LI Jordane stsakoj ta skʼob jun sakapunta ti xkoʼolaj ta jun bikʼit barko ti muʼyuk ep sbalil yilele. Pe jaʼ li kʼusi mas ep sbalil chile. Xi chale: «Jaʼ la skʼelanbun li Russell kʼalal bikʼitun toʼoxe, ti jaʼ yamigoik li kutsʼ kalale». Kʼalal cham xa ox li Russell, jaʼ to te laj yaʼi Jordan ti kʼu yuʼun skʼanojik tajek smukʼtot xchiʼuk stot smeʼ li yamigoik taje, yuʼun koltaatik tajek kʼalal jaʼo laj yil svokolike. Xi to chal li Jordane: «Ti laj kaʼibe mas skʼoplal li Russelle, mas to ep sbalil chkil li bikʼit matanal laj yakʼbune».

Li skʼelobil taje chakʼ ta ilel ti jun krixchanoe xuʼ ep sbalil chil o muʼyuk li jun matanal ch-akʼbate, pe li buchʼu snaʼ stoj ta vokole ep tajek sbalil xchiʼuk stuk xa noʼox jech chil. Li ta Vivliae chalbe skʼoplal jtos matanal ti toj ep tajek sbalile, xi chale: «Yuʼun skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16).

Li buchʼu chchʼam li matanal taje, xuʼ chkuxi-o sbatel osil. ¿Mi oy van yan matanal ti jech ep tajek sbalile? Junantik krixchanoetike mu jechuk chilik, pe li melel yajtsʼaklomtak Kristoe toj «kʼupil sba» xchiʼuk ep sbalil chilik (Salmo 49:8; 1 Pedro 1:18, 19). Pe ¿kʼu yuʼun laj yakʼ ta matanal Xnichʼon Dios ta stojolal li krixchanoetike?

Li jtakbol Pabloe xi chalbe smelolale: «Ta jun noʼox vinik och talel li mulil ta balumile, jech ta skoj mulil och talel ek li lajelale, jaʼ yuʼun chcham skotol krixchanoetik» (Romanos 5:12). Li baʼyel vinik ti jaʼ  li Adane, la saʼ smul kʼalal yalel muʼyuk la xchʼunbe smantal li Diose, li stojol taje jaʼ ti chame. Ta smul Adan chcham li snitilultake, jaʼ xkaltik skotol li krixchanoetike.

«Li stojol mulile jaʼ li lajelale, yan li matanal chakʼ Diose jaʼ kuxlejal sbatel osil ta stojolal li Kristo Jesus ti jaʼ Kajvaltike» (Romanos 6:23). Sventa xichʼ pojel li krixchanoetik ta lajelale, li Diose la stak tal ta Balumil li Xnichʼone, ti jaʼ li Jesukristoe, sventa xakʼ ta matanal li stukʼil kuxlejal ta stojolal li krixchanoetike. Koliyal li matanal taje, ti ojtikinbil kʼuchaʼal li ‹pojelale›, li buchʼutik chakʼ xchʼunel yoʼontonik ta stojolal li Jesuse tstaik kuxlejal sbatel osil (Romanos 3:24).

Kʼalal chichʼ albel skʼoplal li bendision tstaik ta stojolal Jesukristo li buchʼutik chtunik ta stojolal Diose, xi laj yal li jtakbol Pabloe: «Jaʼuk akʼo yichʼ tojbel ta vokol Dios ta skoj ti mu xa noʼox xlaj ta alel li matanal muʼyuk tojbil chakʼe» (2 Korintios 9:15). Li pojelale jaʼ jun mukʼta matanal ti mu kʼusi xkoʼolaj-oe. Ta skotol li matanaletik yakʼojbutik ta slekil yoʼonton li Diose, ¿kʼu yuʼun jaʼ mas tsots skʼoplal li pojelale? ¿Kʼusi jelel-o li ta yantik matanaletik yakʼojbutik Diose? * ¿Kʼu yelan skʼan xkiltik? Li yan chib mantaletik chtale jaʼ tstakʼbutik taje.