¿Mi jkʼanojtik ta melel li Skʼop Diose?
«La achʼamik kʼalal laj avaʼiik li skʼop [Diose] [...] la achʼamik ti kʼu onoʼox yelan ta melele, ti jaʼ skʼop Diose» (1 TES. 2:13).
KʼEJOJ: 37, 51
1-3 1) ¿Kʼusi van kʼot ta pasel ta stojolalik li Evodia xchiʼuk Sintikee? (Kʼelo li lokʼol ta slikebale). 2) ¿Kʼusi xuʼ jpastik sventa muʼyukuk jkʼoptik xchiʼuk li kermanotaktike?
LI YAJTSʼAKLOMUTIK Kristoe toj ep sbalil chkiltik li Vivliae, yuʼun jnaʼojtik ti jaʼ yakʼojbutik li Diose. Li tojobtaseletik chakʼe tskoltautik sventa mu xlik jkʼoptik xchiʼuk chalbutik mantal kʼalal oy kʼusi chopol chbat ta pasel kuʼuntike. ¿Kʼu yelan chkaʼitik li tojobtaseletik taje? Jnoptik ta sventa chaʼvoʼ ermanaetik ta baʼyel siglo ti tʼujbil chbatik ta vinajel ti Evodia xchiʼuk Sintike sbiike. Chal Vivlia ti ayan skʼopike, akʼo mi muʼyuk chal kʼusi ti lik-o skʼopike. Jnoptik noʼox ti kʼusi kʼot ta pasele.
2 Xuʼ van laj yikʼ ta veʼel jlom ermanoetik li Evodiae, pe muʼyuk laj yikʼ ta veʼel li Sintikee. Kʼalal laj yaʼi Sintike ti kʼu yelan xmuyubajik tajek echʼ yuʼunike, ilin tajek, xuʼ van xi la snope: «Mu jchʼun chkaʼi ti muʼyuk xi yikʼ ta veʼel li Evodiae, ¡kaloje kamiga jbakutik tajek!». Xuʼ van la snop ti ch-iltaat yuʼun li Evodiae xchiʼuk ti mu skʼan xkʼelate, jaʼ yuʼun li Sintike eke laj yikʼ ta veʼel li ermanoetik taje, pe muʼyuk xikʼ ta veʼel li Evodiae. Xuʼ van jaʼ sok-o yoʼonton yuʼunik ek li yan ermanoetike. Li Vivliae chal ti albatik Filip. 4:2, 3).
mantal yuʼun Pablo li ermanaetik taje xchiʼuk ti tijbat yoʼontonik sventa xchap li skʼopike. Ta melel, la xchʼunik mantal li ermanaetik taje xchiʼuk xmuyubajik-o tunik ta stojolal li Jeovae (3 Li voʼotik avi eke xuʼ van oy jkʼoptik xchiʼuk junuk ermano ta tsobobbail. Pe xuʼ me jchapantik o xuʼ mu xlik jkʼoptik. ¿Kʼuxi? Jaʼ ti jchʼuntik li tojobtaseletik ta Vivliae. Kʼalal ta jchʼuntik li tojobtaseletike, jaʼ chkakʼtik ta ilel ti ta melel jkʼanojtik li Skʼop Diose, li Vivliae (Sal. 27:11).
LI VIVLIAE CHCHANUBTASUTIK KʼUXI XUʼ JPAJTSAN JBATIK
4, 5. ¿Kʼusitik tojobtasel chakʼbutik Skʼop Dios sventa xijtojob ta spajtsanel jbatik?
4 Bakʼintike vokol tajek chkaʼi ta spajtsanel jbatik. Yuʼun xuʼ van chij-ilinutik o chkat tajek koʼontontik kʼalal oy buchʼu chopol kʼusitik tspasbutik ta skoj jtsʼunbaltik, jlumaltik o ta skoj ti jelel skoloral jbekʼtaltike. Pe xuʼ van mas to kʼux chkaʼitik mi jaʼ jun ermano ti jech tspasbutike. Kʼalal jech chkʼot ta jtojolaltike, ¿kʼuxi van xuʼ skoltautik li tojobtaseletik ta Skʼop Diose?
5 Snaʼoj Jeova kʼusi xuʼ xkʼot ta pasel mi mu jpajtsan jbatike. Yuʼun kʼalal chij-iline xuʼ van oy kʼusi xkaltik o jpastik ti chopol chkaʼi jbatik yuʼun ta tsʼakale. Li Jeovae tstojobtasutik ta Vivlia ti skʼan jpajtsan jbatike. Xi chalbutike: «Mu me ta aniluc noʼox xaʼilin». ¿Mi mu jechuk ti tskoltautik tajek sventa mu xlik jkʼoptik li tojobtasel taje xchiʼuk ti mu xij-ilin ta anile? (kʼelo Eclesiastés 7:9; Proverbios 16:32). Chalbutik Vivlia xtok ti skʼan xkakʼbetik perton li yantike. Li Jesuse laj yal ti muʼyuk tspasbutik perton Jeova mi mu jechuk ta jpastik eke (Mat. 6:14, 15). ¿Mi skʼan to van jchantik spajtsanel jbatik xchiʼuk ti x-ayan mas ta koʼontontik spasel pertone?
6. Mi mu jpajtsan jbatike, ¿kʼusi van xuʼ xkʼot ta pasel?
6 Mi mu jnaʼtik spajtsanel jbatike, xuʼ van chij-ilin-o skotol ora xchiʼuk xlik jpʼajtik li kermanotike. Maʼuk noʼox, yuʼun xuʼ van jech xaʼi sbaik kuʼuntik ek li ermanoetik ta tsobobbaile. Xuʼ van mu xkakʼtik ta ilel ti chij-iline xchiʼuk ti ta jpʼajtik li kermanotike. Pe ta onoʼox xakʼik venta ta tsʼakal xchiʼuk xuʼ van xnamajik ta jtojolaltik (Prov. 26:24-26). Mi oy jech kʼot ta pasel ta jtojolaltike ta me skoltautik ta Vivlia li moletik ta tsobobbaile, sventa mu jechuk jpastik xchiʼuk ti xkakʼbetik perton li yantike (Lev. 19:17, 18; Rom. 3:11-18). Ti yuʼunuk jaʼ jech yakal ta jnuptantike, ¿mi ta van jchʼuntik li tojobtaseletik ta Vivliae?
TSBEILTAS STEKLUMAL LI JEOVAE
7, 8. 1) ¿Kʼu yelan tsbeiltas steklumal li Jeovae? 2) ¿Kʼusitik mantaletik chalbutik li Vivliae xchiʼuk kʼu yuʼun skʼan jchʼuntik?
7 Li Jeova avie, tsbeiltas xchiʼuk chchanubtas li buchʼutik te kapal skʼoplalik li ta jvokʼ s-organisasion ta Balumile. ¿Kʼu yelan tspas? Sbiiltasoj ta «jolil ta stojolal tsobobbail li Kristoe» (Efes. 5:23). Vaʼun li Kristoe eke sbiiltasoj «li tukʼil xchiʼuk pʼijil mosoil» sventa xchanubtas xchiʼuk sbeiltas li steklumal Diose (Mat. 24:45-47). Ta skoj ti jaʼ Skʼop Dios li Vivliae, li mosoil taje toj ep sbalil chil. Jaʼ jech laj yil li jtsop jbeiltasvanej ta baʼyel sigloe (kʼelo 1 Tesalonicenses 2:13) ¿Kʼusitik mantaletik chalbutik li Vivliae?
8 Chalbutik Vivlia ti skʼan nopoltik noʼox jtsob jbatike (Evr. 10:24, 25). Tstijbutik koʼontontik sventa jmojuk kʼusi jchʼunojtik (1 Kor. 1:10). Chalbutik xtok ti skʼan ‹jsaʼilantik baʼyel li Ajvalilal yuʼun Diose› (Mat. 6:33). Chalbutik ti skʼan xbat jcholtik mantal ta jujupʼej naetike, ti bu oy ep krixchanoetike xchiʼuk ta buyuk noʼox (Mat. 28:19, 20; Ech. 5:42; 17:17; 20:20). Jech xtok, li Vivliae chalbe mantal moletik ta tsobobbail sventa sakuk noʼox li tsobobbailetike (1 Kor. 5:1-5, 13; 1 Tim. 5:19-21). Chalbutik ti skʼan sakuk li jbekʼtaltike, ti mu jnoptik o jpastik li kʼusi tspʼaj Jeovae (2 Kor. 7:1).
9. ¿Buchʼu stunesoj Jesus sventa skoltautik ta yaʼibel smelolal li Skʼop Diose?
9 Jlom Krixchanoetike chalik ti mu la persauk xichʼik albel smelolal li kʼusi chchanubtasvan li Vivliae. Pe li Jesuse lik stunes tal ta 1919 «li tukʼil xchiʼuk pʼijil mosoil» sventa skolta li steklumal Dios ta yaʼibel smelolal li Vivliae xchiʼuk ti xchʼunbeik smantale. Kʼalal ta jchʼuntik li beiltaseletik ta Vivliae, jaʼ me jech sak, jmoj xchiʼuk jun yoʼonton li tsobobbaile. Jech oxal, xi jakʼbe jbatike: «¿Mi tukʼ van chkakʼ jba ta stojolal li Jesuse xchiʼuk ta jchʼun li mantaletik chal talel li tukʼil xchiʼuk pʼijil mosoile?».
ANIL TAJEK CHANAV LI SKARETA JEOVAE
10. ¿Kʼu yelan chichʼ albel skʼoplal ta slivroal Ezequiel li jvokʼ s-organisasion Jeova ta vinajele?
10 Li Vivliae chal ti lek chapal li yajtuneltak Jeova ta vinajele. Jech kʼuchaʼal liʼe, li Ezequiele akʼbat yil ti te tikʼil ta skareta li Jeovae xchiʼuk ti anil tajek chanav jaʼ ti bu jotukal skʼan xbat li Jeovae (Ezeq. 1:4-28). Li kareta taje jaʼ skʼan xal li jvokʼ s-organisasion Jeova ti te oy ta vinajele. Li jvokʼ s-organisasion Jeova taje persa onoʼox chchʼun li beiltasel chakʼ Jeovae. Jech xtok, jaʼ tsbeiltas li jvokʼ s-organisasion liʼ ta Balumile. Jnoptik ta sventa li kʼusitik jelem talel ta s-organisasion Dios leʼ xa tal ta slajunebaltik jabile. Jvules ta joltik ti jaʼ Jeova tsbeiltas s-organisasion sventa xichʼ jelel li kʼusitike. Li xnichʼon ti jaʼ li Kristoe xchiʼuk li anjeletike poʼot xa me slajesik li chopol balumile. Jaʼ jech skotolik chichʼik ta mukʼ li Jeovae, li sbie xchiʼuk li sderecho sventa ch-ajvalilaje.
Ta jtojtik tajek ta vokol ti yakʼoj tajek yipik ta abtel li kermanotaktike. (Kʼelo parafo 11).
11, 12. ¿Kʼusi spasoj tal s-organisasion Jeova li ta slajebal xa kʼakʼale?
11 Jnopbetik skʼoplal li kʼusitik spasoj tal s-organisasion Jeova li ta slajebal xa kʼakʼale. Baʼyel kalbetik skʼoplal li naetik ta xichʼ vaʼanele. Ta sienal xa noʼox ermanoetik tsots abtejemik tal ta svaʼanel li achʼ smeʼ nail abtelal ta Warwicke (Nueva York, Estados Unidos). Jech xtok, ta smilal xa noʼox ermanoetik yakalik svaʼanel Salonetik sventa Tsobobbail xchiʼuk Beteletik ta spʼejel Balumil. Li ermanoetik taje jaʼ chichʼik beiltasel yuʼun li Departamento sventa Svaʼanel salonetik xchiʼuk yan kʼusitik ta spʼejel Balumile. ¿Mi mu jechuk ti ta jtojbetik tajek ta vokol li ermanoetik ti tsots tajek abtejemik tale? Ta melel, mu ta jecheʼuk noʼox chvaʼi li naetik taje, yuʼun jaʼ koliyal li yajtuneltak Jeova ti chakʼ yuni matanal takʼinik ti bu kʼalal xuʼ yuʼunike. Li Jeovae chakʼbe bendision li buchʼutik tukʼ yakʼoj sbaike xchiʼuk ti bikʼit chakʼ sbaike (Luk. 21:1-4).
12 Xchibal, jkʼeltik ti kʼu yelan chchanubtasutike. Li Jeovae lek tajek chaʼi xchanubtasel li steklumale (Is. 2:2, 3). Jnoptik noʼox ta sventa li chanob vunetik tstunes sventa xchanubtasutike. Yakʼojbutik li Chanob vun sventa Abtelal ta Prekursore, li Chanob vun sventa j-al lekil aʼyejetik yuʼun Ajvalilal yuʼun Diose, li Chanob vun ta Galaade, li Chanob vun sventa li buchʼutik Achʼik to ta Betele, li Chanob vun sventa Jkʼelvanejetik ta Sirkuito xchiʼuk Yajnilike, li Chanob vun sventa Moletik ta Tsobobbaile, li Chanob vun sventa j-abteletik yuʼun Ajvalilal yuʼun Diose xchiʼuk li Chanob vun sventa Buchʼutik Sbainojik Betel xchiʼuk Yajnilike. Oy kuʼuntik xtok li jpajinatik ta Internet ta jw.org, ti jaʼ te xuʼ jtatik li Vivliae xchiʼuk yan vunetik ta jeltos kʼopetik. Li ta jpajinatik taje xuʼ te jtatik mantaletik sventa ololetik, utsʼ alaliletik xchiʼuk aʼyejetik. ¿Mi yakalutik stunesel li jpajinatik ta Internet ta jw.org li ta cholmantale xchiʼuk li ta yichʼel ta mukʼ Jeova ta kutsʼ kalaltike?
TUKʼUK XKAKʼ JBATIK TA STOJOLAL LI JEOVAE XCHIʼUK JKOLTATIK LI S-ORGANISASIONE
13. ¿Kʼusi oy ta jbatik spasel li yajtunelutik Jeovae?
13 Jaʼ jun mukʼta matanal chkaʼitik ti te kapal jkʼoplaltik li ta s-organisasion Jeovae. Xkojtikintik xa li smantaltak Diose xchiʼuk li kʼusi oy ta yoʼontone, jaʼ yuʼun oy ta jbatik xchʼunbel li smantaltake. Epal krixchanoetike jaʼ toj lek chaʼiik spasel li kʼusitik chopole, pe li voʼotike skʼan jpʼajtik li kʼusi chopole jech kʼuchaʼal tspʼaj kʼusi chopol li Jeovae (Sal. 97:10). Muʼyuk bu ta jchanbetik li buchʼutik chalik ‹ti jaʼ lek li kʼusi chopole xchiʼuk ti jaʼ la chopol li kʼusi leke› (Is. 5:20). Jaʼ noʼox ta jkʼantik ti xmuyubajuk kuʼuntik li Jeovae. Jech oxal chkakʼtik persa ti bu kʼalal xuʼ kuʼuntik ti sakuk noʼox li jbekʼtaltike, li jtalelaltike xchiʼuk ti sakukutik ta mantale (1 Kor. 6: 9-11). Jchʼunojtik lek ti jaʼ sventa jlekilaltik skotol li kʼusi chalbutik Jeova ta Vivliae. Jech xtok, jkʼanojtik li Jeovae xchiʼuk oy-o ta koʼontontik ti tukʼuk xkakʼ jbatik ta stojolale. Jaʼ yuʼun ta jchʼunbetik smantal mi jaʼo teutik ta jnatik, ta tsobobbail, ta kabteltik, ta eskuela o ta buyuk noʼox oyutik (Prov. 15: 3). Kalbetik batel skʼoplal junantik ti bu skʼan tukʼ xkakʼ jbatik ta stojolal li Jeovae.
14. ¿Kʼu yelan xuʼ xakʼik ta ilel ti tukʼ yakʼoj sbaik ta stojolal Jeova li totil meʼiletike?
14 Kʼalal ta jchanubtas kalab jnichʼnabtike. Li ta Vivliae te ch-albatik yuʼun Jeova kʼu yelan skʼan xchanubtas yalab xnichʼnabik li totil meʼiletike. Mi la xchʼunik li mantal taje jaʼ jech chakʼik ta ilel ti tukʼ chakʼ sbaik ta stojolal li Jeovae. Skʼan me mu jechuk snopik kʼuchaʼal li krixchanoetik avie (Efes. 2:2). Jech kʼuchaʼal liʼe, ta junantik lumetike xuʼ van chal totil ti jaʼ oy ta sbaik xchanubtasel yalabik li meʼiletike. Pe li Vivliae jamal chal ti skʼan xchanubtas ta sventa Jeova xnichʼon li totile (Efes. 6:4). Li totil meʼiletik ti skʼanojik tajek Jeovae tskʼanik ti lekuk xil sbaik xchiʼuk Jeova li yalab xnichʼnabike, jech kʼuchaʼal lek laj yil sba xchiʼuk Jeova li Samuel kʼalal bikʼit toʼoxe (1 Sam. 3:19).
15. ¿Kʼuxi chkakʼbetik yil Jeova ti tukʼ oyutik ta stojolal kʼalal oy kʼusi tsots skʼoplal ta jkʼan ta jpastike?
15 Kʼalal oy kʼusi ta jnop ta jpastike. Kʼalal oy kʼusi tsots skʼoplal ta jnop ta jpastike, baʼyel me skʼan jkʼeltik kʼusi tsnop Jeova ta sventa taje. ¿Kʼuxi xuʼ jpastik? Jaʼ ti jsaʼtik li beiltasel ta Vivliae xchiʼuk li ta s-organisasione. Jaʼ jech chkakʼbetik yil Jeova ti tukʼ chkakʼ jbatik ta stojolale. Jech kʼuchaʼal liʼe, jlom krixchanoetike chbatik ta abtel ta yan lum, pe kʼalal mi laj yil yalab xnichʼnabike tstakik batel ti bu likemik tale, sventa jaʼuk stsʼitesbatik yuʼun li yutsʼ yalalike. Taje jaʼ jech tspasik akʼo mi achʼ jvokʼel to li yolike. Vaʼun jaʼ jech xuʼ to x-abtejik ta yan lum li totil meʼiletike. Melel onoʼox ti ta jujuntal ta Romanos 14:12). Jvules ta joltik ti kʼalal oy kʼusi ta jnop ta jpastik ti tsots skʼoplal ta sventa kutsʼ kalaltik xchiʼuk ta kabteltike, skʼan me jnoptik kʼusi chal Vivlia ta sventa taje. Yuʼun toj tunel kuʼuntik ti jaʼuk sbeiltasutik li Jtotik ta vinajele (Jer. 10:23).
jnoptik ta sventa taje. Pe li totil meʼiletike skʼan me snopbeik skʼoplal ti kʼu yelan chil li Jeovae (kʼelo16. 1) ¿Kʼusi kʼot ta nopel yuʼun jun meʼil kʼalal vokʼ yole? 2) ¿Kʼusi koltaat sventa lek kʼusi xkʼot ta nopel yuʼun?
16 Jun nupultsʼakal ti bat ta naklej ta yan lume xchiʼuk ti te laj yil yolike, snopojik xa ox ti tstakik batel ta slumalik sventa te xchʼi xchiʼuk smukʼtot syaya li yolike. Pe jaʼo lik xchan Vivlia xchiʼuk stestigotak Jeova li ajnilale. Vaʼun jaʼ te la xchan ti jaʼ oy ta sba xchanubtasel ta sventa Jeova li yole (Sal. 127:3; Prov. 22:6). Jaʼ yuʼun la snop mi tstak batel xchiʼuk smukʼtot syaya li yole o mi moʼoj. Li antse jaʼ jech la spas kʼuchaʼal chal li Vivliae, la skʼanbe vokol Jeova ti xkoltaat sventa lekuk kʼusi xkʼot ta nopel yuʼune (Sal. 62:7, 8). Laj yalbe li buchʼu chchanubtasat ta Vivliae xchiʼuk li yan ermanoetik ta tsobobbaile. Li yutsʼ yalaltak xchiʼuk li yamigotake sujat tajek sventa stak batel xchiʼuk smukʼtot syaya li yole. Pe li stuke laj yaʼibe smelolal ti mu stakʼ pasel jeche. Li smalale laj yil ti chkoltaat tajek yuʼun ermanoetik li yajnil xchiʼuk li xnichʼone. Taje toj labal laj yaʼi, jaʼ yuʼun lik xchan Vivlia xchiʼuk lik batuk ta tsobajeletik xchiʼuk yutsʼ yalal. Ta melel, muyubaj van tajek kʼalal laj yil ti takʼbat s-orasion yuʼun Jeova li meʼil taje.
17. ¿Kʼusi mantal kichʼojtik albel ti kʼalal chkakʼtik estudioe?
17 Kʼalal chkichʼtik albel mantale. Yan ti kʼuxi xuʼ xkakʼtik ta ilel ti tukʼ chkakʼ jbatik ta stojolal Jeovae jaʼo kʼalal ta jchʼuntik li mantaletik yuʼun s-organisasione. Jech kʼuchaʼal liʼe, jnoptik ta sventa li kʼusi skʼan jpastik kʼalal mi oy xa ox jayibuk velta chkakʼtik estudio li ta livro Chchanubtasvan[e]. Albilutik mantal xtok ti skʼan jchʼakbetik yorail jayibuk minuto kʼalal mi la jchantik ta jujukoj sventa jkoltatik ta yojtikinel mas li s-organisasion Jeovae. Xuʼ jtunestik li video ¿Kʼu yelan li jtsobajelkutike? Xchiʼuk li foyeto ¿Buchʼutik tspasik li kʼusi tskʼan yoʼonton Jeova avie? Jech xtok, albilutik mantal mi tsuts kuʼuntik li livro Chchanubtasvan[e] skʼan jchanubtastik li ta livro ‹Te oyanik-o li ta kʼanelal yuʼun Diose›, akʼo mi yichʼoj xa ox voʼ li j-estudiotike. Jaʼ jech ta jkoltatik sventa ‹lekuk-o tsots li xchʼunel yoʼontonike› (Kol. 2: 7). ¿Mi ta jchʼuntik li mantaletik chkichʼtik albel yuʼun li s-organisasion Jeovae?
18, 19. ¿Kʼusitik skʼan jtojbetik ta vokol li Jeovae?
18 Mu albajuk yepal li kʼusitik skʼan jtojbetik ta vokol li Jeovae. Kalbetik skʼoplal junantik. Baʼyel, «jaʼ kuxulutik yuʼun, chijnikutik xchiʼuk [jaʼ ta sventa] ti oyutike» (Ech. 17: 27, 28). Xchibal, yakʼojbutik li Vivliae. Jkʼanojtik tajek jech kʼuchaʼal li yajtsʼaklomtak Kristo ta Tesalonikae, yuʼun jchʼunojtik «ti jaʼ skʼop Diose» (1 Tes. 2:13).
19 Yoxibal, skʼan jtojbetik ta vokol Jeova ta skoj ti xchanubtasojutik ta Vivlia ti kʼuxi xuʼ xijkʼot ta yamigoe (Sant. 4: 8). Xchanibal, skʼan jtojbetik ta vokol ti te kapal jkʼoplaltik li ta s-organisasione. Jaʼ jech tajek chkaʼi jbatik kʼuchaʼal li jtsʼibajom yuʼun Salmo 136 ti xi laj yale: «Tojbeic ta vocol li Mucʼul Diose, yuʼun jaʼ toj lec yoʼnton, yuʼun sbatel osil mu xlaj o li cʼuxubinel yuʼune» (Sal. 136: 1). Li ta sjunul Salmo 136, chchaʼal ta jujun versikulo ti «sbatel osil mu xlaj o li cʼuxubinel» yuʼun li Jeovae. Mi tukʼ-o chkakʼ jbatik ta stojolal li Jeovae xchiʼuk mi ta jchʼuntik li mantaletik chakʼbutik tal s-organisasione, ta me jkʼupintik-o sbatel osil li kʼuxubinel yuʼune.