1, 2. 1) ¿Kʼusi abtelal laj yakʼ ta yoʼonton spasel li Jesuse, xchiʼuk kʼu yuʼun? 2) ¿Kʼusi skʼan jpastik sventa jchiʼintik ta abtel li Diose?

LI Jesuse jaʼ toʼox jun karpintero xchiʼuk la xcholbe skʼoplal li lekil aʼyeje (Mar. 6:3; Rom. 15:8). Lek tajek la spas xchaʼtosal li yabtele, yuʼun la xchan lek stunesel li abtejebaletik sventa karpinteroal yoʼ smeltsan ta teʼ li kʼusitik jtunelike. Jech xtok, kʼalal la xcholbe skʼoplal li lekil aʼyejetike, lek la stunes li kʼusitik xchanoj ta Tsʼibetik yoʼ skolta li krixchanoetik sventa xaʼibeik smelolal li kʼusitik melel ta Skʼop Diose (Mat. 7:28; Luk. 24:32, 45). Pe kʼalal 30 xa ox sjabilale, laj yikta li yabtel ta karpinteroal sventa jaʼ xakʼ ta yoʼonton spukbel skʼoplal li ajvalil yuʼun Diose, yuʼun snaʼoj ti jaʼ mas tsots skʼoplal li abtelal taje xchiʼuk laj yal ti jaʼ onoʼox sventa takat talel ta balumil yuʼun li Jeovae (Mat. 20:28; Luk. 3:23; 4:43). Jaʼ laj yakʼ ta xkuxlejal li cholmantale xchiʼuk laj yal ti oy ta yoʼonton ti jechuk spas li yantik eke (Mat. 9:35-38).

² Jutuk mu jkotoltike mu jnaʼtik li karpinteroale, pe jkotoltik chkaltik batel li lekil aʼyeje. Li abtelal taje toj echʼ noʼox tsots skʼoplal yuʼun tskolta sba ta abtelal li Dios eke. Xi chal li Vivliae: ‹Jchiʼil jbatik ta abtel xchiʼuk li Diose› (1 Kor. 3:9; 2 Kor. 6:4). Jnaʼojtik lek ti jaʼ melel skotol li Skʼop Dios jech kʼuchaʼal laj yal li jtsʼibajom yuʼun salmoe (Sal. 119:159, 160). Jaʼ yuʼun jtunestik lek ta cholmantal «li kʼop ti jaʼ sventa li kʼusi melele» (kʼelo 2 Timoteo 2:15). Jech oxal chaʼa, skʼan xkakʼ kipaltik sventa xijtojobuk lek stunesel li Vivliae, yuʼun  jaʼ li kabtejebtik ti toj tsots skʼoplal sventa xojtikinik-o Jeova, Jesus xchiʼuk Ajvalilal li krixchanoetike. Sventa oyuk kʼusi lek xkʼot ta pasel kuʼuntike, li s-organisasion Jeovae oy slokʼesoj talel yan abtejebaletik ti skʼan lek xkojtikintike xchiʼuk ti xi sbie: «Abtejebaletik sventa xijchanubtasvan».

3. 1) ¿Kʼusi skʼan xkakʼ ta koʼontontik spasel ti kʼu sjalil kuxulutik ta mol balumile? 2) Jech kʼuchaʼal chal li Echos 13:48, ¿buchʼutik skʼan jsaʼtik li ta cholmantale?

³ ¿Kʼu yuʼun chkaltik ti jaʼ abtejebaletik sventa chanubtasel ti maʼuk abtejebaletik sventa cholmantale? Kʼalal chkalbetik skʼoplal li cholmantale, jaʼ skʼan xal ti chkaltik junuk aʼyeje. Pe kʼalal chanubtasel xie, jaʼ skʼan xal ti chichʼ chapbel smelolal li kʼusi chal Vivlia sventa xaʼibe smelolal li jun krixchano xchiʼuk ti xakʼ ta xkuxlejal li kʼusi yakal chchane. Jaʼ yuʼun, skʼan xkakʼ ta koʼontontik slikesel chanubtaseletik ta Vivlia ti kʼu sjalil kuxulutik liʼ ta mol balumile. Skʼan ta sjunuluk koʼonton jsaʼtik «li buchʼutik oy lek ta yoʼontonik stael li kuxlejal sbatel osile» xchiʼuk ti jkoltatik sventa xkʼotik ta yajtunel Jeovae (kʼelo Echos 13:44-48).

4. ¿Kʼuxi ta jtatik «li buchʼutik oy lek ta yoʼontonik stael li kuxlejal sbatel osile»?

⁴ ¿Kʼuxi ta jtatik «li buchʼutik oy lek ta yoʼontonik stael li kuxlejal sbatel osile»? Jaʼ ti jcholtik mantal jech kʼuchaʼal la spasik li ta baʼyel sigloe. Jaʼ yuʼun, skʼan jchʼuntik li kʼusi laj yal Jesus liʼe: «Buyuk noʼox jteklum cha-ochik o ta bikʼit lum, saʼik li buchʼu sta-oe» (Mat. 10:11). Li avie, jnaʼojtik ti muʼyuk ta xchʼamik lekil aʼyej li buchʼutik muʼyuk ta yoʼontonike, li buchʼutik xtoyet noʼox chaʼi sbaike xchiʼuk li buchʼutik muʼyuk ta yoʼonton chojtikinik li Diose. Jech oxal, jaʼ ta jsaʼtik li krixchanoetik ti bikʼit yakʼoj sbaike, ti oy ta yoʼontonike xchiʼuk ti tskʼan tajek chojtikinik li kʼusi melel ta Vivliae. Kalbetik junuk skʼelobil li kʼusi la spas Jesus kʼalal jaʼo ch-abtej ta karpinteroale, li stuke ta van sabe lek steʼel sventa smeltsan li mexaetike, li xilaetike, li tiʼ naetik xchiʼuk li kʼatlom teʼetike. Kʼalal mi la sta li teʼe, lek ta stunes li yabtejebtak sventa smeltsan li kʼusitike. Veno, li voʼotik eke skʼan ti baʼyeluk jsaʼtik li krixchanoetik ti oy ta yoʼontonik mantale, vaʼun xuʼ xlik jtunestik li abtejebaletik sventa xkʼotik ta yajchankʼoptak Jesuse (Mat. 28:19, 20).

5. ¿Kʼusi skʼelobil chakʼ ta ilel ti skʼan xkojtikintik lek li abtejebaletik sventa chanubtasele? (Kʼelo li lokʼol ta slikebale).

⁵ Jeltos kʼusitik chtun-o li jujun abtejebaletike. Jnopbetik skʼoplal li abtejebaletik ti yikʼaluk van la stunes Jesus kʼalal ch-abtej toʼox ta karpinteroale. * Jech kʼuchaʼal liʼe: Laj van stunes abtejebaletik sventa spʼis li teʼetike, sventa xtuchʼ, sjom o spas ti kʼu yelan chkʼanbate, sventa stukʼibtas o sventa stsʼak li teʼetike. Li abtejebal sventa chanubtasel eke jelajtik kʼusitik chtun-o ta jujuntal. Toj tsots skʼoplal skotol li kabtejebtike, jaʼ yuʼun ta jkʼeltik kʼuxi xuʼ jtunestik.

6, 7. 1) Li voʼote, ¿kuxi atunesoj talel li tarjeta ti chalbe skʼoplal li jw.org? 2) ¿Kʼusi chaʼtos chtun-o li takel ta ikʼel sventa tsobajele?

⁶ Tarjeta ti chalbe skʼoplal li jw.org. Toj bikʼit li abtejebal taje, pe toj jtunel sventa xojtikinutik-o li krixchanoetike xchiʼuk ti jtaktik echʼel li ta jpajinatik ta Internete. Xuʼ te snaʼik buchʼuutik li stestigoutik Jeovae xchiʼuk xuʼ te skʼanik chanubtasel ta Vivlia. Li avie, oy xa mas ta 400 mil krixchanoetik skʼanojik chanubtasel ta Vivlia li ta jpajinatik ta jw.org. Maʼuk noʼox, yuʼun jujun kʼakʼal tskʼanik chanubtasel ta sienal xa noʼox krixchanoetik. Jaʼ yuʼun, lek ti teuk xkuchet kuʼuntik junuk li tarjeta yoʼ jcholbetik mantal li krixchanoetik kʼalal jaʼo xuʼ chkiltike.

⁷ Vunetik sventa takel ta ikʼel. Oy chaʼtos kʼusi chtun-o li takel ta ikʼel sventa tsobajele. Yuʼun xkoʼolaj ti xi ch-albatike: «Ta jtijkutik avoʼonton ti xachan Vivlia xchiʼuk li stestigotak  Jeovae», mi laje, te ch-albat ti xuʼ xchan Vivlia li ta tsobajeletike o ti xichʼ chanubtasel ta stuk noʼoxe. Jaʼ yuʼun chaʼa, li abtejebal liʼe maʼuk noʼox sventa chkakʼ jbatik ta ojtikinel, jaʼ sventa jtaktik ta ikʼel xtok «li buchʼutik oy ta sjol yoʼontonik ti chtun yuʼunik mantale», jaʼ xkaltik, ti akʼo xchanik Vivlia xchiʼuk voʼotike (Mat. 5:3). Lek ta jchʼamtik skotol krixchanoetik mi kʼotik ta jtsobajeltik akʼo mi muʼyuk xchʼamojik junuk chanubtasel ta Vivlia. Yuʼun jaʼ te chakʼ venta stukik ti ep kʼusi xuʼ xchanik li ta Skʼop Diose.

8. ¿Kʼu yuʼun toj tsots skʼoplal ti xkʼotik ta tsobajel li krixchanoetike akʼo mi uni jkoj noʼox? Albo junuk skʼelobil.

⁸ Toj tsots skʼoplal ti jechuk-o jtaktik ta ikʼel li krixchanoetik sventa xbatik li ta tsobajele akʼo mi uni jkoj noʼox. ¿Kʼu yuʼun? Yuʼun xuʼ te xakʼik venta ti jaʼ chakʼik ta chanel kʼusi melel li stestigotak Jeovae xchiʼuk ti tskoltaik krixchanoetik sventa xojtikinik li Diose, ti mu jechuk tspasik li jecheʼ relijionetike (Is. 65:13). Taje jaʼ jech laj yakʼik venta leʼ xa talel jayibuk jabil li jun nupultsʼakal ti jaʼik li Rei xchiʼuk Linda ti likemik ta Estados Unidose. Li stukike yichʼojik ta mukʼ Dios xchiʼuk tskʼan tajek chbatik ta chʼulna sventa xojtikinik lek li Diose. Jaʼ yuʼun kʼot ta nopel yuʼunik ti tskʼelik li jujun chʼulna li ta jteklum bu nakalike. Pe toj ep li chʼulnaetike xchiʼuk oy epal relijionetik. Ta slikebale, oy chaʼtos kʼusi la snop tspasik sventa xkomik ta junuk relijione. Li baʼyele, jaʼ ti oyuk kʼusi xchanik ta Vivlia kʼalal chbatik ta junuk chʼulnae. Li xchibale, jaʼ ti lekuk slap skʼuʼ spokʼik li buchʼutik te chkʼotike. Kʼalal echʼ xa ox jayibuk jabile, echʼik xa ox ta skotol li chʼulnaetike, pe chibajemik xa ox, yuʼun muʼyuk kʼusi jutebuk xchanojik xchiʼuk muʼyuk lek tslap skʼuʼ spokʼik li buchʼutik te chkʼotike. ¿Kʼusi la spasik kʼalal lokʼik batel li ta slajeb chʼulnae? Li Lindae bat ta abtel, li Reie sut batel ta sna. Kʼalal yakal ta xanbal li Reie, te echʼ li ta stsʼel Salon sventa Tsobobbaile, xi la snope: «¿Kʼu yuʼun mu xi-och sventa jkʼel li kʼusi tspasike?». Toj labal sba laj yil ti kʼu yelan li tsobajele. Yuʼun lek tajek stalelalik li buchʼutik te chkʼotik ta tsobajele xchiʼuk lek tajek xvinaj ti kʼu yelan tslap li skʼuʼ spokʼike. Li Reie choti ta sba cholal xchiʼuk lek tajek laj yaʼi li kʼusi la xchane. Jaʼ xkoʼolaj li kʼusi laj yal jtakbol Pablo ta stojolal li krixchanoetik ti jaʼ to sba velta chkʼotik ta tsobajele xchiʼuk ti xi chalike: «Te oy ta atojolalik ta melel li Diose» (1 Kor. 14:23-25). Jech te lik kʼotuk-o ta tsobajel skotol domingo li Reie xchiʼuk ta tsʼakale bat li ta tsobajeletik ta xokol kʼakʼale. Li Linda eke lik xchiʼin batel ta tsobajel li smalale akʼo mi mas xa ox ta 70 sjabilalik, lik xchʼamik jun chanubtasel ta Vivlia xchiʼuk laj yichʼ voʼ xchaʼvoʼalik.

9, 10. 1) ¿Kʼu yuʼun chkaltik ti kʼun ta tunesel li tratadoetike? 2) Chapbo smelolal kʼuxi xuʼ jtunestik li tratado ¿Kʼusi jaʼ li Ajvalilal yuʼun Diose?

⁹ Li tratadoetike. Oy vaxakib jtratadotik ti kʼun tajek ta tunesele xchiʼuk jtunel tajek sventa jlikes-o jloʼiltik xchiʼuk li krixchanoetike. Ti kʼuxi laj yichʼ lokʼesel ta 2013 li tratadoetike, yichʼoj xa pasel imprimir te van voʼmil miyon ta lik. Li kʼusi toj leke, jaʼ ti ta jchantik stunesel skotol kʼalal mi la jchantik stunesel jlikuke, yuʼun koʼol skotol ti kʼu yelan meltsanbile. ¿Kʼuxi xuʼ jtunestik sventa jlikes-o jloʼiltike?

¹⁰ Jnoptik noʼox ti jaʼ ta jtunestik li tratado ¿Kʼusi jaʼ li Ajvalilal yuʼun Diose? Xuʼ xkakʼbetik yil li spat vune xchiʼuk xuʼ xi jakʼbetike: «¿Mi oy ajakʼojbe aba junuk velta kʼusi jaʼ li Ajvalilal yuʼun Diose? ¿Bu junukal chaval ti jaʼ stakʼobil li ta yoxibal liʼe?». Mu ventauk ti kʼu yelan ta stakʼe, jaʼ lek batik li ta yan pajinae xchiʼuk kakʼbetik yil ti bu chal: «Li kʼusi chal li Vivliae», laje, jkʼeltik li Daniel 2:44 xchiʼuk li Isaías 9:6 ti te tsʼibabile. Mi xuʼ chkiltike loʼilajkutik to batel xchiʼuk. Ta slajeb une, akʼbo yil li ta spat tratado ti bu chal: «Jakʼbo aba»: «¿Kʼu van yelan li kuxlejal kʼalal jaʼ xa chventainvan li Ajvalilal yuʼun Diose?». Taje jaʼ tskoltautik sventa xbat jchiʼintik ta loʼil yan velta li jun krixchanoe. Jech oxal kʼalal chbat jchaʼkʼeltike, xuʼ xkakʼbetik yil li xchanobil vukub li ta foyeto Lekil  aʼyejetik yakʼoj Diose, yuʼun jaʼ jtos kabtejebtik sventa jlikestik junuk chanubtasel ta Vivliae.

11. ¿Kʼusi sventa pasbil li jrevistatike, xchiʼuk kʼusi skʼan jnabetik skʼoplal?

¹¹ Li revistaetike. Li Jkʼel osil ta toyol xchiʼuk ¡Despertade! jaʼ li kʼusi mas jelubtasbil ta yan kʼopetik xchiʼuk ti mas pukbil ta spʼejel balumile. Ta skoj ti ep tajek buchʼutik chchanike, li sbi mantal ta slikebal pajinae chichʼ tʼujel lek sventa x-ayan ta yoʼontonik xchanel li krixchanoetik ta spʼejel balumile. Jech oxal, skʼan jtunestik sventa jtijbetik yoʼonton li krixchanoetik yoʼ xchanik li kʼusi toj tsots skʼoplal ta jkuxlejaltik avie. Pe baʼyel skʼan jnaʼtik buchʼu sventa pasbil li jujulik revista yoʼ stabeik sbalile.

12. 1) ¿Buchʼutik sventa pasbil li revista ¡Despertade!, xchiʼuk kʼusi sventa pasbil? 2) ¿Kʼusi lek chkʼot ta pasel aviloj kʼalal chatunes li abtejebal taje?

¹² Li revista ¡Despertade! jaʼ sventa pasbil li buchʼutik xojtikinik jutuk o ti mu xojtikinik jsetʼuk li kʼusi chal Vivliae. Yikʼaluk van mu xojtikinik li kʼusi chakʼ ta chanel li Skʼop Diose, ti mu spat lek yoʼontonik ta stojolal li relijione o yikʼaluk van mu snaʼik mi oy beiltaseletik ta Vivlia ta sventa li xkuxlejalike. Jaʼ yuʼun li revistae pasbil sventa xkakʼbetik xchʼunik ti oy ta melel li Diose (Rom. 1:20; Evr. 11:6). Xchiʼuk jaʼ chkoltaatik sventa xchʼunik ti jaʼ ta melel Skʼop Dios li Vivliae (1 Tes. 2:13). Jaʼ yuʼun, li oxlik ¡Despertad! ti chlokʼ ta sjunul jabil 2018, xi sbie: «El camino de la felicidad», «12 claves para una familia feliz» xchiʼuk «Ayuda para quienes están de duelo».

13. 1) ¿Buchʼutik sventa pasbil Li Jkʼel osil ta toyol sventa skotol krixchanoetike? 2) ¿Kʼusi lek chkʼot ta pasel aviloj kʼalal chatunes li abtejebal taje?

¹³ Li Jkʼel osil ta toyol sventa skotol krixchanoetike, jaʼ te chchapbatik smelolal li chanubtaseletik ta Vivlia li buchʼutik xchʼunojik Dios xchiʼuk ti chichʼbeik ta mukʼ li Skʼope. Yikʼaluk van oy yojtikinobil yuʼunik jutuk li ta Vivliae, pe ti mu xaʼibeik smelolal li kʼusi chchanubtasvane (Rom. 10:2; 1 Tim. 2:3, 4). Li oxib sbi Li Jkʼel osil ta toyol ta sventa li sjunul jabil 2018, jaʼ tstakʼ li sjakʼobiltak liʼe: «¿Mi jtunel-o kuʼuntik li Vivliae?» «¿Kʼusi van chkʼot ta pasel li ta jelavele?» «¿Mi oyot ta yoʼonton li Diose?».

14. 1) ¿Kʼusi sventa li chanib videoetik ti te skʼoplal li ta abtejebaletik sventa chanubtasele? 2) ¿Kʼusi lek kʼotem ta pasel aviloj kʼalal chatunes li videoetik taje?

¹⁴ Li videoetike. Li ta skʼakʼalil Jesuse, skotol li karpinteroetike naka ta kʼabal chabtelanik li teʼetike. Pe avie, oy xa tstunesik abtejebaletik ti ta lus ch-abteje, jech kʼuchaʼal li silobil teʼe, li sjomobile, li xjuxobile xchiʼuk li sbajobil teʼetike. Taje jaʼ jech kʼotem ta pasel ek ta sventa li abtejebaletik ta jtunestik yoʼ xijchanubtasvane, yuʼun maʼuk xa noʼox oy vunetik, oy xa videoetik xtok. Oy chanib videoetik ti te skʼoplal li ta abtejebaletik sventa chanubtasele, xi sbiike: ¿Kʼu yuʼun skʼan jchantik li Vivliae? ¿Kʼu yelan chichʼ akʼel li chanubtasel ta Vivliae? ¿Kʼu yelan li jtsobajelkutike? ¿Buchʼuunkutik li stestigotak Jeovae? Kʼalal ta jchiʼintik ta loʼil ta sba velta li krixchanoetike xuʼ jaʼ jtunestik li videoetik ti chib noʼox minuto chjalije, yan li mas jalike jaʼ jtunestik kʼalal chijchaʼvulaʼanvane xchiʼuk mi mas xokolik li krixchanoetike. Li abtejebaletik taje jaʼ chkoltavan yoʼ xchʼamik junuk chanubtasel ta Vivlia xchiʼuk ti xbatik ta tsobajel li krixchanoetike.

15. Albo junchibuk skʼelobil ti kʼu yelan staojbeik sbalil krixchanoetik li videoetik ta skʼop stukike.

¹⁵ Jkʼeltik kʼusitik lek kʼotem ta pasel yuʼun li videoetike. Oy jun ermana la sta jun ants ti te likem ta Micronesiae xchiʼuk laj yakʼbe yil jun video ta skʼop stuk ti jaʼ li yapese, jaʼ li video ¿Kʼu yuʼun skʼan jchantik li Vivliae? Kʼalal lik skʼel li videoe, xi laj yal li antse: «¡Mu jchʼun chkaʼi ti ta jkʼop oye! Yuʼun li vinik chkʼopoje jaʼ jech snaʼ xkʼopojik ti bu likemun talele». Ta tsʼakale, laj  yal ti tskʼel skotol li kʼusitik chlokʼanuk ta jw.org ta yapés kʼope xchiʼuk ti chchan la li kʼusitik te chvinaje (koʼoltaso xchiʼuk Echos 2:8, 11). Kalbetik skʼoplal yan ermana ta Estados Unidos. Li ermanae oy sjun-ol ti nakal ta yan lume, vaʼun la stakbe echʼel li spajinail ta Internet sventa skʼel ta skʼop stuk li video ¿Kʼu yuʼun skʼan jchantik li Vivliae? Kʼalal laj xa ox skʼel li videoe, la stakbe echʼel jun koreo elektroniko li sjunmeʼe, xi laj yalbee: «Li kʼusi mas labal sba laj kaʼie, jaʼ li bu chal ti jaʼ oy ta skʼob jun chopol tsatsal juʼelal li balumile. Laj xa jkʼan jun chanubtasel ta Vivlia». Li kereme jaʼ te nakal yoʼ bu mu x-akʼbat spas yabtelik li stestigotak Jeovae.

16. Chapbo smelolal kʼusi sventa li jujulik foyetoetik liʼe: 1) Chikintao kʼusi chal Dios sventa chakuxi sbatel osil. 2) Lekil aʼyejetik yakʼoj Dios. 3) ¿Buchʼutik tspasik li kʼusi tskʼan yoʼonton Jeova avie?

¹⁶ Li foyetoetike. Mi oy jun krixchano ti mu snaʼ skʼelel vune o mi chʼabal ta skʼop stuk li vunetik ti lokʼemik ta Vivliae, ¿kʼuxi xuʼ jchanubtastik ta sventa li kʼusi melele? Oy jun abtejebal ti toj tunel kuʼuntike, jaʼ li Chikintao kʼusi chal Dios sventa chakuxi sbatel osil. * Li foyeto Lekil aʼyejetik yakʼoj Diose jaʼ yan abtejebal ti jtunel tajek sventa xuʼ jlikestik junuk chanubtasel ta Vivliae. Xuʼ xkakʼbetik yil li 14 xchanobil ti te yichʼoj talel ta spat foyetoe xchiʼuk jakʼbetik ti bu junukal chtijbat yoʼonton sventa jlikestik xchanel xchiʼuke. ¿Mi oy xa jech jtunesojtik kʼalal chbat jchaʼvulaʼantik li krixchanoetike? Li yoxibal abtejebal sventa chanubtasele jaʼ li foyeto ¿Buchʼutik tspasik li kʼusi tskʼan yoʼonton Jeova avie? ti jaʼ sventa li buchʼutik chkakʼbetik estudio yoʼ xojtikinik li s-organisasion Jeovae. Sventa jnaʼtik kʼuxi lek ta tunesele, xuʼ jkʼeltik li Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj li ta marso ta 2017.

17. 1) ¿Kʼusi sventa li jujulik livroetike? 2) ¿Kʼusitik skʼan spasik li buchʼutik chichʼik voʼe, xchiʼuk kʼu yuʼun?

¹⁷ Li livroetike. Mi lik kakʼtik chanubtasel xchiʼuk jlikuk foyetoe, xuʼ me jeltik ta kʼusiuk ora sventa jaʼ xa xkakʼtik-o chanubtasel li ta livro ¿Kʼusi chchanubtasvan ta melel li Vivliae? Toj lek tajek li abtejebale, yuʼun li buchʼu chkakʼbetik chanubtasele mas ta xchan echʼel li kʼusitik toj tsotsik skʼoplal ta Vivliae. Mi tsuts yuʼun li livro chchanubtasvane xchiʼuk mi yantik xchʼi ta mantal chkiltike, jaʼ xa me chkakʼbetik-o chanubtasel li ta livro ‹Te oyanik-o li ta kʼanelal yuʼun Diose›. * Taje jaʼ chkoltaat sventa xakʼ echʼel ta xkuxlejal li beiltaseletik ta Vivliae. Jaʼ yuʼun, skʼan teuk ta joltik ti skʼan stsuts yuʼunik xchibal livro li buchʼutik ta jchanubtastik ta Vivliae akʼo mi yichʼojik xa ox voʼ. Vaʼun, jaʼ jech tsnaʼik li kʼusitik melel ta Vivliae (kʼelo Kolosenses 2:6, 7).

18. 1) Jech kʼuchaʼal chal li 1 Timoteo 4:16, ¿kʼusi skʼan jpastik, xchiʼuk kʼusi lek chkʼot ta pasel? 2) ¿Kʼusi oy ta koʼontontik stael kʼalal ta jtunestik li abtejebaletik sventa xijchanubtasvane?

¹⁸ Li stestigoutik Jeovae skʼan jpukbetik skʼoplal li kʼusitik melel yoʼ staik kuxlejal sbatel osil li krixchanoetike (Kol. 1:5; kʼelo 1 Timoteo 4:16). Jaʼ yuʼun, yoʼ spas kuʼuntike kichʼojtik akʼbel li abtejebaletik sventa xijchanubtasvane (kʼelo li rekuadro « Abtejebaletik sventa xijchanubtasvan»). Jaʼ yuʼun skʼan jtunestik lek li abtejebaletike. Li jujun jcholmantale xuʼ snop stuk kʼusi abtejebal ta stunes xchiʼuk ti kʼusi orae. Pe skʼan jvules ta joltik ti maʼuk noʼox skʼan jpuktik li vunetike xchiʼuk ti mu xkakʼbetik komel li krixchanoetik ti muʼyuk ta yoʼontonik mantale. Yuʼun li kʼusi ta jkʼantike, jaʼ ti xkʼotik ta yajchankʼop Kristo li buchʼutik oy ta yoʼontonik li mantale, ti chchʼamik li kʼusi melele, ti bikʼit yakʼoj sbaike xchiʼuk ti «oy lek ta yoʼontonik stael li kuxlejal sbatel osile» (Ech. 13:48; Mat. 28:19, 20).