«KʼALAL kichʼoj voʼlajuneb jabile laj kichʼ voʼ, vaʼun kʼalal echʼ vakib ue lik tunkun ta prekursora auksiliar. La jtikʼ jsolisitud sventa xi-och ta prekursora regular kʼalal echʼ jun jabile. Jech xtok, kʼalal tsuts kuʼun li jchanune, ayan ta koʼonton ti xibat ti bu chtun mas jcholmantaletike. Li vaʼ kʼakʼale te nakalun xchiʼuk jyaya ti maʼuk stestigo Jeovae, pe ta jkʼan chilokʼ batel li ta sna jyayae xchiʼuk li ta jlumale. Kʼalal laj yalbun li jkʼelvanej ta sirkuito ti jaʼ lek te noʼox xitun ta jlumale, chopol tajek laj kaʼi. Pe muʼyuk laj kakʼ ta ilel ti kaloje. Jecheʼ xa te xinijnun sutel ta snopel li kʼusi laj yalbune. Xi laj kalbe li jchiʼil ta prekursorale: ‹Jaʼ jech ta jpas jnaʼ kʼuchaʼal li Jonase..., pe bat onoʼox ta Ninive li stuke, jaʼ yuʼun li voʼon eke jaʼ te chitun ti bu chalbeikune›.

»Oy xa ta xchanibal jabil ti chitun ta prekursora liʼ ta jlumale xchiʼuk laj kakʼ venta ti toj lek ti la jchʼun li beiltasele. Li avie ximuyubaj tajek, akʼo mi mu toʼox jkʼan liʼ xitune. Oy jun ue laj kakʼ 24 estudio, taje jaʼ koliyal li Jeovae. Pe maʼuk noʼox, yuʼun lik jchanubtas ta Vivlia li jyayae akʼo mi mu toʼox skʼan».

Jun ants ta Fiyi ti lik xchan Vivliae, skʼan stʼuj bu jotukal chbat, mi chbat ta asamblea o mi jaʼ te chbat li ta skumpleanyo yutsʼ yalale. Li smalale lek laj yaʼi ti xbat li ta asambleae, ti xuʼ jaʼ to xkʼot ta tsʼakal li ta kʼine. Pe kʼalal tsuts li asambleae, laj yakʼ venta ti mu stakʼ xbat li ta kumpleanyoe, yuʼun xuʼ xyal-o ta mantal, jaʼ yuʼun muʼyuk xbat.

Pe xi laj yalbe yutsʼ yalal li vinike: «Te la chtal tana li kajnile, jaʼ to la mi laj li stsobajelik stestigotak Jeovae». Xi laj yal li yutsʼ yalale: «Muʼyuk chtal, yuʼun li stestigotak Jeovae muʼyuk bu tspasik li kumpleanyoe». *

Li kʼusi labal sba laj yil smalal li antse, jaʼ ti tukʼ laj yakʼ sba ta sventa li kʼusi xchʼunoje xchiʼuk li kʼusi chal sjol yoʼontone. Ta skoj ti tukʼ laj yakʼ sbae, la xcholbe mantal smalal xchiʼuk yan krixchanoetik. Vaʼun lik xchan Vivlia li smalale xchiʼuk lik batuk ta tsobajel.