Li kʼusitik tsjakʼ jkʼelvunetike
¿Kʼu chaʼal jaʼo laj yal Jesus li kʼusi laj yal David ta Salmo 22:1 kʼalal jutuk xa ox skʼan xchame?
▪ Jech kʼuchaʼal chal ta Mateo 27:46, kʼalal jutuk xa ox skʼan xcham li Jesuse, xi laj yale: «Dios kuʼun, Dios kuʼun, ¿kʼu yuʼun ti laj aviktaune?». Taje jaʼ jech laj yakʼ kʼotuk ta pasel li kʼusi laj yal David ta Salmo 22:1 (Mar. 15:34). Kʼalal jech laj yal li Jesuse, maʼuk skʼan xal ti chibaje o ti muʼyuk xa xchʼunel yoʼontone, yuʼun laj yaʼibe smelolal ti kʼu yuʼun skʼan xchame xchiʼuk ta sjunul yoʼonton jech la spas (Mat. 16:21; 20:28). Jech xtok, snaʼoj ti muʼyuk tstunes jun «mok» li Jeova sventa xchabiat kʼalal tsta yorail chichʼ milele (Job 1:10). Vaʼun, jech chakʼ ta ilel Jesus ti tukʼ chakʼ sba ta stojolal Jeova manchuk mi toj kʼux ti kʼu yelan chichʼ milele (Mar. 14:35, 36).
Vaʼun chaʼa, ¿kʼu yuʼun ti jech laj yal li Jesuse? Mu jnaʼtik lek, pe jkʼeltik batel ti kʼu van yuʼun jech laj yale. *
Li Jesuse yikʼaluk van laj yakʼ ta aʼiel ti muʼyuk laj yichʼ koltael yuʼun Jeova kʼalal laj yichʼ milele. Muʼyuk chichʼ koltael yuʼun Jeova kʼalal chakʼ xkuxlejal ta jtojolaltike, yuʼun skʼan «spas preva lajelal ta skoj li krixchanoetike» (Ebr. 2:9).
Kʼalal laj yal Jesus li kʼusi chal ta Salmo 22, jaʼ van sventa xvul ta sjol krixchanoetik sjunul li kʼusi chal Salmoe. Li judaetike nopem xaʼiik tskomes ta sjolik jayibuk Salmo, kʼalal ch-albatik junuk versikuloe, chvul ta sjolik sjunul. Mi jaʼ jech oy ta yoʼonton li Jesuse, snaʼoj lek ti chvul ta sjolik yajtsʼaklomtak li epal albil kʼopetik ta sventa ti kʼu yelan chchame (Sal. 22:7, 8, 15, 16, 18, 24). Jech xtok, li ta slajebtik Salmoe chal ti jaʼ chkʼot ta «Ajvalil li Jeovae» xchiʼuk ti jaʼ tsventain «li krixchanoetik kʼalal to spajeb balumile» (Sal. 22:27-31).
Li Jesuse xuʼ van chakʼ ta aʼiel ti chʼabal smule. Muʼyuk tukʼ laj yichʼ chapanel kʼalal jutuk xa ox skʼan xchame, yuʼun laj yichʼ tikʼbel smul ti laj la xchopol kʼopta Diose (Mat. 26:65, 66). Ta anil noʼox la xchapanik xchiʼuk muʼyuk la stsakik ta venta li mantaletike (Mat. 26:59; Mar. 14:56-59). Jaʼ yuʼun, kʼalal jech laj yale, li Jesuse xuʼ van chakʼ ta aʼiel ti muʼyuk smul ti jaʼ jech chichʼ kastigoe.
Li Jesuse jaʼ van la svulesbe ta sjol krixchanoetik ti lek ilbil-o yuʼun Jeova li David akʼo mi laj yil svokol. Li Davide oy-o xchʼunel yoʼonton, yuʼun li ta yan versikuloetike te laj yal ti spatoj yoʼonton ta stojolal Dios ti tskolta li yajtuneltake xchiʼuk akʼbat-o bendision yuʼun li Jeovae (Sal. 22:23, 24, 27). Jaʼ jech kʼot ta stojolal li Jesus ti jaʼ «Xnichʼon Davide». Akʼo mi laj yichʼ jokʼanel ta jtel teʼe maʼuk skʼan xal ti muʼyuk xa lek ilat yuʼun li Jeovae (Mat. 21:9).
Xuʼ van jaʼ laj yakʼ ta aʼiel Jesus ti kʼux tajek laj yaʼi ti muʼyuk xa chabibil yuʼun Jeova sventa xakʼ ta ilel ti tukʼ laj yakʼ sbae. Kʼalal la saʼ smulik li Adan xchiʼuk Evae, persa laj yakʼ xkuxlejal ta jtojolaltik li Jesuse. Taje maʼuk onoʼox jech oy ta yoʼonton ta slikebal li Jeovae. Akʼo mi muʼyuk kʼusi chopol la spas li Jesuse, skʼan xil svokol xchiʼuk xcham ta jtojolaltik sventa xakʼ ta ilel ti jaʼ jun jutkʼop li Satanase xchiʼuk ti jtatik yan velta li kʼusi chʼay yuʼunik li Adan xchiʼuk Evae (Mar. 8:31; 1 Ped. 2:21-24). Sventa xkʼot ta pasel taje, skʼan ti mu xkoltaat yuʼun Jeova li vaʼ orae.
Li kʼusi van oy ta yoʼonton Jesuse jaʼ ti xakʼbe yil yajtsʼaklomtak ti kʼu yuʼun laj yakʼ permiso Jeova ti xichʼ milele. * Li Jesuse snaʼoj ti ep buchʼutik chmak-o yakanik ti jech laj yichʼ jokʼanel ta jtel teʼe, yuʼun jaʼ noʼox jech chichʼik milel li buchʼutik la spas tsots smulike (1 Kor. 1:23). Pe mi laj yaʼibeik smelolal yajtsʼaklomtak ti kʼu yuʼun chchame, muʼyuk me chmak yokik (Gal. 3:13, 14). Vaʼun, muʼyuk tsnopik ti la spas tsots smule, yuʼun jaʼ jkoltavanej chilik.
Akʼo mi mu jnaʼtik kʼusi oy ta yoʼonton Jesus ti vaʼ yelan laj yale, li kʼusi snaʼoje jaʼ ti yakal tspasbe li kʼusi tskʼan yoʼonton Jeova ti xcham ta jtel teʼe. Ta tsʼakal jutuke, xi laj yale: «¡Kʼot xa ta pasel!» (Juan 19:30; Luk. 22:37). Li Jeovae muʼyuk xa la xchabi li vaʼ orae sventa xkʼot ta pasel li kʼusi tal spas liʼ ta balumile. Jaʼ jech kʼot ta pasel skotol li kʼusitik «tsʼibabil ta Smantal Moises xchiʼuk li kʼusitik yaloj J-alkʼopetik xchiʼuk li kʼusitik tsʼibabil ta Salmose» (Luk. 24:44).
^ par. 2 Li ta revista liʼe, kʼelo xtok li ta xchanobil «¿Kʼusi chakʼ jchantik li kʼusi laj yal komel Jesuse?» ta parafo 9 xchiʼuk 10.
^ par. 4 Kʼalal la xchol mantal li Jesuse, oy onoʼox kʼusitik laj yal xchiʼuk oy kʼusitik la sjakʼ pe maʼuk sventa xakʼ ta aʼiel ti kʼu yelan chaʼi sbae, yuʼun jaʼ sventa stijbe yoʼonton yajchankʼoptak sventa xalik li kʼusi tsnopike (Mar. 7:24-27; Juan 6:1-5; kʼelo Li Jkʼel-osil ta toyol ta 15 yuʼun oktuvre ta 2010 ta pajina 4 xchiʼuk 5).
