CHAʼVOʼ tsebetik ti yakal chanavik batel ti bu oy pʼolmajebaletik ta Baguio (Filipinas) laj yilik jun karrito sventa cholmantal, pe muʼyuk xnopajik batel. Li ermana Helen ti jaʼ te vaʼal ta xokon li karritoe stseʼet tajek sat la skʼel batel li tsebetike. Akʼo mi tukʼ jelavik li tsebetike, labal sba tajek laj yilik ti stseʼet noʼox tajek sat li Helene.

Mu ta sjaliluke, kʼalal jaʼo kajalik batel ta autovus sventa sut batel ta snaike, laj yilik jpʼej Salon sventa Tsobobbail ti te tsʼibabil ta mukʼta letraetik li jw.org. Vul ta sjolik ti jaʼ jech tsʼibabil li ta karrito sventa cholmantale. Vaʼun, yalik ta autovus sventa skʼelik li yorailtak chjelav li tsobajeletik li ta Salon sventa Tsobobbaile.

Kʼotik ta tsobajel xchaʼvoʼalik. ¿Mi xanaʼik buchʼu laj yilik kʼalal ochik li ta Salon sventa Tsobobbaile? ¡Jaʼ li Helene! Anil vul ta sjolik ti jaʼ li ermana ti stseʼet tajek sate. Xi laj yal li Helene: «Kʼalal jaʼo chnopajik talel ta jtojolal li tsebetike, lixiʼ jutuk. La jnop mi oy kʼusi chopol la jpas». Pe li tsebetike laj yalbeik Helen ti yilojik xa onoʼoxe.

Li tsebetike la skʼupinik tajek li tsobajele xchiʼuk la skʼupinik xchiʼinel li ermanoetike. Jaʼ xa yutsʼ yalal laj yaʼiik. Kʼalal tsuts li tsobajele, laj yilik ti lik xchʼubaik salon li ermanoetike, vaʼun la skolta sbaik ek. Li jun tsebe muʼyuk xa te nakal ta Filipinas, pe li june yakal xa chkʼotilan ta tsobajel xchiʼuk yakal xa chichʼ chanubtasel ta Vivlia. ¡Jaʼ koliyal ti stseʼet tajek sat li ermanae!