1. Li Jesuse, ¿kʼu yuʼun laj yalbe Jeova ti akʼo xchabibat li yajtsʼaklomtake?

KʼALAL jun xa ox akʼobal skʼan xcham li Jesuse, la snopbe skʼoplal li kʼusitik vokol tsnuptan yajtsʼaklomtake. Ta skoj ti skʼanojane, laj yalbe Stot ti akʼo xchabian ta stojolal li Satanase (Juan 17:14, 15). Yuʼun snaʼoj ti mi muy xa ox batel ta vinajele, li Satanase jech-o tstsak ta kʼop li buchʼutik tskʼan chtunik ta stojolal Jeovae. Jaʼ yuʼun, tskʼanik chabiel li steklumal Jeovae.

2. ¿Kʼu yuʼun xuʼ jpat koʼontontik ti ta onoʼox stakʼ j-orasiontik li Jeovae?

² Li Jeovae la stakʼbe s-orasion Jesus ta skoj ti skʼanoj tajeke. Mi chkakʼbetik yipal sventa lekuk xilutik li Jeovae, ta me skʼanutik ek, tskoltautik xchiʼuk chchabiutik mi jech la jkʼanbetik li ta j-orasiontike. Ta skoj ti jaʼ jun jkʼanvanej Totile, ta onoʼox xchabi li yuni nichʼnabtake, mi muʼyuk jech tspase, chopol chkom skʼoplal un bi.

3. ¿Kʼu yuʼun toj tsots skʼoplal ti xchabiutik li Jeovae?

³ Li avie, mas to toj tsots skʼoplal ti xchabiutik li Jeovae, yuʼun laj yichʼ jipel yalel tal ta balumil li Satanase xchiʼuk «oy tajek skʼakʼal yoʼonton» (Apok. 12:12). Yakʼojbe snop junantik krixchanoetik ti yakal «tspasik chʼul abtelal ta stojolal [Dios]» kʼalal tskontrainutike (Juan 16:2). Li buchʼutik mu xchʼunik ti oy Diose tskontrainutik ek ta skoj ti muʼyuk ta jchanbetik stalelalike. Pe muʼyuk ta jxiʼtatik, yuʼun xi chal li Vivliae: «Tukʼ li Kajvaltike, jaʼ tstsatsubtas avoʼontonik xchiʼuk chchabioxuk ta stojolal li Satanase» (2 Tes. 3:3). Jkʼeltik batel chaʼtos ti kʼu yelan chchabiutik li Jeovae.

4. Jech kʼuchaʼal chal Efesios 6:13 kʼalal ta 17, ¿kʼusi yakʼojbutik Jeova sventa xchabiutike?

⁴ Li Jeovae yakʼoj kabtejebtik ta mantal sventa xkuch kuʼuntik kʼalal tstsakutik ta kʼop li Satanase (kʼelo Efesios 6:13-17). Lek tsots li abtejebal taje xchiʼuk jtunel kuʼuntik, pe jaʼ noʼox me chchabiutik mi ta jtunestik skotole. Jkʼeltik batel kʼusi skʼan xal li jujutos abtejebale.

5. ¿Kʼusi jaʼ li melel ti xkoʼolaj kʼuchaʼal jun chukile, xchiʼuk kʼu yuʼun skʼan jchukintik?

⁵ Li kʼusi melel ti xkoʼolaj kʼuchaʼal jun chukile jaʼ skʼan xal li kʼusitik melel chalbe skʼoplal Vivliae. ¿Kʼu yuʼun skʼan jchukintik li chukil taje? Yuʼun li Satanase «jaʼ totil yuʼun li jutbil kʼope» (Juan 8:44). Ta smilal xa noʼox jabil sjutoj talel kʼop xchiʼuk sloʼlaoj «skotol li jnaklejetik ta spʼejel balumile» (Apok. 12:9). Pe li kʼusitik melel chal ta Vivliae jaʼ tskoltautik sventa mu xijlaj ta loʼlael. ¿Kʼuxi ta jchukintik taje? Jaʼ ti jchantik li kʼusi melel ta stojolal Jeovae, ti xkichʼtik ta mukʼ «ta chʼul espiritu xchiʼuk ta [melele]» xchiʼuk ti sakuk jtalelaltik ta skotole (Juan 4:24; Efes. 4:25; Ebr. 13:18).

6. ¿Kʼusi jaʼ li tukʼilal ti xkoʼolaj ta smak stiʼ oʼontonale, xchiʼuk kʼu yuʼun skʼan jlaptik?

⁶ Li tukʼilal ti xkoʼolaj ta smak stiʼ oʼontonale jaʼ skʼan xal li stukʼil mantaltak Jeovae. ¿Kʼu yuʼun skʼan jlaptik? Li batsʼi smak stiʼ oʼontonale chchabibe li yoʼonton jun soltaroe. Jaʼ noʼox jech ek, li tukʼilal ti xkoʼolaj ta smak stiʼ oʼontonale chchabi koʼontontik, jaʼ xkaltik, ti kʼu kelantik ta melel sventa mu sokesutik li balumile (Prov. 4:23). Li Jeovae tskʼan ti akʼo jkʼantike xchiʼuk ti ta sjunuluk koʼontontik xijtun ta stojolale (Mat. 22:36, 37). Jaʼ yuʼun, li Satanase oy kʼusitik tspas sventa xlik jkʼantik li kʼusitik oy ta balumil ti jaʼ li kʼusitik tspʼaj Jeovae (Sant. 4:4; 1 Juan 2:15, 16). Pe mi chil ti jech-o ta jchʼunbetik smantal Jeovae, oy kʼusitik yan tspas sventa chakʼ jvokoltik.

7. ¿Kʼuxi xuʼ jlaptik li tukʼilal ti xkoʼolaj ta smak stiʼ oʼontonale?

⁷ Li tukʼilal ti xkoʼolaj ta smak stiʼ oʼontonale jaʼo ta jlaptik kʼalal ta jpastik li kʼusi lek chil Jeovae xchiʼuk ti ta jpʼajtik li kʼusi chopol chile (Sal. 97:10). Junantik krixchanoetike xi tsnopike: «Mu xa xakʼ kʼusi jpas ta jkuxlejaltik li smantaltak Jeovae». Pe mi muʼyuk xa la jchʼuntik li beiltaseletik ta Vivliae, xijkoʼolaj ta jun soltaro ti tslokʼes li smak stiʼ yoʼonton kʼalal jaʼo yakal paskʼop ta skoj ti tsnop ti toj ole. ¿Mi mu jechuk ti mu lekuk ti jech tspase? Li buchʼu skʼanojik Jeovae xi chalike: «Mu toj tsotsuk ta chʼunbel li smantaltake». Yuʼun snaʼojik ti jaʼ chpojbat xkuxlejalike (1 Juan 5:3).

8. ¿Kʼusi skʼan xal ti jlapoj jxonobtik sventa lek chapalutik ta yalel batel li lekil aʼyejetike?

⁸ Li Pabloe laj yal ti skʼan jlaptik li jxonobtik sventa lek chapalutik ta yalel batel li lekil aʼyejetik sventa jun oʼontonale. Taje jaʼ skʼan xal ti skʼan lekuk chapalukutik skotol ora sventa jpukbetik skʼoplal li Ajvalilal yuʼun Diose. Tstsatsub xchʼunel koʼontontik kʼalal chkalbetik yantik li kʼusi chal ta Vivliae. Tspat koʼontontik ti oy ep yajtuneltak Jeova ta spʼejel balumil ti yakal chcholik lekil aʼyejetik ti bu kʼalal xuʼ yuʼunike. Jech kʼuchaʼal liʼe, chcholik mantal ta yabtelik, ta eskuela, ta pʼolmajebaletik, ta naetik, kʼalal chbatik ta manolajel, kʼalal tsvulaʼan yutsʼ yalalik ti maʼuk stestigotak Jeovae, kʼalal chchiʼinik ta loʼil li buchʼutik xojtikinike xchiʼuk ti jech-o chcholik mantal akʼo mi mu xuʼ xlokʼ ta snaik kʼuuk sjalil. Mi chkiktatik cholmantal ta skoj noʼox ti chijxiʼe, ta xkil-o jvokoltik yuʼun. Mi jech la jpastike, xijkoʼolaj kʼuchaʼal jun soltaro ti tslokʼ  xonob kʼalal jaʼo yakal paskʼope, chyayij ta anil, mas vokol chaʼi sventa tspoj sba xchiʼuk mu spas yuʼun li kʼusi ch-albat yuʼun li bankilal soltaroe.

9. ¿Kʼu yuʼun skʼan jtsaktik lek li jmukʼta eskudotik ti jaʼ li xchʼunel koʼontontike?

⁹ Li mukʼta eskudoe jaʼ skʼan xal li xchʼunel koʼontontik ta stojolal Jeovae. Jpatoj koʼontontik ti tspas onoʼox skotol li kʼusi yaloje. Li xchʼunel koʼontontike jaʼ tskoltautik stupʼel «skotol sflecha li Satanas ti tsanajtik skʼakʼal tsjip tale». Skʼan jtsakojtik lek li eskudoe, yuʼun jaʼ tskoltautik sventa mu xijlaj ta loʼlael yuʼun li jecheʼ chanubtaseletik chal li jvalopatinej mantaletike xchiʼuk sventa mu xijchibaj kʼalal chkichʼtik labanele. Mi muʼyuk xchʼunel koʼontontike, vokol me chkaʼitik xchʼunbel smantal Jeova kʼalal oy buchʼu tsujutik ta spasel li kʼusi chopole. ¿Kʼuxi chchabiutik li j-eskudotik ti jaʼ li xchʼunel koʼontontike? Tskoltautik sventa jpakbetik skʼoplal li kʼusi jchʼunojtik k’alal te oyutik ta kabteltik o ta eskuelae (1 Ped. 3:15). Tskoltautik sventa mu jchʼamtik junuk abtelal ti tsmakutik ta spasbel yabtel Jeova akʼo mi lek chkichʼtik tojel (Ebr. 13:5, 6). Jech xtok, tskoltautik sventa tukʼ-o xkakʼ jbatik kʼalal chkichʼtik kontrainele (1 Tes. 2:2).

10. ¿Kʼusi jaʼ li kolebal ti xkoʼolaj ta smak joltike, xchiʼuk kʼu yuʼun skʼan jlaptik?

 ¹⁰ Li kolebal ti xkoʼolaj ta smak jolile jaʼ li spatobil koʼontontik yakʼojbutik Jeovae, jaʼ xkaltik, ti yaloj tspojutik lokʼel li ta lajelale xchiʼuk ti chakʼ jmotontik mi la jpasbetik li yabtele (1 Tes. 5:8; 1 Tim. 4:10; Tito 1:1, 2). Jech kʼuchaʼal chchabibat sjol jun soltaro li smak sjole, li spatobil koʼontontike chchabi li jnopbentik eke. ¿Kʼuxi chchabiutik? Tskoltautik sventa jaʼuk xkakʼ ta koʼontontik li kʼusitik yaloj tspas Dios ta jelavele xchiʼuk ti mu jvul tajek koʼontontik ta skoj li jvokoltike. ¿Kʼuxi ta jlaptik li smak joltik ti jaʼ li kolebale? Jaʼo kʼalal chkakʼtik persa sventa jechuk jnoptik kʼuchaʼal li Jeovae. Jech kʼuchaʼal liʼe, maʼuk jaʼ ta jpat-o koʼontontik yuʼun li kʼulejal ti muʼyuk sbalile, jaʼ ta jpat-o koʼontontik ta stojolal li Diose (Sal. 26:2; 104:34; 1 Tim. 6:17).

11. ¿Kʼusi jaʼ li espada chakʼ chʼul espiritue, xchiʼuk kʼu yuʼun skʼan jtunestik?

¹¹ Li espada chakʼ chʼul espiritue jaʼ li Skʼop Diose. Li Vivliae xuʼ xakʼ ta ilel li kʼusitik mu meleluke xchiʼuk xuʼ skolta lokʼel ta jecheʼ chanubtasel li krixchanoetike xchiʼuk ti mu xa spasik li kʼusitik chopole (2 Kor. 10:4, 5; 2 Tim. 3:16, 17; Ebr. 4:12). Ta jchantik stunesel lek kʼalal chijchanunaj jtuktik xchiʼuk kʼalal chchanubtasutik li s-organisasion Diose (2 Tim. 2:15). Pe li Jeovae maʼuk noʼox yakʼojbutik li kabtejebtik ta mantale. Jkʼeltik kʼusi yan chakʼbutik.

12. ¿Kʼusi yan chtun kuʼuntik, xchiʼuk kʼu yuʼun?

¹² Li jun soltaro ti lek chaneme snaʼoj ti mu stsal yuʼun stuk li epal soltaroetike, yuʼun skʼan ti xkoltaat yuʼun li xchiʼiltake. Jaʼ noʼox jech ek, mu stsal kuʼun jtuktik li Satanas xchiʼuk li sviniktake, yuʼun skʼan ti skoltautik li jchiʼiltaktik ta chʼunolajele. Li Jeovae yakʼoj kermanotaktik ta spʼejel balumil ti xuʼ skoltautike (1 Ped. 2:17).

13. Jech kʼuchaʼal chal Ebreos 10:24 xchiʼuk 25, ¿kʼuxi ta jtabetik sbalil li tsobajeletike?

¹³ Jtos ti kʼuxi xuʼ skoltautik li kermanotaktike jaʼo kʼalal chijbat ta tsobajeletike (kʼelo Ebreos 10:24, 25). Jkotoltik ta onoʼox xijchibaj bakʼintik. Pe ¿mi mu jechuk ti mas xa jun koʼonton chkaʼi jbatik kʼalal chijbat ta tsobajele? Tspat koʼontontik kʼalal ta sjunul yoʼonton chakʼ sloʼilik li kermanotaktike. Jech xtok, kʼalal tsjelubtas sparteik xchiʼuk chjelav mantaletik ti te lokʼem skʼoplal ta Vivliae, tskoltautik sventa jechuk-o xijtun ta stojolal Jeova. Jech xtok, tspat koʼontontik kʼalal ta jchiʼintik ta loʼil kermanotaktik kʼalal skʼan toʼox xlik xchiʼuk tstsuts li tsobajeletike (1 Tes. 5:14). Xuʼ jkoltatik yantik xtok li ta tsobajeletike sventa xijmuyubaj no’ox (Ech. 20:35; Rom. 1:11, 12). Pe maʼuk noʼox taje, yuʼun te ta jchantik kʼuxi xuʼ masuk to lek jcholtik mantal xchiʼuk xijchanubtasvan. Jech kʼuchaʼal liʼe, te chkichʼtik chanubtasel kʼuxi xuʼ jtunestik lek li vunetik xchiʼuk li videoetik ti te talem li ta abtejebaletik sventa xijchanubtasvane. Jaʼ yuʼun, jchapan jbatik lek li ta tsobajeletike, jtsʼet chikintatik lek li kʼusi chichʼ alele xchiʼuk kakʼ ta jkuxlejaltik. Mi jech la jpastike, lek me chapalutik sventa li paskʼope xchiʼuk chijkʼot ta «jun lekil yajsoltaro Kristo» (2 Tim. 2:3).

14. ¿Buchʼutik yan tskoltautik?

¹⁴ Ta smiyonal xa noʼox anjeletik ti tsots sjuʼelike tskoltautik xtok. Jnaʼojtik xa li kʼusi spas yuʼun li jun noʼox anjele. Jaʼ yuʼun, ¿mi xnop xa noʼox kuʼuntik kʼusi spas yuʼunik li epal anjeletike? (Is. 37:36). Mi junuk krixchano xchiʼuk mi junuk pukuj xkoʼolaj yip kʼuchaʼal li yaj-anjeltak Jeovae. Mas  me xuʼ kuʼuntik mi te xchiʼinojutik Jeovae, mu ventauk kʼu yepal li buchʼutik tskontrainutike (Jues. 6:16). ¡Taje tspat koʼontontik! Jaʼ yuʼun, teuk ta joltik kʼalal muʼyuk xa kipal chkaʼitik ta skoj li kʼusi laj yalbutik o la spasbutik junuk jchiʼiltik ta abtel, ta eskuela o junuk kutsʼ kalaltik ti maʼuk testigoe. Jvules ta joltik ti mu jtuktikuk yakal ta jpastik kʼope, jaʼ yakal tsbeiltasutik li Jeovae.

15. Jech kʼuchaʼal chal Isaias 54:15 xchiʼuk 17, ¿kʼu yuʼun muʼyuk buchʼu xuʼ smakbe ye li steklumal Diose?

¹⁵ Li balumil ti jaʼ sventainoj Satanase tspʼajutik tajek, ¿kʼu yuʼun? Yuʼun muʼyuk ta jtikʼ jbatik ta politika xchiʼuk muʼyuk ta jpastik kʼop. Chkakʼtik ta ojtikinel li sbi Diose, chkaltik batel ti jaʼ noʼox xuʼ xakʼ talel jun oʼontonal li Ajvalilal yuʼune xchiʼuk ta jchʼunbetik li stukʼil mantaltake. Chkaltik ta jamal ti jaʼ jun jutkʼop li buchʼu yakal tsventain li balumil avie xchiʼuk ti jaʼ jun jmilvanej ti muʼyuk xkʼuxul yoʼontone (Juan 8:44). Jech xtok, chkaltik batel ti poʼot xa xichʼ lajesel li kʼusitik oy ta balumil avie. Pe mu onoʼox xmak yu’un ketik li Satanas xchiʼuk sviniktake, yuʼun jech-o chkichʼtik ta mukʼ Jeova ti bu kʼalal xuʼ kuʼuntike. Akʼo mi ep sjuʼel li Satanase, muʼyuk kʼusi pasem yuʼun sventa smak ta be li kabteltike, yuʼun jech-o yakal chichʼ cholbel mantal li krixchanoetik ta spʼejel balumile. Ti jech kʼotem ta pasele jaʼ ta skoj ti xchabiojutik li Jeovae (kʼelo Isaias 54:15, 17).

16. ¿Kʼuxi tspoj steklumal Jeova kʼalal jaʼo yakal li mukʼta tsatsal vokolile?

¹⁶ ¿Kʼusi chkʼot ta pasel li ta jelavele? Kʼalal jaʼo yakal li mukʼta tsatsal vokolile, li Jeovae oy chaʼtos kʼusitik labal sba tspas sventa spojutik. Baʼyel, tspoj li yajtuneltak ti tukʼ yakʼoj sbaik kʼalal mi kʼot yorail ti ta xichʼ lajesel yuʼun ajvaliletik ta balumil li Mukʼta Babiloniae, jaʼ xkaltik, skotol li jeche’ relijionetik ta balumile (Apok. 17:16-18; 18:2, 4). Xchibal, tspoj steklumal kʼalal mi laj yichʼ lajesbel skotol li sviniktak Satanas ta Armajedone (Apok. 7:9, 10; 16:14, 16).

17. ¿Kʼu yuʼun skʼan nopol oyutik ta stojolal Jeova?

¹⁷ Mi nopol oyutik ta stojolal Jeovae, mu sbateluk osil chak’ jvokoltik li Satanase, yuʼun ja’ chichʼ akʼbel slajeb sbatel osil li stuke (Rom. 16:20). Jaʼ yuʼun, jlaptik me lek skotol li kabtejebtike xchiʼuk teuk me jlapojtikuk-o. Mu me jtuktikuk jpastik kʼop, jkoltatik li kermanotaktike xchiʼuk jchʼunbetik li smantaltak Jeovae. Mi jech la jpastike, xuʼ jpat koʼontontik ti tstsatsubtasutik xchiʼuk chchabiutik li jkʼanvanej Totil kuʼuntike (Is. 41:10).