VOʼNE xa onoʼox tajek ti tsots skʼoplal chilik ti xakʼik milbil matanal kʼalal chichʼik ta mukʼ li Jeovae. Jech kʼuchaʼal li j-israeletik ta voʼnee chakʼik chonbolometik sventa xchikʼbeik smoton li Diose. Jaʼ yuʼun, li yajtuneltak Diose lek ojtikinbilik ta skoj ti chakʼik matanal sventa «skʼupil kʼoptael li Diose». Pe oy to yan matanaletik xtok ti kʼupil tajek chil li Jeovae (Evr. 13:15, 16). ¿Kʼusi sbalil ta jtatik mi laj kakʼtik li matanaletik taje? Jaʼ ti xkuxet noʼox koʼontontike xchiʼuk ta jtatik mas bendision. Jaʼ yuʼun jkʼelbetik batel junchibuk skʼelobiltak.

Baʼyel kalbetik skʼoplal li Anae, li stuke jaʼ jun j-israel ants ti tukʼ yakʼoj sbae, pe ti kʼusi une mu snaʼ x-alaj, pe oy tajek ta yoʼonton ti x-ayan junuk skereme. Jaʼ yuʼun la skʼanbe Jeova ti akʼo x-akʼbat junuk skereme xchiʼuk xi laj yalbe ta jamale: «Me laj avacʼbune, ta xcacʼ tunuc o avuʼun ti jayib cʼacʼal cuxule» (1 Sam. 1:10, 11). Akʼbat onoʼox yuʼun Jeova li kʼusi la skʼanbee, lik xchiʼin yol, xchiʼuk Samuel laj yakʼbe sbi. Vaʼun kʼalal laj yikta xchuʼ li Samuele, laj yikʼ batel ta chʼulna pasbil ta nukul jech kʼuchaʼal yaloj onoʼoxe sventa te xtun ta stojolal Jeova. ¿Mi akʼbat bendision yuʼun Jeova li Anae? Akʼbat, yuʼun ta mas tsʼakale laj to yil voʼob yalabtak. Li Samuel eke kʼot ta jun j-alkʼop xchiʼuk ta jun jtsʼibajom li ta Vivliae (1 Sam. 2:21).

Jech kʼuchaʼal li Ana xchiʼuk Samuele, li voʼotik eke xuʼ me xkakʼbe jkuxlejaltik sventa xijtun ta stojolal li Jpasvanej kuʼuntike. Li Jesuse laj yal ti ta jtatik mas bendision kʼalal chkakʼtik persa spasbel yabtel li Stote (Mar. 10:28-30).

Avie jaʼ xa kalbetik skʼoplal li Dorkase, ti jaʼ jun yajtsʼaklom Kristo ta baʼyel siglo ti lek ojtikinbil ta skoj ti «lekik tajek kʼusitik tspas xchiʼuk ep matanaletik chakʼ ta xkʼuxul yoʼonton», jaʼ xkaltik, oy kʼusitik lek tspas ta stojolal li yantike. Pe li Dorkase oy kʼusi la snuptan ti kʼux tajek laj yaʼi li ermanoetike, yuʼun «tsakat ta chamel, vaʼun cham». Kʼalal laj yaʼi ermanoetik ti te nopol oy li Pedroe, bat skʼanbeik vokol ti akʼo taluk ta ora yoʼ bu oyike. ¿Kʼusi la spas li Pedroe? Jaʼ ti la xchaʼkuxes li Dorkase. ¡Nopo xa noʼox avaʼi kʼu to yelan xkuxet yoʼonton komik li ermanoetike! Yuʼun jaʼ to sba velta laj yilik ti jech la spas jun jtakbole (Ech. 9:36-41). Li Jeovae mi jsetʼuk la xchʼay ta sjol li kʼusitik la spas Dorkase (Evr. 6:10). Yuʼun li sloʼil xkuxlejale te tsʼibabil kom li ta Vivliae xchiʼuk xuʼ jchanbetik li slekil kʼelobil laj yakʼ ta ilele.

Toj lek ta chanbel stalelal li jtakbol Pablo eke, yuʼun li stuke ta slekil yoʼonton la xchʼak skʼakʼal ta stojolal li yantike xchiʼuk la xchikintabe lek li kʼusi chalike. Xi la stsʼibabe batel li yajtsʼaklomtak Kristo ta Korintoe: «Ta sjunul koʼonton ta jlajes kipal ta aventaik, ta xkakʼ sjunlej jkuxlejal ta atojolalik» (2 Kor. 12:15). Li Pabloe laj yil ta sat stuk ti chakʼ tajek jmuyubajeltik kʼalal ta jkoltatik li yantike. Xchiʼuk oy to yan kʼusi ta jtatik ti mas tsots skʼoplale, ¿kʼusi jaʼ? Jaʼ ti chakʼbutik sbendision xchiʼuk ti lek chilutik li Jeovae (Ech. 20:24, 35).

Ta melel, kʼupil tajek sba chil Jeova kʼalal chkakʼ kipaltik xchiʼuk kʼalal ta jchʼak jkʼakʼaltik ta spasbel li yabtele xchiʼuk kʼalal ta jkolta li kermanotaktike. Pe, ¿mi oy to yan kʼusi stakʼ xkakʼbetik Jeova sventa xkichʼtik-o ta mukʼ? Oy ta melel. Jaʼ ti xkakʼtik li matanal takʼine. Toj ep sbalil mi jech la jkakʼtike, yuʼun toj jtunel sventa jechuk-o xichʼ cholel mantal ta spʼejel Balumil. Taje te smakojbe skʼoplal ti chichʼ akʼbel jutuk stakʼinik sventa sman li kʼusi chtun yuʼunik li misioneroetike xchiʼuk li yan ermanoetik ti chtunik ta tsʼakal ora ti stuk noʼox jeche. Li matanal takʼin xtoke, jaʼ chkoltavan sventa xichʼ jelubtasel ta yan kʼopetik li jvuntike xchiʼuk li videoetike. Jech xtok, jaʼ sventa xichʼ vaʼanel li Salonetik sventa Tsobobbaile xchiʼuk ti xichʼ koltael ermanoetik kʼalal chil svokolik ta tsatsal nikel, nojelal ta voʼ o yan kʼusi tsnuptanik. Jaʼ yuʼun, mi laj kakʼtik ta ilel ti oy slekil koʼontontike, xuʼ me jchʼuntik ta melel ti ta jtatik li bendisione xchiʼuk jaʼ me jech chkichʼtik ta mukʼ Jeova «ta sventa li cʼusitic oy [kuʼuntike]» (Prov. 3:9; 22:9).