1. ¿Kʼu toʼox yelan chapal li s-organisasion Jeova li ta baʼyel sigloe?

 KʼALAL oy kʼusi chakʼbe sbain yajtuneltak li Jeovae, oy ta yoʼonton ti lekuk xchapet spasike (1 Kor. 14:33). Jun skʼelobile jaʼ ti oy ta yoʼonton xichʼ pukel batel ta spʼejel balumil li lekil aʼyejetike (Mat. 24:14). Jaʼ yakʼojbe sbain Jesus ti sbeiltas li abtelal taje. Li Jesus eke yakʼoj ta yoʼonton ti lekuk xchapet xichʼ pasele. Li ta baʼyel sigloe, li ta Jerusalene oy jtsop ermanoetik ti jaʼ skʼoplal li jtakboletik xchiʼuk moletik ti jaʼ sbainojik skʼelel li kʼusi skʼan spasik ta tsobobbailetike xchiʼuk jaʼ sbainojik chakʼik mantaletik (Ech. 15:2; 16:4). Ta skotol li tsobobbailetike laj yichʼ vaʼanel moletik sventa xbeiltasvanik xchiʼuk jaʼ oy ta sbaik yalbel ermanoetik li kʼusi chkʼot ta nopel yuʼunik li jtsop ermanoetike (Ech. 14:23). Ta skoj ti lek xchʼunik mantal li ermanoetike, «mas tsatsub batel xchʼunel yoʼontonik li tsobobbailetike xchiʼuk epajik batel» (Ech. 16:5).

2. ¿Kʼuxi sbeiltasoj xchiʼuk smakʼlinoj talel ta mantal li steklumal Jeova leʼ xa talel ta sjabilal 1919?

² Li ta jkʼakʼaliltike, li Jeovae jech-o lek chapal yuʼun li steklumale. Li ta 1919, li Jesuse lik svaʼan jtsop ermanoetik ti tʼujbil chbatik ta vinajel sventa xchapanik li cholmantale xchiʼuk xakʼbe sveʼelik ta mantal li yajchankʼoptake (Luk. 12:42). a Jamal xvinaj ti chkoltaatik yuʼun Jeova li ta abtelal tspasik li ermanoetik taje (Is. 60:22; 65:​13, 14).

3, 4. 1) Albo junuk skʼelobil kʼuxi ta jtabetik sbalil ti lek chapal li j-organisasiontike. 2) ¿Kʼusi ta jchantik batel li ta xchanobil liʼe?

 ³ Ti muʼyukuk lek chapal li j-organisasiontike, mu spas kuʼuntik jechuk li abtelal laj yakʼ jbaintik Jesuse (Mat. 28:​19, 20). Jech kʼuchaʼal ti butik ta jcholtik mantale. Ti muʼyukuk lek chapanbile, te van chbat jcholtik mantal ti bu xal koʼontontike, vaʼun xuʼ van ta jun noʼox territorio ta jcholtik mantal, jaʼuk li ta yan territorioe chʼabal ta jcholtik mantal. ¿Mi oy to van yan kʼuxi xuʼ jtabetik sbalil ti lek chapal li j-organisasiontike?

⁴ Li avi kʼakʼale, li Jesuse lek xchapanoj li steklumal Dios jech kʼuchaʼal la spas ta stojolal li yajchankʼoptak kʼalal liʼ toʼox oy ta balumile. Li ta chanobil liʼe, ta jkʼeltik batel li kʼusitik la spas Jesus xchiʼuk ti kʼu yelan yakal jech tspas li j-organisasiontik avi eke. Ta jkʼeltik batel xtok kʼusi xuʼ jpastik sventa xkakʼtik ta ilel ti jpatoj koʼontontik li ta s-organisasion Jeovae.

LI J-ORGANISASIONTIKE JAʼ CHCHANBE LI KʼUSI LA SPAS JESUSE

5. Li j-organisasiontike, ¿kʼuxi yakal chchanbe li Jesuse? (Juan 8:28).

⁵ Li kʼusi la spas xchiʼuk li kʼusi laj yal Jesuse jaʼ la xchanbe li Stote. Jaʼ jech li s-organisasion Jeova avi eke, te tslokʼesik talel ta Skʼop Dios li tojobtasel xchiʼuk li chanubtasel chakʼe (kʼelo Juan 8:28; 2 Tim. 3:​16, 17). Jech xtok, jech-o chalbutik ti jchantik li Vivliae xchiʼuk ti xkakʼ ta jkuxlejaltik li kʼusi ta jchantike. ¿Kʼusi sbalil ta jtabetik mi ta jchʼuntik li tojobtasel taje?

6. ¿Kʼusi sbalil ta jtabetik mi ta jchantik li Vivliae?

⁶ Ep sbalil ta jtabetik mi ta jtunestik li vunetik sventa jchantik li Vivliae. Yuʼun xuʼ jkoʼoltajestik ta Vivlia li mantaletik chakʼbutik li j-organisasiontike. Kʼalal chkakʼtik venta ti jaʼ te lokʼem talel ta Vivliae, mas to ta jpat koʼontontik li ta s-organisasion Jeovae (Rom. 12:2).

7. ¿Kʼusi laj yalbe skʼoplal li Jesuse, xchiʼuk kʼuxi jech yakal tspas li s-organisasion Jeova avie?

⁷ Li Jesuse jaʼ laj yalbe skʼoplal «li lekil aʼyejetik ta sventa li Ajvalilal yuʼun [Diose]» (Luk. 4:​43, 44). Jech xtok, laj yalbe yajchankʼoptak ti jechuk spasik eke (Luk. 9:​1, 2; 10:​8, 9). Li avi kʼakʼal eke, li buchʼutik te skʼoplal li ta s-organisasion Jeovae chalik batel li lekil aʼyejetik ta sventa li Ajvalilal yuʼun Diose mu ventauk bu nakalik o kʼusi sbainojik li ta organisasione.

8. ¿Kʼusi mukʼta matanal jtaojtik?

⁸ Jaʼ jun mukʼta matanal ti xuʼ xkalbetik krixchanoetik ta sventa li Ajvalilal yuʼun Diose, yuʼun mu buchʼuuk noʼox xuʼ jech spas. Kʼalal liʼ toʼox ta balumil li Jesuse, muʼyuk laj yakʼ ti x-albat skʼoplal yuʼun li pukujetike (Luk. 4:41). Li avi kʼakʼale, li buchʼu tskʼan chchol mantal xchiʼuk li stestigotak Jeovae oy kʼusitik baʼyel skʼan spas. ¿Kʼuxi xuʼ xkakʼtik ta ilel ti ep sbalil chkiltik ti xuʼ jcholtik mantale? Jaʼ ti ta skotoluk ora jcholtik mantale. Oy ta koʼontontik ti jchanbetik kʼusi la spas li Jesuse. Jaʼ yuʼun, chkakʼ ta koʼontontik li cholmantale xchiʼuk ti jchanubtastik li yantike (Mat. 13:​3, 23; 1 Kor. 3:6).

9. ¿Kʼusi spasoj li j-organisasiontik sventa xakʼ ta ojtikinel li sbi Diose?

⁹ Li Jesuse laj yakʼ ta ojtikinel li sbi Diose. Jun veltae, li Jesuse xi laj yalbe ta orasion li Stote: «Laj kakʼbe snaʼik li abie» (Juan 17:26). Jaʼ jech tspas li j-organisasiontik avie, yuʼun chakʼ persa ta yalbel krixchanoetik kʼusi sbi li Diose. Li kʼusi tstunesik sventa spas yuʼunik taje jaʼ li Xchʼul Kʼop Dios sventa Achʼ Balumil ti jelubtasbil mas ta 270 kʼopetik ta sliklej o ta jvokʼ noʼoxe. Li ta Vivlia taje te laj yichʼ tsʼibabel yan  velta li sbi Dios ti bu toʼox tsʼibabil ta orijinale. Li apendise A4 xchiʼuk A5 te chchapbe smelolal ti kʼu yuʼun te laj yichʼ tsʼibabel yan velta li sbi Diose. Li ta apendise A5 te chchapbe lek smelolal ti kʼu yuʼun skʼan te xvinaj 237 ta velta sbi Dios li ta Tsʼibetik ta Griego Kʼope.

10. ¿Kʼusi chakʼ jchantik li kʼusi kʼot ta stojolal jun ants ta Myanmare?

¹⁰ Jech kʼuchaʼal la spas li Jesuse, oy ta koʼontontik ti xkakʼbetik yojtikinik sbi Dios skotol li krixchanoetike. Li ta Myanmare, oy jun ermana laj yakʼbe yojtikin sbi Dios jun ants ti 67 xa sjabilale. Li antse muyubaj tajek xchiʼuk lokʼ-o yaʼlel sat, xi laj yale: «Sba to velta laj kaʼibe li sbi Diose. [ . . . ] Toj echʼ xa noʼox tsots skʼoplal li kʼusi laj avakʼbun jchane». Jech kʼuchaʼal chkakʼtik venta li ta loʼile, kʼalal oy buchʼu chojtikinbe sbi Diose, xuʼ xjelbat-o xkuxlejal.

JECHUK-O XKAKʼTIK TA ILEL TI JPATOJ KOʼONTONTIK LI TA J-ORGANISASIONTIKE

11. ¿Kʼuxi xuʼ xakʼik ta ilel li moletik ta tsobobbail ti spatoj yoʼontonik li ta s-organisasion Diose? (Kʼelo xtok li lokʼoletike).

¹¹ Jtos ti kʼuxi xuʼ xakʼik ta ilel moletik ta tsobobbail ti spatoj yoʼontonik li ta s-organisasion Diose, jaʼ ti xchanik lek li mantaletik kʼalal chtakbatik talele xchiʼuk ti xakʼik persa ti jechuk spasike. Kalbetik junuk skʼelobil, li stukike ch-albatik kʼuxi tsjelubtasik li mantaletik ta tsobajele xchiʼuk ti kʼu yelan tspasik li orasione. Pe ch-albatik xtok ti kʼu yelan skʼan xchabiik li xchijtak Kristoe. Kʼalal tspasik li kʼusi ch-albatik yuʼun organisasion li moletike, li ermanoetike chabibil chaʼi sbaik xchiʼuk kʼanbil chaʼi sbaik yuʼun Jeova.

12. 1) ¿Kʼu yuʼun skʼan jchʼuntik li kʼusi chalbutik li buchʼutik tsbeiltasutike? (Ebreos 13:​7, 17). 2) ¿Kʼu yuʼun muʼyuk lek mi jaʼ chkakʼ ta koʼontontik li spaltailik li buchʼutik tsbeiltasutike?

¹² Kʼalal chalbutik mantal li moletike, mas me lek ti ta sjunuluk koʼonton jchʼuntike. Mi jech ta jpastike, mas kʼun chaʼiik spasel li yabtelike. Li Vivliae chalbutik ti jchʼunbetik smantal xchiʼuk ti jpastik kʼusi chalbutik li buchʼutik chbeiltasvanike (kʼelo Ebreos 13:​7, 17). Pe ta skoj ti jaʼik jpasmuliletik li moletike, vokol chkaʼitik ta xchʼunbel smantalik. Pe teuk me ta joltik ti mi jaʼ chkakʼ ta koʼontontik li kʼusi chʼabal lek chbat yuʼunik ta pasele, jaʼ me yakal ta jpastik li kʼusi tskʼanik kajkontrataktike. ¿Kʼu yuʼun ti jech chkaltike? Yuʼun mi oy kʼusi chopol ta jnoptik ta stojolal li moletike, yikʼaluk me muʼyuk xa ta jpat koʼontontik li ta s-organisasion Diose. Taje jaʼ me li kʼusi oy ta yoʼontonik li kajkontratike. Jaʼ yuʼun chaʼa, ¿kʼuxi xuʼ xkakʼtik venta li kʼusitik tsjutik kajkontratike xchiʼuk kʼusi xuʼ jpastik sventa jpʼajtike?

MU ME XKAKʼTIK TI OY BUCHʼU SNAMAJESUTIK LI TA J-ORGANISASIONTIKE

13. ¿Kʼu yelan tsokesbeik skʼoplal s-organisasion Dios li kajkontrataktike?

¹³ Li kajkontrataktike tsokesbeik skʼoplal li kʼusitik tspas li s-organisasion Diose. Jech kʼuchaʼal liʼe, li Jeovae tskʼan ti sakuk jpat jxokontike, ti lekuk jtalelaltike xchiʼuk ti lekuk oyutik ta mantale. Jech xtok, chal ti mi oy buchʼu tspas kʼusitik chopol xchiʼuk ti muʼyuk tsutes yoʼontone, skʼan lokʼesel li ta tsobobbaile (1 Kor. 5:​11-13; 6:​9, 10). Ta skoj ti ta jchʼuntik li mantaletik taje, li kajkontrataktike chalik ti toj pʼel xkaltike, ti toj chopolutike xchiʼuk ti muʼyuk jkʼanojtik yantik ta skoj ti jelelike.

14. ¿Bu chlik talel li jecheʼ loʼiletik chalik ta stojolal li j-organisasiontike?

¹⁴ Teuk ta joltik ti buchʼu tskontrainutike. Li Satanas ti «jaʼ totil yuʼun li jutbil kʼope» jaʼ tspukbe skʼoplal li jecheʼ loʼiletik ta stojolal li j-organisasiontike (Juan 8:44; Jen. 3:​1-5). Jaʼ yuʼun, mu labaluk chkaʼitik ti tstijbe yoʼonton krixchanoetik sventa spukik jecheʼ loʼiletike. Yuʼun jech xa onoʼox la spas li ta baʼyel sigloe.

15. Li jnitvanejetik ta relijione, ¿kʼusi la spasbeik Jesus xchiʼuk li yajchankʼoptake?

 ¹⁵ Akʼo mi jaʼ tukʼil vinik echʼ li Jesuse xchiʼuk ti la spas ep skʼelobil juʼelale, li Satanase la stijbe yoʼonton krixchanoetik sventa sjutbeik smul. Kalbetik junuk skʼelobil, li jnitvanejetik ta relijione laj yalbeik krixchanoetik ti ta yip la «ajvalil yuʼun pukujetik» ti tslokʼes pukujetik li Jesuse (Mar. 3:22). Kʼalal laj yichʼ chapanel li Jesuse, li jnitvanejetik ta relijione laj yalik ti chopol kʼoptavan lae xchiʼuk laj yakʼbeik xchʼun epal krixchanoetik ti xichʼ milele (Mat. 27:20). Ta mas tsʼakale, kʼalal lik xa ox xcholik mantal li yajtsʼaklomtak Kristoe, li yajkontratakike «lik sokbeik sjol li jyanlumetik» sventa skontrainik li ermanoetike, «jech oxal chopol kʼusitik lik snop yuʼunik» (Ech. 14:​2, 19). Ta sventa li kʼusi chal Echos 14:​2, li revista La Atalaya ta 1 yuʼun disiembre ta 1998 laj yal ti maʼuk noʼox la spʼajik lekil aʼyejetik li judaetik ti chkontrainvanike, yuʼun la «spukbeik batel skʼoplal jecheʼ loʼiletik» sventa skontrainik yajtsʼaklomtak Kristo li krixchanoetike.

16. ¿Kʼusi skʼan teuk ta joltik mi laj kaʼitik jecheʼ loʼiletike?

¹⁶ Li Satanase jech-o tsjut kʼop xchiʼuk jech-o «yakal tsloʼla skotol li jnaklejetik ta spʼejel balumile» (Apok. 12:9). Jaʼ yuʼun, mi laj kaʼitik jecheʼ loʼiletik ta stojolal li j-organisasiontik o ta stojolal li ermanoetik ti jaʼ chbeiltasvanike, teuk me ta joltik li kʼusi la spas li yajkontratak Dios ta stojolal Jesus xchiʼuk ta stojolal li jchʼunolajeletik ta baʼyel sigloe. Jech kʼuchaʼal yaloj xa onoʼox li Vivliae, li krixchanoetike yakal tskontrainik li stestigotak Jeovae xchiʼuk yakal tspukik jecheʼ loʼiletik ta stojolalik (Mat. 5:​11, 12). Muʼyuk me chijlaj ta loʼlael mi jnaʼojtik bu chlik talel li jutbil kʼopetike xchiʼuk mi oy kʼusi ta jpastik ta anil yoʼ jchabi jbatike. Jaʼ yuʼun, ¿kʼusi skʼan jpastik sventa jchabi jbatike?

17. ¿Kʼusi skʼan xapas mi laj avaʼi junuk jecheʼ loʼile? (2 Timoteo 1:13; kʼelo xtok li rekuadro « ¿Mi oy la albat jecheʼ loʼil? Li kʼusi skʼan xapase»).

 ¹⁷ Mu me jchikintatik li jecheʼ loʼiletike. Li jtakbol Pabloe jamal laj yal kʼusi skʼan jpastik mi oy laj kaʼitik junuk jecheʼ loʼile. Xi laj yal mantal ta 1 Timoteo 1:​3, 4: «Mu me [xachikintaik] li jecheʼ loʼiletike». Xi to la stojobtas li Timoteoe: «Pʼajo me li jecheʼ loʼiletik ti maʼuk chakʼ ta ichʼel ta mukʼ Diose» (1 Tim. 4:7). Kalbetik junuk skʼelobil, li jun k’ox olole xuʼ van stam xchiʼuk stikʼ ta ye li kʼusi bitsil tsta ta pisoe. Pe jaʼuk li jun krixchano ti staoj xa svaʼleje muʼyuk tspas jech, yuʼun snaʼoj ti bu toʼox oye xchiʼuk ti xuʼ x-ipaj-oe. Jech oxal, li voʼotike ta jpʼajtik li jecheʼ loʼiletike xchiʼuk jaʼ noʼox ta jchikintatik li «lekil chanubtasel» ta mantale (kʼelo 2 Timoteo 1:13).

18. ¿Kʼuxi xuʼ xkakʼtik ta ilel ti jpatoj koʼontontik li ta s-organisasion Jeovae?

¹⁸ Laj xa jkʼeltik oxtos ti kʼuxi chchanbeik Jesus li s-organisasion Diose, pe taje maʼuk noʼox. Kʼalal mas chachan batel li Avivliae, te chavakʼ venta ti oy to yan kʼuxi chchanbeik li Jesuse. Mu me xavikta aba ta skoltael avermanotak sventa masuk to spat yoʼontonik li ta j-organisasiontike. Jechuk-o me tukʼ xatun batel ta stojolal Jeova. Mu me xavakʼ buchʼu snamajesot li ta s-organisasion ti jaʼ yakal tstunes sventa spas li kʼusi oy ta yoʼontone (Sal. 37:28). ¿Mi mu jechuk ti jaʼ jun mukʼta matanal ti oyutik ta s-organisasion Jeova ti bu skʼanoj sbaik xchiʼuk ti tukʼ yakʼoj sbaike? ¡Jechuk-o me ep sbalil xkiltik li j-organisasiontike!