¿Mi anaʼoj xa?
¿Kʼu yuʼun oy jyanlumetik li ta yajsoltarotak Davide?
LI TA yajsoltarotak Davide mu skotoluk jaʼik j-israeletik, jech kʼuchaʼal liʼe: Selek ti jaʼ j-ammon vinike, Urias ti jaʼ j-et vinike xchiʼuk Itma ti jaʼ jmoab vinike (1 Kron. 11:39, 41, 46). a Te skʼoplal li jkeretitaetik, li jpeletitaetik xchiʼuk li viniketik ti likemik ta Gate (2 Sam. 15:18). Xaval yaʼele, li jkeretitaetik xchiʼuk li jpeletitaetike yutsʼ yalal sbaik xchiʼuk li jfilisteaetike (Esek. 25:16). Li jgatetike jaʼik jnaklejetik te ta jteklum Filistea ta Gat (Jos. 13:2, 3; 1 Sam. 6:17, 18).
¿Kʼu yuʼun la stikʼ ta yajsoltarotak David li jyanlumetike? Yuʼun snaʼoj lek ti maʼuk noʼox tukʼ chakʼ sbaik ta stojolale, yuʼun tukʼ chakʼ sbaik ta stojolal Jeova xtok. Jech kʼuchaʼal liʼe, xi chalbe skʼoplal jkeretitaetik xchiʼuk jpeletitaetik li livro The New Interpreter’s Dictionary of the Bible: «Tukʼ yoʼonton laj yakʼ sbaik ta stojolal David kʼalal jaʼo tsots tajek chil svokol li ta ajvalilal yuʼune». ¿Kʼuxi jnaʼojtik? Yuʼun «skotol li viniketik ta Israele» laj yiktaik li ajvalil David sventa jaʼ stsʼakliik «jun jsaʼkʼop vinik ti Seba sbie», pe li jkeretitaetik xchiʼuk li jpeletitaetike la skoltaik David sventa xakʼbeik slajeb li jtoyba Sebae (2 Sam. 20:1, 2, 7). Jun veltae, li skerem ajvalil David ti Adonias sbie la stoy sba, yuʼun tskʼan ox ch-och yaʼi ta ajvalil. Pe li jkeretitaetik xchiʼuk li jpeletitaetike tukʼ yoʼonton laj yakʼ sbaik ta stojolal li Davide xchiʼuk la skoltaik Salomon sventa jaʼuk x-och ta ajvalil, yuʼun jaʼ xa onoʼox tʼujbil yuʼun li Jeovae (1 Rey. 1:24-27, 38, 39).
Yan jyanlum vinik ti laj yakʼ ta ilel ti tukʼ yoʼonton ta stojolal Davide, jaʼ li Ittai ti jaʼ jun jgat vinike. Li Ittai xchiʼuk li vakib sien yajsoltarotake la skoltaik David kʼalal la stoy sba li yan skerem ti Absalon sbie, yuʼun li Absalone la sloʼlabe yoʼonton krixchanoetik ta Israel sventa xvaʼanat ta ajvalil. Li Davide laj yalbe ti mu persauk xkoltaat yuʼun Ittai ta skoj ti jaʼ jyanlume. Pe xi la stakʼ li Ittaie: «¡Jamal chkal ta skoj kuxul Jeova xchiʼuk ti kuxul li kajval ti jaʼ li ajvalile, buyuk noʼox xbat li ajvalil kuʼune, mi te chcham o mi moʼoj, te chbat li avajtunel eke!» (2 Sam. 15:6, 18-21).
Li Ittaie tukʼ laj yakʼ sba ta stojolal David, yuʼun snaʼoj ti jaʼ tʼujbil yuʼun Jeova sventa x-ajvalilaje.
Akʼo mi jyanlum li jkeretitaetik, li jpeletitaetik xchiʼuk li jgatetike, xchʼunojik lek ti jaʼ melel Dios li Jeovae xchiʼuk ti jaʼ stʼujoj ta ajvalil li Davide. Ta melel, li Davide toj lek laj yaʼi ti tukʼ yoʼonton laj yakʼ sbaik li viniketik taje.
a Li ta smantal Dios ti te ta jtatik ta Deuteronomio 23:3 kʼalal ta 6 jamal chal ti mu stakʼ x-ochik ta stsobobbail Israel li j-ammonetike xchiʼuk li jmoabetike. Xaval yaʼeluke, jaʼ skʼan xal ti mu stakʼ xkʼotik ta mero j-israeletike. Pe taje maʼuk skʼan xal ti mu stakʼ xchiʼinbeik ta naklej li steklumal Diose. Li ta livro Perspicacia para comprender las Escrituras, saʼo ti bu chal «Ammonitas», laje saʼo ti bu chal «Se casan con israelitas».
