1. ¿Kʼu yelan chaʼi sbaik junantik kʼalal chlokʼik ta cholmantale? (Kʼelo xtok li lokʼole).

 LI YAJTUNELUTIK Jeovae ta jcholtik mantal ta skoj ti jkʼanojtik li Jtotik ta vinajele xchiʼuk ta skoj ti ta jkʼantik xojtikinik li yantik eke. Epal ermanoetike tskʼupinik chcholik mantal, pe jaʼuk li yantike vokol chaʼiik ta spasel. ¿Kʼu yuʼun ti jech chaʼi sbaike? Junantike stsʼijetik noʼox xchiʼuk mu noʼox spas yuʼun chaʼiik. Yantik xtoke chkʼexavik kʼalal chbatik ta vulaʼal ta sna krixchanoetik kʼalal muʼyuk takbilik ta ikʼele. Junantik xtoke chiʼik mi mu lekuk xtakʼbatik. Jaʼuk li yantike jaʼ ta skoj ti mu skʼan sabeik sjol li yantike. Skotol li ermanoetik taje skʼanojik tajek li Jeovae, pe vokol chaʼiik ti xcholbeik mantal li buchʼutik mu xojtikinike. Akʼo mi jech, snaʼojik ti toj tsots skʼoplal li abtelal taje. Jech oxal, chlokʼilanik onoʼox ta cholmantal. ¡Xmuyubaj yuʼunik Jeova kʼalal jech tspasike!

2. ¿Kʼu yuʼun skʼan mu xachibaj ti mi oy bakʼintik ti muʼyuk xa xamuyubaj li ta cholmantale?

² ¿Li voʼot une? ¿Mi oy bateltik ti muʼyuk xa xamuyubaj li ta cholmantale? Mi jaʼ jeche, mu me xachibaj. Mi muʼyuk jun avoʼonton chachol mantale, xuʼ van jaʼ senyail ti bikʼit avakʼoj abae. Yikʼaluk van mu xakʼan ti labal xa sba xa yiloxuk li yantike o ti xatikʼ aba ta kʼope. Jech xtok, muʼyuk onoʼox buchʼu lek chaʼi ti mu xtakʼbat leke, mas to kʼalal oy ta avoʼonton chakoltavane. Li Atot ta vinajele xaʼibe lek smelolal li kʼusitik chanuptane xchiʼuk oy ta yoʼonton tskoltaot (Is. 41:13). Li ta xchanobil liʼe, ta jkʼeltik batel voʼtos kʼusitik xuʼ skoltaot sventa masuk to xakʼupin li cholmantale.

 XUʼ TE XATA AVIP LI TA SKʼOP DIOSE

3. ¿Bu la sta yipal Jeremias sventa xchol mantal?

³ Li ta voʼnee, kʼalal oy kʼusi ch-akʼbat sbainik li yajtuneltak Dios ti mu spas yuʼun chaʼiike, te tsta yipalik li ta Tsʼibetike. Kalbetik skʼoplal li j-alkʼop Jeremiase. Kʼalal take batel yuʼun Jeova ta cholmantale, xiʼ tajek xchiʼuk xi laj yale: «Li voʼone mu jnaʼ xikʼopoj, yuʼun toj keremun to» (Jer. 1:6). ¿Kʼuxi chʼay yuʼun li xiʼele? Jaʼ akʼbat yipal yuʼun li Skʼop Diose. Xi laj yale: «Li skʼop Jeovae [ . . . ] xkoʼolaj kʼuchaʼal kʼokʼ ti xtiltun ta jbakile, mu xa stsʼik laj kaʼi» (Jer. 20:​8, 9). Ti bu la xchol mantal li Jeremiase mu toj kʼunuk. Pe li aʼyej la spuk batele, jaʼ akʼbat-o yipal sventa spas yuʼun li kʼusi akʼbat sbaine.

4. ¿Kʼusi sbalil ta jtatik mi ta jchantik xchiʼuk mi ta jnopbetik skʼoplal li Skʼop Diose? (Kolosenses 1:​9, 10).

⁴ Li yajtsʼaklomutik Kristo eke te ta jta kipaltik kʼalal ta jchantik li Skʼop Diose. Kʼalal la stsʼibabe batel yajtsʼaklomtak Kristo ta Kolosas li Pabloe laj yalanbe ti mi oy xa ox lek yojtikinobil yuʼunike, jaʼ chkoltaatik sventa oyuk lek smelolalik ta stojolal Jeova xchiʼuk ti jech-o tsatin batel yuʼunik li lekil abtelale (kʼelo Kolosenses 1:​9, 10). Jamal xvinaj, li jun lekil abtelale jaʼ li xcholel batel li lekil aʼyejetike. Jech kʼuchaʼal laj xa kiltike, kʼalal ta jchantik xchiʼuk ta jnopbetik skʼoplal li Skʼop Diose, tstsatsub li xchʼunel koʼontontik ta stojolal Jeovae xchiʼuk chkaʼibetik lek smelolal ti kʼu yuʼun skʼan jpuktik batel li lekil aʼyejetik ta sventa li Ajvalilale.

5. ¿Kʼusi xuʼ jpastik sventa jtabetik lek sbalil li Vivliae?

⁵ Sventa xatabe lek sbalil li Skʼop Diose, mu me ta aniluk xakʼel o ti ta anil xa chanopbe skʼoplale. ¿Kʼusi xuʼ xapas ti mi la ata junuk versikulo ta Vivlia ti vokol ta aʼibel smelolale? Sabo lek smelolal kʼusi smakoj li ta Índice de las publicaciones Watch Tower o li ta Saʼobil sventa xchanik mas li stestigotak Jeovae. Mi la achʼakbe lek yorail sventa xachanunaje, mas to me chapat avoʼonton li ta Skʼop Diose (1 Tes. 5:21). Mi mas xa ox achʼunoj lek li kʼusi chal Vivliae, mas me chakʼupin yalbel yantik li kʼusi yakal chachane.

LEK XACHAPAN ABA LI TA CHOLMANTALE

6. ¿Kʼu yuʼun skʼan jchapan jbatik lek kʼalal chijlokʼ ta cholmantale?

⁶ Mi la achapan aba lek kʼalal chalokʼ ta cholmantale, mas me jun avoʼonton chachiʼin ta loʼil li krixchanoetike. Li Jesuse baʼyel xa onoʼox la xchapan yajchankʼoptak kʼalal  muʼyuk toʼox stakanoj batel ta cholmantale (Luk. 10:​1-11). Ta skoj ti la spasik li kʼusi albatik yuʼun Jesuse, lek kʼusi kʼot ta pasel yuʼunik li ta cholmantale, jaʼ yuʼun xmuyubajik noʼox (Luk. 10:17).

7. ¿Kʼusi xuʼ jpastik sventa lekuk chapalutik kʼalal mi lijlokʼ ta cholmantale? (Kʼelo xtok li lokʼole).

⁷ Sventa lekuk chapalutik kʼalal ta jcholtik mantale, jnopbetik lek skʼoplal kʼuxi xuʼ xkal ta jkʼop jtuktik li lekil aʼyejetike. Jech xtok, jtunel me kuʼuntik mi baʼyel ta jnopbetik skʼoplal kʼu yelan nopem xaʼi tstakʼbutik li krixchanoetik bu ta jcholtik mantale xchiʼuk ti jnopbetik skʼoplal kʼuxi ta jtakʼbetike. Vaʼun, kʼalal ta jchiʼintik ta loʼil li krixchanoetike, jun noʼox koʼontontik, xijtseʼet noʼox xchiʼuk chkakʼtik ta ilel ti oy ta koʼontontik li yantike.

8. Li yajtsʼaklomtak Kristoe, ¿kʼuxi xkoʼolajik-o ta jun kʼib ti patbil ta achʼele?

⁸ Li jtakbol Pabloe oy kʼusi la skoʼoltas-o li abtelal ta cholmantale. Xi laj yale: «Jechunkutik kʼuchaʼal kʼib patbil ta achʼel ti noj ta [kʼulejale]» (2 Kor. 4:7). Pe, ¿kʼusi jaʼ li kʼulejale? Jaʼ li xcholel lekil aʼyejetik ta sventa Ajvalilal ti xuʼ sta-o skolebal li krixchanoetike (2 Kor. 4:1). ¿Kʼusi jaʼ li kʼib ti patbil ta achʼele? Jaʼ li yajtunelutik Diose ti chkaltik batel li lekil aʼyejetike. Li ta skʼakʼalil Pabloe, li jpʼolmajeletike nopem xaʼi tstunesik kʼibetik ti patbil ta achʼel sventa skʼej sveʼelik, svinoik o skʼej stakʼinike. Li avi kʼakʼal eke, li Jeovae oy kʼusi yakʼoj jbaintik ti toj tsots skʼoplale: li spukel batel lekil aʼyejetike. Ta skoj ti tskoltautike, oy kipaltik sventa lek jpas li kabteltik yakʼoj jbaintike.

KʼANBO STSATSAL AVOʼONTON LI DIOSE

9. ¿Kʼusi xuʼ skoltautik sventa mu jxiʼtatik li krixchanoetike xchiʼuk mi muʼyuk lek laj kichʼtik takʼbele? (Kʼelo xtok li lokʼole).

⁹ Bateltike, chijxiʼo yuʼun li krixchanoetike o kʼalal muʼyuk lek chkichʼtik takʼbele. ¿Kʼuxi xuʼ stsal kuʼuntik? Jnopbetik skʼoplal li orasion la spasik jtakboletik kʼalal albatik mantal ti xikta sbaik ta cholmantale. Li stukike muʼyuk xiʼik, yuʼun la skʼanbeik Jeova ti xkoltaatik sventa tsotsuk yoʼonton xalik batel li skʼope. Vaʼun, li Jeovae la stakʼ ta anil (Ech. 4:​18, 29, 31). Kʼalal mi och xiʼel ta koʼontontike, jkʼanbetik Jeova ti skoltautike. Kalbetik ti skoltautik sventa masuk to jkʼantik li krixchanoetik yoʼ mu xijxiʼ kʼalal ta jcholbetik mantale.

10. ¿Kʼuxi tskoltautik Jeova sventa jpukbetik bal skʼoplale? (Isaias 43:​10-12).

 ¹⁰ Li Jeovae jaʼ la stʼujutik sventa xijkʼot ta stestigotak (kʼelo Isaias 43:​10-12). Xchiʼuk jamal yaloj ti tskoltautik sventa tsotsuk koʼontontike. Kalbetik batel skʼoplal chantosuk li kʼusi xuʼ skoltautik ta spasel taje. Baʼyel, li Jesuse te xchiʼukutik kʼalal ta jcholtik batel li lekil aʼyejetike (Mat. 28:​18-20). Xchibal, li Jeovae yalojbe anjeletik ti skoltautike (Apok. 14:6). Yoxibal, li Jeovae chakʼbutik xchʼul espiritu, taje jaʼ tskoltautik sventa svules ta joltik li kʼusitik xa jchanojtike (Juan 14:​25, 26). Xchanibal, li Jeovae yakʼoj kermanotaktik sventa xchiʼinutik ta cholmantal. Ta skoj ti tskoltautik Jeova xchiʼuk li kermanotaktike, xuʼ me tsots koʼontontik jcholtik batel mantal.

JTSAKTIK TA VENTA KʼU YELAN OY LI KRIXCHANOETIKE XCHIʼUK JUNUK KOʼONTONTIK

11. ¿Kʼusi xuʼ jpastik sventa masuk to ep buchʼutik jcholbetik mantale? (Kʼelo xtok li lokʼole).

¹¹ ¿Mi chachibaj kʼalal jutuk chata krixchanoetik ta naetike? Mi jaʼ jecheʼ, xi xajakʼbe abae: «¿Bu van oyik li avie? ¿Mi te van oyik ta yabtelik o mi yakalik ta manolajel?» (Ech. 16:13). Mi jaʼ jeche, ¿mi xuʼ van xachol mantal ta kayeetik? Jun ermano ti Yoxua sbie xi chale: «Oy buchʼutik lek jcholojbe mantal kʼalal chibat ta chʼivit, ta mukʼtikil tiendaetik xchiʼuk li ta skotleb karroetike». Li Yoxua xchiʼuk li yajnil ti Breyet sbie mas ep staojik krixchanoetik ta snaik kʼalal chbat xcholik mantal ta bat kʼakʼale xchiʼuk kʼalal chbat xcholik mantal ta domingo mi echʼem xa ox oʼlol kʼakʼale (Efes. 5:​15, 16).

12. ¿Kʼuxi xuʼ jnaʼtik li kʼusitik xchʼunoj li krixchanoetike xchiʼuk li kʼusi oy ta yoʼonton tsnabeik skʼoplale?

¹² Mi chavil ti muʼyuk mas oy ta yoʼonton mantal li krixchanoetike, kʼelo lek kʼusitik xchʼunoj xchiʼuk li kʼusitik tsvul-o yoʼontonike. Li Yoxua xchiʼuk Breyete jaʼ tstunesik li sjakʼobiltak te talem ta baʼyel pajina li ta tratadoetike. Kʼalal chakʼik li tratado ¿Kʼusi chanop ta sventa li Vivliae?, xi chalike: «Junantik krixchanoetike xchʼunojik ti likem talel ta stojolal Dios li Vivliae, pe jaʼuk li yantike mu jechuk tsnopik. ¿Li voʼote kʼu yelan chavil?».  Kʼalal jech tspasike, lek chloʼilajik xchiʼuk li krixchanoetike.

13. Manchuk mi mu skʼan xchikintaik mantal li krixchanoetike, ¿kʼu yuʼun ti lek onoʼox kʼusi chkʼot ta pasel kuʼuntike? (Proverbios 27:11).

¹³ Manchuk mi mu xchikintaik mantal li krixchanoetike, jech-o ta jcholtik mantal ¿Kʼu yuʼun? Yuʼun li kʼusi mas tsots skʼoplale jaʼ ti jpastik li kʼusi laj yalbutik Jeova xchiʼuk li Xnichʼone: ti jcholtik li lekil aʼyejetike (Ech. 10:42). Jaʼ yuʼun, mu me jvul-o tajek koʼontontik mi muʼyuk buchʼu ta jtatik ta chiʼinel ta loʼil o mi mu skʼan xchikintaik li mantale. Xuʼ me jun noʼox koʼontontik, yuʼun jnaʼojtik ti xmuyubaj kuʼuntik li Jtotik ta vinajele (kʼelo Proverbios 27:11).

14. ¿Kʼu yelan chkaʼi jbatik kʼalal oy jun jcholmantal tsta jun krixchano ti oy ta yoʼonton mantale, xchiʼuk kʼu yuʼun ti jech chkaʼi jbatike?

¹⁴ Xuʼ me xijmuyubaj ek kʼalal oy jun jcholmantal tsta jun krixchano ti oy ta yoʼonton mantale. Ta sventa li cholmantal ta jpastike, Li Jkʼel-osil ta toyole tskoʼoltas kʼuchaʼal chichʼ saʼel junuk olol ti chʼayeme. Ep buchʼutik tsaʼvanik xchiʼuk ep bu chanavik sventa saʼik. Kʼalal chichʼ tael li olole, maʼuk noʼox xmuyubaj li buchʼu la stae, yuʼun xmuyubaj skotolik. Jaʼ jech li abtelal ta jpastik eke, yuʼun koʼol ta jkolta jbatik. Sventa jcholtik mantal ta junuk territorioe, mu spas kuʼuntik ta jtuktik. Jaʼ yuʼun, xijmuyubaj jkotoltik kʼalal oy buchʼu chlik kʼotuk ta tsobajele.

AKʼO TA ILEL LI KʼANELALE

15. ¿Kʼusi tskoltautik sventa masuk to xijmuyubaje? (Mateo 22:​37-39; kʼelo xtok li lokʼol).

¹⁵ Mi jkʼanojtik tajek li Jeova xchiʼuk li jchiʼiltaktike mas to me xijmuyubaj li ta cholmantale (kʼelo Mateo 22:​37-39). Nopo noʼox avaʼi kʼu to yelan xmuyubaj Jeova kʼalal chil ta jcholtik mantale xchiʼuk ti kʼu to yelan xmuyubajik li krixchanoetik kʼalal chlik xchanik Vivliae. Teuk me ta ajol ti tsta skolebalik li buchʼutik chchʼamik mantale (Juan 6:40; 1 Tim. 4:16).

16. Akʼo mi mu xuʼ xijlokʼ ta jnatik, ¿kʼusi xuʼ jpastik sventa masuk to jkʼupintik li cholmantale? Albo junuk skʼelobil.

¹⁶ Mi mu stakʼ xalokʼ ta anae, akʼo persa ti bu kʼalal xuʼ avuʼun sventa xavakʼ ta ilel ti akʼanoj li Jeova xchiʼuk li krixchanoetike. Kʼalal jaʼo li COVID-19, li Samuel xchiʼuk Daniae la sbaj sba ta snaik. Akʼo mi vokol tajek laj yaʼiik, la  xcholik mantal ta telefono, la stsʼibaik kartaetik xchiʼuk laj yakʼik estudio ta Zoom. Jech xtok, li Samuele la xcholbe mantal li j-abteletik ta ospital kʼalal chpoxtaat ta kansere. Xi chal li Samuele: «Li vokoliletik la jnuptankutike li lubkutik yuʼun xchiʼuk likʼunibkutik ta mantal. Jech-oxal, laj kakʼkutik venta ti skʼan xitunkutik ta stojolal Jeova sventa ximuyubajkutik noʼoxe». Kʼalal jech tsots la snuptanike, li Daniae balchʼuj xchiʼuk telel kom ta stem oxib u. Ta mas tsʼakale, vakib u la stunes silla de rueda. Xi chale: «Laj kakʼ persa spasel li kʼusitik noʼox spas kuʼune. La jcholbe mantal jun enfermera ti chvul svulaʼanune xchiʼuk la jcholbeik mantal li buchʼutik oy kʼusi chkʼot yiktabeikun ta jnae. Jech xtok, la jta ta chiʼinel ta loʼil ta telefono jun ants ti lek chaʼi mantale, ti jaʼ sbainoj jun empresa ti chchonik li kʼusi chtun yuʼunik li doktoretike». Melel onoʼox ti oy kʼusitik vokol laj yaʼiik spasel li Samuel xchiʼuk Daniae, pe ta skoj ti laj yakʼ yipalik ti bu kʼalal xuʼ yuʼunike, xmuyubajik noʼox.

17. ¿Kʼusi skʼan jpastik sventa jtabetik sbalil li kʼusi laj xa jloʼiltatik tale?

¹⁷ Li kʼusitik laj xa kalbetik talel skʼoplale mas me ta jtabetik sbalil mi jech la jpastik skotole. Ta jujutose xkoʼolaj ta smuineb veʼlil, mi la jkaptik skotole, lek mu chlokʼ li veʼlile. Jaʼ me jech li kʼusitik laj xa jloʼiltatik tale, yuʼun mi la jpastike, mas jun koʼontontik xchiʼuk xijmuyubaj noʼox li ta cholmantale.