1. ¿Kʼusi tskʼel ta jtojolaltik li Jeovae?

XIJMUYUBAJ tajek kʼalal jnaʼojtik ti «lek chil steklumal li Jeovae» (Sal. 149:4). Li stuke jaʼ tskʼel li jlekil talelaltike, li kʼusitik xuʼ kuʼuntik spasele xchiʼuk tskʼan chamigoinutik. Mi tukʼ chkakʼ jbatik ta stojolale, nopol oy ta jtojolaltik (Juan 6:44).

2. ¿Kʼu yuʼun tsnopik junantik ermanoetik ti muʼyuk kʼanbilik yuʼun li Jeovae?

² Xuʼ van oy buchʼu xi chale: «Jnaʼoj ti skʼanoj steklumal li Jeovae, pe ¿kʼuxi jnaʼoj ti skʼanojune?». ¿Kʼu yuʼun ti oy jech tsnopik junantik ermanoetike? Jkʼeltik kʼusi chal Oksana * ti tsots laj yil svokol ta sbikʼtale: «Limuyubaj tajek kʼalal laj kichʼ voʼ xchiʼuk li-och ta prekursorae, pe kʼalal echʼ 15 jabile lik vuluk ta jol li kʼusitik vokol la jnuptane. Jaʼ yuʼun, lik jnop ti muʼyuk xa lek chilun Jeova xchiʼuk ti mu jta-o ti skʼanune». Jun prekursora ti Yua sbi ti tsots laj yil svokol ta sbikʼtal eke xi chale: «Laj kakʼbe jkuxlejal Jeova, yuʼun ta jkʼan ti xmuyubajuk kuʼune, pe jnaʼoj onoʼox ti muʼyuk tskʼanune».

3. ¿Kʼusi ta jtakʼtik batel li ta xchanobil liʼe?

³ Xuʼ van jech chkaʼi jbatik kʼuchaʼal li chaʼvoʼ ermanaetike: ti jkʼanojtik tajek li Jeovae, pe vokol chkaʼitik xchʼunel ti skʼanojutike. Li ta xchanobil liʼe, ta jtakʼtik batel li chib sjakʼobil liʼe: ¿kʼu yuʼun skʼan jpʼeluk ta koʼontontik ti skʼanojutik li Jeovae? xchiʼuk ¿kʼusi xuʼ jpastik kʼalal oy kʼusi chopol chtal ta jnopbentike?

4. ¿Kʼu yuʼun xibal sba mi ta jnoptik ti muʼyuk skʼanojutik Jeovae?

⁴ Mi jchʼunojtik ti skʼanojutik li Jeovae, jaʼ tstij koʼontontik sventa xijtun ta stojolal ti bu kʼalal xuʼ kuʼuntike mu ventauk kʼusi xuʼ jnuptantik. Pe mi xijchibet noʼoxe, ta xkʼunib li kipaltike (Prov. 24:10). Vaʼun, mi lijchibaj xchiʼuk mi lik jnoptik ti muʼyuk skʼanojutik Jeovae, mas me vokol chkaʼitik stsalel li kʼusitik chakʼ talel Satanase (Efes. 6:16).

5. ¿Kʼusi kʼotem ta stojolal junantik ermanoetik ti la snopik ti muʼyuk kʼanbilik yuʼun Jeovae?

⁵ Junantik ermanoetike tsnopik ti muʼyuk kʼanbilik yuʼun li Jeovae, jaʼ yuʼun kʼunibem li xchʼunel yoʼontonike. Jun mol ta tsobobbail ti James sbie xi chale: «Akʼo mi chitun toʼox ta Betel xchiʼuk ta jkʼupin xcholel mantal ta jun tsobobbail ta yan kʼop, lik jnop mi ta melel lek chil Jeova li kʼusi ta jpase. Ta tsʼakale, mu jnaʼ mi chaʼi onoʼox li j-orasione». Li Eva ti chtun ta tsʼakal orae xi chale: «Laj kakʼ venta ti xibal sba kʼalal chlik jnoptik ti muʼyuk skʼanojutik li Jeovae, yuʼun tsmakutik ta spasbel yabtel xchiʼuk muʼyuk xa ta jkʼupintik ti kʼu yelan chijtun ta stojolale». Li Michael ti jaʼ prekursor xchiʼuk mol ta tsobobbaile xi chale: «Mi la anop ti muʼyuk oyot ta yoʼonton li Diose, ta kʼunkʼun chanamaj ta stojolal».

6. ¿Kʼusi xuʼ jpastik mi oy kʼusi chopol tal ta jnopbentike?

⁶ Li kʼusi laj yal li ermanoetike chakʼ kiltik ti toj xibal sba mi lik jnoptik ti muʼyuk skʼanojutik li Jeovae. ¿Kʼusi xuʼ jpastik mi oy kʼusi chopol tal ta jnopbentike? Jlokʼes ta jnopbentik ta anil. Kalbetik Jeova ti akʼo skoltautik sventa junuk noʼox koʼontontike, ti akʼo xchabi koʼontontik xchiʼuk jnopbentik sventa mu xa chopoluk xkaʼi jbatike (Sal. 139:23; Filip. 4:6, 7). Teuk ta joltik xtok ti oy yan ermanoetik ti oy kʼusitik chopol chtal ta sjolik bakʼintik eke xchiʼuk junantik yajtuneltak Dios ta voʼnee jaʼ jech laj yaʼi sbaik ek. Jkʼeltik kʼusi xuʼ jchantik ta stojolal li jtakbol Pabloe.

7. ¿Kʼusitik la snuptan li jtakbol Pabloe?

⁷ ¿Mi toj ep kʼusitik jbainojtik spasel ti  mu xa spas kuʼuntik skotol chkaʼitike? Jaʼ jech laj yaʼi sba ek li jtakbol Pabloe, yuʼun laj yal ti la svul yoʼonton ta stojolal skotol li tsobobbailetike (2 Kor. 11:23-28). ¿Mi muʼyuk xa xijmuyubaj ta skoj ti tsots iputike? Li Pabloe chopol laj yaʼi sba ta skoj ti mu stakʼ slokʼes li «chʼix ta [sbekʼtale]», jaʼ van ti oy kʼusi ip chaʼie (2 Kor. 12:7-10). ¿Mi chibajem chkaʼi jbatik ta skoj ti jmulavilutike? Jaʼ jech laj yaʼi sba bakʼintik li Pablo eke. Laj yal ti toj abol sba ta skoj ti toj vokol laj yaʼi spasel li kʼusi leke (Rom. 7:21-24).

8. ¿Kʼusi koltaat Pablo yoʼ xtun-o ta stojolal Jeova akʼo mi ep kʼusitik la snuptane?

⁸ Akʼo mi toj ep kʼusitik la snuptan li Pabloe, jech-o tun ta stojolal Jeova. ¿Kʼusi koltaat-o? Akʼo mi snaʼoj ti jmulavil noʼoxe, xchʼunoj lek ti tstabe sbalil li pojelale. Jech xtok, snaʼoj lek ti laj yal Jesus ti chkuxi sbatel osil skotol «li buchʼu chakʼ xchʼunel yoʼonton ta stojolale» (Juan 3:16; Rom. 6:23). Jamal xvinaj ti xchʼunoj lek Pablo ti tstabe sbalil li pojelale, jpʼel ta yoʼonton ti chakʼ ta perton li buchʼutik tsutes yoʼontonik akʼo mi tsots li kʼusi spasojike (Sal. 86:5).

9. ¿Kʼusi chakʼ jchantik li kʼusi laj yal Pablo ta Galatas 2:20?

⁹ Li Pabloe xchʼunoj lek ti kʼanbil yuʼun Dios ta skoj ti la stak talel Xnichʼon yoʼ xcham ta stojolale. Jkʼeltik li kʼusi toj kʼupil sba chal ta Galatas 2:20 (kʼelo). Xi laj yal li Pabloe: «Li Xnichʼon Dios ti jaʼ li buchʼu la skʼanun xchiʼuk ti laj yakʼ sba ta jtojolale». Li Pabloe muʼyuk la snop ti mu sta-o ti xkʼanat yuʼun li Diose. Mu xiuk la snope: «Jnaʼoj ti skʼanoj kermanotak li Jeovae, pe muʼyuk onoʼox tskʼanun maʼ voʼone». Jech xtok, xi laj yalbe li ermanoetik ta Romae: «Cham ta jtojolaltik Kristo kʼalal jpasmulilutik toʼoxe» (Rom. 5:8). Muʼyuk spajeb ti kʼu yelan skʼanojutik li Diose.

10. ¿Kʼusi chakʼ jchantik li Romanos 8:38 xchiʼuk 39?

¹⁰ (Kʼelo Romanos 8:38, 39). Li Pabloe jpʼel ta yoʼonton ti skʼanojutik tajek li Diose. Laj yal ti muʼyuk kʼusi «xuʼ xchʼakutik lokʼel li ta kʼanelal yuʼun [Diose]». Snaʼoj lek ti laj yakʼ ta ilel smalael yuʼun ta stojolal li jteklum Israele. Jech xtok, snaʼoj ti laj yichʼ kʼuxubinel eke. Ta jpʼelchaʼpʼel noʼoxe xkoʼolaj ti xi laj yal li jtakbol Pabloe: «Mi la stak talel Xnichʼon  sventa xcham ta jtojole, muʼyuk srasonal kuʼun sventa xkal ti muʼyuk skʼanojun li Jeovae» (Rom. 8:32).

11. Akʼo mi ep kʼusi chopol la spas Pablo jech kʼuchaʼal chal ta 1 Timoteo 1:12 kʼalal ta 15, ¿kʼu yuʼun snaʼoj ti kʼanbil yuʼun Diose?

¹¹ (Kʼelo 1 Timoteo 1:12-15). Li Pabloe oy onoʼox bakʼintik ti chopol laj yaʼi sba ta skoj li kʼusitik la spas ta voʼnee. Laj yal ti jaʼ mas jpasmulil ta skotolike. ¿Kʼu yuʼun ti jech laj yale? Kʼalal muʼyuk toʼox yojtikinoj li mantale, la skontrain epal ermanoetik ta jeltos lumetik, la stikʼanan ta chukel jlom xchiʼuk lek laj yil ti xichʼuk milel li yantike (Ech. 26:10, 11). Jnoptik noʼox ti laj yakʼ ta milel jun nupultsʼakal li Pabloe, ¿kʼu van yelan chaʼi sba mi laj yojtikinbe yalab xnichʼnab ta tsʼakale? Chopol van chaʼi sba ta skoj li kʼusitik la spase, pe mu xa kʼusi stakʼ spas. Xchʼunoj lek ti cham Kristo ta stojolale xchiʼuk xi laj yale: «Ti kʼusi jtaoje jaʼ koliyal li slekil yutsil yoʼonton Diose» (1 Kor. 15:3, 10). ¿Kʼusi chakʼ jchantik? Jaʼ ti skʼan jpʼeluk ta koʼontontik ti cham ta jtojolaltik ta jujuntal li Kristoe xchiʼuk xuʼ lek xkil jbatik xchiʼuk Jeova ta skoj ti jech la spase (Ech. 3:19). Li kʼusi tstsak ta venta Diose jaʼ li kʼusi ta jpastik avi xchiʼuk li ta mas jelavele, maʼuk li kʼusitik chopol la jpastik ta voʼnee, mu ventauk mi jaʼutik xa ox stestigo Jeova o mi maʼuk toʼox (Is. 1:18).

12. Jech kʼuchaʼal chal 1 Juan 3:19 xchiʼuk 20, ¿kʼusi skʼan jpastik mi mu kʼusi xijtun-o chkaʼitik o ti mu jtatik-o xkichʼtik kʼanele?

¹² Bateltike, tsloʼlautik li koʼontontike xchiʼuk chakʼ jchʼuntik ti mu kʼusi xijtun-oe o ti mu jtatik-o xkichʼtik kʼanele (kʼelo 1 Juan 3:19, 20). Jaʼ yuʼun, xuʼ van ta jnoptik ti mu xtoj-o jmultik ti laj  yakʼ ta matanal xkuxlejal li Jesuse. Mi oy jech laj kaʼi jbatike, teuk ta joltik ti «mas to toyol skʼoplal li Diose, jaʼ mu sta li koʼontontike». Akʼo mi ta jnoptik ti mu skʼanutik li Jtotik ta vinajel o ti mu xakʼutik ta pertone, ti melel xkaltike, jaʼ ti skʼanojutike xchiʼuk ti chakʼutik ta pertone. Sventa jchʼuntik ti skʼanojutik xchiʼuk ti chakʼutik ta pertone, skʼan jchan Jvivliatik skotol kʼakʼal, nopolikuk noʼox jpastik orasion xchiʼuk jchiʼintik li ermanoetike. Jkʼeltik batel kʼu yuʼun toj tsots skʼoplal li oxtos taje.

13. ¿Kʼuxi tskoltautik kʼalal ta jchan Jvivliatike? (Kʼelo xtok li rekuadro « ¿Kʼuxi chkoltaatik li Skʼop Diose?»).

¹³ Jchantik li Skʼop Dios jujun kʼakʼale. Mi jech ta jpastike, mas to chkojtikinbetik li stalelal Jeovae xchiʼuk chkakʼtik venta ti skʼanojutik tajeke. Mi ta jnopbetik skʼoplal jujun kʼakʼal li kʼusi chal Vivliae, tskoltautik sventa lekuk kʼusi xbat ta nopel kuʼuntik xchiʼuk ti jeltik li kʼusi ta jnoptik o ti kʼu yelan chkaʼi jbatike (2 Tim. 3:16). Jun mol ta tsobobbail ti Kevin sbie xchiʼuk ti muʼyuk toʼox ep sbalil chaʼi sbae xi chale: «Kʼalal ta jchan li Salmo 103 xchiʼuk ta jnopbe skʼoplale, jaʼ tskoltaun sventa oyuk smelol li kʼusi ta jnope xchiʼuk ti xkakʼ venta li kʼusi tsnop ta jtojolal li Jeovae». Li Eva ti laj kalbetik skʼoplal li ta parafo 5 xi chale: «Kʼalal ch-echʼ jujun kʼakʼale, ta jchʼakbe yorail sventa jnopbe skʼoplal ti kʼu yelan tsnop li Jeovae. Taje tstsatsubtas xchʼunel koʼonton xchiʼuk ximuyubaj-o».

14. ¿Kʼuxi tskoltautik li orasione?

¹⁴ Jpasilantik orasion (1 Tes. 5:17). Sventa lekuk xkamigointik li jun krixchanoe, skʼan nopolikuk noʼox jchiʼintik ta loʼil xchiʼuk ti jamaluk kʼusi xkalbe jbatike, taje jaʼ jech skʼan jpastik ek ta stojolal li Jeovae. Kʼalal chkalbetik ti kʼu yelan chkaʼi jbatik, li kʼusi ta jnoptik xchiʼuk li kʼusi ta jvul-o koʼontontike, chkakʼbetik yil ti jpatoj koʼontontik ta stojolale xchiʼuk ti jnaʼojtik ti skʼanojutike (Sal. 94:17-19; 1 Juan 5:14, 15). Li Yua ti laj kalbetik skʼoplal ta parafo 2 xi chale: «Kʼalal ta jpas orasione, chkalbe Jeova skotol li kʼusitik la jpas echʼ kʼakʼale. Pe maʼuk noʼox, yuʼun ta jchapbe skotol li kʼusi oy ta koʼontone. Mu xkoʼolaj kʼuchaʼal yajval kabtel chkil li Jeovae, yuʼun jaʼ xa jech chkil kʼuchaʼal jun totil ti skʼanoj ta melel li yuni nichʼnabtake». (Kʼelo li rekuadro « ¿Mi oy xa achanoj?»).

15. ¿Kʼuxi chakʼ ta ilel Jeova ti oyutik ta yoʼonton ta jujuntale?

¹⁵ Jchiʼin li kermanotaktike. Jaʼik jun  matanal yakʼojbutik li Jeovae (Sant. 1:17). Kʼalal laj yakʼ kutsʼ kalaltik ta mantal ti skʼanojutik skotol orae, li Jeovae laj yakʼ kiltik ti oyutik ta yoʼonton ta jujuntale (Prov. 17:17). Kʼalal la stsʼibabe batel karta li yermanotak ta Kolosas li Pabloe, laj yal ti koltaat yuʼun junantik ermanoetike xchiʼuk ti patbat yoʼontone (Kol. 4:10, 11). Li Jesus eke ep sbalil laj yil kʼalal koltaat yuʼun anjeletik xchiʼuk junantik yajchankʼoptak ti jaʼik yamigotake (Luk. 22:28, 43).

16. ¿Kʼuxi tskoltautik sventa xijnopaj ta stojolal Jeova li kermanotaktike?

¹⁶ ¿Mi ta jkʼanbetik koltael li kermanotaktik xchiʼuk mi ta jchʼamtik li kʼusi tspas ta jtojolaltike? Kʼalal chkalbetik jvokoltik junuk ermano ti yij ta mantale, maʼuk skʼan xal ti kʼunutik ta mantale, yuʼun xuʼ jaʼ skoltautik. Jkʼeltik li kʼusi laj yal James ti laj kalbetik skʼoplal ta parafo 5: «Jaʼ skoltaojun ti oy kamigotak ti yijik ta mantale. Kʼalal oy kʼusi chopol chtal ta jnopbene, ta sjunul yoʼonton chchikintaik li kʼusi chkale xchiʼuk chalbeikun ti skʼanojikune. Taje jaʼ te chkakʼ venta ti skʼanojun xchiʼuk ti tsvul yoʼonton ta jtojolal li Jeovae». ¡Toj tsots skʼoplal ti oyuk jlekil amigotik li ta tsobobbaile!

17, 18. ¿Buchʼu skʼan jchʼunbetik li kʼusi chale, xchiʼuk kʼu yuʼun?

¹⁷ Li Satanase tskʼan ti xachibaje xchiʼuk ti xavikta spasel li kʼusi tskʼan Jeovae. Tskʼan ti xanop ti muʼyuk skʼanojot Jeova xchiʼuk ti mu xata-o ti xakʼbot akuxlejale. Pe mu jechuk ta melel.

¹⁸ Skʼanojot tajek li Jeovae xchiʼuk oy abalil chil. Mi ta jchʼunbetik smantale, jech-o tskʼanutik jech kʼuchaʼal kʼanbil li Jesuse (Juan 15:10). Jech oxal chaʼa, mu jchʼunbetik li Satanase mi jaʼuk li koʼontontik kʼalal chalbutik ti muʼyuk skʼanojutik li Jeovae. Jaʼ jchʼunbetik Jeova ti jaʼ tskʼel li kʼusi lek ta jpastik ta jujuntale. Jpʼeluk ta koʼontontik ti lek chil steklumal ti te kapal akʼoplal eke.