XCHANOBIL 41
¿Kʼuxi xuʼ jkolta kaj-estudiotik yoʼ xichʼ voʼ? (Sbavokʼal)
«Chavakʼ ta ilel atukik ti svunoxuk Kristo ti voʼonkutik jtsʼibaojkutik ta atojolalik kʼuchaʼal jtunelunkutike» (2 KOR. 3:3).
KʼEJOJ 78 Kakʼtik ta naʼel Skʼop Dios
LI KʼUSI TA JCHANTIKE *
Xijmuyubaj tajek k’alal chkiltik ti chich’ vo’ junuk estudiante ti te chk’ot ta jtsobobbailtik xchi’uk ti jk’anojtik tajeke (kʼelo parafo 1).
1. ¿Kʼuxi chakʼ kiltik 2 Korintios 3:1 kʼalal ta 3 ti xijmuyubaj kʼalal oy buchʼu ta jkoltatik yoʼ xichʼ voʼe? (Kʼelo li lokʼol ta pajina 1).
¿KʼU YELAN chkaʼi jbatik kʼalal chichʼ voʼ jun estudiante ta jtsobobbailtike? ¡Xijmuyubaj van tajek! (Mat. 28:19). Mas to van xijmuyubaj mi voʼotik laj kakʼbetik estudioe (1 Tes. 2:19, 20). Li yajtsʼaklom Kristo ti jaʼtik to yichʼoj voʼe maʼuk noʼox lek skʼoplal chkom yuʼun li buchʼu chanubtasate, yuʼun lek skʼoplal chkom xtok li tsobobbaile (kʼelo 2 Korintios 3:1-3).
2. 1) ¿Kʼusi tsots skʼoplal skʼan jakʼbe jbatik, xchiʼuk kʼu yuʼun? 2) ¿Kʼu yelan li jun estudioe? (Kʼelo li tsʼib ta yok vune).
2 Xijmuyubaj tajek ti kʼu yelan echʼem talel li chanib jabile, yuʼun li ta jujun ue, laj yichʼ akʼel te van 10 miyon estudio * ta spʼejel balumil. Ti vaʼ sjalil xtoke, laj yichʼik voʼ te van mas ta 280 mil krixchanoetik jujun jabil. ¿Kʼuxi xuʼ jkoltatik li yan estudianteetik sventa xichʼik voʼe? Li Jeovae oy smalael yuʼun xchiʼuk yakʼojbe to yorail sventa xkʼotik ta yajchankʼop Kristo li krixchanoetike. Pe muʼyuk xa jal, jaʼ yuʼun ta jkʼan ta jkoltatik ti bu kʼalal xuʼ kuʼuntik sventa ta anil xa noʼox xchʼiik ta mantal xchiʼuk ti xichʼik voʼe (1 Kor. 7:29 sbavokʼal; 1 Ped. 4:7).
3. ¿Kʼusi ta jkʼeltik li ta xchanobil liʼe?
3 Sventa masuk anil jkoltatik li estudianteetik sventa xichʼik voʼe, li Jtsop Jbeiltasvaneje la sjakʼ ta Beteletik kʼuxi ta pasel. Li ta xchanobil liʼe xchiʼuk li chtale, ta jkʼeltik bal kʼusi xuʼ jchanbetik junantik jkʼelvanej ta sirkuito, misioneroetik xchiʼuk prekursoretik ti chanemik leke (Prov. 11:14; 15:22). * Li sloʼilike chkoltavan sventa snaʼik kʼusi xuʼ spasik li buchʼu chchanubtasvanik xchiʼuk li estudianteetik yoʼ lekuk kʼusi xkʼot ta pasel yuʼunike. Li ta xchanobil liʼe, ta jkʼeltik voʼtos kʼusi xuʼ spasik yoʼ xichʼik voʼ li buchʼutik yakal chichʼik estudioe.
JCHANTIK JUJUN XEMANA
Jakʼbetik kaj-estudiotik mi oy bu xuʼ xijchoti kʼalal ta jchantik Vivliae. (Kʼelo parafo 4-6).
4. ¿Kʼusi skʼan teuk ta joltik mi ta stiʼ sna chkakʼbetik estudio li jun krixchanoe?
4 Oy ermanoetik ti te noʼox ta stiʼ sna chakʼbeik estudio li jun krixchanoe. Akʼo mi xuʼ onoʼox x-ayan ta yoʼonton mi jech la spasike, pe jutuk mu skotoluk veltae, jlikel noʼox chchiʼinik ta loʼil xchiʼuk mu van skotoluk xemana xuʼ xloʼilajik. Sventa oyuk-o ta yoʼontonik li mantale, junantike tskʼanbeik snumeroal stelefono, * vaʼun tskʼoponik batel o tstakbeik bal mensaje sventa xalbeik skʼoplal li Vivliae. Pe mu van xchʼi ta mantal akʼo mi xjelav jayibuk u. Skʼan teuk ta joltik li’e: mi jaʼ noʼox uni jlikel chchʼakbe yorail xchiʼuk mi muʼyuk mas chakʼ yipal sventa xchan Skʼop Dios li buchʼu chichʼ estudioe, chib skʼoplal mi xlokʼ ta yoʼonton xakʼbe xkuxlejal Jeova xchiʼuk ti xichʼ voʼe.
5. Jech kʼuchaʼal laj yal Jesus ta Lukas 14:27 kʼalal ta 33, ¿kʼuxi xuʼ jkoltatik li buchʼutik chkakʼbetik estudioe?
5 Jun veltae, li Jesuse laj yal chib loʼil yoʼ xakʼ ta ilel kʼusi skʼan spas jun krixchano sventa xkʼot ta yajchankʼop. Laj yalbe skʼoplal jun vinik ti tskʼan tsvaʼan jun tayal kʼelob osil xchiʼuk jun ajvalil ti chlokʼ stsak ta kʼop yan ajvalile. Ta sventa li vinike, laj yal ti baʼyel «chchotan sba sventa tskʼel kʼu yepal chlaj yuʼun sventa stsuts yuʼun li kʼusi tspase». Ta sventa li ajvalile, laj yal ti baʼyel «chchotan sba sventa tsnop lek» mi xkuch yuʼun paskʼop xchiʼuk ti kʼu yepal yajsoltarotake (kʼelo Lukas 14:27-33). Jech kʼuchaʼal laj yal li loʼiletik taje, li Jesuse snaʼoj ti skʼan snopbe lek skʼoplal kʼusitik skʼan spas jun krixchano sventa x-och ta yajchankʼop. Sventa spas yuʼunik li kʼusi laj yal Jesuse, skʼan jtijbetik yoʼontonik sventa xchʼam s-estudioik jujun xemana. ¿Kʼuxi xuʼ spas kuʼuntik?
6. ¿Kʼusi xuʼ jpastik sventa xchʼi ta mantal li kaj-estudiotike?
6 Li kʼusi baʼyel xuʼ jpastike jaʼ ti masuk jal xkakʼbetik estudio li ta stiʼ snae. Kʼalal chbat jvulaʼantik jujukoje, maʼukuk noʼox me jun versikulo ta Vivlia jchanbetik. Mi nop xa ox xaʼi li krixchano ti mas xa jal chijloʼilaje, jakʼbetik mi oy bu xuʼ xijchoti. Li kʼusi tstakʼe jaʼ te chkakʼtik venta mi tsots skʼoplal chil li s-estudioe. Ta jelavel xtoke, xuʼ jakʼbetik mi oy ta yoʼonton chchan chaʼkojuk ta xemana ti jaʼ chkoltaat sventa xchʼi noʼox ta mantale. Jkʼeltik kʼusi yan skʼan spas li buchʼu chichʼ estudioe.
JCHAPAN JBATIK LEK JUJUKOJ
Jchapan jbatik lek kʼalal chbat chanubtasvankutike xchiʼuk kakʼbetik yil kaj-estudiotik kʼuxi ta pasel. (Kʼelo parafo 7-9).
7. ¿Kʼu yelan skʼan xchapan sba jujukoj li buchʼu chakʼ estudioe?
7 Mi voʼotik chkakʼtik estudioe, tsots skʼoplal ti baʼyel jchapan jbatik leke. ¿Kʼuxi xuʼ jpastik? Jkʼeltik li vun yakal ta jchantike xchiʼuk jsaʼtik li tekstoetik te taleme. Jkʼeltik li kʼusitik mas tsots skʼoplal chale. Jnopbetik skʼoplal li stituloal, subtituloaltak, sjakʼobiltak, li tekstoetik ti «kʼelo» xie, slokʼoltak xchiʼuk mi oy junuk svideoal ti chchapbe smelolale. Laje, jnopbetik skʼoplal kʼu yelan xkuxlejal li kaj-estudiotike, ti kʼu yelan xuʼ jamaluk ta aʼiel xkalbetik li kʼusi yakal jchantike xchiʼuk ti kʼunuk ta aʼiel sventa xaʼibe smelolal xchiʼuk ti xakʼ ta xkuxlejale (Neem. 8:8; Prov. 15:28 sbavokʼal).
8. Jech kʼuchaʼal laj yal Pablo ta Kolosenses 1:9 xchiʼuk 10, ¿kʼuxi xuʼ jkoltatik li kaj-estudiotike?
8 Yan ti kʼusi xuʼ jpastik kʼalal ta jchapan jbatike jaʼ ti jloʼiltabetik Jeova ti kʼu yelan xkuxlejal li j-estudiantetike xchiʼuk li kʼusitik chtun yuʼune. Jkʼanbetik vokol Jeova yoʼ lekuk jtunestik Vivlia sventa xkʼot ta yoʼontone (kʼelo Kolosenses 1:9, 10). Jnopbetik skʼoplal mi oy kʼusi vokol chaʼibe smelolal o vokol chaʼi xchʼunel. Teuk ta joltik ti kʼusi oy ta koʼontontike jaʼ ti jkoltatik yoʼ xichʼ voʼe.
9. ¿Kʼuxi xuʼ jkolta kaj-estudiotik sventa xchapan sba lek?
9 Li kʼusi oy ta koʼontontik kʼalal ta jchanubtastik li j-estudiantetike jaʼ ti oyuk sbalil xil li kʼusi spasojik Jeova xchiʼuk Jesus xchiʼuk ti oyuk-o ta yoʼonton chchan batele (Mat. 5:3, 6). ¿Kʼusi skʼan spas li kaj-estudiotik sventa stabe lek sbalil kʼalal ta jchanubtastike? Jaʼ ti xakʼ ta yoʼonton li kʼusi yakal chchane. Jaʼ yuʼun, tsots skʼoplal ti xkalbetik akʼo xchapan sba lek jujukoje xchiʼuk ti snopbe skʼoplal kʼuxi xuʼ xakʼ ta xkuxlejale. Xuʼ jmoj jchapan jbatik jkojuk sventa xkakʼbetik yil kʼuxi ta pasel. * Jchanubtastik ta saʼel li stakʼobile xchiʼuk ti jutebuk noʼox sbon sventa xvul ta sjole. Laje, kalbetik ti akʼo xal tal ta skʼop stuk li stakʼobile. Jaʼ jech ta jnaʼtik mi yakal chaʼibe smelol. Jkʼeltik li yoxtosal kʼusi skʼan spas li kaj-estudiotike.
JCHANUBTASTIK YOʼ SKʼOPON JEOVA SKOTOL KʼAKʼAL
Kakʼbetik yil kaj-estudiotik kʼuxi xuʼ skʼopon Jeova. (Kʼelo parafo 10, 11).
10. ¿Kʼu yuʼun tsots skʼoplal ti xchan Svivlia jujun kʼakʼal li jun estudiantee, xchiʼuk kʼuxi xuʼ lek stabe sbalil?
10 Maʼuk no’ox me skʼan xichʼ s-estudio jujun xemana li buchʼu yakal chchan Vivliae, oy to kʼusitik yan xuʼ spas jujun kʼakʼal ti chkoltaat-oe. Skʼan xchiʼin ta loʼil Jeova xchiʼuk ti xchikintabe li kʼusi ch-albate. Mi la xchan Svivlia jujun kʼakʼale, jaʼ jech chchikintabe li Jeovae (Jos. 1:8; Sal. 1:1-3). Kakʼbetik yil kʼuxi ta tunesel li programa sventa xchanel Vivlia ti te oy ta jw.org xchiʼuk ti stakʼ pasel imprimire. * Sventa stabe lek sbalil kʼalal chchan Svivliae, jtijbetik yoʼonton sventa snopbe skʼoplal kʼusi chchanubtasat ta sventa Jeova xchiʼuk ti kʼuxi xuʼ xakʼ ta xkuxlejale (Ech. 17:11; Sant. 1:25).
11. ¿Kʼuxi xuʼ xchan spasel orasion li kaj-estudiotike, xchiʼuk kʼu yuʼun tsots skʼoplal ti jechuk-o spasilane?
11 Jtijbetik yoʼonton kaj-estudiotik sventa xchiʼin ta loʼil Jeova skotol kʼakʼal. Kʼalal ta jlikestik estudio o ta jtsutsestike, ta sjunuluk koʼonton jpastik orasion xchiʼuk kalbetik skʼoplal li kaj-estudiotike. Vaʼun, jaʼ jech chchan ti sjambe yoʼonton Jeova xchiʼuk ti skʼanbe vokol ta sbi Jesukristoe (Mat. 6:9; Juan 15:16). Mi la xchan Svivlia skotol kʼakʼal sventa chaʼi li kʼusi ch-albate xchiʼuk mi tskʼopon ta orasione, nopo noʼox avaʼi kʼu yelan chkoltaat sventa xnopaj ta stojolal li Diose (Sant. 4:8). Mi jech nop xaʼi spasele, jaʼ chkoltaat sventa oyuk kʼusi sta ti jaʼ chtijbat-o yoʼonton sventa xakʼbe xkuxlejal Jeova xchiʼuk ti xichʼ voʼe. ¿Kʼusi jaʼ taje? Jkʼeltik batel.
JKOLTATIK YOʼ XKʼOT TA YAMIGO LI JEOVAE
12. ¿Kʼuxi xuʼ jkolta kaj-estudiotik sventa xkʼot ta yamigo li Jeovae?
12 Skʼan ti mu jaʼuk noʼox xkom ta sjol kaj-estudiotik li kʼusi ta jchantik jujukoje, yuʼun skʼan xkʼot ta yoʼonton xtok. ¿Kʼu yuʼun? Yuʼun li koʼontontike, ti te smakoj li kʼusi ta jkʼantik xchiʼuk ti kʼu yelan chkaʼi jbatike, jaʼ chakʼ ti oyuk kʼusi jpastike. Toj lek snaʼ xchanubtasvan li Jesuse, jaʼ yuʼun tskʼan chchikintaik li krixchanoetike. Pe maʼuk noʼox, yuʼun tstsʼakliik ta skoj ti chkʼot ta yoʼontonik li kʼusi chale (Luk. 24:15, 27, 32). Li buchʼu chichʼ chanubtasele skʼan ti kuxuluk xil li Jeovae xchiʼuk ti jechuk xil kʼuchaʼal Stot, Sdios xchiʼuk Yamigo (Sal. 25:4, 5). Kʼalal chkakʼbetik estudioe, kalbetik skʼoplal li stalelaltak Jeova ti toj kʼupilik sbae (Eks. 34:5, 6; 1 Ped. 5:6, 7). Mu ventauk kʼusi ta jchantik jujukoj, kakʼbetik yil kʼu yelan stalelal li Jeovae. Jkoltatik yoʼ epuk sbalil xil ti toj lek snaʼ xkʼanvan li Jeovae, ti toj lek yoʼontone xchiʼuk ti snaʼ xkʼuxubinvane. Xi laj yal li Jesuse: «Skʼan xakʼan ta sjunul avoʼonton li Jeova Dios avuʼune», yuʼun «jaʼ li baʼyel mantale xchiʼuk ti mas tsots skʼoplale» (Mat. 22:37, 38). Kakʼtik persa sventa skʼan ta sjunul yoʼonton Jeova li kaj-estudiotike.
13. Albo junuk skʼelobil ti kʼuxi xuʼ jkolta kaj-estudiotik yoʼ xojtikinbe stalelal li Jeovae.
13 Kʼalal ta jchiʼintik ta loʼil li kaj-estudiotike, kalbetik ti kʼu yuʼun jkʼanojtik li Jeovae. Vaʼun, jaʼ jech chakʼ venta ti skʼan xamigoin xchiʼuk ti skʼanojuk li Jeova eke (Sal. 73:28). Jnoptik noʼox ti yakal ta jchantik jlikuk vun o junuk teksto ti oy kʼusi toj kʼupil sba chal ta stojolal Jeovae, jech kʼuchaʼal ti snaʼ xkʼanvane, ti toj pʼije, ti tukʼe xchiʼuk ti ep sjuʼele. Mi oy jech la jtatike, kalbetik ti jaʼ jun srasonal ti kʼu yuʼun jkʼanojtik li Jtotik ta vinajele. Jkʼeltik kʼusi yan skʼan spas li kaj-estudiotik sventa xichʼ voʼe.
JTIJBETIK YOʼONTON YOʼ XBAT TA TSOBAJELETIK
Jtijbetik yoʼonton kaj-estudiotik sventa xbat noʼox ta tsobajeletik. (Kʼelo parafo 14, 15).
14. Jech kʼuchaʼal chal ta Ebreos 10:24 xchiʼuk 25, ¿kʼusi skʼan spas sventa xchʼi noʼox ta mantal li kaj-estudiotike?
14 Oy tajek ta koʼontontik ti xichʼ voʼ li kaj-estudiotike. ¿Kʼuxi xuʼ jkoltatik? Jtose jaʼ ti jtijbetik yoʼonton yoʼ xbat li ta tsobajeletike. Li buchʼutik chanemik ta yakʼel estudioe chalik ti jaʼ ta anil noʼox chchʼiik ta mantal li buchʼutik chbatik noʼox ta tsobajeletike (Sal. 111:1). Junantik ermanoetike chalbe yaj-estudioik ti skʼan xbatik ta tsobajel xtok sventa xchanik mase, ti maʼuk no’ox te chchanik skotol k’alal chichʼ s-estudioike. Jkʼelbetik Ebreos 10:24 xchiʼuk 25 li j-estudiantetike xchiʼuk kakʼbetik yil kʼusitik sbalil tstabe mi lik batuk ta tsobajeletike (kʼelo). Kakʼbetik yil li video ¿Kʼu yelan li jtsobajelkutike? * Jkolta kaj-estudiotik sventa xbatilan ta skotol li tsobajeletike.
15. ¿Kʼuxi xuʼ jtijbetik yoʼonton kaj-estudiotik sventa xlik batuk li ta tsobajeletike?
15 ¿Kʼusi xuʼ jpastik mi muʼyuk ayem-o ta tsobajel li kaj-estudiotik o mi nom staj chkʼotilane? Jloʼiltabetik li kʼusi jaʼtik to la jchantik ta junuk tsobajel ti kʼupil sba laj kaʼitike. Taje jaʼ mas chtijbat-o yoʼonton sventa xbat ta tsobajel. Kakʼbetik jlikuk vun ti jaʼ yakal ta jchantike, jech kʼuchaʼal Li Jkʼel-osil ta toyole o li Programa xchiʼuk bu chijtsʼibaje. Kakʼbetik yil li kʼusi ta jchantik ta yan tsobajele xchiʼuk jakʼbetik bu jvokʼukal mantal ti mas lek laj yile. K’alal mi bat ta sba velta ta tsobajele, te chakʼ venta ti jaʼ mas lek li kʼusi chaʼi xchiʼuk li kʼusi chil tee, ti mu jechuk li kʼusi yiloj ta yan relijione (1 Kor. 14:24, 25). Te chojtikin yan krixchanoetik ti jaʼ chkoltaat yoʼ xichʼ voʼe xchiʼuk ti xuʼ xchanbe stalelalike.
16. 1) ¿Kʼuxi xuʼ jkolta kaj-estudiotik yoʼ xichʼ voʼe? 2) ¿Kʼusi ta jkʼeltik li ta yan xchanobile?
16 Jaʼ yuʼun chaʼa, ¿kʼuxi xuʼ jkolta kaj-estudiotik yoʼ xichʼ voʼe? Sventa xakʼ ta yoʼonton li chanubtasel chichʼe, jtijbetik yoʼonton sventa xchʼam s-estudio jujun xemana xchiʼuk ti xchapan sba lek jujukoje. Kakʼbetik yil kʼuxi xuʼ skʼopon Jeova jujun kʼakʼal xchiʼuk ti xkʼot ta yamigoe. Jtijbetik yoʼonton sventa xbat ta tsobajeletik. (Kʼelo li rekuadro ta pajina 12, « Li kʼusi skʼan spas li buchʼu chichʼ estudioe»). Jech kʼuchaʼal ta jkʼeltik ta yan xchanobile, oy voʼtos kʼusi skʼan spas li buchʼu chchanubtasvan sventa skolta yaj-estudio yoʼ xichʼ voʼe.
KʼEJOJ 76 ¿Mi xkuxet avoʼnton yuʼun?
^ par. 5 Kʼalal ta jchanubtastik jun krixchanoe, jaʼ skʼan xal ti ta jkoltatik sventa sjel li kʼusi tsnope, ti kʼu yelan chaʼi sbae xchiʼuk li kʼusitik tspase. Li teksto sventa sjabilal 2020 ti te lokʼem ta Mateo 28:19 tsvules ta joltik ti tsots skʼoplal ti xkakʼbetik estudio li krixchanoetike xchiʼuk ti jkoltatik yoʼ xichʼik voʼe. Li ta xchanobil liʼe xchiʼuk li ta yane, ta jchantik kʼuxi xuʼ xijtojob mas li ta kabteltike.
^ par. 2 LIʼE TSOTS SKʼOPLAL: Mi nopolik noʼox ta jchiʼintik ta loʼil junuk krixchano ta sventa Vivliae xchiʼuk mi ta jtunestik jlikuk vune, yakal xa chkakʼtik jun estudio. Mi chib xa ox velta jchiʼinojtik ta loʼil kʼalal laj kakʼbetik yil kʼu yelan chijchanubtasvane xchiʼuk mi chchan-o batel chkiltike, xuʼ xa jtsak batel ta j-informetik ti jaʼ xa jun estudioe.
^ par. 3 Li xchanobil liʼe xchiʼuk li yan chtale yichʼoj tal tojobtaseletik ti te laj yichʼ lokʼesel li ta jvokʼ mantal ti xi sbie: «Kakʼtik estudio ti xuʼ xchʼiik-o ta mantale», ti lik lokʼuk ta español ta julio ta 2004 kʼalal ta mayo ta 2005 li ta Kabteltik sventa Diose. Li ta tsotsile, jaʼ noʼox oy ta fevrero kʼalal ta mayo ta 2005.
^ par. 4 Skotol li jcholmantaletike skʼan stsakik ta venta li kʼusi chal smantaltak ajvalil ta sventa ti mu xichʼ pukel bal li snumeroal telefono, biil o yan kʼusitik.
^ par. 9 Kʼelo li video ti chjalij chanib minuto Chanubtaso kʼuxi xuʼ xchapan sba li avaj-estudioe. Ochan ta JW Library® yoʼ bu chal MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ par. 10 Ochan yoʼ bu chal CHANUBTASELETIK TA VIVLIA > KʼUXI XUʼ JCHANTIK LEK LI VIVLIAE.
^ par. 14 Ochan ta JW Library® yoʼ bu chal MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
