1. Jech kʼuchaʼal chal Mateo 24:9, ¿kʼu yuʼun mu labaluk sba chkaʼitik mi chkichʼtik pʼajele?

TI KʼU yelan la spasutik li Jeovae jaʼ sventa xkichʼtik kʼanel xchiʼuk xijkʼanvan. Jech oxal, kʼux chkaʼitik kʼalal oy buchʼu tspʼajutike xchiʼuk chakʼbutik xiʼel. Jech kʼuchaʼal liʼe, xi chal jun ermana ta Europa ti Georgina * sbie: «Li jmeʼe la spʼajun tajek ta skoj ti chitun ta stojolal Jeovae. 14 toʼox jabil kichʼoj, ta skoj ti pʼajbilune, la jnop mi chopol krixchanoun». Xi chal jun ermano ti Danilo sbie: «Kʼalal la smajikun li soltaroetike, kʼalal la xchopol kʼoptaikun xchiʼuk laj yalbeikun ti oy kʼusi chopol tspasbeikun ta skoj ti jaʼun stestigo Jeovae, lixiʼ xchiʼuk chopol tajek laj kaʼi jba». Akʼo mi kʼux chkaʼitik ti chkichʼtik pʼajele, pe yaloj xa onoʼox Jesus ti jech chkʼot ta pasele (kʼelo Mateo 24:9).

2, 3. ¿Kʼu yuʼun spʼajojutik li krixchanoetike?

² Li krixchanoetike spʼajojutik ta skoj ti maʼuk te jkʼoplaltik ta balumil jech kʼuchaʼal li Jesuse (Juan 15:17-19). Jaʼ yuʼun, akʼo mi ta onoʼox jtsaktik ta venta li ajvaliletike, muʼyuk chkichʼtik ta mukʼ kʼuchaʼal jun dios xchiʼuk muʼyuk chkichʼtik ta mukʼ li slokʼolike, yuʼun jaʼ noʼox stuk Jeova chkichʼtik ta mukʼ. Li voʼotike jaʼ ta jpakbetik skʼoplal ti jaʼ oy sderecho Jeova sventa spas ta mantal li krixchanoetike. Pe li Satanas xchiʼuk li snitilulale chopol chilik (Jen. 3:1-5, 15). Ta jcholbetik batel skʼoplal ti jutuk xa skʼan slajesbe svokol krixchanoetik li Ajvalilal yuʼun Diose xchiʼuk ti jutuk xa skʼan slajesbe skʼoplal li yajkontratake (Dan. 2:44; Apok. 19:19-21). Taje lekil aʼyejetik chaʼiik li buchʼutik  manxoike, pe muʼyuk lek chaʼiik li buchʼutik chopolike (Sal. 37:10, 11).

³ Li krixchanoetik xtoke spʼajojutik ta skoj ti chkakʼ ta jkuxlejaltik li smantaltak Diose xchiʼuk muʼyuk lek chilik ti jech ta jpastike. Jech kʼuchaʼal liʼe, li krixchanoetik avie muʼyuk chopol chilik ti chmulivajik jech kʼuchaʼal la spasik li ta Sodoma xchiʼuk Gomorra ti laj yichʼik lajesel yuʼun Diose (Jud. 7). Ep buchʼutik tsnaʼleutik xchiʼuk chalik ti mu kʼusi jkʼantik ta skoj ti ta jchʼuntik li kʼusitik chal li mantaletik ta Vivlia ta sventa li mulivajele (1 Ped. 4:3, 4).

4. ¿Kʼusitik talelalil xuʼ skoltautik sventa xkuch kuʼuntik mi laj kichʼtik pʼajele?

⁴ ¿Kʼusi tskoltautik sventa xkuch kuʼuntik mi laj kichʼtik pʼajel o tsnaʼleutik li krixchanoetike? Skʼan tsotsuk lek xchʼunel koʼontontik ta stojolal Jeova ti ta onoʼox skoltautike, yuʼun li xchʼunel koʼontontike xkoʼolaj kʼuchaʼal jun eskudo ti xtupʼ yuʼun skotol li sflechatak Satanase (Efes. 6:16). Pe maʼuk noʼox skʼan ti oyuk xchʼunel koʼontontike, yuʼun skʼan xijkʼanvan xtok. ¿Kʼu yuʼun? Yuʼun li kʼanelale «muʼyuk ch-ilin ta anil [...]. Stsʼik yuʼun skotol li kʼusitike [...] xchiʼuk xkuch yuʼun skotol» li kʼusi chakʼ jvokoltike (1 Kor. 13:4-7, 13). Jkʼeltik batel kʼuxi tskoltautik mi jkʼanojtik Jeova, kermanotaktik xchiʼuk li buchʼutik tskontrainutik yoʼ xkuch kuʼuntik mi laj kichʼtik pʼajele.

5. ¿Kʼusi pas yuʼun Jesus ta skoj ti skʼanoj tajek li Stote?

⁵ Kʼalal jun xa ox akʼobal skʼan xichʼ milel yuʼun yajkontratak li Jesuse, xi laj yalbe li yajchankʼoptake: «Sventa snaʼ krixchanoetik ti jkʼanoj li Totile, jaʼ jech yakal ta jpas ti kʼu yelan yalojbun mantal li Totile» (Juan 14:31). Ta skoj ti skʼanoj tajek Jeova li Jesuse, jaʼ akʼbat yipal sventa xkuch yuʼun li svokoltak tsnuptane. Jaʼ jech chkuch kuʼuntik ek mi jkʼanojtik li Jeovae.

6. Jech kʼuchaʼal chal Romanos 5:3 kʼalal ta 5, ¿kʼu yelan chkaʼi jbatik kʼalal chkichʼtik pʼajele?

⁶ Li kʼusi koltaatemik li yajtuneltak Jeova sventa xkuch yuʼunik li kontrainele jaʼ ti skʼanojik tajek li Diose. Jech kʼuchaʼal liʼe, kʼalal laj yalik li buchʼutik te oyik ta snail chapanobbail yuʼun judaetik ti akʼo xa mu xcholik mantal li jtakboletike, xi laj yalik ta skoj ti skʼanojik Diose: «Jaʼ skʼan ta jchʼunbekutik smantal kʼuchaʼal ajvalil li Diose, maʼuk li krixchanoetike» (Ech. 5:29; 1 Juan 5:3). Li ermanoetik ti yakal chichʼik kontrainel yuʼun li chopol ajvaliletike kuchem tal yuʼunik ta skoj ti skʼanojik li Dios eke. Kʼalal tspʼajutik li krixchanoetike, muʼyuk chijchibaj-o, xijmuyubaj noʼox (Ech. 5:41; kʼelo Romanos 5:3-5).

7. ¿Kʼusi skʼan jpastik mi lik skontrainutik li kutsʼ kalaltike?

⁷ Jaʼ van mas vokol chkaʼitik kʼalal jaʼ tskontrainutik li kutsʼ kalaltike. Kʼalal chakʼik venta kutsʼ kalaltik ti chlik xa jkʼantik Jeovae, xuʼ van xlik snopik ti lijlaj xa ta loʼlaele o ti lik xa jchuvajtike (koʼoltaso xchiʼuk Markos 3:21). Xuʼ van chopol xa kʼusi xlik spasbutik xtok, pe teuk me ta joltik ti laj onoʼox yal Jesus ti «te noʼox ta sna chlokʼ yajkontra li krixchanoe» (Mat. 10:36). Akʼo mi oy kʼusitik chopol chlik spasbutik li kutsʼ kalaltike, muʼyuk onoʼox ta jpʼajtik, moʼoj, yuʼun kʼalal mas ta jkʼantik li Jeovae, mas ta jkʼantik li yantike (Mat. 22:37-39). Pe muʼyuk me chkiktatik xchʼunel li mantaletik xchiʼuk li beiltaseletik chal Vivlia ta skoj noʼox ti ta jkʼantik lekuk xilutik junuk krixchanoe.

8, 9. ¿Kʼusi koltaat-o jun ermana sventa tukʼ xakʼ sba akʼo mi tsots laj yichʼ kontrainel?

⁸ Li Georgina ti laj kalbetik skʼoplal ta parafo 1 tukʼ laj yakʼ sba manchuk mi tsots kontrainat yuʼun li smeʼe. Xi chale: «Jmoj lik jchankutik Vivlia xchiʼuk li jmeʼe. Pe vakib u ta  tsʼakal kʼalal oy xa ox ta koʼonton chibat ta tsobajeletike, ta anil noʼox lik skontrainun li jmeʼe. Laj kakʼ venta ti jaʼ chchiʼinan ta loʼil li buchʼutik svalopatinojik komel mantale, vaʼun jaʼ xa jech chalbun li kʼusitik ch-albate. Maʼuk noʼox, yuʼun chchopol kʼoptaun, tsnitbun jol, chmichʼbun jnukʼ xchiʼuk tsjipbun ta kʼaʼep li jvuntake. Kʼalal tsʼaki 15 jabilale, laj kichʼ voʼ. Sventa xkikta li Jeovae, la stikʼun ta snail tsebetik ti bu chichʼik koltael ta skoj ti oy kʼusi chopol tspasike. Junantik tsebetike tslajesik droga xchiʼuk oy kʼusitik yan chopol tspasik. Jaʼ mas vokol yaʼel kʼalal jaʼ tskontrainutik li buchʼu jaʼ chkʼuxubinutik jechuke xchiʼuk ti tskʼanutike».

⁹ Li Georginae chal kʼusitik koltaat-o sventa xkuch yuʼun li svokoltake, xi chale: «Kʼalal lik skontrainun li jmeʼe, jaʼo tsuts kuʼun xchanel sliklej Jvivlia li vaʼ kʼakʼale. Vaʼun, laj kakʼ venta ti jaʼ melel li kʼusi yakal ta jchane xchiʼuk nopol xa ox chkaʼi jba ta stojolal Jeova. La jkʼopon-o Jeova xchiʼuk la xchikintabun li kʼusi laj kalbee. Kʼalal jaʼo te oyun ti bu ay stikʼun jmeʼe, oy jun ermana laj yikʼun batel ta sna, koʼol la jchankutik li Vivliae. Ti vaʼ sjalile, la spatbeikun-o koʼonton li ermanoetike xchiʼuk jaʼ xa kutsʼ kalal laj kaʼi. Te laj kakʼ venta ti jaʼ mas tsots sjuʼel li Jeovae, maʼuk li buchʼu tskontrainutike».

10. ¿Kʼusi ti jpatoj-o lek koʼontontike?

¹⁰ Li jtakbol Pabloe laj yal ti mu «jtosuk kʼusitik meltsanbil ti xuʼ xchʼakutik lokʼel li ta kʼanelal yuʼun Dios ti te oy ta stojolal Kristo Jesus ti jaʼ Kajvaltike» (Rom. 8:38, 39). Akʼo mi oy onoʼox chkil jvokoltik, li Jeovae muʼyuk chiktautik, ta onoʼox spat koʼontontik xchiʼuk tstsatsubtasutik. Jech xtok, tstunes ermanoetik sventa skoltautik jech kʼuchaʼal la spas ta stojolal li Georginae.

11. ¿Kʼuxi koltaatik jchankʼopetik li kʼanelal laj yalbe skʼoplal Jesus ta Juan 15:12 xchiʼuk 13? Albo junuk skʼelobil.

¹¹ Kʼalal jun xa ox akʼobal skʼan xcham li Jesuse, la svulesbe ta sjol yajchankʼoptak ti akʼo skʼan sbaik ta jujuntale (kʼelo Juan 15:12, 13). Yuʼun snaʼoj ti jaʼ chkoltaatik sventa jmojuk oyik xchiʼuk ti xkuch yuʼunik li kontrainele. Jnopbetik jutuk skʼoplal li ermanoetik ta Tesalonika ti laj onoʼox yichʼik kontrainel ti kʼuxi lik li tsobobbaile. Li ermanoetik taje toj lek ta chanbel stalelalik ta skoj ti snaʼ xkʼanvanik xchiʼuk ti kuch yuʼunike (1 Tes. 1:3, 6, 7). Tijbat yoʼontonik yuʼun Pablo ti masuk to lek  tsʼakal xkʼanvanike (1 Tes. 4:9, 10). Li kʼanelale jaʼ chtijbat yoʼontonik sventa spatbeik yoʼonton li buchʼutik chat yoʼontonike xchiʼuk ti skoltaik li buchʼutik kʼunike (1 Tes. 5:14). Laj onoʼox spasik li kʼusi albatike, yuʼun jun jabil ta tsʼakale, xi albatik yuʼun Pablo ta xchibal skartae: «Akotolik mas xa chakʼan abaik ta jujuntal» (2 Tes. 1:3-5). Li kʼanelale jaʼ koltaatik-o sventa xkuch yuʼunik li vokolile xchiʼuk li kontrainele.

12. ¿Kʼuxi laj yakʼik ta ilel ti skʼanoj sbaik li ermanoetik kʼalal lik kʼop ta slumalike?

¹² Jkʼeltik kʼusi la snuptan li Danilo xchiʼuk yajnil ti laj kalbetik skʼoplal ta parafo 1. Kʼalal laj yil svokolik ta skoj ti lik kʼop ta slumalike, muʼyuk laj yikta sbaik ta tsobajeletik, jech-o la xcholik mantal xchiʼuk laj yakʼbeik kʼusi slajesik li ermanoetike. Jun veltae, te kʼot soltaroetik ta sna Danilo ti xkuchoj lek yabtejebike, xi chale: «Laj yalbeikun ti akʼo xkikta li jrelijione, pe ta skoj ti laj kalbeik ti moʼoje, la smajikun xchiʼuk tskʼan xa ox tstukʼaikun ta jol yilel, pe jot-o bu la stʼomesik. Kʼalal mu to chbatike, laj yalbeikun ti tsutik tal sventa xilbajinik li kajnile. Li ermanoetike ta anil noʼox la stakunkutik batel ta tren sventa xibatkutik ta naklej ta yan jteklum. Mu xchʼay ta jol ti kʼu yelan laj yakʼik ta ilel ti skʼanojunkutik li ermanoetike. Ti bu likʼotkutike, laj yakʼ jveʼelkutik li ermanoetike, la skoltaikun sventa jta kabtel xchiʼuk bu xuʼ xinakikutik. Koliyal taje, ta mas tsʼakale voʼonkutik xa la jkoltakutik li ermanoetik ti jatavik ta skoj li paskʼope». Li loʼil taje chakʼ ta ilel ti kʼalal chkakʼbe jbatik ta ilel li kʼanelale jaʼ tskoltautik sventa xkuch kuʼuntik li kontrainele.

13. ¿Kʼuxi xuʼ skoltautik li chʼul espiritu sventa jechuk-o xijtun ta stojolal Jeova akʼo mi chkichʼtik kontrainele?

¹³ Li Jesuse laj yal ti skʼan jkʼantik li kajkontratike (Mat. 5:44, 45). Taje mu kʼunuk ta pasel, pe mi tskoltautik li xchʼul espiritu Diose tspas kuʼuntik. Li talelaletik chakʼ chʼul espiritu jech kʼuchaʼal li kʼanelale, li smalaele, li yutsil oʼontonale, li manxoale xchiʼuk li pajesejbaile tskoltautik sventa xkuch kuʼuntik li kontrainele (Gal. 5:22, 23). Ep li buchʼutik ti chkontrainvanik toʼoxe jelem xa stalelalik xchiʼuk ep buchʼutik kʼotemik ta stestigo Jeova ta skoj ti lek yakʼoj ta ilel stalelal yajnilik, smalalik, yalab xnichʼnabik o junuk slakʼnaike. Jaʼ yuʼun, mi vokol tajek chkaʼitik sventa jkʼantik li buchʼutik tskontrainutik ta skoj li  kʼusi jchʼunojtike, jkʼanbetik Jeova ti akʼo xakʼbutik xchʼul espiritue (Luk. 11:13). Ta melel, jaʼ mas lek ti jechuk-o jpastik kʼuchaʼal chalbutik Diose (Prov. 3:5-7).

14, 15. ¿Kʼuxi koltaat jun ermana li kʼusi chal ta Romanos 12:17 kʼalal ta 21 sventa jechuk-o skʼan smalal akʼo mi tsots ch-ilbajinat?

¹⁴ Kalbetik skʼoplal Yasmín ti te nakal ta Oriente Medioe. Kʼalal kʼot ta stestigo Jeovae, li smalale la snop mi laj yichʼ loʼlael li Yasmine xchiʼuk oy kʼusitik la spas sventa mu xa xtun ta stojolal Dios. La xchopol kʼopta li yajnile xchiʼuk laj yalbe yutsʼ yalaltak, jun jnitvanej ta relijion xchiʼuk jun j-akʼchamel ti akʼo sibtasike xchiʼuk ti xalbeik ti jaʼ ta smul ti muʼyuk xa jun yoʼonton li yutsʼ yalale. Jun veltae, ay xchopol kʼopta ermanoetik kʼalal jaʼo yakal tsobajele. Li Yasmine te x-okʼolet ta skoj ti toj ep kʼusitik chopol tspasbate.

¹⁵ Li ermanoetike la spatbeik yoʼonton xchiʼuk la stsatsubtasbeik yoʼonton kʼalal chkʼot ta jujun tsobajele. Li moletik ta tsobobbaile laj yalbeik ti akʼo xakʼ ta xkuxlejal li kʼusi chal ta Romanos 12:17 kʼalal ta 21 (kʼelo). Xi chal li Yasmine: «Mu kʼunuk laj kaʼi ti jpas li kʼusi chal Vivliae, pe la jkʼanbe Jeova ti akʼo skoltaune xchiʼuk laj kakʼ persa ti bu kʼalal xuʼ kuʼune. Jaʼ yuʼun, kʼalal yolbaj xa chikʼubtas spisoal jkosina li jmalale, ta jkus. Kʼalal oy kʼusi chalbune, muʼyuk kʼusi chopol ta jtakʼbe xchiʼuk kʼalal ch-ipaje, ta jkʼuxubin».

16, 17. ¿Kʼusi chakʼ achan li kʼusi kʼot ta stojolal Yasmine?

¹⁶ Li Yasmine chal ti lekik kʼusitik kʼot ta pasel ta skoj ti laj yakʼbe yil smalal ti skʼanoje. Xi chale: «Mas lik spat yoʼonton ta jtojolal, yuʼun snaʼoj ti mu jnaʼ jut kʼope. Ta tsʼakale, lek xa chchikintabun kʼalal chkalbekutik skʼoplal relijione xchiʼuk laj yakʼ persa sventa junuk noʼox koʼontonkutik. Avie, jaʼ xa chalbun ti xibat ta tsobajeletike, lek xa tajek xkil jbakutik xchiʼuk jun xa noʼox koʼontonkutik. Jpatoj koʼonton ti xuʼ van jmoj xa xlik tunkunkutik ta stojolal Jeova ta tsʼakale».

¹⁷ Li kʼusi la spas Yasmine chakʼ ta ilel ti kʼanelale «stsʼik yuʼun skotol li kʼusitike [...], spatoj yoʼonton ta skotol xchiʼuk xkuch yuʼun skotol» (1 Kor. 13:4, 7). Ep kʼusitik spas yuʼun li kontrainele, pe jaʼ mas xuʼ yuʼun li kʼanelale. Li kontrainele xuʼ syayijesutik, pe xuʼ me mu xa skontrainutik mi chkakʼtik ta ilel ti jkʼanojtik li yantike. Jech xtok, chmuyubaj me kuʼuntik li Jeovae, pe xuʼ xijmuyubaj-o akʼo mi jech-o chkichʼtik kontrainel. Jkʼeltik kʼu yuʼun.

18. ¿Kʼu yuʼun xuʼ xijmuyubaj manchuk mi chkichʼtik kontrainel?

¹⁸ Xi laj yal li Jesuse: «Xamuyubajik noʼox me kʼalal [...] chavichʼik nutsele» (Luk. 6:22). Melel onoʼox ti mu jkʼantik pʼajel xchiʼuk ti xkichʼtik kontrainel ta skoj li kʼusi jchʼunojtike. Vaʼun chaʼa, ¿kʼu yuʼun xuʼ xijmuyubaj manchuk mi xkichʼtik kontrainel? Jkʼeltik oxib srasonal. Li baʼyele jaʼ ti lek chilutik Dios mi kuch kuʼuntik li kontrainele (1 Ped. 4:13, 14). Li xchibale jaʼ ti mas tstsatsub li xchʼunel koʼontontike (1 Ped. 1:7). Li yoxibale jaʼ ti ta jtatik jun matanal ti mu kʼusi xkoʼolaj-oe: li kuxlejal sbatel osile (Rom. 2:6, 7).

19. ¿Kʼu yuʼun xmuyubajik noʼox li jtakboletik akʼo mi laj yichʼik majele?

¹⁹ Kʼalal muʼyuk toʼox jal chaʼkuxiem li Jesuse, li jtakboletike laj yaʼi ta xkuxlejalik li muyubajel albatik skʼoplale. Akʼo mi laj yichʼik majel xchiʼuk laj yichʼik albel ti mu xa xcholik mantale, xmuyubajik noʼox, «yuʼun jaʼ matanal chilik ti laj yil svokolik ta skoj li sbi Jesuse» (Ech. 5:40-42). Jaʼ mas skʼanojik li Jesuse, jaʼ mu masuk laj yakʼ ta yoʼontonik ti laj yichʼik pʼajele. Jaʼ jech laj yakʼik ta ilel kʼalal «muʼyuk bu laj yikta sbaik» ta xcholel li lekil aʼyejetike. Li avi eke, ep ermanoetik tukʼ-o chtunik ta stojolal Jeova akʼo mi ep chil svokolik. Snaʼojik ti muʼyuk chchʼay ta sjol Jeova li kʼusi tspasike xchiʼuk ti chakʼik ta ilel ti skʼanojbeik li sbie (Ebr. 6:10).

20. ¿Kʼusi chkalbetik skʼoplal li ta yan xchanobile?

²⁰ Yoʼ to mu slajesbe skʼoplal chopol krixchanoetik li Jeovae, skʼan xkuch-o batel kuʼuntik li kontrainel chakʼike (Juan 15:19). Skʼan mu xijxiʼutik-o, yuʼun li Jeovae tstsatsubtasbe yoʼonton xchiʼuk chchabi li yajtuneltak ti tukʼ yakʼoj sbaike. Taje jaʼ chkalbetik skʼoplal li ta yan xchanobile (2 Tes. 3:3). Jaʼ yuʼun, jechuk-o me jkʼantik li Jeovae, li kermanotaktike xchiʼuk li buchʼutik tskontrainutike. Mi jech ta jpastike, jmoj tsobolutik-o, tsotsutik ta mantal, chkichʼtik-o ta mukʼ Jeova xchiʼuk chkakʼtik ta ilel ti jaʼ mas ep kʼusi spas yuʼun li kʼanelale, jaʼ mu sta li kontrainele.