LI AVIE mu kʼunuk ta tael jun oʼontonal ta skoj ti noj ta choplejal li balumile. Akʼo mi yakal ta jkʼupintik uni jutukuk, pe vokol tajek sventa jechuk-o xkaʼi jbatike. ¿Kʼusi beiltaseletik ta Vivlia xuʼ skoltautik sventa jtatik li melel jun oʼontonale xchiʼuk ti mu xchʼay kuʼuntike? ¿Kʼuxi xuʼ jkoltatik yantik yoʼ staik li jun oʼontonal eke?

¿Kʼusi skʼan jpastik sventa jkʼupintik li jun oʼontonale? Skʼan nopol oyutik ta stojolal li Jeovae. Mi jech ta jpastike, chabibil me chkaʼi jbatik xchiʼuk tskoltautik sventa mu xchʼay kuʼuntik li jun oʼontonale. Jech xtok, skʼan oyuk jlekil amigotik. Pe baʼyel jkʼeltik batel kʼuxi xuʼ lek xkil jbatik xchiʼuk li Jeovae.

Kʼalal ta jchʼunbetik li smantaltak Jeova xchiʼuk li beiltaseletik yuʼune, chkakʼbetik yil ti jpatoj koʼontontik ta stojolal xchiʼuk ti ta jkʼantik ti junuk noʼox koʼontontik xchiʼuke (Jer. 17:7, 8; Sant. 2:22, 23). Mi jech ta jpastike, chnopaj ta jtojolaltik li Diose xchiʼuk chakʼbutik li jun oʼontonale. Xi chalbutik li Isaías 32:17: «Li tuqʼuil chapanele chlamaj cʼop yuʼun; li lequil coltaele chacʼ jun coʼntontic, muʼyuc cʼop-oʼnton chcaʼitic o yuʼun». Lek me chkaʼi jbatik mi ta sjunul koʼontontik ta jchʼunbetik li smantaltak Jeovae (Is. 48:18, 19).

Li Jeovae chakʼbutik jun jmotontik sventa jechuk-o jkʼupintik li jun oʼontonale, ¿kʼusi jaʼ taje? Jaʼ li chʼul espiritue (Ech. 9:31).

Kʼalal laj yal jtakbol Pablo «li talelaletik chakʼ chʼul espiritue», jaʼ ta yoxtosal laj yalbe skʼoplal li jun oʼontonale (Gal. 5:22, 23). Jech oxal, tsots me skʼoplal ti xkakʼtik abtejuk ta jtojolaltik li chʼul espiritu yoʼ jtatik li jun oʼontonal ta melele. Jkʼeltik batel chaʼtosuk kʼusi  skʼan jpastik sventa skoltautik li chʼul espiritue.

Li baʼyel kʼusi skʼan jpastike jaʼ ti jnopes jbatik ta xchanel li Jvivliatike (Sal. 1:2, 3). Kʼalal ta jnopbetik skʼoplal li kʼusi chal Skʼop Diose, jaʼ tskoltautik li chʼul espiritu yoʼ xkaʼibetik smelolal kʼu yelan chil Jeova li kʼusitike. Jech kʼuchaʼal liʼe, ta jchantik kʼuxi chut Jeova sventa junuk noʼox yoʼonton xchiʼuk ti kʼu yuʼun toj tsots skʼoplal chil ti jechuk spase. Jaʼ yuʼun, mi chkakʼ ta jkuxlejaltik li kʼusi ta jchantik ta Vivliae xuʼ me jtatik mas jun oʼontonal (Prov. 3:1, 2).

Li xchaʼtosal kʼusi skʼan jpastike jaʼ ti jkʼanbetik xchʼul espiritu li Jeovae (Luk. 11:13). Yuʼun xi chalbutik ta jamale: «Li jun oʼontonal yuʼun Dios ti toj echʼ xa noʼox leke, ti jaʼ mu sta li snopben krixchanoetike, chchabi avoʼontonik xchiʼuk anopbenik ta stojolal li Kristo Jesuse» (Filip. 4:6, 7). Li Jdiostike chakʼbutik jun oʼontonal mi nopolik noʼox ta jkʼanbetik li xchʼul espiritue, taje jaʼ noʼox chakʼbe li buchʼutik jaʼ yamigotak ta melele (Rom. 15:13).

Li Vivliae ep skoltaoj krixchanoetik yoʼ sjel li xkuxlejalike xchiʼuk ti junuk noʼox yoʼontonik ta stojolal li Jeovae, ti junuk noʼox yoʼonton ta stukike xchiʼuk ta stojolal li yantike. Jkʼeltik junchibuk skʼelobiltak.

Li ta tsobobbailetike oy toʼox van krixchanoetik ti anil snaʼ xlik skʼakʼal yoʼontonike. Pe li avie, mas xa snaʼ xkʼanvanik, oy xa stsʼikemal yuʼunik, jun xa noʼox yoʼontonik xchiʼuk oy xa yutsil yoʼontonik * (Prov. 29:22). Jkʼelbetik skʼoplal chaʼvoʼ ermanoetik ti laj yichʼik koltael sventa xchanik spajesel sbaik xchiʼuk ti jun xa yoʼontonik ta stojolal li ermanoetike.

Kʼalal skʼan toʼox xchan Vivlia li Davide, oy kʼusitik chopolik chal ta skoj ti mu snaʼ spajes sbae, yuʼun nopem xaʼi tsloʼilta batel li krixchanoetike xchiʼuk mu snaʼ xichʼ ta kʼux li yutsʼ yalale. Pe laj yakʼ venta ta tsʼakal ti skʼan sjel li stalelale. ¿Kʼusi van koltaat sventa sta li jun oʼontonale? Xi chal kaʼitike: «Lik kakʼ ta jkuxlejal li beiltaseletik ta Vivliae, vaʼun lik jkʼuxubin jbakutik mas li ta kutsʼ kalale».

 Li Rachel eke jel stalelal ta skoj ti kʼu yelan chʼi talele. Xi chale: «Ta skoj ti nopem xaʼi tstsak sbaik ta utel jujun kʼakʼal li kutsʼ kalale, jaʼ jech la jchan ek xchiʼuk vokol chkaʼi stsalel li avie». ¿Kʼusi spasoj tal sventa sta li jun oʼontonale? Xi to chalbutike: «Skotol ora ta jkʼanbe koltael li Jeovae».

Li sloʼil David xchiʼuk Rachele jaʼ noʼox chib yuni kʼelobil ti oy sbalil kʼalal chkakʼ ta jkuxlejaltik li beiltaseletik xchiʼuk kʼalal ta jkʼanbetik li xchʼul espiritu Jeovae. Akʼo mi tsots li kuxlejal avie, xuʼ me jkʼupintik jun oʼontonal. Jech xtok, xuʼ jmoj tsobolutik li ta kutsʼ kalaltik xchiʼuk li ta tsobobbaile. Xi to chalbutik li Jeovae: «Junuk me avoʼontonik xchiʼuk skotol li krixchanoetike» (Rom. 12:18). ¿Kʼuxi xuʼ spas kuʼuntik taje? ¿Kʼusi sbalil ta jtatik kʼalal jun noʼox koʼontontik xchiʼuk li yantike?

Kʼalal ta jcholtik mantale, jaʼ jech ta jkoltatik krixchanoetik yoʼ stabeik sbalil li lekil aʼyej ta sventa li Ajvalilale (Is. 9:6, 7; Mat. 24:14). Xkuxet-o koʼontontik kʼalal lek chchʼamik li aʼyeje, yuʼun chkoltaatik sventa mu svul yoʼontonik xchiʼuk ti mu x-ilinik ta skoj li kʼusitik chkʼotanuk ta pasele. Maʼuk noʼox, yuʼun tsta spatobil yoʼontonik xchiʼuk chchʼunik li tojobtasel liʼe: «Jaʼ saʼic ti cʼu xʼelan jun avoʼntonique, jaʼ noʼox pasic o batel» (Sal. 34:14).

Kʼalal ta jcholbetik mantal li krixchanoetik ta sba veltae, xuʼ van mu toj lekuk tstakʼbutik (Juan 3:19). Akʼo mi jech, li chʼul espiritue jaʼ tskoltautik sventa lekuk noʼox jkʼopontik xchiʼuk ti xkichʼtik ta mukʼe. Mi jech la jpastike, jaʼ yakal ta jchʼuntik li kʼusi laj yal Jesus liʼe: «Kʼalal cha-ochik ta yut nae kʼoponik li buchʼutik te oye. Mi staik-oe komuk ta stojolalik li jun oʼontonal chavalbeike, pe mi mu staik-oe, sutuk tal ta atojolalik li jun oʼontonal laj avalbeike» (Mat. 10:11-13). Toj lek ti jech jpastike, yuʼun jun koʼontontik chijlokʼ batel ta sna li jun krixchanoe xchiʼuk xuʼ van xchikinta li ta mas tsʼakale.

¿Kʼuxi to xuʼ xijkoltavan sventa oyuk li jun oʼontonale? Jaʼ kʼalal ta rason ta jkʼopontik li yaj-abteltak ajvalile akʼo mi chkontrainvanik li jlome. Kalbetik junuk skʼelobil, jun ajvalil ta Africae oy kʼusitik chopol chil xchiʼuk mu xakʼ permiso sventa xichʼ vaʼanel li Salonetik sventa Tsobobbaile. Vaʼun, oy jun ermano ti tun toʼox ta misioneroal te ta Africae, laj yichʼ takel batel ta Londres (Inglaterra) sventa xchapaj li kʼopetike xchiʼuk ti xalbe yaʼi li yajkʼopojel ajvalil (embajador) ti muʼyuk tsaʼik kʼop ta sventa li abtel tskʼan tspasik ta África li stestigotak Jeovae. Pe ¿kʼusi van kʼot ta pasel?

Xi chal li ermanoe: «Kʼalal likʼote, laj kakʼ venta ti jaʼ te likem talel ta slumal África li buchʼu te chchʼamvane, yuʼun jaʼ slapojbe li skʼuʼilale. Ta skoj ti jchanojbe li skʼopike jaʼ jech lik jkʼopon. Labal to sba laj yil xchiʼuk xi laj sjakʼbune: ‹¿Mi oy buchʼu tal asaʼ?›. Ta slekil koʼonton laj kalbe ti ta jkʼan ta jchiʼin ta loʼil li yajkʼopojel ajvalile. Vaʼun, la skʼopon echʼel ta telefono, kʼalal lokʼ talele, tal skʼoponun. Te lik kalbe smelolal li yabtel tspasik li stestigotak Jeovae xchiʼuk lek la xchikintabun».

Koliyal ti lek la xchapbe smelolal li ermanoe, li yajkʼopojel ajvalile ep kʼusitik muʼyuk xa chopol laj yil ta sventa li abtelal ta jpastike. Ta mas tsʼakale laj yakʼ permiso li ajvalil ta Africa yoʼ xichʼ vaʼanel li salonetike. ¡Muyubajik tajek li ermanoetike! Jamal xvinaj ti oy sbalil kʼalal chij-ichʼvan ta mukʼe, yuʼun chakʼ ti junuk noʼox koʼontontike.

Li avie kuxulutik xa ta jun paraiso ta mantal ti jun noʼox koʼontontike. Sventa jechuk-o jkʼupintike, skʼan xkakʼ kipaltik ta yakʼel ta ilel li jtos talelal chakʼ chʼul espiritu ti la jchantike. Li kʼusi mas tsots skʼoplale jaʼ ti chakʼbutik sbendision li Jeovae xchiʼuk mas to me ta jkʼupintik jun oʼontonal li ta achʼ balumile (2 Ped. 3:13, 14).