Li kʼusitik tsjakʼ jkʼelvunetike
Li ta xchanobil «Akʼo yichʼ chʼultajesel li abie» ti lok’ ta Jkʼel-osil ta toyol ta junio ta 2020, ¿kʼusi laj yichʼ albel smelolal ta sventa sbi Jeova xchiʼuk ti kʼu yelan ch-ajvalilaje?
Li ta xchanobil taje oy kʼusi laj yichʼ albel skʼoplal ti te tsakal jkʼoplaltik xchiʼuk li anjeletike ti jaʼ li xchʼultajesbel sbi Jeovae. Ti kʼu yelan ch-ajvalilaj li Jeovae te tsakal skʼoplal li xchʼultajesbel li sbie. Jech xtok, te me tsakal skʼoplal mi tukʼ chkakʼ jbatik ta stojolal Jeova o mi muʼyuk.
¿Kʼu yuʼun jaʼ mas chkalbetik skʼoplal li sbi Jeovae xchiʼuk ti kʼu yelan chichʼ chʼultajesbele? Jkʼeltik batel oxibuk srasonal.
Li Satanase la xchopol kʼoptabe sbi Dios ta nichimaltik Eden xchiʼuk jech-o yakal tspas.
Baʼyuke, li ta nichimaltik Edene, li Satanase la xchopol kʼoptabe sbi Jeova o chʼabal xa lek skʼoplal kom yuʼun. Li kʼusi la sjakʼbe Evae te laj yakʼ ta aʼiel ti mu la snaʼ xtʼolpʼij li Diose xchiʼuk ti toj tsotsik la ta chʼunel li mantaletik yakʼoje. Ta tsʼakale, laj yal ti mu la meleluk li kʼusi laj yal Diose, jaʼ yuʼun te laj yakʼ ta aʼiel ti jaʼ la jut kʼop li Diose. Kʼalal jech la spase, la xchopol kʼoptabe li sbie, vaʼun pas ta Diablo li Satanase ti jaʼ skʼan xal jchopolkʼoptavaneje (Juan 8:44). Li Evae la xchʼun li kʼusi mu meleluk laj yal Satanase, vaʼun muʼyuk xa la xchʼunbe smantal li Diose xchiʼuk te laj yakʼ ta ilel ti mu skʼan ti jaʼ xventainate (Jen. 3:1-6). Avie, li Satanase jech-o chchopol kʼoptabe li sbi Diose, yuʼun chal jutbil kʼopetik ta stojolal sventa jnoptik ti toj chopol li Jeovae. Jaʼ yuʼun, li buchʼutik chchʼunike muʼyuk xa chchʼunbeik li smantal Jeovae. Li kʼusi mas chopol kilojtike jaʼ ti chichʼ jutbel smul li Jeovae. Jaʼ yuʼun, te chlik tal skotol li vokoliletike xchiʼuk li choplejal ta balumile.
Ta xchibale, sventa stabe sbalil li kʼusitik spasoje, li Jeovae jpʼel ta yoʼonton chchʼultajes xchiʼuk tsakubtas li sbie. Taje jaʼ li kʼusi mas tsots skʼoplal chile, yuʼun xi chale: «Jpʼel skʼoplal ta jchʼultajes li jmukʼul [bie]» (Esek. 36:23). Li ta orasion chanubtasvan li Jesuse, xi laj yale: «Akʼo yichʼ chʼultajesel li abie». Jaʼ jech laj yakʼ ta aʼiel ti tsots skʼoplal skʼan jkʼan ta j-orasiontik taje (Mat. 6:9). Li ta Vivliae, ep ta velta chalbutik ti tsots skʼoplal ti jkʼupil kʼoptabetik li sbi Jeovae. Jkʼelbetik batel jun chibuk skʼelobil: «Kʼupil kʼoptaik Jeova ta skoj li sbie» (1 Kron. 16:29; Sal. 96:8). «Kʼupil kʼoptabeik ta kʼejimoletik li sbi ti jun smukʼule» (Sal. 66:2). «Ta jtoybe skʼoplal abi ta sbatel osil» (Sal. 86:12). Jun velta kʼalal jaʼo kʼopoj tal Jeova ta vinajele, li Jesuse jaʼo te oy ta templo ta Jerusalen. Vaʼun, xi laj yalbe li Stote: «Akʼo yichʼ toybel skʼoplal li abie», xi takʼbat yuʼun li Jeovae: «La jtoybe skʼoplal xchiʼuk ta jtoybe skʼoplal yan velta» (Juan 12:28). a
Ta yoxibale, skotol li kʼusi tspas Jeovae jaʼ sventa chʼultajesbiluk xkom li sbie. Kʼalal mi tsuts xa ox li Jmil Jabil ch-ajvalilaj li Kristoe, jaʼ xkaltik, mi tsuts xa ox li slajeb prevae chʼultajesbil xa ox chkom li sbi Jeovae. Li voʼotik xchiʼuk li anjeletike, ¿kʼu xa ox van yelan chkiltik ti chʼultajesbil xa ox li sbi Jeovae? Sventa jtakʼtik taje, jkʼeltik batel kʼu yuʼun tsots skʼoplal ti tukʼ xakʼ sbaik li krixchanoetike xchiʼuk ti jnaʼtikuk kʼu yelan tspas mantal li Jeovae. Li vaʼ orae, muʼyuk xa ox chichʼ akʼel ta preva mi tukʼ chakʼ sbaik li krixchanoetike. ¿Kʼu yuʼun? Yuʼun tukʼil krixchanoetik xa ox xchiʼuk echʼem xa ox li slajeb prevae. Vaʼun, chkuxiik ta sbatel osil. Pe ¿kʼusi xuʼ xkaltik ta sventa ti kʼu yelan tspas mantal li Jeovae? Muʼyuk xa me chkaltik mi lek ch-ajvalilaj li Jeovae o mi muʼyuk. Yuʼun kakʼojtik xa ox venta ti jaʼ noʼox stuk lek ch-ajvalilaj li Jeovae. Li vaʼ orae, li krixchanoutik xchiʼuk li anjeletike jmoj xa tsobolutik xchiʼuk kakʼojtik xa ox ta ilel ti jaʼ ta jkʼantik ti tsventainutik li Jeovae, yuʼun jaʼ xa noʼox stuk ichʼbil ta mukʼ li sbi Jeovae.
Lek xa ox chʼultajesbil chkom li sbi Jeovae xchiʼuk muʼyuk xa buchʼu tsokesbat skʼoplal, vaʼun mas xa me tsots skʼoplal chkom li sbi Jeovae. ¿Kʼu yuʼun? Yuʼun chakʼik venta ti jech-o labalik sba kʼusi tspas li Jeovae. Ta skoj ti bikʼit chakʼ sba li Jesuse xchiʼuk ti chchaʼakʼbe sutel Stot li Ajvalilale, li Diose stuk xa noʼox chkʼot ta Ajvalil (1 Kor. 15:28). Ta tsʼakal une, li buchʼutik chkuxiik ta balumile tskʼupinik «li jun yutsil kolebal jech kʼuchaʼal tstaik li xnichʼnab Diose» (Rom. 8:21). Li Jeovae tspas li kʼusi oy onoʼox ta yoʼonton ta slikebal ti tspas ta jun li yutsʼ yalal ta vinajel xchiʼuk ta balumile (Efes. 1:10).
¿Kʼu van yelan chaʼi sba li yutsʼ yalal Jeova mi kʼot xa ox ta pasel taje? Li anjeletik xchiʼuk li krixchanoetike ch-ayan ta yoʼontonik chichʼbeik ta mukʼ li sbi Jeovae. Li Davide xi la stsʼibae: «Akʼo yichʼ kʼupil kʼoptael li Jeova Diose [...]. Akʼo yichʼ kʼupil kʼoptabel sbatel osil li sbi ti jun smukʼule» (Sal. 72:18, 19). Ta skoj ti chijkuxiutik ta sbatel osile, te to ta jtabetik yan srasonaltak ti kʼu yuʼun sta-o ti xkichʼbetik ta mukʼ li sbi Jeovae.
Kʼalal chkaʼibetik sbi li Jeovae, chtal ta joltik ti kʼu yelan ta melele xchiʼuk ti toj echʼ noʼox chkʼanvane (1 Juan 4:8). Teuk me ta joltik ti ta skoj ti skʼanojutike la spasutik, laj yakʼ Xnichʼon sventa spojutik xchiʼuk laj yakʼ ta ilel ti jaʼ jun lekil Ajvalile. Jech xtok, chkakʼtik venta kʼuxi chakʼbe ta ilel kʼanelal skotol li spasbentak Jeovae. Vaʼun, ta sbatel osil xuʼ xijnopaj ta stojolal li Jeovae xchiʼuk ti ta jkʼupil kʼoptabetik li sbie (Sal. 73:28).
