaʼiik ermanoetik ti lek stalelal li Demetrioe. Jech xtok, ta skoj ti xuʼ van jaʼ take batel yuʼun li Juane laj van yakʼbe ta skʼob stuk li Gayoe. O xuʼ van jaʼ jun jkʼelvanej ta tsobobbailetik ti laj yichʼ batel li kartae. Kʼuuk onoʼox yelan, li Demetrioe xuʼ van laj to xchaʼal li kʼusi la stsʼiba li jtakbol Juane.

Lek onoʼox xchʼamvan li Gayoe, pe ¿kʼu yuʼun albat to yuʼun Juan ti jechuk-o xchʼamvane? ¿Mi yuʼun la snop ti persa skʼan patbel yoʼonton sventa tsotsuk-oe? Li Diotrefese tskʼan tsnutsan lokʼel ta tsobobbail li buchʼutik lek chchʼamvanike. Ta skoj taje, ¿mi yuʼun van jaʼ chiʼo Juan mi muʼyuk xa chchʼam ermanoetik li Gayoe? Mu jnaʼtik lek kʼusi ta skoj, pe xi tsatsubtasbat yoʼonton yuʼun li Juane: «Te likem tal ta stojolal Dios li buchʼu tspas kʼusi leke» (3 Juan 11). ¡Taje jaʼ srasonal sventa jaʼuk-o jpastik li kʼusi leke!

Li karta taje, ¿mi tijbat van yoʼonton Gayo  sventa jechuk-o lek xchʼamvan? Laj. ¿Kʼuxi jnaʼojtik? Yuʼun li Jeovae laj yakʼ ti akʼo teuk tsakal skʼoplal xkom ta Vivlia sventa stij koʼontontik ta spasel «li kʼusi leke».

Mu jnaʼtik mas ta stojolal li kermanotik Gayoe. Akʼo mi jech, ti kʼu yepal jnaʼojtik ta sventa li xkuxlejale oy kʼusitik chakʼ jchantik.

Baʼyel, jutuk mu jkotoltikuk ti xkojtikintik xa li kʼusitik melele, pe jaʼ koliyalik li tukʼil ermanoetik ti lokʼ ta yoʼontonik nom xanavik sventa xchanubtasutike. Veno, mu onoʼox skotoluk ermanoetik nom tajek chanavik ta skoj li lekil aʼyejetike. Pe oy buchʼutik ti jech tspasike, jech kʼuchaʼal li jkʼelvanejetik ta sirkuito xchiʼuk yajnilike xuʼ me jkoltatik xchiʼuk jpatbetik yoʼontonik kʼuchaʼal la spas li Gayoe. Lek me tajek xtok ti jkoltatik li buchʼutik chbatik ta naklej ta yan lum ta skoj ti skʼan to mas jcholmantaletik ta sventa li Ajvalilale. Jchʼuntik li mantal liʼe: «Nopuk-o me xavaʼiik ti lek xachʼamvanike» (Rom. 12:13; 1 Tim. 5:9, 10).

Xchibal, mu me labaluk sba xkaʼitik mi oy buchʼu tskontrainbe yabtel li buchʼutik sbainojik li tsobobbaile. Yuʼun laj onoʼox yichʼ chibal kʼoptael ek li yabtelik Juan xchiʼuk Pabloe (2 Kor. 10:7-12; 12:11-13). ¿Kʼusi ta jpastik mi jaʼ jech kʼot ta pasel li ta jtsobobbailtike? Xi la stojobtas Timoteo li Pabloe: «Mu persauk skʼan slikes kʼop li smoso Kajvaltike, skʼan lek noʼox yoʼonton ta stojolal skotol krixchanoetik, xtojobuk lek ta chanubtasvanej, skʼan spajes sba kʼalal oy kʼusi chopol tspasbate, oyuk smalael yuʼun kʼalal chchanubtas li buchʼutik mu skʼan xchʼamik li chanubtasele». Jaʼ yuʼun, mi ta jpajes jbatik kʼalal oy buchʼu tsaʼ joltike xuʼ van slekubtas stalelik ta tsʼakal li buchʼutik chchopol kʼoptavanike. Vaʼun, «xuʼ van xjelbat snopbenik yuʼun Dios sventa xojtikinik lek li kʼusi melele» (2 Tim. 2:24, 25).

Yoxibal, skʼan jkʼupil kʼoptatik li buchʼutik tukʼ-o yakʼoj sbaik akʼo mi chichʼik kontrainele. Jech xtok, kakʼtik me venta ti tsots tajek ch-abtejike. Li Juane la spatbe yoʼonton li Gayoe xchiʼuk laj yalbe ti lekik tajek li kʼusi tspase. Sventa mu xlubtsajik li ermanoetike skʼan patbel yoʼontonik, jaʼ yuʼun li moletik ta tsobobbaile skʼan xchanbeik stalelal li Juane (Is. 40:31; 1 Tes. 5:11).

Li karta la stsʼibabe batel Gayo li Juane kʼajomal noʼox yichʼoj 219 ta pʼel kʼop li ta griegoe, jech oxal jaʼ mas bikʼit li ta sliklej Vivliae. Akʼo mi jech, li yajtsʼaklomutik Kristo avie ep tajek ta jtabetik sbalil.