KʼALAL chkichʼtik akʼbel jun matanal ti toj lek chkiltike, skʼan me stij koʼontontik ta stojel ta vokol. Li Jesuse laj yakʼ ta ilel ti toj tsots skʼoplal ti jnaʼtikuk stojel ta vokole, jech laj yakʼ iluk kʼalal la xpoxta lajuneb viniketik ti tsakbilik ta jtos kʼexlal sba chamel ti muʼyuk toʼox xpoxile. Li ta lajunvoʼ viniketike jaʼ noʼox jun «sut tal, tsots x-avet tal sventa tstoybe skʼoplal Dios». Xi laj yal li Jesuse: «Lajunvoʼ ta akotolalik ti laj avichʼik poxtaele, ¿mi mu jechuk? Vaʼun chaʼa, ¿bu oyik li balunvoʼ achiʼiltake?» (Lukas 17:12-17). Li loʼil taje, chakʼ ta ilel ti chchʼay noʼox ta joltik li kʼusi lek tspasbutik li yantike.

Jech kʼuchaʼal laj xa kalbetik talel skʼoplale, li pojelale jaʼ jun matanal ti muʼyuk kʼusi xkoʼolaj-oe. Li matanal taje, muʼyuk bu jech akʼbilutik-o. Jaʼ yuʼun, ¿kʼu yelan chavil li mukʼta matanal yakʼojbutik li Diose?

• Ojtikino li buchʼu laj yakʼ li matanale. Li matanal pojelale muʼyuk chakʼbe ta jech noʼox xkuxlejal li krixchanoetike. Jaʼ yuʼun xi laj yalbe Stot li Jesuse: «Jaʼ skʼoplal kuxlejal sbatel osil liʼe, ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3). Jnoptik noʼox avaʼi ti oy buchʼu la spojot kʼalal kʼoxot toʼoxe, ¿mi mu jechuk ti chakʼan chavojtikine xchiʼuk ti chajakʼbe kʼu yuʼun ti jech la spase? Li Jeova Dios ti jaʼ laj yakʼ li matanal pojelal sventa tspojutike, tskʼan ti akʼo xkojtikintik xchiʼuk ti xijkʼot ta  yamigoe. Xi chal li Vivliae: «Nopajanik ta stojolal Dios, vaʼun chnopaj tal ta atojolalik ek» (Santiago 4:8).

• Oyuk xchʼunel avoʼonton li ta pojelale. «Tsta xkuxlejal sbatel osil li buchʼu chakʼ xchʼunel yoʼonton ta stojolal li Nichʼonile» (Juan 3:36). ¿Kʼusi skʼan xal ti chkakʼ xchʼunel koʼontontike? Jaʼ ti oyuk kʼusi jpastike. Sventa xkakʼtik iluk li xchʼunel koʼontontik li ta pojelale skʼan xvinaj ta kabteltik (Santiago 2:17). Sventa jtatik li jun matanale, skʼan jyeʼ jkʼobtik xchiʼuk jchʼamtik. Li voʼot eke, jaʼ me jech skʼan xa «yeʼ akʼob» sventa xachʼam li matanal pojelale. Taje jaʼ me skʼan xal ti skʼan jnaʼtik kʼu yelan tskʼan xijkuxi li Diose xchiʼuk ti xkakʼ ta jkuxlejaltik li kʼusi ta jchantike. * Kʼopono Dios ta orasion, kʼanbo perton xchiʼuk albo ti akʼo lekuk li ajol avoʼontone. Nopajan ta stojolal xchiʼuk pato avoʼonton ti xuʼ chata jun oʼontonal, muyubajel xchiʼuk lekilal ta sbatel osil mi chavakʼ xchʼunel avoʼonton li ta pojelale (Evreos 11:1).

• Batan li ta Snaʼobil slajel Kristoe. Sventa mu jchʼay ta joltik li pojelale, li Jesuse la slikes komel li snaʼobil jujun jabile. Xi laj yale: «Jech xapasilanik-o sventa jnaʼobil» (Lukas 22:19). Li jabil liʼe, li stestigotak Jeovae ta spasbeik ta martes 11 yuʼun avril li Snaʼobil slajel Kristoe, taje jaʼo kʼalal chʼayem xa ox batel li kʼakʼale. Li ta mantal ti mu sta jun ora chjalije, te chichʼ albel skʼoplal ti kʼusi skʼan xal li slajel Jesuse, ti kʼuxi ta jtabetik sbalil li avie xchiʼuk li ta jelavele. Li echʼ jabile, ayik jutuk mu 20 miyon krixchanoetik li ta Snaʼobil slajel Kristo ta spʼejel Balumile. Ta jtakotkutik ta ikʼel li ta tsobajel taje yoʼ jtojbetik ta vokol Dios ta sventa li jun mukʼta matanal laj yakʼbutike.