Kʼalal tetik xa ox 13 jabilale, muʼyuk xa lek xkil jba xchiʼuk li Jeovae. Toj ep noʼox kʼusi tspasik chkil li jchiʼiltak ta chanune, ta jkʼan ti jech kolemukun ta spasel eke. Ch-echʼ xa ta mas chkaʼi li smantal Jeova xchiʼuk li smantal jtot jmeʼe xchiʼuk toj tsots xa ta pasel chkaʼi li kʼusitik sventa mantale. Jnaʼoj yaʼel ti te oy li Jeovae, pe nom xa chkaʼi jba ta stojolal.

Muʼyuk onoʼox laj kikta jba, yuʼun chilokʼ to jutuk ta cholmantal sventa mu xakʼik venta ti yakal xa chilubtsaj ta mantale. Muʼyuk xa ta jchapan jba kʼalal chibat ta cholmantale, jaʼ yuʼun vokol chkaʼi kʼuxi xuʼ jlikes jloʼil o kʼuxi xuʼ jchiʼin ta loʼil li yajval nae. Chʼabal jrevisita, chʼabal chkakʼ estudio, vaʼun mas xa mu jkʼupin-o li cholmantale. Xi la jnope: «¿An kʼuxi xa noʼox xuʼ yuʼunik ti jech-o chcholik mantal jujun xemana xchiʼuk jujun u li yantike?».

Kʼalal kichʼoj xa ox 17 jabile, ta jkʼan xa tajek chinaki jtuk. Jaʼ yuʼun, libat ta Australia. Akʼo mi chat yoʼontonik kom li jtot jmeʼe,  la spat yoʼontonik ta jtojolal ti jech-o chitun ta stojolal Jeovae.

Kʼalal te xa oyun ta Australiae, mas xa lisok ta mantal, yuʼun muʼyuk xa mas chibat ta tsobajeletik xchiʼuk jaʼ lik jchiʼinan li kerem tsebetik ti chbatik bakʼintik ta tsobajele, pe chbatik ta kʼin xtok xchiʼuk ch-uchʼbajik. Li avie, chkakʼ venta ti xkoʼolaj kʼuchaʼal ti jun xa ox kok tikʼil ta steklumal Jeova xchiʼuk ti jun xa ox kok tikʼil ta sbalumil Satanase, pe muʼyuk bu jun koʼonton.

Jmoj toʼox nakalun xchiʼuk voʼob ermanaetik. Vaʼun chib jabil ta tsʼakale, te kom ta jnakutik jun xemana li jkʼelvanej ta sirkuito xchiʼuk yajnile. Kʼalal laj kakʼ venta ti toj lek stalelal li yajnil ti Tamara sbie, te lik jnop ti kʼu yelan oyun ta mantale. Kʼalal oy kʼusi tskʼelbe skʼoplal ta tsobobbail li smalale, te chkom xchiʼinunkutik li Tamarae, ximuyubajkutik noʼox. Toj lek laj kil ti jech tspase, yuʼun muʼyuk toʼox jnopoj ti lek stseʼin xchiʼuk ti bikʼit noʼox yakʼoj sba li buchʼu yij ta mantale.

Li Tamarae skʼanoj tajek li kʼusi xchanoj ta Vivliae xchiʼuk toj baxbol ta cholmantal, ta jkʼan xa kaʼi jechukun ek. Xmuyubaj noʼox chtun ta stojolal Jeova ti bu kʼalal xuʼ yuʼune, yan li voʼone muʼyuk ximuyubaj ta skoj ti juteb noʼox kʼusi ta jpas ta stojolale. Li stalelale la svulesbun ta jol ti oy ta yoʼonton Jeova ti xkuxetuk noʼox koʼontontik xijtun ta stojolale xchiʼuk ti xij-avan ta muyubajele (Sal. 100:2).

Ta jkʼan chimuyubaj kaʼi kʼuchaʼal Tamarae, jaʼ noʼox ti oy kʼusitik skʼan jpase. Vokol laj kaʼi pe pas onoʼox kuʼun. Lik jchapan jba li ta cholmantale xchiʼuk litun bakʼintik ta prekursora auksiliar. Taje jaʼ la skoltaun sventa mu xa masuk xixiʼ kʼalal ta jchol mantale xchiʼuk mas xa ximuyubaj ta skoj ti mas xa ta jtunes li Vivliae. Ta tsʼakale, lik tunkun ta prekursora auksiliar jujun u.

 Jaʼxa lik kamigoin li ermanoetik ti lek oyik ta mantale xchiʼuk ti xmuyubajik noʼox chtunik ta stojolal Jeovae akʼo mi jelajtik li sjabilalike. Li slekil talelalike jaʼ la skoltaun sventa jkʼel li kʼusi mas tsots skʼoplal chkile xchiʼuk ti xnopuk xkaʼi ti xichanunaj jtuke. Mas xa ta jkʼupin li cholmantale. Ta tsʼakale, li-och ta prekursora regular. Limuyubaj yan velta ti te xa oyun ta tsobobbaile.

Jun jabil ta tsʼakale, laj kojtikin li ermano Alex ti lek yoʼontone, skʼanoj tajek li Jeovae xchiʼuk tskʼupin li cholmantale. Li vaʼ kʼakʼale, jaʼo chtun ta siervo ministerial xchiʼuk vakib xa ox jabil chtun ta prekursor. Kʼalal ay tunuk jayibuk u ta Malaui ti bu jutuk tajek jcholmantaletike, te la xchiʼinan junantik misioneroetik xchiʼuk jaʼ tijbat yoʼonton sventa jaʼuk baʼyel xakʼ ta xkuxlejal li Ajvalilal yuʼun Diose.

Linupunkutik ta sjabilal 2003. Vaʼun, jmoj litunkutik batel ta tsʼakal ora. Ep kʼusitik jchanojkutik talel xchiʼuk ep yakʼojbunkutik bendision li Jeovae.

Li ta 2009, lik tunkunkutik ta misioneroal ta Timor Oriental ti jaʼ jun bikʼit lum ti nopol xil Indonesiae. Kʼalal laj kichʼkutik albele, labal sba laj kaʼikutik, limuyubajkutik tajek pe lixiʼkutik xtok. Voʼob u ta mas tsʼakale, likʼotkutik ta Dili ti jaʼ kapital yuʼun li Timor Orientale.

Jel tajek li jkuxlejalkutike, yuʼun laj kakʼkutik persa ti xnopuk xkaʼikutik ti kʼu yelan stalel xkuxlejalike, li skʼopike xchiʼuk ti kʼu yelan chveʼike. Kʼalal ta jcholkutik mantale, oy ta jtakutik krixchanoetik ti abol noʼox sbaike, ti muʼyuk mas chanunajemike xchiʼuk ti yichʼojik utilanele. Ep buchʼutik laj kojtikinkutik ti yayijem sbekʼtalik o ti mu xa  junuk yoʼontonik ta skoj li paskʼop xchiʼuk majbaile. *

¡Stuk xa noʼox jech li cholmantale! Jech kʼuchaʼal liʼe, jun veltae la jta ta cholmantal jun bikʼit tseb ti María * sbi xchiʼuk ti 13 sjabilale, chat tajek yoʼonton ta skoj ti oy toʼox ta junchib jabil ti cham smeʼe xchiʼuk muʼyuk mas tskʼopon li stote. Li Mariae mu snaʼ kʼusi tspas. Xvul to ta jol ti jun veltae x-okʼ tajek laj yalbun ti kʼu yelan chaʼi sbae pe mu xkaʼi lek li kʼusi chalbune, yuʼun mu toʼox jnabe lek li skʼope. Jaʼ yuʼun, laj kalbe Jeova ti akʼo skoltaun sventa jpatbe yoʼontone, vaʼun lik jkʼelbe junantik teksto ta Vivlia. Kʼalal echʼ jayibuk jabile, laj kil kʼu yelan jel batel xkuxlejal, stalelal xchiʼuk ti kʼu yelan xvinaj spat xokon li Mariae. Laj yichʼ voʼ xchiʼuk oy xa buchʼutik chakʼbe estudio li avie. Oy ep yutsʼ yalal ta mantal xchiʼuk kʼanbil tajek chaʼi sba.

Ta melel, li Jeovae yakʼoj tal bendision ti kʼu yelan ta xichʼ cholel mantal ta Timor Orientale. Li buchʼutik yichʼojik voʼ leʼ xa tal ta lajuneb jabile, ep buchʼutik chtunik xa ta prekursor, ta siervo ministerial, ta moletik ta tsobobbail xchiʼuk junantike tskolta sbaik ta sjelubtasel li vunetik ta skʼop stukik li ta Ofisina ti bu chichʼ Jelubtasel Kʼope. Limuyubaj tajek kʼalal chkaʼi kʼu yelan chkʼejinik li ta tsobajeletike, ti chkil ti xmuyubajik noʼoxe xchiʼuk ti kʼu yelan chchʼiik ta mantale.

Li jkuxlejalkutik liʼ ta Timor Orientale jelel tajek kʼuchaʼal ta Australiae. Akʼo mi jech, ximuyubajkutik noʼox. Bakʼintike, chimuykutik ta jun kʼox autovus ti noj ta krixchanoetik ti ay sman tal sveʼelik jech kʼuchaʼal takin choy xchiʼuk itajetik. Bakʼintik xtoke, chkakʼkutik estudio ta jun bikʼit na, kʼixin tajek, chʼabal spisoal li yut snaike xchiʼuk te x-eklajet smeʼ yalakʼik. Akʼo mi oy vokolil yileluk, ep ta velta xi la jnope: «¡Toj kʼupil sba!».

Kʼalal ta jvules ta jol ti kʼu yelan echʼ talel jkuxlejale, ta jtojbeik tajek ta vokol jtot jmeʼ ti laj yakʼ yipalik la xchanubtasikun ta stojolal Jeovae xchiʼuk ti la skoltaikun kʼalal oy kʼusi vokol laj kaʼi kʼalal la jta tal jvaʼleje. Li kʼusi chal Proverbios 22:6 jaʼ jech kʼotem ta jkuxlejal. Li jtot jmeʼe xmuyubajik tajek ta jtojolalkutik xchiʼuk li Alexe. Xmuyubajik tajek kʼalal chilik ti kʼu yelan tstunesunkutik li Jeovae. Leʼ xa ta sjabilal 2016, lik tunkunkutik ta jkʼelvanej ta sirkuito ti bu sbainoj skʼelel li Betel ta Australasiae.

Mu xa jchʼun yaʼel ti toj tsots toʼox laj kaʼi li cholmantale, yuʼun li avie ta jkʼupin xa tajek li cholmantale. Laj kakʼ venta ti jaʼ xijmuyubaj-o ta melel kʼalal chijtun ta sjunul koʼontontik ta stojolal Jeovae, mu ventauk li kʼusi ta jnuptan ta jkuxlejaltike. Jkʼupinoj tajek li 18 jabil ti jmoj xa tunemunkutik tal ta stojolal Jeova xchiʼuk li Alexe. Kakʼoj venta ti jaʼ melel li kʼusi xi laj yalbe Jeova li Davide: «Chmuyubaj skotolik li buchʼu tsaʼ snakʼobbail ta atojolale; skotol ora x-avetik ta muyubajel [...] xchiʼuk chmuyubajik ta atojolal li buchʼutik skʼanojik abie» (Sal. 5:11).