LI VUL oʼontone xuʼ xkʼot kʼuchaʼal jun alal ikatsil ti tslubtsanutike (Prov. 12:25). ¿Mi oy jech avaʼioj aba junuk velta? ¿Mi mu xa xanaʼ kʼusi chapas bakʼintik? Mi jeche, mu atukuk noʼox ti jech chavaʼi abae. Yikʼaluk van oy buchʼu ta jchabitik ta skoj ti ipike, chamem van junuk kutsʼ kalaltik, yakal van chkil jvokoltik ta skoj tsatsal ikʼaloʼ, nikel o yan kʼusitik o yikʼaluk van oy kʼusitik la jnuptantik ti tslubtsanutike xchiʼuk ti chlub˗o jnopbentike. ¿Kʼusi tskoltautik sventa mu masuk jvul koʼontontik? a

Li kʼusi kʼot ta stojolal li ajvalil Davide xuʼ skoltautik sventa mu masuk jvul koʼontontik. Li stuke ep kʼusitik la snuptan xchiʼuk jutuk xa mu cham (1 Sam. 17:34, 35; 18:10, 11). ¿Kʼusi koltaat˗o David sventa mu svul tajek yoʼontone? ¿Kʼusi xuʼ jchanbetik?

Li Davide ep kʼusitik la snuptan. Jkʼeltik kʼusi kʼot ta stojolal kʼalal jaʼo yakal chjatav ta skoj ti tskʼan ox chmilat yuʼun li ajvalil Saule. Kʼalal sutik talel ta jun paskʼop li David xchiʼuk sviniktake, laj yilik ti elkʼanbat batel skotol li kʼusitik oy yuʼunik yuʼun li yajkontratakike, chikʼbat li snaike xchiʼuk ikʼbatik batel li yutsʼ yalalike. ¿Kʼu yelan laj yaʼi sba? Xi chal li Vivliae: «Li David xchiʼuk li viniketik te xchiʼuke lik smil sbaik ta okʼel jaʼ to ti kʼuxi lubtsajik ta okʼele», maʼuk noʼox, yuʼun ch˗akʼbat ox «ton yuʼun li sviniktake» (1 Sam. 30:1-6). Oxtos to li kʼusitik tsots yakal tsnuptan li Davide: chukbil batel li yutsʼ yalale, tskʼan ox chmilat yuʼun li sviniktake xchiʼuk yakal tsnutsat yuʼun li ajvalil Saule. ¿Mi xnop noʼox avuʼun kʼu to yelan yakal tsvul yoʼonton li Davide?

¿Kʼusi la spas? Ta anil noʼox «la saʼ koltael ta stojolal li Jeova Dios yuʼune sventa sta stsatsal yoʼonton». ¿Kʼuxi la spas? Li Davide nopem onoʼox xaʼi tspas orasion sventa skʼanbe koltael li Jeovae xchiʼuk ti snopbe skʼoplal ti kʼu yelan koltabil tal ta voʼnee (1 Sam. 17:37; Sal. 18:2, 6). Li Davide laj yakʼ venta ti skʼan xbeiltasat yuʼun li Jeovae, jaʼ yuʼun la sjakʼbe li kʼusi xuʼ spase. Kʼalal takʼbat yuʼun Jeovae, ta anil la spas li Davide. Ta skoj taje, li Jeovae laj yakʼbe bendision li David xchiʼuk sviniktake. Jech xtok, la spoj sutel li yutsʼ yalalike xchiʼuk li kʼusitik yuʼunike (1 Sam. 30:7-9, 18, 19). ¿Mi laj avakʼ venta li oxtos kʼusi la spas Davide? La spas orasion sventa skʼanbe koltael Jeova, la snopbe skʼoplal ti kʼu yelan koltabil yuʼun Jeova ta voʼnee xchiʼuk la spas li kʼusi albat yuʼun Jeovae. ¿Kʼusi xuʼ jchanbetik? Jkʼeltik oxtosuk.

1. Jpastik orasion. Mi chlik jvul koʼontontik chkaʼitike, jkʼanbetik Jeova ti akʼo skoltautik yoʼ jnaʼtik kʼusi xuʼ jpastik. Mi jal ta jpastik orasion xchiʼuk mi chkalbetik Jeova li kʼusi chkat˗o koʼontontike, jun me koʼontontik chijkom. Mi mu stakʼ jech jpastike, xuʼ jlikel noʼox jkʼopontik xchiʼuk xuʼ ta koʼontontik noʼox. Kʼalal ta jkʼopontik Jeova jujukoje, yakal chkakʼtik ta ilel ti jpatoj koʼontontik ta stojolal jech kʼuchaʼal li David ti xi laj yale: «Jaʼ tayal ton kʼotem kuʼun li Jeovae xchiʼuk jaʼ jtsatsal pojobbail xchiʼuk jaʼ li buchʼu tspojune.  Jaʼ mukʼta ton kuʼun li Jdiose, jaʼ te jtaoj jpojobbail» (Sal. 18:2). ¿Mi oy sbalil li orasione? Jun prekursora ti Kahlia sbie xi chale: «Kʼalal ta jpas orasione, jun xa koʼonton chkaʼi jba. Li orasione tskoltaun sventa jechuk jnop kʼuchaʼal li Jeovae xchiʼuk ti masuk to jpat koʼonton ta stojolale». Ta melel, li orasione jaʼ jun kʼupil sba matanal yakʼojbutik Jeova ti xuʼ skoltautik kʼalal ta jvul koʼontontike.

2. Jnopbetik skʼoplal. Kʼalal chavules ta ajol li kʼusitik anuptanoje, ¿mi ta van xaval ti muʼyuk kuch avuʼun jechuk ti manchuk la skoltaot Jeovae? Kʼalal ta jnopbetik skʼoplal ti kʼu yelan la skolta yajtuneltak ta voʼne li Jeovae xchiʼuk ti kʼu yelan skoltaojutik tale, mas ta jpat koʼontontik ta stojolal xchiʼuk mas jun koʼontontik chkaʼi jbatik (Sal. 18:17-19). Jun mol ta tsobobbail ti Joshua sbie xi chale: «Jtsʼibaoj ta vun li orasionetik ti bu stakʼojbun li Jeovae. Taje jaʼ sventa jvules ta jol ti kʼu yelan stakʼojbun Jeova kʼalal oy kʼusi jamal laj kalbee». Kʼalal ta jnopbetik skʼoplal li kʼusitik spasoj ta jtojolaltik li Jeovae, chakʼ kipaltik sventa jtsaltik li vul oʼontone.

3. Oyuk kʼusi jpastik. Jkʼeltik kʼusi chal Vivlia kʼalal skʼan toʼox kʼusi ta jnop ta jpastike, yuʼun jaʼ noʼox xuʼ te jtatik lekil beiltasel (Sal. 19:7, 11). Ep buchʼutik yakʼojik venta ti kʼalal tsabeik skʼoplal junuk tekstoe, mas tsnaʼik kʼuxi xuʼ xakʼ ta xkuxlejalik. Jun mol ta tsobobbail ti Jarrod sbie xi chale: «Kʼalal ta jsabe lek skʼoplal junuk tekstoe, tskoltaun sventa jnaʼ skotol li kʼusitik kʼot ta pasele. Vaʼun, xuʼ jnaʼ li kʼusi tskʼan chalbun li Jeovae, chkʼot ta koʼonton xchiʼuk ta jpas li kʼusi lek chile». Kʼalal chkakʼtik sbeiltasutik Jeova ta Vivliae xchiʼuk ta jchʼunbetik li smantaltake, mas me chapalutik sventa jtsaltik li vul oʼontone.

Li Davide snaʼoj lek ti jaʼ noʼox xuʼ stsal yuʼun li vul oʼonton mi chkoltaat yuʼun li Jeovae. Tstoj tajek ta vokol ti chkoltaate, xi laj yale: «Ta skoj li sjuʼel Diose, xuʼ ximuy ta jun muro». Xi to laj yale: «Jaʼ chakʼ kipal li melel Diose» (Sal. 18:29, 32). Yikʼaluk van xuʼ jnoptik ti xkoʼolaj kʼuchaʼal tayal muro li jvokoltike, pe koliyal li Jeovae xuʼ stsal kuʼuntik. Mi ta jkʼanbetik koltael Jeova ta orasion, mi ta jnopbetik skʼoplal li kʼusitik spasoj ta jtojolaltik xchiʼuk mi ta jpastik jech kʼuchaʼal tskʼane, jpʼel me ta koʼontontik ti chakʼ kipaltik xchiʼuk jpʼijiltik sventa jnaʼtik kʼuxi xuʼ jtsaltik li vul oʼontone.