Ti oy noʼox smelolal li kʼusitik oy kuʼuntike jaʼ me chakʼ jmuyubajeltik
LI DANIEL XCHIʼUK MIRIAME nupunik ta septiembre ta sjabilal 2000, vaʼun batik ta naklej ta Barcelona (España), oy kʼusitik lek x-ayan yuʼunik. Xi chal li Daniele: «Li kʼu yepal ta jpaskutik kanal ta kabtelkutike xuʼ xbat veʼkunkutik toʼox ta lekil restauranteetik, ti xibatkutik ta yan lumetike, xchiʼuk ti jman lek jkʼuʼkutike. Jech xtok, nopolik noʼox chilokʼkutik ta cholmantal». Pe oy kʼusi jelbat-o li xkuxlejalike.
Ta jun asamblea ta 2006, tijbat yoʼonton yuʼun jun mantal li Daniele, li mantal taje xi tsjakʼe: «¿Mi yakalutik van spasel ti bu kʼalal xuʼ kuʼuntik sventa jpojtik ‹li buchʼutik xtamlajetik xa bal ta sbelel lajelale›?» (Prov. 24:11). Li mantal taje chalbe skʼoplal ti voʼotik oy ta jbatik ta yalel li lekil aʼyejetik ta sventa li Vivliae, yuʼun jaʼ noʼox te xuʼ sta-o xkuxlejal li krixchanoetike (Ech. 20:26, 27). Xi chvul ta sjol li Daniele: «Voʼon la skʼoponun yaʼel li Jeovae». Li mantal taje chalbe skʼoplal xtok ti mas la xijmuyubaj kʼalal chkakʼbetik yipal chijtun ta stojolal li Jeovae. Li Daniele snaʼoj ti jaʼ melel taje, yuʼun chtun xa onoʼox ta prekursora li Miriame xchiʼuk chil ti xmuyubaj tajeke.
Xi to chal li Daniele: «Te laj kakʼ venta ti skʼan jel tajek li jkuxlejale». Vaʼun jech la spas. Mas xa jutuk yorail lik abtejuk, och ta prekursor xchiʼuk la snop ti xuʼ mas xmuyubajik mi bat tunikuk ti bu chtun mas jcholmantaletike.
KʼALAL ECHʼ LI VOKOLILE JAʼO TAL LI KʼUSITIK LEKE
Li ta mayo ta 2007, li Daniel xchiʼuk Miriame laj yikta li yabtelike vaʼun batik ta naklej ta Panamá, jun lum ti xojtikinik xa onoʼoxe. Te chcholik mantal ta junantik lum ti joyol ta nab ta archipiélago ti Bocas del Toro sbie, te ta nab Caribe. Jutuk mu skotoluk li buchʼutik te nakalike jaʼik krixchanoetik ti ngäbe sbi li stsʼunbalike. Li Daniel xchiʼuk Miriame laj yilik ti xuʼ van xveʼik-o vaxakibuk u ta Panamá ti kʼu yepal stsoboj stakʼinike.
Ta varko chbatik li ta jujun lum joyol ta nabe. Kʼalal mi kʼotik li ta lum xtoke tstunesik visikleta. Xvul to ta sjolik li sba velta ti xanavik te van 30 kilometrouk ta visikleta ti vitstikaltik xchiʼuk ti jaʼo kʼixin tajeke. Ta skoj ti lub tajek li Daniele, jutuk xa mu yal ta lum. Pe li utsʼ alaliletik ti ngäbe stsʼunbalike toj lek yoʼonton laj yakʼik ta ilel, mas to kʼalal laj xchanbeik jpʼelantik skʼopike. Ta tsʼakal jutuke chakʼik xa ox 23 estudio.
¿Kʼusi kʼot ta pasel kʼalal laj stakʼinike? Xi chal li Daniele: «Kʼalal ta jnop ti chisutkutik batel ta Españae, chlik lokʼuk yaʼlel jsatkutik». Tsvul tajek yoʼontonik ti chiktaik komel li s-estudioike. Pe jun u ta mas tsʼakale, oy kʼusi laj yichʼik albel ti labal to sba laj yaʼiike. Xi chal li Miriame: «Laj yalbunkutik ti laj kichʼkutik biiltasel ta prekursor espesiale. Limuyubajkutik tajek ti te likomkutik li bu onoʼox oyunkutike».
LI KʼUSI MAS XMUYUBAJIK-OE
Ta skoj ti oy kʼusitik jel li ta organisasione, li Daniel xchiʼuk Miriame maʼuk xa prekursor espesial komik li ta 2015. ¿Kʼusi van tspasik un? La spat yoʼontonik ta sventa li kʼusi chal Salmo 37:5 ti xi chale: «Acʼbo sventain Mucʼul Dios scotol li cʼusi chapase; chʼuno ta avoʼnton ti xuʼ yuʼune, jech chaspasbot li cʼusi tsots scʼoplal oy ta avoʼntone». La sta yabtelik ti bu xakʼ yorail xtunik ta prekursor regulare, vaʼun li avie te chtunik ta jun tsobobbail ta bikʼit lum ta Veraguas (Panamá).
Xi chal li Daniele: «Kʼalal skʼan toʼox xilokʼkutik batel li ta Españae, mu toʼox jnaʼkutik lek mi xkuch onoʼox kuʼunkutik ti lekuk noʼox sba li jkuxlejalkutike. Pe li avie jaʼ jech jkuxlejalkutik xchiʼuk oy kuʼunkutik li kʼusitik mas tsotsik skʼoplale». ¿Kʼusi van ti mas xmuyubajik yuʼune? Xi chalike: «Ti ta jkoltatik li krixchanoetik ti bikʼit yakʼoj sbaik ti tskʼan chojtikinik li Jeovae jaʼ me chakʼ jmuyubajeltik ti mu kʼusi xkoʼolaj-oe».
