LI MOLETIK ta tsobobbail ta spʼejel balumile, toj ep sbalil chilik li yabtel tspasik ta s-organisasion Jeovae. Jaʼ jun matanal chkiltik li voʼotik eke. Pe achʼtik toe, li moletik ta tsobobbail ti oy xa sjabilalike laj yichʼik albel ti oy kʼusitik maʼuk xa tsbainike xchiʼuk ti jaʼ xa xakʼbeik sbain li moletik ta tsobobbail ti mas to keremike.

Jech oxal ti kʼu xa sjalil laj yichʼ alel tal taje, li jkʼelvanejetik ta sirkuito xchiʼuk li jchanubtasvanejetik ta chanob vunetik ta Vivliae chiktaik li kʼusi sbainojik kʼalal mi laj xa ox staik 70 sjabilalike. Jech xtok, li moletik ta tsobobbail ti yichʼojik xa 80 sjabilalike jaʼ xa chakʼbeik komel sbain yabtelik li buchʼutik mas to keremik jech kʼuchaʼal ti xtunik ta jbabe yuʼun Komite sventa Betel o ta jbabe yuʼun moletik ta tsobobbail. ¿Kʼu yelan yabinoj sbaik li buchʼutik jech kʼotem ta stojolalike? Yakʼojik ta ilel ti tukʼ yakʼoj sbaik ta stojolal Jeova xchiʼuk li ta s-organisasione.

Li Ken ti tun jutuk mu 49 jabil ta jbabe yuʼun Komite sventa Betele, xi chvul ta sjole: «Kʼalal laj kaʼi li aʼyej taje, lek tajek laj kaʼi. Maʼuk noʼox, yuʼun li jun sob taje kalojbe xa onoʼox Jeova ti chtun tajek kuʼunkutik jun jbabe ti masuk to kereme». Epal moletik  ta tsobobbail ti oy xa sjabilalike, jaʼ jech tsnopik kʼuchaʼal li Kene. Skotol li tukʼil ermanoetik taje, jun yoʼonton chtunik ta stojolal li yermanoike. Akʼo mi chopol laj yaʼi sbaik jutuk kʼalal laj yaʼiik li aʼyeje.

Li Esperandio ti jaʼ toʼox li jbabe yuʼun moletik ta stsobobbaile, chvul ta sjol ti chopol jutuk laj yaʼi sba kʼalal laj yaʼi li aʼyeje. Pe jamal laj yal xtok ti ep xa svokoltak ta skoj ti oy xa sjabilale xchiʼuk ti skʼan xa mas xchabi sbae. Akʼo mi jech, tukʼ-o chtun ta stojolal li Jeovae xchiʼuk jaʼ jun matanal ch-ilat yuʼun li ermanoetik eke.

¿Kʼusi kʼotem ta stojolalik li ermanoetik ti chtunik toʼox ta jkʼelvanejetik ta sirkuitoe? Xi chal kaʼitik li Allane: «Litun 38 jabil li ta jkʼelvanej ta sirkuitoe. Jaʼ yuʼun kʼalal laj kaʼi li aʼyeje, chʼayal to kʼot koʼonton». Tukʼ chtun-o ta stojolal Jeova li Allane xchiʼuk jamal chal ti ep sbalil kʼalal chchanubtas li buchʼutik mas to keremike.

Li Russelle tun 40 jabil ta jkʼelvanej ta sirkuito xchiʼuk jaʼ toʼox jchanubtasvanej ta chanob vunetik ta Vivlia. Kʼalal laj yaʼiik xchiʼuk yajnil ti chiktaik li kʼusi sbainojike, chopol tajek laj yaʼi sbaik li ta slikebale, xi chal li ermanoe: «Toj ep sbalil chkilkutik li kʼusi jbainojkutike xchiʼuk oy to kipal chkaʼikutik ti xitunkutik to batele». Skotol li kʼusi xchanojik xchiʼuk yiloj ta xkuxlejalik li Russell xchiʼuk yajnile, tstunesik yoʼ skoltaanik li ermanoetik ti bu chtunike. Li ermanoetik ta tsobobbaile xmuyubajik ti te xchiʼukike.

Li voʼotike xuʼ van mu jechuk kaʼioj jbatik kʼuchaʼal li ermanoetik laj kalbetik skʼoplale. Pe sventa xkaʼibetik smelolal ti kʼu yelan chaʼi sbaike, lek me ti jchaʼkʼeltik li kʼusi chal ta 2 Samuele.

Jvules ta joltik kʼalal laj yichʼ kontrainel yuʼun skerem li ajvalil David ti jaʼ li Absalone. Li Davide jatav lokʼel ta Jerusalen sventa xbat li ta Mahanaim ti te xkom li ta smaleb kʼakʼal ta ukʼum Jordane. Kʼalal te oyik xchiʼuk sviniktak li Davide laj yakʼik venta ti oy kʼusitik chtun yuʼunik sventa xkuxiike. ¿Kʼusi kʼot ta pasel?

Oy oxvoʼ viniketik ti te nakalike laj yakʼ ta ilel slekil yoʼontonik, yuʼun laj yichʼbeik echʼel stemik, sveʼelik xchiʼuk li kʼusitik jtunel yuʼunike. Jun li buchʼu aye jaʼ li Barzilaie (2 Sam. 17:27-29). Kʼalal laj skʼakʼal yoʼonton li Absalone, sut batel ta Jerusalen li Davide, vaʼun li Barzilaie la xchiʼin batel David kʼalal to ta ukʼum Jordan sventa mu kʼusi snuptan ta be. Li Davide laj yalbe Barzilai ti akʼo xbat chiʼinatuk li ta Jerusalene xchiʼuk laj yalbe ti chakʼbe sveʼele akʼo mi mu persauk jech tskʼan akʼbel ta skoj ti jkʼulej tajeke (2 Sam. 19:31-33). Xuʼ van li Davide tsots skʼoplal laj yilbe li stalelale xchiʼuk ti xuʼ xtojobtasat lek ta skoj ti ep kʼusi xchanoj ta xkuxlejale. Li Barzilai eke jaʼ van jun matanal laj yaʼi jechuk ti te chnaki xchiʼuk ti te ch-abtej li ta snail spasobmantal Davide.

Akʼo mi jech, li Barzilaie bikʼit laj yakʼ sba xchiʼuk jamal laj yalbe David ti 80 xa sjabilale xchiʼuk ti oy kʼusitik mu xa spas yuʼune. ¿Kʼu yuʼun jech laj yal  taje? Melel onoʼox ti ep kʼusi xchanoj ti kʼu xa sjalil kuxul tale. Xchiʼuk xuʼ to xakʼ lekil tojobtaseletik kʼuchaʼal «li moletic» ti la stojobtasik li ajvalil Reoboame (1 Rey. 12:6, 7; Sal. 92:12-14; Prov. 16:31). Li Barzilaie jaʼ van chalbe skʼoplal ti mu xa kʼusi mas spas yuʼun ta skoj li sjabilale. Maʼuk noʼox, yuʼun laj yal ti mu xa noʼox stabe smuil li kʼusi tslajese xchiʼuk ti chmak xa xchikine (Ecl. 12:4, 5). Jaʼ yuʼun laj yalbe David ti jaʼ akʼo yikʼ batel ta Jerusalen li Quimame ti yikʼaluk van jaʼ skereme (2 Sam. 19:35-40).

Li kʼusi laj yichʼ alel ta slikebaltike xkoʼolajtik li kʼusi kʼot ta nopel yuʼun li Barzilaie, yuʼun li stuke la stsak ta venta ti kʼu yelan oye xchiʼuk li kʼusi xtojob spasele. Pe li avie, jaʼ laj yichʼ tsakel ta venta ti kʼu yelan chaʼi sbaik xchiʼuk li kʼusitik xtojob spasel li tukʼil moletik ta tsobobbail ta spʼejel balumile.

Li moletik ta tsobobbail laj kalbetik skʼoplal ta slikebale bikʼit yakʼoj sbaik xchiʼuk yakʼojik venta ti ep sbalil chichʼ tael ta s-organisasion Jeova kʼalal chakʼbeik sbain jlom abtelaletik li buchʼutik mas to keremike, yuʼun yantik x-epaj li abtelal skʼan kʼelele. Oy epal moletik ta tsobobbail ti yijik xae xchanubtasojik ermanoetik ti mas to keremike. Jech spasojik kʼuchaʼal Barzilai ti la xchanubtas skereme xchiʼuk li jtakbol Pablo ti la xchanubtas li Timoteoe (1 Kor. 4:17; Filip. 2:20-22). Li ermanoetik ti mas to keremike yakʼojik ta ilel ti ‹jaʼik viniketik jech kʼuchaʼal matanal› xchiʼuk ti xuʼ skolta sbaik «sventa stsatsubtasbel li sbekʼtal Kristoe» (Efes. 4:8-12; koʼoltaso xchiʼuk Números 11:16, 17, 29).

Li ermanoetik ta spʼejel balumil ti jaʼ xa laj yakʼbeik sbain junantik yabtelik li yan ermanoetike, yepajesoj yabtelik ta stojolal li Jeovae.

Xi chal Marco ti tun 19 jabil ta jkʼelvanej ta sirkuitoe: «Li kʼusitik jel ta jkuxlejale jaʼ la skoltaun sventa jkolta o ti xinopaj ta stojolal li smalal ermanaetik ti maʼuk stestigo Jeova li ta jtsobobbailkutike».

Xi chal ek li Geraldo ti tun 28 jabil ta jkʼelvanej ta sirkuitoe: «Li kajnil xchiʼuk voʼone oy kʼusi achʼ ta jkʼan ta jpaskutik, jaʼ ti jkoltakutik li buchʼutik chibajemik ta mantale xchiʼuk ti xkakʼkutik chanubtaseletik ta Vivliae». Li avie, yakal xa chakʼik 15 chanubtasel ta Vivlia xchiʼuk ep xa skoltaojik li buchʼutik chibajemik toʼoxe, yuʼun chkʼotik xa ta tsobajel li avie.

Li Allan ti laj kalbetik skʼoplal ta slikebale, xi chale: «Avie, xuʼ xa jaʼ mas xkakʼ ta koʼontonkutik li cholmantale. Ta jkʼupinkutik tajek xcholel mantal ti bu oy epal krixchanoetike, li ta pʼolmajebaletike xchiʼuk ti bu nakalunkutike. Oy chaʼvoʼ jlakʼnatake chkʼot xchiʼinunkutik bateltik li ta tsobajeletike».

¿Mi jech kʼotem ta atojolal kʼuchaʼal li tukʼil ermanoetik laj kalbetik skʼoplale xchiʼuk ti jel li kʼusitik sbainojik akʼo mi lek xchanojike? Mi jaʼ jeche, jtos ti kʼuxi xuʼ jmoj xa-abtej xchiʼuk li Jeovae, jaʼ ti xa loʼiltabe kʼu yelan echʼem talel akuxlejal li buchʼutik mas to keremike. Xi chal li Russell laj kalbetik skʼoplal lek to jlikele: «Li Jeovae yakal chchanubtas xchiʼuk tstunes ta junuk abtelal li buchʼutik mas to keremik ti baxbolik ta abtele. Jech xtok, li ermanoetike ta stabeik sbalil ti ta sjunul yoʼonton chchabiatik yuʼun li jchabichije». (Kʼelo li rekuadro ti bu chal: « Koltao li ermanoetik ti mas to keremik sventa xtojobik lek spasel li kʼusitik snaʼike»).

Mi achʼ to jel li kʼusitik abainoje, skʼan mu chopoluk xavaʼi aba. Yuʼun li kʼusitik apasoj tal ta sjunul avoʼontone ep staojbeik sbalil ta xkuxlejal li krixchanoetike xchiʼuk stakʼ jech-o xapas batel. Jech xtok, jech-o me chavichʼ kʼanel.

Li kʼusi mas toj tsots skʼoplale, jaʼ ti te-o ta yoʼonton Jeova li avabtel apasoje, xi jamal chal li Vivliae: «Muʼyuk chchʼay ta sjol li avabtelike xchiʼuk li kʼanelal laj avakʼik ta ilel ta sventa li sbie xchiʼuk ti chatunik ta stojolal li buchʼutik chʼulike xchiʼuk ti jech-o chatunik batel ta stojolalike» (Evr. 6:10). Li kʼusi laj yakʼ ta naʼel li Jeovae, chakʼ ta ilel ti maʼuk noʼox tsvules ta sjol li kabteltik jpasojtike, moʼoj, yuʼun toj ep jbalil chilutik ek. Jaʼ yuʼun, muʼyuk chchʼay ta sjol  li avabtele xchiʼuk skotol li kʼusitik yakal-o chapas yoʼ xmuyubaj yoʼonton avuʼune.

Pe mi muʼyuk kichʼojtik jelbel li kʼusi jbainojtike, xuʼ jtunel onoʼox kuʼuntik li kʼusi yakal chkalbetik skʼoplale, ¿kʼu yuʼun?

Yuʼun yikʼaluk van oy ta jkʼopontik li buchʼutik yichʼojik jelbel li kʼusitik sbainojik ta skoj ti oy xa sjabilalike. Jech oxal, sventa jtabetik sbalil ti yijik ta mantal xchiʼuk ti ep kʼusi xchanojike, skʼan jkʼanbetik tojobtasel xchiʼuk beiltaseletik. Jech xtok, skʼan jkʼeltik kʼu yelan tstunesik li kʼusitik xchanojik ti bu chtunik avie.

Jech oxal, mi oy kʼusitik muʼyuk xa jbainojtik ta skoj ti oy xa jabilaltike o mi xkojtikintik junuk ermano ti xuʼ jtabetik sbalil li kʼusi xchanojike, skʼan me teuk ta joltik ti toj tsots skʼoplal chil Jeova li buchʼutik tukʼ tunemik talel ta stojolal xchiʼuk ti jech-o tspasik batele.