Li Jesuse te la xchan tal ta vinajel li talelaletik ti chtun sventa lekuk x˗abtej xchiʼuk li yantike. Jech xtok, kʼalaluk ay ta balumile, lek kʼusitik laj yakʼbe xchan li buchʼutik jmoj abtej xchiʼuke. ¿Kʼuxi tskoltautik li kʼusi la spase? Ta jkʼeltik batel oxtos beiltaseletik ti jaʼ tskoltautik sventa jmoj tsobol jkolta jbatik ta abtele.

Li jun krixchano ti snaʼ jmoj x˗abtej xchiʼuk yantike bikʼit yakʼoj sba, oy sbalil chil ti jmoj chchiʼin ta abtel li yantike xchiʼuk muʼyuk tstoy sba. Li Jesuse jaʼ jech laj yil ta stojolal li Stote, yuʼun bikʼit yakʼoj sba. Akʼo mi jaʼ noʼox Jeova xuʼ xichʼ albel ti jaʼ li Jpasvaneje, laj yakʼ ta ilel ti toj tsots skʼoplal laj yil ti abtej xchiʼuk Xnichʼone. Yuʼun xi laj yale: «Jpastik krixchano jech kʼuchaʼal voʼotike» (Jen. 1:26). Kʼalaluk jech laj yal li Jeovae, li Jesuse laj yakʼ venta ti bikʼit yakʼoj sba li Stote (Sal. 18:35).

Kʼalal ay ta balumil li Jesuse, bikʼit laj yakʼ sba ek. Jech xtok, kʼalal chichʼ kʼupil kʼoptael ta skoj li kʼusitik tspase, laj yal ti jaʼ koliyal li Jeovae (Mar. 10:17, 18; Juan 7:15, 16). Laj yakʼbe yipal sventa junuk noʼox yoʼonton xchiʼuk li yajtakboltake, yuʼun yamigo laj yilanan, maʼuk ti smosotake (Juan 15:15). Jun veltae, la spokbe yok yajtakboltak sventa xchanubtasan ti skʼan bikʼit xakʼ sbaike (Juan 13:5, 12-14). Jech kʼuchaʼal li Jesuse, skʼan oyuk sbalil xkiltik li jchiʼiltaktik ta abtele xchiʼuk ti jaʼ mas tsots skʼoplal xkiltik li kʼusi tskʼan stukike. Toj lek kʼusitik chkʼot ta pasel kʼalal chkichʼ jbatik ta mukʼe xchiʼuk ti maʼuk batem ta koʼontontik buchʼu mas toyol skʼoplal chkome (Rom. 12:10).

Li jun krixchano ti bikʼit yakʼoj sbae chaʼibe smelolal ti «lek kʼusi chkʼot ta pasel kʼalal oy ep jtojobtasvanejetike» (Prov. 15:22). Mu ventauk li kʼusitik  jchanojtik spasele o li kʼusitik xijtojob spasele, skʼan teuk ta joltik ti mu junuk buchʼu snaʼ spasel skotole, yuʼun li Jesus eke laj yakʼ venta ti oy to kʼusitik mu snaʼe (Mat. 24:36). Jech xtok, oy sbalil laj yil li kʼusi tsnop yajchankʼoptak ti maʼuk tukʼil krixchanoetike (Mat. 16:13-16). Jaʼ yuʼun, li buchʼutik la xchiʼinan ta abtele lek tajek laj yaʼi sbaik ta stojolal. Mi bikʼit chkakʼ jbatik eke, mi te ta joltik ti oy noʼox spajeb li kʼusi xuʼ kuʼuntik spasele xchiʼuk mi oy ta koʼontontik xchikintael li kʼusi tsnop yantike, jun noʼox me koʼontontik xchiʼuk lek kʼusi chkʼot ta pasel kuʼuntik.

Tsots tajek skʼoplal ti skʼan bikʼituk xakʼ sbaik li moletik ta tsobobbail kʼalal jmoj tsobol ch˗abtejike. Jech kʼuchaʼal bikʼit laj yakʼ sba li Jesuse, skʼan svules ta sjolik ti xuʼ xventainat yuʼun chʼul espiritu junuk mol ta tsobobbail sventa oyuk kʼusi xal ti jaʼ chkoltaatik˗o li jtsop moletik yoʼ lekuk kʼusi xkʼot ta nopel yuʼunike. Mi jun noʼox yoʼontonik li ta stsobajelike, jaʼ chkoltaatik sventa koʼoluk xakʼ sloʼilik. Vaʼun, li kʼusi chkʼot ta nopel yuʼunike tstabe sbalil sjunul li tsobobbaile.

Li jun lekil chiʼilil ta abtele lek snaʼ xrasonaj xchiʼuk muʼyuk chal ti persa skʼan xichʼ pasel kʼuchaʼal chale. Li Jesuse ep ta velta laj yil ti snaʼ xrasonaj li Stote, jaʼ jech vinaj kʼalal takat tal ta balumil sventa xcham ta stojolal li krixchanoetike (Juan 3:16).

Li Jesuse la sjel snopben kʼalal sta˗o chile. Jvules ta joltik kʼuxi la skolta jun jfenisia ants akʼo mi jaʼ takbil tal sventa skolta li jteklum Israele (Mat. 15:22-28). Kʼalal muʼyuk la skʼanbe li kʼusi mu spas yuʼun li yajchankʼoptake, te vinaj ti snaʼ xrasonaje. Jech xtok, kʼalaluk pʼajat yuʼun Pedro ta yeloval epal krixchanoetike, ta sjunul yoʼonton laj yakʼ ta perton xchiʼuk ta mas tsʼakale oy kʼusitik tsots skʼoplal laj yakʼbe sbain (Luk. 22:32; Juan 21:17; Ech. 2:14; 8:14-17; 10:44, 45). Li kʼusi la spas Jesuse chakʼ kiltik ti skʼan jel li kʼusi ta jnoptike sventa snaʼik yantik ti jnaʼ xijrasonaje (Filip. 4:5).

Mi jnaʼ xijrasonaje, jaʼ tskoltautik sventa jmojuk xij˗abtej xchiʼuk buchʼuuk noʼox krixchanoal. Li Jesuse lek laj yil sbaik xchiʼuk li krixchanoetike. Pe itʼixaj yoʼonton li yajkontratake, yuʼun laj yalik ti «jaʼ yamigo jtsobpatanetik xchiʼuk jpasmuliletik» ti la xchʼamik li lekil aʼyeje (Mat. 11:19). ¿Mi stakʼ jchanbetik Jesus ti jmoj xij˗abtejutik manchuk mi jelelutike? Jun ermano ti Louis sbie, ti tunem ta jkʼelvanej ta sirkuito, ta Betel xchiʼuk ti abtejem xchiʼuk epal ermanoetik ti jelel stsʼunbalike xi laj yale: «Chkil voʼone li jujutsop ermanoetike  xkoʼolaj kʼuchaʼal ta pakʼbal na o kʼal na ti pasbil ta ton ti jelajtik smukʼtikil xchiʼuk yelanile. Mi lek laj yichʼ cholel li tonetike, xuʼ lek chkom li pakʼbal nae. Kakʼoj persa sjelel li jtalelale sventa lekuk xi-abtej xchiʼuk li yantike, vaʼun jech lek chlokʼ li abtelale». ¡Toj lek ti jech stalelal li ermanoe!

¿Kʼuxi xuʼ xkakʼtik ta ilel ti jnaʼ xijrasonaj li ta tsobobbaile? Xuʼ van li ta jgrupotik ta cholmantale oy ermanoetik ti jeltos sjabilalik o ti oy kʼusi sbainojik li ta yutsʼ yalalike. Kʼalal mi lijlokʼ ta cholmantal xchiʼukike, ¿mi xuʼ van jech jcholtik mantal kʼuchaʼal nopem xaʼiik sventa skʼupinik li cholmantale?

Li lekil chiʼilil ta abtele mu snaʼ kʼusi sjalan (1 Tim. 6:18). Kʼalal jmoj abtej xchiʼuk Stot li Jesuse, laj yil ti muʼyuk kʼusi tsnakʼ ta yoʼontone. Jech xtok, «kʼalal la smeltsan» vinajel li Jeovae, te oy li Jesuse xchiʼuk ep kʼusitik la xchan ta stojolal li Stote (Prov. 8:27). Ta mas tsʼakale, li Jesuse ta sjunul yoʼonton laj yakʼbe xchan yajchankʼoptak skotol li kʼusi yaʼioj ta stojolal Stote (Juan 15:15). Mi la jchanbetik stalelal li Jeovae, ta sjunul me koʼontontik ta xkakʼbetik xchan kermanotaktik li kʼusi jnaʼojtik xchiʼuk li kʼusi jchanojtike. Li jun lekil chiʼilil ta abtele muʼyuk tsnakʼ li kʼusi xchanoj o li kʼusi snaʼoj ti xuʼ van jtunel yuʼun li yantike. Moʼoj, yuʼun ta sjunul yoʼonton ta xal li kʼusi snaʼoje xchiʼuk li kʼusi xchanoj sventa xuʼ xakʼbe xchan li yantik eke.

Yan li kʼusi xuʼ jpastike jaʼo kʼalal ta jpatbetik yoʼonton li ermanoetike. ¿Mi mu jechuk ti lek chkaʼi jbatik kʼalal chakʼik venta yantik li kʼusi ta jpastik xchiʼuk ti ta sjunul yoʼontonik tstojbutik ta vokole? Li Jesuse la xchʼakbe yorail sventa xalbe yajchankʼoptak li kʼusitik lek tspasike (koʼoltaso xchiʼuk Mateo 25:19-23; Luk. 10:17-20). Yuʼun laj yalbe ti «mas to mukʼ abtelal [tspasik]» kʼuchaʼal li stuke (Juan 14:12). Kʼalal jun xa ox akʼobal skʼan xcham li Jesuse, la skʼupil kʼopta li yajtakboltak ti tukʼ yakʼojan sbaike, xi laj yale: «Li voʼoxuke liʼ achiʼinojikun˗o kʼalal chkil jvokole» (Luk. 22:28). Li kʼusi laj yal Jesuse patbat-o tajek yoʼontonik xchiʼuk oy kʼusi laj yakʼ ta yoʼontonik spasel. Mi la jchʼakbetik yorail sventa jkʼupil kʼoptatik li kermanotaktik eke, mas me xmuyubajik xchiʼuk mas me baxbolik ta abtel.

Xi laj yal jun ermano ti Kayode sbie: «Mu me persauk tukʼil krixchanoot sventa xakʼot ta jun lekil chiʼilil ta abtel, pe li kʼusi xuʼ xapase jaʼ ti xmuyubaj avuʼun li yantike xchiʼuk ti xakʼupil kʼopta li kʼusi tspasike». ¿Mi jaʼ van jechot li voʼote? ¿Kʼu chaʼal mu xajakʼbe yan ermanoetik mi jaʼot jun lekil chiʼilil ta abtel chilik? ¿Mi jun noʼox van yoʼontonik oyik ta atojolal jech kʼuchaʼal jun noʼox yoʼontonik li yajtakboltak Jesus kʼalal la xchiʼinik ta abtele? Mi jaʼ jeche, xuʼ me xi xaval kʼuchaʼal laj yal li jtakbol Pabloe: «Jchiʼil noʼox jbatik ta abtel sventa xkuxetuk noʼox avoʼontonik» (2 Kor. 1:24).