LI YUTSʼ YALAL Johne te toʼox nakalik ta jun bikʼit jteklum ta Gujarat (India). Li Johne jaʼik mero katolikoetik xchiʼuk li voʼob xchiʼiltak ta vokʼele xchiʼuk li smeʼike. Jaʼuk li stote och ta stestigo Jeova; laj yichʼvoʼ kʼalal nopoltik xa ox li sjabilal 1960. Jaʼ yuʼun chopol tajek chilbeik li srelijion stotike.

Jun veltae, xi albat yuʼun stot li Johne: «Avokoluk bat akʼbo jlik sovre jun kamigo ti jaʼ jchiʼil ta aʼiej mantale». Pe li Johne jaʼo la syayijes jun sbikʼtal kʼob li ta jun sob taje, yuʼun la sjam jun lata. Ta skoj ti tskʼan chchʼun mantale och ta xpixel li sniʼ skʼobe xchiʼuk bat onoʼox yakʼ li jlik sovre taje.

Kʼalal kʼot li ta sna yamigo stote, te nakal la stabe li yajnil ti jaʼ stestigo Jeova eke. Jech oxal jaʼ la xchʼam li sovree, pe li ermanae laj yilbe ti lajem jun sbikʼtal kʼob li Johne. Jech oxal xi laj yalbee: «Ta jpoxtabot bal». La slokʼes tal poxiletik, la skusbe ti bu yayijeme xchiʼuk la xpixbe. Vaʼun, la spasbe tal jun vaso ste xchiʼuk ta yutsil yoʼonton la xcholbe mantal.

Ta skoj ti jech laj yakʼ ta ilel slekil yoʼonton li ermanae, li Johne ta kʼunkʼun jel li kʼusi toʼox tsnop ta stojolal li stestigotak Jeovae. Jaʼ yuʼun oy kʼusitik lik sjakʼbe li ermanae. Yuʼun li stot Johne muʼyuk xa xchʼunoj ti jaʼ Dios li Jesuse xchiʼuk muʼyuk xa jech xchʼunoj ti jaʼ skʼan kʼoponel li Mariae. Li ermanae xchanoj li gujarati kʼope, ti jaʼ li sbatsʼi kʼop Johne, jech oxal lik xchapbe ta Vivlia li kʼusitik jakʼbate. Ta slajeb xa une, laj yakʼbe li foyeto “Estas buenas nuevas del reino”.

Kʼalal la xchan foyeto li Johne te laj yakʼ venta ti jaʼ li melel relijione. Laje bat ta stojolal li spaleike sventa sjakʼbe li kʼusitik laj yalbe li ermanae. Kʼalal jech la sjakʼbee kap tajek sjol li palee, jipbat talel jlik Vivlia xchiʼuk xi tsots albate: «¡La apas ta Satanas chkil!». Xi to albat xtoke: «¿Bu jotukal chal ta Vivlia ti maʼuk Dios li Jesuse? ¿Bu chal ti mu stakʼ jkʼopontik li Mariae? ¿¡Bu jotukal chal!?». Labal to sba laj yil ti jaʼ jech takʼbat yuʼun li palee, xi la stakʼbe sutel li Johne: «Mi jsetʼuk xa bu chbat jtekʼ yan velta li xchʼulna jkatolikoetike». Taje jaʼ onoʼox jech kʼot ta pasel yuʼun.

Ta tsʼakale lik xchʼam jun estudio li Johne. Vaʼun kʼot ta yoʼonton li kʼusi melele xchiʼuk lik spasbe li yabtel Jeovae. Jech xtok, oy jayvoʼuk yutsʼ yalal ti jech tijbat yoʼontonik eke. Kʼalal chil ti bu komem yav syayijemal li Johne jaʼ chvulesbat ta sjol li kʼusi kʼot ta pasel leʼ xa ta 60 jabile: ti jaʼ te laj yojtikin-o mantal ta skoj noʼox ti laj yakʼ ta ilel slekil yoʼonton li jun ermanae (2 Kor. 6:4, 6).