1. ¿Kʼusi jaʼ li paraiso ta mantale xchiʼuk kʼusi oy ta yoʼontonik spasel li buchʼutik te oyike?

 LI AVIE, xkoʼolaj ti oy jun paraiso liʼ ta balumile, ti bu noj ta krixchanoetik ti jaʼ batem ta yoʼontonik spasel li kʼusitik leke. Li ta paraiso xkaltik taje ta smiyonal xa noʼox krixchanoetik jun noʼox yoʼontonik xchiʼuk jpʼel ta yoʼontonik te oyik-o. Jech xtok, oy ta yoʼontonik ti x-ochik epal krixchanoetik eke. ¿Kʼusi yakal chkalbetik skʼoplal? ¡Jaʼ li kʼupil sba paraiso ta mantale! a

2. ¿Kʼu yuʼun toj labal sba ti oy jun paraiso ta mantale?

² Akʼo mi kuxulutik ta jun balumil ti toj xibal sba ti ventainbil yuʼun Satanase, li Jeovae spasoj jun paraiso xkaltik ti bu jun noʼox koʼontontik xchiʼuk jmoj oyutike (1 Juan 5:19; Apok. 12:12). Li Jeovae snaʼoj ti xuʼ xkil-o jvokoltik yuʼun li sbalumil Satanase. Ta skoj ti skʼanojutike, oy kʼusitik spasoj sventa junuk noʼox koʼontontik xijtun ta stojolal. Li ta Vivliae chal ti xkoʼolaj ta jun nakʼobbail xchiʼuk ta «jun nichimaltik ti lek [atʼesbil]» li paraisoe (Is. 4:6; 58:11). Koliyal Jeova, li buchʼutik te oyik li ta paraiso taje xmuyubajik noʼox xchiʼuk muʼyuk kʼusi ta xiʼik-o manchuk mi kuxulik xa ta slajebal kʼakʼal ti toj xibal sbae (Is. 54:14; 2 Tim. 3:1).

3. ¿Kʼusi ora kʼot ta pasel ta sba velta li kʼusi chal Isaias kapitulo 65?

³ Li ta Isaias kapitulo 65, li Jeovae chal kʼu yelan li jkuxlejaltik ta paraiso ta mantale. Li kʼusitik la stsʼiba li j-alkʼope kʼot ta pasel ta sba velta li ta sjabilal 537 kʼalal muʼyuk toʼox talem Jesuse. Li vaʼ kʼakʼale, li judaetik ti sutesoj yoʼontonike kolik lokʼel  li ta Babiloniae xchiʼuk sutik batel ta slumalik. Ta skoj ti koltaatik yuʼun Jeovae, la xchaʼvaʼanik li Jerusalen ti lilijem toʼoxe, vaʼun pas yan velta ta jun kʼupil sba jteklum. Jech xtok, la xchaʼvaʼanik li templo sventa te xchaʼichʼik ta mukʼ Jeova jech kʼuchaʼal tspasik toʼoxe (Is. 51:11; Sak. 8:3).

4. ¿Kʼu yelan yakal chkʼot ta pasel ta jkʼakʼaliltik li kʼusitik chal ta Isaias kapitulo 65?

⁴ Li xchibal velta kʼot ta pasel li kʼusi chal li Isaiase jaʼ li ta jkʼakʼaltike. Lik ta 1919 kʼalal kolik lokʼel ta Mukʼta Babilonia li yajtuneltak Jeovae. Vaʼun, li paraiso ta mantale ch’i batel ta spʼejel balumil. Li ermanoetike xmuyubajik noʼox la slikesik epal tsobobbailetik. Epal vinik antsetik ti toj simaronik toʼoxe xchiʼuk ti chopol toʼox tajek stalelalike, chʼiik ta mantal xchiʼuk la slapik «li achʼ talelal ti jech laj yichʼ pasel jech kʼuchaʼal la skʼan yoʼonton li Diose» (Efes. 4:24). Akʼo mi jaʼ to chkʼot ta pasel ta achʼ balumil li kʼusitik laj yalbe skʼoplal Isaiase, xuʼ xa jkʼupintik avi li bendisionetike. Ta jkʼeltik batel kʼusi sbalil ta jtabetik li paraiso ta mantale xchiʼuk ti kʼu yuʼun skʼan te oyutik-oe.

LI BENDISIONETIK TA JTATIK LI TA PARAISO TA MANTALE

5. Jech kʼuchaʼal chal Isaias 65:​13, ¿kʼusitik bendision yakal ta jkʼupintik li ta paraiso ta mantale?

⁵ Oy noʼox lek jveʼeltik. Li Isaiase toj labal sba ti kʼu yelan laj yalbe skʼoplal li buchʼutik te oyik li ta paraiso ta mantal xchiʼuk li buchʼutik muʼyuk te oye (kʼelo Isaias 65:13). Li yajtunelutik Jeovae oy kuʼuntik skotol. Yakʼojbutik xchʼul espiritu, Xchʼul Kʼop xchiʼuk ep jveʼeltik ta mantal sventa mu xkiltik viʼnal, takitiʼil xchiʼuk sventa xijmuyubajuk noʼox (koʼoltaso xchiʼuk Apokalipsis 22:17). Pe jaʼuk li buchʼutik muʼyuk te oyik li ta paraiso ta mantale chʼabal sveʼelik, chʼabal kʼusi chuchʼik xchiʼuk chilik kʼexlal. Abol sbaik ta mantal (Amos 8:11).

6. ¿Kʼusi veʼlilal chalbe skʼoplal Joel 2:​21-24, xchiʼuk kʼusi skʼan jpastik sventa jtabetik sbalile?

⁶ Li j-alkʼop Joele laj yalbe skʼoplal ti Jeovae chakʼbe li kʼusitik jtunel tajek yuʼun li steklumale, jech kʼuchaʼal li sat tsʼunobiletike, li vinoe xchiʼuk li aseitee (Joel 2:​21-24). Li kʼusi skʼan xale, jaʼ ti chakʼbe kʼusi chtun yuʼun steklumal li Jeovae, jech kʼuchaʼal li veʼlil ta mantale. ¿Kʼu yelan yakal tspas avie? Yakʼojbutik Vivlia, vunetik, pajina ta internet, tsobajeletik xchiʼuk asambleaetik. Jaʼ jech lek makʼlinbilutik jujun kʼakʼal sventa lek tsotsutik.

7. ¿Kʼu yuʼun ti xmuyubajik tajek li yajtsʼaklomtak Kristoe? (Isaias 65:14).

⁷ Xijmuyubaj tajek. Li yajtsʼaklomtak Kristoe tstojbeik tajek ta vokol Dios ta skoj li kʼusitik spasoje, jaʼ yuʼun x-avetik ta muyubajel (kʼelo Isaias 65:14). ¿Kʼu yuʼun ti mu kʼusi xal yoʼontonike? Yuʼun kʼalal chchanik li Skʼop Diose, te tstaik li kʼusitik melele xchiʼuk li kʼusitik yaloj tspas Dios ti tstsatsub-o yoʼontonike. Jech xtok, oy lek spatobil yoʼontonik ta skoj ti laj yakʼ ta matanal xkuxlejal li Jesuse. ¡Xmuyubajik tajek kʼalal chalbe yermanotakik li kʼusitik kʼupil sba taje! (Sal. 34:8; 133:​1-3).

8. ¿Kʼusitik ti mas tsots skʼoplal oy li ta paraiso ta mantale?

⁸ Li kʼusitik mas tsots skʼoplal xvinaj li ta paraiso ta mantale jaʼ ti jmoj oyik xchiʼuk ti skʼanoj sbaik li yajtuneltak Jeovae. Li kʼanelal taje «jaʼ batsʼi jpasvanej ta jun», jaʼ senyail ti kʼu yelan li kuxlejal ta achʼ balumile. Tee mas to me jkʼanoj jbatik xchiʼuk mas to me tsobol oyutik (Kol. 3:14). Jun ermana chal ti kʼu yelan laj yaʼi sba kʼalal laj yojtikin li stestigotak Jeovae. Xi chale: «Muʼyuk toʼox ximuyubaj xchiʼuk muʼyuk ximuyubaj li ta kutsʼ kalale. Ti bu laj kakʼ venta ta sba velta ti skʼanoj sbaik li krixchanoetike jaʼo kʼalal laj kojtikin li stestigotak Jeovae». Li buchʼu tskʼan chmuyubaje, skʼan x-och li ta paraiso ta mantale. Mu  ventauk kʼusi xal ta jtojolaltik li yantike, li ta sat Jeova xchiʼuk ta stojolal li yutsʼ yalal ti oy ta sjunul vinajel balumile lek jkʼoplaltik (Is. 65:15).

9. ¿Kʼusi tspas Jeova ta sventa li jvokoltike? (Isaias 65:​16, 17).

⁹ Muʼyuk xa kʼusi ta jvul-o koʼontontik. Li ta Isaias 65:14 chal ti buchʼu muʼyuk te oyik li ta paraiso ta mantale ch-avanik ta skoj ti oy kʼusi kʼux chaʼi ta yoʼontonike xchiʼuk ti x-ijetik ta skoj li svokolike. ¿Kʼusi xuʼ xkaltik ta stojolal li yajtuneltak Diose? ¿Kʼusi chkʼot ta pasel ta sventa li svokolike? Xi jamal chal li Jeovae: «Muʼyuk xa chichʼ tael ta naʼel li vokoliletik oy toʼox ta voʼnee; ta xichʼ lokʼesel batel ta yeloval jsat» (kʼelo Isaias 65:​16, 17). Li Jeovae chchʼaybe skʼoplal li vokoliletike xchiʼuk ta kʼunkʼun tstupʼ batel ta jnopbentik li kʼusitik chopol jnuptanojtike.

10. ¿Kʼu yuʼun chkaltik ti jaʼ jun bendision ti te jchiʼuktik li kermanotaktike? (Kʼelo xtok li lok’ole).

¹⁰ Li avie xuʼ me jech chkaʼi jbatik kʼalal chijbat ta tsobajeletike. Yuʼun kʼalal te oyutike, muʼyuk ta jnopbetik skʼoplal li kʼusi ta jvul-o koʼontontike. ¿Kʼusi xuʼ jpastik sventa jechuk-o oyuk jun oʼontonal li ta paraiso ta mantale? Jaʼ ti xkakʼtik ta ilel ta jkuxlejaltik li talelaletik chakʼ chʼul espiritue, jech kʼuchaʼal li kʼanelale, li xkuxetel oʼontonale, li jun oʼontonale, li slekil oʼontonale xchiʼuk li manxoale (Gal. 5:​22, 23). ¡Jaʼ jun mukʼta matanal ti oyutik ta s-organisasion Diose! Mi te oyutik-o li ta paraiso ta mantale, ta me xkiltik tspas Dios skotol li kʼusi yaloje: ti tspas jun achʼ vinajel xchiʼuk achʼ balumile.

11. ¿Kʼu yelan skʼan xkaʼi jbatik ti oyutik ta paraiso xkaltike? (Isaias 65:​18, 19).

¹¹ Ta jtojtik tajek ta vokol xchiʼuk xijmuyubaj noʼox. Li Isaiase laj yalbe skʼoplal li srasonaltak ti kʼu yuʼun xijmuyubaj ti chijtun ta stojolal Diose. Li ta paraiso bu oyutike jaʼ la spas stuk li Jeovae (kʼelo Isaias 65:​18, 19). Jech oxal, tstunesutik sventa jkoltatik li krixchanoetik yoʼ xlokʼik talel li ta organisasionetik ta balumil ti xkoʼolaj ta takixokol balumile, vaʼun ti x-ochik li ta stsobobbail yajtsʼaklomtak Kristo ti xkoʼolaj ta sat voʼ li ta takixokol balumile. ¡Xijmuyubaj tajek ti xkojtikintik xa li kʼusi melele! Jech oxal, oy ta koʼontontik ti xkalbetik yantik ta sventa li bendisionetik taje (Jer. 31:12).

12. ¿Kʼu yelan chavaʼi aba kʼalal chachanbe skʼoplal li kʼusi chal Isaias 65:​20-24, xchiʼuk kʼu yuʼun?

¹² Ta jtojbetik tajek ta vokol Jeova ti te oyutik li ta paraiso xkaltike xchiʼuk xijmuyubajutik ta skoj li spatobil koʼontontik yakʼoje.  ¡Nopo xa noʼox avaʼi kʼusitik xuʼ xapas kʼalal mi te xa oyot li ta achʼ balumile! Xi jamal chal li Vivliae: «Maʼuk xa noʼox jayib kʼakʼal chkuxi li ololetik tee, mi junuk mol ta xcham kʼalal muʼyuk to staoj skʼakʼalile». Chal xtok ti krixchanoetike «ta xlik svaʼan snaik sventa te chnakiik, ta stsʼun s-uvaik sventa tslobeik sat». Jech xtok, «mu jecheʼuk noʼox ti tsots ch-abtejike», yuʼun ch-akʼbatik bendision yuʼun li Jeovae. Li Diose jamal chal ti mas xa ta jkʼupin jkuxlejaltik, ti jun koʼontontik xchiʼuk ti xijmuyubaj noʼoxe. Yuʼun li vaʼ kʼakʼale kʼalal muʼyuk to tskʼanbeik vokol li Diose, snaʼoj xa onoʼox li kʼusitik chtun yuʼunike xchiʼuk chakʼbe li «kʼusi tskʼan yoʼontonik skotol li kʼusitik kuxajtike» (Is. 65:​20-24; Sal. 145:16).

13. ¿Kʼu yelan chalbe skʼoplal Isaias 65:25 ti k’u yelan skʼan sjel stalelalik li buchʼutik tskʼan chtunik ta stojolal Jeovae?

¹³ Jun-o koʼontontik xchiʼuk chʼabal kʼusi chijxiʼ yuʼun. Ta skoj ti chkoltaatik yuʼun chʼul espiritue, epal krixchanoetik ti simaronik toʼox tajek kʼuchaʼal chonbolometike labal sba ti kʼu yelan sjeloj stalelalike (kʼelo Isaias 65:25). Xkoʼolaj ti pasik xa ta manxoe (Rom. 12:2; Efes. 4:​22-24). Melel onoʼox ti oy bu chijchʼaye, yuʼun jpasmulilutik. Akʼo mi jech, li Jeovae toj labal sba kʼusi spasoj, yuʼun skotol li krixchanoetik akʼo mi jelel bu likemik tal, jmoj tsobolik, skʼanoj sbaik xchiʼuk jun yoʼontonik (Tito 2:11). ¡Taje jaʼ noʼox spas yuʼun li Dios ti skotol xuʼ yuʼune!

14. ¿Kʼuxi kʼot ta stojolal jun ermano li kʼusi chal Isaias 65:25?

¹⁴ ¿Mi ta melel xuʼ xjel xkuxlejal li jun krixchanoe? Li sloʼil jun ermano liʼe chakʼ ta ilel ti xuʼe. Jun vinik ti 20 sjabilale ti lek saʼkʼop xchiʼuk ti toj chopol tajek stalelale, ep ta velta laj yichʼ tikʼel ta chukel ta skoj ti ep la saʼ smule. Yuʼun oy laj yelkʼan karroetik xchiʼuk yan kʼusitik. Jech xtok, lek xaʼi stsakvan ta majel. Kʼalal laj yaʼi ta sba velta li kʼusi chal Vivlia xchiʼuk ti lik batuk ta tsobajeletik xchiʼuk li stestigotak Jeovae, te laj yakʼ venta ti jaʼ noʼox oy sbalil xkuxlejal mi te oy li ta paraiso ta mantale. Kʼalal yichʼoj xa ox voʼe, ep ta velta tsnopbe skʼoplal kʼu yelan kʼot ta xkuxlejal li kʼusi chal Isaias 65:25. Yuʼun akʼo mi jaʼ toʼox jech kʼuchaʼal jkot simaron leon, pas ta manxo chij.

15. ¿Kʼu yuʼun oy ta koʼontontik ta jkoltatik yantik yoʼ x-ochik li ta paraiso ta mantale, xchiʼuk kʼuxi tspas kuʼuntik taje?

¹⁵ Xi chlik yal li Isaias 65:13: «Xi chal li Ajvalil Jeova ti jaʼ Mukʼul Jpasmantale». Li ta versikulo 25 xi tstsutse: «Xi li Jeovae». Ta onoʼox xkʼot ta pasel li kʼusitik yaloj Diose (Is. 55:​10, 11). Oy xa ta melel li paraiso ta mantale. Ta skoj ti te jkʼoplaltik li ta utsʼ alalil ti jmoj chichʼik ta mukʼ Jeovae, xuʼ jun koʼontontik xchiʼuk muʼyuk kʼusi chijxiʼo akʼo mi kuxulutik ta jun balumil ti noj ta choplejale (Sal. 72:7). Jaʼ yuʼun, oy ta koʼontontik ti jkoltatik li krixchanoetik sventa teuk skʼoplal li ta kutsʼ kalaltik ta mantale. ¿Kʼuxi tspas kuʼuntik taje? Jaʼ ti xkakʼ ta koʼontontik spasel ta yajtsʼaklomtak Kristo li krixchanoetike (Mat. 28:​19, 20).

JKOLTATIK YANTIK SVENTA XTALIK LI TA PARAISO TA MANTALE

16. ¿Kʼusi chtijbat yoʼonton li krixchanoetik sventa x-ochik li ta paraiso ta mantale?

¹⁶ Jkotoltik oy me kʼusi xuʼ jpastik ta jujuntal sventa xtijbat yoʼonton yantik yoʼ x-ochik li ta paraiso ta mantale. ¿Kʼuxi tspas kuʼuntik taje? Jaʼ ti jchanbetik li Jeovae. Li stuke muʼyuk chikʼ talel ta persa li krixchanoetike, yuʼun ta slekil yoʼonton chikʼanan talel (Jer. 31:3; Juan 6:44). Li buchʼutik oy ta yoʼontonik mantal xchiʼuk ti chchanbeik skʼoplal li stalelaltak Jeovae chtijbat yoʼontonik sventa xnopajik ta stojolal. Ta skoj li jtalelaltike, ¿kʼuxi xuʼ x-ochik-o ta paraiso ta mantal li yantike?

17. ¿Kʼusi xuʼ jpastik sventa x-ochik talel ta paraiso ta mantal li krixchanoetike?

 ¹⁷ Jtos ti kʼusi xuʼ jpastik sventa xtijbat yoʼonton li krixchanoetik yoʼ x-ochik talel li ta paraiso ta mantale, jaʼ ti jkʼan li kermanotaktike xchiʼuk ti xkakʼ ta ilel slekil koʼontontik ta stojolalike. Kʼalal oy buchʼu jaʼ to sba velta chbat ta jtsobajeltike, oy ta koʼontontik ti jechuk xal jkʼoplaltik kʼuchaʼal laj yalik li krixchanoetik ti jaʼo van batik ta tsobajel li ta Korintoe ti xi laj yalike: «Te oy ta atojolalik ta melel li Diose» (1 Kor. 14:​24, 25; Sak. 8:23). Jaʼ yuʼun, toj tsots skʼoplal ti jtsaktik ta venta li tojobtasel liʼe: «Junuk me avoʼontonik ta jujuntal» (1 Tes. 5:13).

18. ¿Kʼusi xuʼ xtijbat-o yoʼontonik yoʼ xnopajik talel ta j-organisasiontik li krixchanoetike?

¹⁸ Jech xtok, jkotoltik skʼan xkakʼ kipaltik sventa jechuk xkil kermanotaktik kʼuchaʼal chil Jeovae. Jech oxal, jaʼ chkakʼ ta koʼontontik li slekil talelalike maʼuk li xchopolilike, yuʼun li ta jelavele tspasik ta tukʼil krixchano. Xuʼ me ta slekil koʼontontik jchapan jkʼoptik mi jech-o ta jtsaktik ta venta li beiltasel liʼe: «Oyuk slekil avoʼontonik ta [jujuntal], kʼuxuk tajek ta avoʼonton xavaʼi abaik xchiʼuk pasbo abaik perton ta sjunul avoʼontonik ta jujuntal» (Efes. 4:32). Skotol li buchʼu tskʼan jech chichʼ pasbele jaʼ chtijbat yoʼontonik sventa x-ochik talel li ta paraiso ta mantale. b

TEUK OYUTIK-O LI TA PARAISO TA MANTALE

19. 1) ¿Kʼusitik yaloj junantik ti chaʼsutik talel li ta paraiso ta mantale? (Kʼelo li rekuadro « Lokʼik toʼox batel, pe chaʼsutik tal»). 2) ¿Kʼusi skʼan oyuk ta koʼontontik spasel? (Kʼelo xtok li lok’ole).

¹⁹ ¡Jaʼ jun mukʼta matanal ti te jkʼoplaltik li ta paraiso ta mantale! Avie mas xa toj  kʼupil sba xchiʼuk ep tajek yajtuneltak Jeova te oy. Jech-o ta jtojbetik ta vokol Jeova ti laj yakʼbutik li kʼupil sba paraisoe. Skotol li buchʼu tskʼan lek makʼlinbil, ti xkuxetuk yoʼonton xchiʼuk ti junuk noʼox yoʼontone, skʼan me te x-ochik xchiʼuk ti muuk xlokʼik-oe. Pe skʼan me xkichʼ jpʼijiltik, yuʼun li Satanase oy ta yoʼonton tsloʼlautik xchiʼuk ti xijnamajutik li ta kʼupil sba paraisoe (1 Ped. 5:8; Apok. 12:9). Mu me xkakʼ jbatik ta tsalel, kakʼtik-o me persa sventa jechuk-o kʼupil sba kuʼuntik, ti sakuk-oe xchiʼuk ti oyuk jun oʼontonal li ta paraiso ta mantale.