Junantik stestigotak Jeovae tstunesik aplikasionetik sventa mensaje sventa xchiʼinik ta loʼil yutsʼ yalalik xchiʼuk yan ermanoetik. Pe li ermanoetik ti yijik ta mantale tstsakik ta venta li tojobtasel liʼe: «Li buchʼu pʼije tsta ta ilel li vokolile, vaʼun tsnakʼ sba, pe li buchʼutik chʼabal spʼijilike tukʼ chjelavik batel, vaʼun tsta-o svokolik» (Prov. 27:12).

Jnaʼojtik ti tskʼan chchabiutik li Jeovae. Jaʼ yuʼun, muʼyuk ta jchiʼintik li buchʼutik jaʼ noʼox ta xchʼakvanike, ti lokʼemik ta tsobobbaile o ti chakʼik ta chanel li kʼusi mu meleluke (Rom. 16:17; 1 Kor. 5:11; 2 Juan 10, 11). Xuʼ van oy junantik li buchʼutik chkʼotik ta tsobobbaile muʼyuk chchʼunik li mantaletik chal ta Vivliae (2 Tim. 2:20, 21). Mas kʼun ta tʼujel buchʼu chkamigointik kʼalal jkʼelojbetik sate, pe jaʼ mas vokol kʼalal ta jtunestik li aplikasionetik sventa mensajeetike.

Mi oy ta koʼontontik chij-och ta junuk grupo ti bu xuʼ jtaktik mensajeetike, jnopbetik skʼoplal buchʼutik te tikʼajtik. Junantik ermanoetike te stikʼoj sbaik li ta mukʼtik grupoetik taje xchiʼuk muʼyuk lek kʼusi kʼotem ta stojolalik. ¿Kʼuxi xuʼ xkichʼ jpʼijiltik kʼalal ta sienal o smilal noʼox buchʼutik te tikʼajtik li ta grupoe? Yuʼun mu onoʼox stak’ naʼel buchʼutik jaʼ xchiʼuk kʼu yelan oyik ta mantal. Xi chal Salmo 26:4: «Muʼyuk ta jchiʼin li jloʼlavanej krixchanoetike xchiʼuk muʼyuk ta jchiʼin li buchʼu mu xakʼ ta ilel kʼu yelanik ta melele». Li kʼusi mas leke jaʼ ti jaʼuk noʼox jchiʼintik ta loʼil li buchʼutik xkojtikintike.

Akʼo mi mu toj epuk yajval li ta grupo bu tikʼilutike, skʼan jkʼel jbatik ti kʼu sjalil ta jtakulantik mensaje xchiʼuk li kʼusi chichʼ albel skʼoplale. Mu jnoptik ti persa ta jtakʼtik skotol li mensajeetike, mu ventauk li kʼusitik chalbeik skʼoplal o manchuk mi jaʼ chalilanbeik-o skʼoplal. Li Pabloe laj yalbe Timoteo ti akʼo skʼel sba ta stojolal li krixchanoetik ti jaʼ noʼox «chloʼiltavanik, [ti] te tstikʼ sbaik ti bu mu jaʼuk ta sventaike» (1 Tim. 5:13). Li avie, xuʼ jech xkʼot ta pasel li ta Internete.

Li yajtsʼaklomtak Kristo ti yijik ta mantale muʼyuk tstikʼ sbaik kʼalal oy buchʼu ta xichʼ loʼiltaele, kʼalal chichʼ alel li kʼusi mu stakʼ alele o ti maʼuk oy ta jbatik yalbel skʼoplale (Sal. 15:3; Prov. 20:19). Muʼyuk chchikintaik mi jaʼuk tspukbeik skʼoplal li kʼusitik labalik xa noʼox sba ta aʼiel o ti mu stak’ naʼel mi jech ta melele (Efes. 4:25). Ti bu xuʼ jtatik ep jveʼeltik ta mantal xchiʼuk aʼyejetik ti xuʼ jpat-o koʼontontike jaʼ li ta jpajinatik ta Internet jw.org xchiʼuk li kʼusitik chlokʼ jujun u ta JW Broadcasting^®.

Junantik ermanoetike tstunesik li aplikasionetik sventa mensaje yoʼ oyuk kʼusi xchonik, smanik, sventa xalbeik skʼoplal spʼolmalik o sventa saʼ svinikik ta abtel. Taje jaʼ sventa pʼolmajel o abtelal xchiʼuk skʼan mu skapbeik skʼoplal li ta yichʼel ta mukʼ Jeovae. Pe li yajtsʼaklomtak Kristo ti maʼuk batem ta yoʼontonik skʼanel takʼine muʼyuk kʼusi tspasik sventa staik takʼin ta stojolal li ermanoetike (Ebr. 13:5).

¿Mi lek van ti jtunestik li aplikasionetik taje yoʼ jkʼantik takʼin sventa jkoltatik li yan ermanoetik ti yakal chil svokolike? Ta skoj ti jkʼanojtik li ermanoetike, nopolik noʼox ta jpatbetik yoʼontonik xchiʼuk ta jkoltatik mi chtun yuʼunik chkiltike (Sant. 2:15, 16). Mi jaʼ ta jtunestik jun mukʼta grupo sventa xijkoltavane, xuʼ van jaʼ noʼox yakal ta jmaktik ta be ti kʼu yelan chkoltavan li Betel o li moletik ta tsobobbail ti mas to toj lek ti kʼu yelan tspasike (1 Tim. 5:3, 4, 9, 10, 16). Jech xtok, mu jkʼantik ti xkakʼtik ta aʼiel ti voʼotik laj kichʼtik tʼujel sventa jchabitik li ermanoetike.

Ta jkʼantik ti jaʼuk sventa yichʼobil ta mukʼ Dios skotol li kʼusi ta jpastike (1 Kor. 10:31). Jaʼ yuʼun, mi la jnop la jtunestik junuk aplikasion sventa mensaje o li yan kʼusitik achʼ chlokʼanuk talele, jnopbetik skʼoplal li kʼusitik vokol xuʼ jnuptantike xchiʼuk kichʼ jpʼijiltik.