1. ¿Kʼusi skʼan jpastik-o batel?

¿MI AVICHʼOJ xa voʼ? Mi jeche, jaʼ skʼan xal ti oy xchʼunel avoʼonton ta stojolal Jeova xchiʼuk ti oy ta avoʼonton chatun ta stojolal li s-organisasione. * Pe skʼan jechuk-o xchʼi batel li xchʼunel koʼontontik ta stojolal Jeovae xchiʼuk ti jchʼuntik ti jaʼ tstunes s-organisasion sventa xkʼot ta pasel li kʼusi tskʼan yoʼontone.

2, 3. ¿Kʼusi stalelaltak Jeova chvinaj ti kʼu yelan tsbeiltas li s-organisasione?

² Ti kʼu yelan tsbeiltas s-organisasion li Jeova avie jaʼ te chvinaj li stalelaltake, li kʼusi oy ta yoʼontone xchiʼuk li smantaltake. Jkʼeltik batel oxtosuk.

³ Baʼyel, «mu snaʼ xtʼujvan li Diose» (Ech. 10:34). Ta skoj ti skʼanojutik jkotoltik li Jeovae, lokʼ ta yoʼonton laj yakʼ Xnichʼon sventa spojutik (Juan 3:16; 1 Tim. 2:6). Oy ta yoʼonton ti epuk buchʼutik sta skolebalike, jaʼ yuʼun tstunes s-organisasion sventa xkʼot ta xchikin lekil aʼyej li buchʼutik oy ta yoʼontonike. Xchibal, jaʼ jun Dios ti chakʼ jun oʼontonale xchiʼuk ti lek xchapet tspas skotole (1 Kor. 14:33, 40). Jaʼ yuʼun, skʼan jechuk spasik ek li steklumale, ti junuk noʼox yoʼonton xtunik ta stojolale xchiʼuk ti lekuk xchapet li kʼusitik tspasike. Yoxibal, jaʼ «Mukʼul Jchanubtasvanej» li Jeovae (Is. 30:20, 21). Jech oxal, li s-organisasione chakʼ ta chanel kʼusi chal Vivlia ta tsobajeletik xchiʼuk ta cholmantal. Li oxtos stalelal Jeova liʼe te vinaj kʼalal la sbeiltas li stsobobbail  yajtsʼaklom Kristo ta baʼyel sigloe. Jkʼeltik batel kʼuxi la spas xchiʼuk ti kʼu yelan tspas li avie. Ta jkʼeltik xtok kʼuxi tskoltautik li xchʼul espiritue.

4. ¿Kʼusi albatik ta Echos 1:8 li yajtsʼaklomtak Jesuse, xchiʼuk kʼuxi tspas yuʼunik?

⁴ Ta baʼyel siglo. Kʼalal la xchol mantal li Jesuse, la spatbe yoʼonton li krixchanoetike (Luk. 4:43). Laj yalbe yajchankʼoptak ti jechuk-o xcholik mantal «kʼalal to ta namal balumil» (kʼelo Echos 1:8). Pe ¿mi spas van yuʼun ta yip stukik? Mi jsetʼuk, skʼan ti xkoltaatik yuʼun li chʼul espiritu ti jaʼ «li jkoltavanej» laj yal Jesuse (Juan 14:26; Sak. 4:6).

5, 6. ¿Kʼuxi koltaatik yuʼun chʼul espiritu li yajchankʼoptak Jesuse?

⁵ Li ta Pentekostes ta sjabilal 33, laj yichʼik chʼul espiritu li yajchankʼoptak Jesuse. Vaʼun, lik noʼox xcholik mantal xchiʼuk mu ta sjaliluke, ta smilal xa noʼox krixchanoetik la xchʼamik mantal (Ech. 2:41; 4:4). Jech xtok, muʼyuk xiʼik kʼalal laj yichʼik nutsele. La skʼanbeik koltael Jeova xchiʼuk xi la spasik orasione: «Koltao sventa oyuk stsatsal yoʼontonik xalik batel akʼop li amosotake». «Vaʼun ventainbil kʼot skotolik yuʼun li chʼul espiritue xchiʼuk tsots yoʼonton» laj yalik batel li skʼop Diose (Ech. 4:18-20, 29, 31).

⁶ Pe oy to kʼusi la snuptanik. Chʼabal ep skopiail yuʼunik li Skʼop Diose xchiʼuk muʼyuk yan vunetik yuʼunik sventa xchanunajik kʼuchaʼal li avie. Maʼuk noʼox, yuʼun skʼan xcholbeik mantal li buchʼutik yan-o skʼopike. Akʼo mi jech, muʼyuk bu xchibajik. Kʼalal mu toʼox sta lek 30 jabile, laj xa ox yaʼiik mantal «skotol li kʼusitik pasbil ti oy ta yolon vinajele» (Kol. 1:6, 23).

7. ¿Kʼuxi la snaʼik yajtuneltak Jeova ti skʼan xcholik mantale, xchiʼuk kʼusi la spasik?

⁷ Ta jkʼakʼaliltik. Li Jeovae tstunes Skʼop sventa sbeiltas xchiʼuk xakʼbe yip li steklumale. Li ta Vivliae, te chal ti kʼu yelan la xchol mantal li Jesuse xchiʼuk li mantal laj yakʼbe komel li yajchankʼoptake (Mat. 28:19, 20). ¿Kʼuxi yakʼoj ta xkuxlejalik ermanoetik ta jkʼakʼaliltik li mantal taje? Jech kʼuchaʼal li yajtsʼaklomtak Kristo ta baʼyel sigloe, li ermanoetike spatoj lek yoʼontonik ti chkoltaatik yuʼun chʼul espiritu sventa xcholik mantal ti bu kʼalal xuʼ yuʼunike. Taje jech chakʼ ta ilel li revista ta julio ta 1881, xi laj yale: «Muʼyuk laj kichʼtik takel ta ikʼel sventa xkichʼtik ichʼel ta mukʼ mi jaʼuk sventa jtsob jkʼulejaltik; moʼoj, jaʼ sventa xkakʼ sjunul jkuxlejaltik xchiʼuk skotol li kʼusi oy kuʼuntike, sventa jcholtik li lekil aʼyeje». Xi laj yal ek li foyeto Buchʼutik akʼbat sbainik li abtelale, ti lokʼ ta 1919 li ta inglese: «Yileluke, toj tsots ta pasel li abtelale, pe jaʼ yuʼun li Kajvaltike, jech oxal jaʼ tskoltautik ta spasel». Taje jaʼ jech jchʼunojtik ek.

8, 9. ¿Kʼusi yichʼoj tunesel sventa xichʼ cholel li lekil aʼyeje?

⁸ ¿Kʼusitik stunesoj talel s-organisasion Jeova sventa xichʼ pukel li lekil aʼyeje? Stunesoj talel vunetik, «Foto-Drama de la Creación», gramófono (xkoʼolaj kʼuchaʼal jun tokadisko), karro ti oy svosinail ta sbae, radio xchiʼuk Internet. Li Jeovae mu snaʼ xtʼujvan xchiʼuk yaloj xa onoʼox ti chichʼ cholel «ta skotol lumetik, nitilulaletik, jeltos kʼopetik xchiʼuk ta skotol jteklumetik» li lekil aʼyeje (Apok. 14:6, 7). Oy ta yoʼonton ti xaʼi skotol krixchanoetik li lekil aʼyej ta sventa li Ajvalilale. Jech oxal, li s-organisasione tsjelubtas ta sienal xa noʼox kʼop li vunetike. ¿Mi oy van yan organisasion ti jech tspase? ¡Muʼyuk!

 ⁹ ¿Kʼuxi chichʼ cholbel mantal li buchʼutik nakalik ta mukʼtik naetik o ti bu lek chabibile? Li Jeovae skoltaoj talel steklumal sventa jeltosuk ti kʼu yelan xichʼ cholel mantale. Jech kʼuchaʼal li ta 2001, li Jtsop Jbeiltasvaneje laj yal ti xuʼ xichʼ tunesel karrito sventa xichʼ cholel mantal ti bu oy krixchanoetik (predicación pública) li ta Franciae xchiʼuk li ta yan lumetike. Ep buchʼutik la xchikintaik-o mantal. Li ta 2011 xtoke, li ta Nueva York (Estados Unidos), lik yichʼ cholel mantal ti bu oy ep krixchanoetike. Akʼo mi naka toʼox lokʼ jun jabil, laj xa ox yichʼ pukel 102,129 livro, 68,911 revista xchiʼuk 4,701 la skʼanik chanubtasel ta Vivlia. Jech vinaj ti jaʼ yakal tsbeiltas cholmantal li chʼul espiritue. Jaʼ yuʼun, li Jtsop Jbeiltasvaneje laj yal ti xuʼ xichʼ tunesel karrito ta spʼejel balumile.

10. ¿Kʼusi xuʼ jpastik sventa masuk to xijtojob ta cholmantale?

¹⁰ Kʼusi xuʼ jpastik. Li Jeovae chchanubtasutik kʼuxi ta cholel mantal li ta jujukoj tsobajele. Jaʼ yuʼun, kakʼtik persa spasel jech ti bu kʼalal xuʼ kuʼuntike. Lokʼkutik ta cholmantal xchiʼuk li jgrupotike xchiʼuk mi oy to bu mu xijtojobe, kalbetik ermanoetik ti akʼo skoltautike; jaʼ me tstij koʼontontik ti kʼu yelan chcholik mantale. Manchuk mi oy kʼusitik ta jnuptantik, jechuk-o jcholtik mantal. Melel onoʼox, mu xuʼ kuʼuntik ta kip jtuktik, pe jech kʼuchaʼal chal li teksto ta slikebal li xchanobil liʼe, jaʼ tskoltautik xchʼul espiritu Jeova sventa jpastik li kʼusi oy ta yoʼontone (Sak. 4:6). Yuʼun jaʼ yuʼun Dios li abtelal liʼe.

11. ¿Kʼusi la spas jtsop jbeiltasvanej yoʼ jmojuk oyik xchiʼuk ti junuk noʼox yoʼontonike?

¹¹ Ta baʼyel siglo. Li jtsop jbeiltasvanej ti te toʼox oy ta Jerusalene jmoj abtejik yoʼ lekuk xchapet li kʼusitik tspasike xchiʼuk ti junuk yoʼonton li steklumal Diose (Ech. 2:42). Li ta sjabilaltik 49, li ermanoetike lik svulilan sbaik ta sventa li sirkunsisione, ¿kʼusi la spas li jtsop jbeiltasvaneje? ¿Mi jaʼ noʼox la snopbeik skʼoplal li kʼusi nopem  xaʼiik spasele? ¿Mi jaʼ van la stsakik ta venta li buchʼu jech chakʼik ta chanele? ¿Mi chakʼik ti xpaj-o cholmantal ta skoj taje? Moʼoj, jaʼ la xchʼamik koltael yuʼun li chʼul espiritue xchiʼuk la saʼik beiltasel ta Skʼop Dios sventa xchapanik (Ech. 15:1, 2, 5-20, 28). ¿Kʼusi kʼot ta pasel un? Li Jeovae laj yakʼbe bendision li kʼusi kʼot ta nopel yuʼunike, jun yoʼonton kom li tsobobbaile, jmoj noʼox tsobol oyik xchiʼuk jech-o la xcholik batel mantal (Ech. 15:30, 31; 16:4, 5).

12. ¿Kʼuxi xvinaj ti lek xchapet kʼusi tspas xchiʼuk ti jmoj oy li s-organisasion Jeovae?

¹² Ta jkʼakʼaliltik. Li s-organisasion Jeovae yakʼoj persa sventa xchapetuk skotol li kʼusitik tspase xchiʼuk ti junuk noʼox yoʼonton li yajtuneltak Diose. Li ta 1895, la slokʼesik jun mantal ta inglés li ta revista Li Jkʼel-osil ta toyol ta 15 yuʼun noviembre ti te lokʼem ta 1 Korintios 14:40, xi sbie: «Lek xchapet xchiʼuk ta smelolal noʼox». Xi chale: «Li jtakboletike muʼyuk bu xikta sbaik yalbel mantal tsobobbail sventa lekuk xchapet li kʼusi tspasike [...]. Lek me ti jchʼuntik li kʼusitik laj yichʼ tsʼibael komel sventa jchanubtaseltike» (Rom. 15:4). Li s-organisasion Jeova avie jech-o oy ta yoʼonton ti lekuk xchapet li kʼusi chichʼ pasele xchiʼuk ti junuk noʼox koʼontontike. Kalbetik junuk yuni kʼelobil, ti jech xijbat ta yan tsobobbail o ta yan lume, ¿mi ta to van jnoptik kʼusi revistail chichʼ chanel o ti kʼu yelan chichʼ jelubtasele? Moʼoj, yuʼun xkoʼolaj ti te xa oyutik ta jtsobobbailtik chkaʼitike. ¿Mi jech van jmoj tsobolutik jechuk ti muʼyukuk tskoltautik li xchʼul espiritu Jeovae? (Sof. 3:9).

13. ¿Kʼusi skʼan jnopbetik skʼoplal jech kʼuchaʼal chal Santiago 3:17?

¹³ Kʼusi xuʼ jpastik. Li Jeovae oy ta yoʼonton ti jmojuk oyutik «ta skoj li chʼul espiritue» (Efes. 4:1-3). Xiuk jnopbetik skʼoplale: «¿Kʼusi yakal ta jpas sventa junuk noʼox koʼonton xchiʼuk li ermanoetike xchiʼuk ti jmojuk tsobolunkutike? ¿Mi ta jchʼunbe smantal li buchʼutik chbeiltasvanike? ¿Mi xuʼ spat yoʼontonik ta jtojolal? ¿Mi  ta jpas li kʼusi akʼbil jbaine xchiʼuk mi ta yorail noʼox ta jpas? ¿Mi lek jnaʼ xikoltavan?» (kʼelo Santiago 3:17). Mi oy bu vokol chkaʼitik spasele, jkʼanbetik xchʼul espiritu Jeova sventa skoltautik. Mi laj kakʼ slekubtas jtalelaltik li chʼul espiritue, mas to me tskʼanutik xchiʼuk chkʼuxubinutik li kuni ermanotaktike.

14. Jech kʼuchaʼal chal ta Kolosenses 1:9 xchiʼuk 10, ¿kʼuxi la skolta yajtuneltak li Jeovae?

¹⁴ Ta baʼyel siglo. Solel lek tajek chaʼi chchanubtas steklumal li Jeovae (Sal. 32:8). Xi chalbutik xkaltike: «Laʼ, kuni kʼox, ta jkʼan ti xavojtikinune, ti xakʼanune xchiʼuk ti xakuxi sbatel osile». Sventa spas kuʼuntike, skʼan jchʼamtik li chanubtasel chakʼbutike (Juan 17:3). Li ta baʼyel sigloe, la stunes stsobobbail yajtsʼaklomtak Kristo sventa xchanubtas li steklumale (kʼelo Kolosenses 1:9, 10). La stunes xchʼul espiritu xtok ti jaʼ li «jkoltavanej» laj yal Jesuse (Juan 14:16). Jaʼ koltaatik-o yajtsʼaklomtak Kristo yoʼ xaʼibeik smelolal li Skʼop Diose xchiʼuk jaʼ vulesbat ta sjolik li kʼusi laj yal xchiʼuk la spas Jesuse. Taje te tsakal kom li ta Evanjelioetike. Mas to tsatsub li xchʼunel yoʼontonike, mas to la skʼanik li Diose, li Xnichʼone xchiʼuk li yermanotakike.

15. ¿Kʼuxi kʼotem ta pasel aviloj li albil kʼop ta Isaias 2:2 xchiʼuk 3?

¹⁵ Ta jkʼakʼaliltik. Li Jeovae yaloj xa onoʼox ti «ta slajebaltik kʼakʼale» ep buchʼutik chmuyik batel li ta vits yuʼun sventa teuk xchanubtasane (kʼelo Isaias 2:2, 3). Taje jech xa chkʼot ta pasel. Stuk noʼox jech ti kʼu yelan chichʼ ichʼel ta mukʼ Jeova akʼo mi epajem li jecheʼ chanubtasele. ¡Spajebal xa noʼox ti kʼu yelan tsmakʼlinutik ta mantal li Jeovae! (Is. 25:6). Tstunes  «li tukʼil xchiʼuk pʼijil mosoil» sventa jeltosuk li jveʼeltik ta mantal chakʼbutike (Mat. 24:45). Kʼupil tajek chkaʼitik li vunetik, li mantaletik xchiʼuk li jeltos videoetik chakʼbutik talele. Jech chkaʼi jbatik kʼuchaʼal li yamigo Job ti Eliu sbie, xi laj yale: «¿Mi oy yan jchanubtasvanej kʼuchaʼal li [Jeovae]?» (Job 36:22).

16. ¿Kʼuxi xuʼ xkakʼ ta jkuxlejaltik li chanubtasel yuʼun Jeovae?

¹⁶ Kʼusi xuʼ jpastik. ¿Kʼusi xuʼ jpastik mi vokol chkaʼitik yakʼel ta jkuxlejaltik li kʼusi ta jchantik ta Skʼop Diose? Jaʼ tskoltautik li chʼul espiritue. Xiuk jkʼanbetik Jeova kʼuchaʼal laj yal li jtsʼibajom yuʼun salmo liʼe: «Kajval Jeova, chanubtasun ta sventa li abee. Jaʼ te ta jtam-o batel sbelel li kʼusi melel avuʼune. Pasbun ta jun koʼonton sventa jxiʼta li abie» (Sal. 86:11). Kakʼtik akʼo xchanubtasutik ta Skʼop xchiʼuk ta s-organisasion li Jeovae. Jechuk-o jmakʼlin jbatik ta mantal. Jtsʼun ta koʼontontik li mantale xchiʼuk kakʼ ta jkuxlejaltik. Jaʼ tskoltautik li chʼul espiritue. Jpatbetik yoʼonton li kermanotaktike, yuʼun jaʼ kutsʼ kalaltik (Ebr. 10:24, 25). Kalbetik Jeova ti xlokʼuk ta koʼontontik yakʼel jkomentariotik ta tsobajele xchiʼuk ti ta sjunuluk koʼonton jelubtastik li jpartetik chij-akʼbate. Jech chkakʼbetik yil Jeova xchiʼuk Jesus ti jkʼanojbetik li xchijtake (Juan 21:15-17).

17. ¿Kʼuxi chkakʼtik ta ilel ti jmoj chijtun xchiʼuk li s-organisasion Jeovae?

¹⁷ Jutuk xa skʼan ti jun xa noʼox organisasion chkom liʼ ta balumile, jaʼ li organisasion tsbeiltas Jeova ta xchʼul espiritue. Kuxetuk noʼox koʼontontik kʼalal jmoj chij-abtej xchiʼuke. Jchanbetik stalelal Jeova ti lek snaʼ xkʼanvane xchiʼuk ti mu snaʼ xtʼujvane, jcholbetik mantal skotol krixchanoetik. Xchapetuk lek li kʼusitik ta jpastike xchiʼuk junuk noʼox koʼontontik xchiʼuk li kermanotaktike. Jchikintabetik lek kʼusi chal li Mukʼul Jchanubtasvanej kuʼuntike. Mi jech ta jpastike, lek me tsots koʼontontik tstautik kʼalal mi laj yichʼ lajesbel li sbalumil Satanase. Jun noʼox me koʼonton tukʼ chijtun xchiʼuk li s-organisasion Jeovae.