Li jtakbol Pabloe xi la stsʼibabe batel li Timoteo ti jaʼ mol ta tsobobbail eke: «Tsots chkalbot ta stojolal Dios xchiʼuk ta stojolal Kristo Jesus xchiʼuk ta stojolal tʼujbil anjeletik ti xachʼun li mantaletike, pe mu me baʼyeluk kʼusi chopol xanop ta stojolal xchiʼuk mu me tʼujbiluk xavut» (1 Tim. 5:21). ¿Buchʼutik skʼoplal li «tʼujbil anjeletik» taje? Kalbetik batel skʼoplal.

Li jtakbol Pabloe maʼuk chalbe skʼoplal li 144 mile, yuʼun kʼalal la stsʼibabe batel li Timoteoe, muʼyuk toʼox yichʼojik chaʼkuxesel li buchʼutik tʼujbil chbatik ta vinajele. Li jtakboletik xchiʼuk li yan jmuyeletik ta vinajele muʼyuk toʼox akʼbil xkuxlejalik ta vinajel. Jaʼ yuʼun, maʼuk skʼoplalik li tʼujbil anjeletike (1 Kor. 15:​50-54; 1 Tes. 4:​13-17; 1 Juan 3:2).

Maʼuk skʼoplal xtok li anjeletik ti la stoy sbaik li ta skʼakʼalil Nojelal ta voʼe, yuʼun li anjeletik taje la spas ta jmoj sjolik xchiʼuk li Satanase. Vaʼun, pasik ta pukujetik xchiʼuk kʼotik ta yajkontra Jesus (Jen. 6:2; Luk. 8:​30, 31; 2 Ped. 2:4). Li ta jelavele, li Jesuse ta xchukanan ta xab jmil jabil. Ta mas tsʼakal une, jmoj chakʼbe slajeb xchiʼuk li Satanase (Jud. 6; Apok. 20:​1-3, 10).

Li ta 1 Timoteo 5:​21, chal ti «tʼujbil anjeletik» taje jmoj ch-abtejik xchiʼuk li Dios xchiʼuk li Kristo Jesuse. Jaʼ yuʼun, jaʼ skʼoplal anjeletik ti te oyik ta vinajel ti tukʼ yakʼoj sbaike.

Oy epal mil anjeletik ti tukʼ yakʼoj sbaike (Ebr. 12:​22, 23). Mu stakʼ xkaltik ti te stsopet skotol li anjeletik kʼalal oy kʼusi ch-akʼbat sbainik spasel yuʼun Jeovae (Apok. 14:​17, 18). Teuk ta joltik ti jun veltae jun noʼox anjel akʼbat sbain ti xbat smil 185 mil soltaroetik ta Asiriae (2 Rey. 19:35). Jech xtok, jech kʼuchaʼal laj yal li Jesuse oy epal anjeletik ti jaʼ tstsobik lokʼel ta Ajvalilal «skotol li kʼusitik tsmak-o yakanike xchiʼuk tstsobik lokʼel li jpaschoplejaletike» (Mat. 13:​39-41). Yikʼaluk van oy yan anjeletik ti jaʼ «tstsobik li buchʼutik» tʼujbil chbatik ta vinajele (Mat. 24:31). Jech xtok, oy yan anjeletik ti jaʼ ch-albatik mantal ti akʼo xchabiutik ti buyuk noʼox chijxanave jech kʼuchaʼal chal li ta Salmo 91:11 (Mat. 18:10; koʼoltaso xchiʼuk Mateo 4:11 xchiʼuk Lukas 22:43).

Li kʼusi chal ta 1 Timoteo 5:21 jaʼ van skʼoplal anjeletik ti oy kʼusi ch-akʼbat sbainik li ta tsobobbaile. Ta sjunul li kapitulo liʼe, li Pabloe jaʼ yakal chchiʼin ta loʼil li moletik ta tsobobbaile xchiʼuk la stojobtasan li ermanoetik ti akʼo stsakik ta venta li moletike. Jech xtok, albatik moletik ti akʼo spas lek li yabtelike ti mu «baʼyeluk kʼusi chopol» snopik ta stojolal yantik, ti mu xtʼujvanike xchiʼuk ti mu ta aniluk kʼusi xkʼot ta nopel yuʼunike. ¿Kʼu yuʼun? Yuʼun li Pabloe laj yalbe jun srasonal ti toj tsots skʼoplal ti kʼu yuʼun skʼan xchʼunik tojobtasel li moletike. Yuʼun ti chtunik ta stojolal li ermanoetike jaʼ tspasik ta stojolal Dios, Kristo Jesus xchiʼuk li tʼujbil anjeletike. Taje jaʼ skʼan xal ti kʼelbilik yuʼun Jeova, Jesus xchiʼuk li tʼujbil anjeletik ti kʼu yelan chchabiik tsobobbail li moletike. Jech kʼuchaʼal chkakʼtik ventae oy anjeletik ti jaʼ sbainojik skʼelel li tsobobbaile jech kʼuchaʼal ti xchabiik li yajtuneltak Diose, ti sbeiltasik li cholmantale xchiʼuk ti xalbeik Jeova li kʼusi chilik chkʼot ta pasele (Mat. 18:10; Apok. 14:6).