Mi jech kʼot ta pasele, jaʼ svinajeb ti la xtuchʼbe skʼoplal li baʼyel snupunel li ermano kʼalal nupun yan veltae xchiʼuk ti jaʼ xa yajnil li buchʼu laj yikʼe. Sventa xkaʼibetik lek smelolal ti kʼu yuʼun jech chichʼ alele, jkʼelbetik skʼoplal li kʼusi laj yal Jesus ta sventa li xtuchʼel nupunel xchiʼuk ti xijnupun yan veltae.

Li ta Mateo 19:9, li Jesuse laj yal ti kʼajomal noʼox oy jun srasonal chal ta Vivlia ti xuʼ oy buchʼu xtuchʼ snupunele. Xi chale: «Ti buchʼu tsutes˗o yajnil mi maʼuk ta skoj mulivajel xchiʼuk ti chikʼ yan antse tsloʼla snup xchiʼil». Li kʼusi laj yal Jesuse chakʼ jchantik 1) ti chal Vivlia ti jaʼ noʼox ta skoj mulivajel xuʼ xtuchʼ snupunelike xchiʼuk 2) ti yakal chmulivaj li vinik mi chtuchʼ snupunel ti muʼyuk srasonal yuʼun ta Vivliae xchiʼuk ti chnupun xchiʼuk yan antse. a

Li kʼusi laj yal Jesus liʼe, ¿mi chakʼ ta aʼiel Vivlia ti jaʼ skʼan xal ti xuʼ xnupun yan velta li jun vinik ti laj xa xtuchʼ snupunel ta registro civil ta skoj ti mulivaje? Mu xuʼ xkaltik ti xuʼe o ti moʼoje. Kʼalal oy buchʼu junukal tsloʼla li xchiʼil ta nupunele, li buchʼu muʼyuk smule jaʼ tsnop mi chakʼ ta perton o mi muʼyuk. Mi muʼyuk laj yakʼ ta perton xchiʼuk ti chtuchʼ snupunelik ta registro civile, xchaʼvoʼalik xuʼ saʼ snup xchiʼilik yan velta.

Pe li buchʼu muʼyuk smule xuʼ van muʼyuk ta yoʼonton chtuchʼ snupunel xchiʼuk oy van ta yoʼonton chakʼ ta perton li smalale. Pe ¿kʼusi van chkʼot ta pasel mi muʼyuk la xchʼam akʼel ta perton li vinik ti la smukul sati yajnile xchiʼuk ti chtuchʼ snupunel ta registro civil ti muʼyuk jech laj yakʼ ye li yajnile? Ta skoj ti tskʼan ch˗akʼvan ta perton li antse xchiʼuk ti mu skʼan xtuchʼ snupunele, ta sat li Jeovae mu xuʼ xnupun yan velta li vinike. Pe mi nupun xchiʼuk yan ants akʼo mi chal Vivlia ti mu stakʼe, yakal xa me tsloʼla yan velta li snup xchiʼil toʼoxe. Li moletik ta tsobobbaile skʼan me skʼelbeik skʼoplal yan velta ta jun komite sventa chapanvanej li mulil taje (1 Kor. 5:1, 2; 6:9, 10).

Mi nupun yan velta li jun vinik ti muʼyuk chal Vivlia ti stakʼ jech spase, ¿kʼu yelan skʼan xkiltik li snupunel toʼoxe xchiʼuk li snupunel avie? ¿Mi nupultsʼakal ch˗ilatik˗o yuʼun Jeova xchiʼuk li sba ajnile? Li buchʼu muʼyuk smule, ¿mi xuʼ to van snop mi chakʼ ta perton o mi muʼyuk li smalal toʼoxe? ¿Mi xuʼ van chkaltik ti yakal chmulivajik li achʼ nupunele?

Kaʼiojbetik toʼox smelolal ti yakal chmulivaj li achʼ nupunel mi kuxul to li buchʼu muʼyuk la spas smule, mi muʼyuk to nupuneme xchiʼuk mi muʼyuk mulivajeme. Pe li Jesuse mu jaʼuk mas laj yalbe skʼoplal li buchʼu muʼyuk la saʼ smul kʼalal laj yal ta sventa li xtuchʼel nupunel xchiʼuk ti saʼ yan snup xchiʼilike. Li kʼusi noʼox laj yalbe skʼoplal Jesuse jaʼ ti yakal tsloʼla snup xchiʼil li jun vinik mi chtuchʼ snupunel ti muʼyuk jech chal Vivliae xchiʼuk ti tsaʼ yan snup xchiʼile. Pe mi jech kʼot ta pasele, li Jesuse laj yal ti xkoʼolaj ti chmulivaj li vinik ti jech tspase, vaʼun jaʼ te chchʼay˗o skʼoplal li snupunel toʼoxe.

Kʼalal oy buchʼu chtuchʼ snupunel ta registro civil xchiʼuk ti chnupun xchiʼuk yan krixchanoe, li snup xchiʼil ti muʼyuk smule maʼuk xa oy ta sba mi chakʼ ta perton o mi muʼyuk. Jech xtok, mu  xuʼ xkaltik mi lek o mi muʼyuk lek li achʼ nupunel ta skoj ti kuxul to li buchʼu muʼyuk la spas smule, ti muʼyuk to nupuneme o ti muʼyuk mulivajeme. b

Li ta slikebale, laj kaltik ti jaʼ mulivaj li malalile, vaʼun ti la xtuchʼ˗o li snupunelike. Pe ¿kʼusi van chkʼot ta pasel mi la xtuchʼ snupunel xchiʼuk mi nupun yan velta, pe ti muʼyuk mulivajeme? ¿O kʼusi van chkʼot ta pasel mi jaʼ to mulivaj li vinik kʼalal xtuchʼoj xa ox snupunelik xchiʼuk ti nupun yan velta akʼo mi ch˗akʼat xa ox ta perton yuʼun li yajnil toʼoxe? Mi jech kʼot ta pasele, xkoʼolaj ti mulivaj li vinik kʼalal la xtuchʼ snupunel xchiʼuk ti nupun yan veltae, jaʼ yuʼun te chchʼay skʼoplal li baʼyel snupunele. Vaʼun, ta stojolal li ajvalile oy xa sbalil li achʼ nupunele. Li revista La Atalaya ta 15 yuʼun fevrero ta 1980, pajina 30 laj yal ti ta skoj ti nupun xa yan veltae, «mu xuʼ xikta komel li yajnile xchiʼuk mu xuʼ sut yan velta xchiʼuk li yajnil toʼoxe; yuʼun li snupunelik toʼoxe lajem xa skʼoplal ta skoj ti la xtuchʼ snupunel ta registro civile, ta skoj ti mulivaje xchiʼuk ti nupun yan veltae».

Li kʼusi laj xa kalbetik talel skʼoplal liʼe maʼuk skʼan xal ti muʼyuk xa chʼul chkiltik li nupunele o ti maʼuk xa jun tsatsal mulil chkiltik li buchʼu tsloʼla snup xchiʼile. Mi oy jun ermano la xtuchʼ snupunel ti muʼyuk jech chal Vivliae xchiʼuk ti tsaʼ yan yajnile, li moletike tsvaʼanik jun komite sventa chapanvanej, yuʼun la sloʼla snup xchiʼil. (Mi jaʼ yajtsʼaklom Kristo li achʼ yajnile, skʼan svaʼanik yan komite sventa chapanvanej, yuʼun mulivaj xa ek). Muʼyuk chkaltik ti yakal chmulivaj li achʼ nupultsʼakale, pe ta epal jabil muʼyuk me kʼusi chichʼ akʼbel sbain ta tsobobbail li ermanoe. Skʼan xichʼ malael sventa xchʼay ta sjolik li kʼusi la spase. Jech xtok, skʼan tsakel ta venta ti kʼu yelan oy li sba ajnil ti baʼyel xa onoʼox van la snop tsloʼlae xchiʼuk li xnichʼnabtak ti kʼoxik to ti xuʼ van la stenan komele (Mal. 2:14-16).

Chopol kʼusitik chkʼot ta pasel kʼalal ta jtuchʼ jnupuneltik ta registro civil xchiʼuk mi chijnupun yan velta ti muʼyuk jech chal ta Vivliae, jaʼ yuʼun skʼan ti chʼuluk xkiltik li nupunel jech kʼuchaʼal chil Jeovae (Ekl. 5:4, 5; Ebr. 13:4).