¿Mi akʼupinoj skʼelel Li Jkʼel-osil ta toyol ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

¿Kʼusi chakʼ jchantik Jeova ti kʼu yelan tstsak ta venta li antsetike?

Muʼyuk ta stʼujanan xchiʼuk maʼuk ti mas xa tsots skʼoplal chil li viniketike. Ta stsʼet chikintaanbe, tstsak ta venta ti kʼu yelan chaʼi sba li antsetike xchiʼuk ti kʼusi yakal tsnuptanike. Jech xtok, spatoj yoʼonton ta stojolalik ti tspasik li kʼusi yakʼojbe spasike (w24.01, paj. 16).

¿Kʼuxi xuʼ xkakʼ ta jkuxlejaltik Efesios 5:7 kʼalal xi chale: «Mu me teuk kapal akʼoplalik xchiʼukik» xie?

Li jtakbol Pabloe tspʼijubtasutik ti mu jaʼuk jchiʼintik li buchʼutik tspasik kʼusi chopol sventa mu xa jchʼunbetik smantal Jeovae. Jaʼ yuʼun, skʼan me mas xkichʼ jpʼijiltik. ¿Kʼu yuʼun? Yuʼun kʼalal xa ta redes sociales xuʼ jtatik ta chiʼinel ta loʼil li krixchanoetike (w24.03, paj. 22, 23).

¿Kʼusi jecheʼ loʼiletik skʼan jpʼajtik?

Skʼan me xkichʼ jpʼijiltik ta sventa li jecheʼ loʼiletik ti xuʼ van jaʼ la stakbutik talel junuk kamigotike, junuk korreo ti mu xkojtikintik buchʼu tstak talele. Jech xtok, skʼan me xkichʼ jpʼijiltik mi la jtatik ta chiʼinel ta loʼil jun jvalopatinej mantal ti oy ta yoʼonton xchanel Vivlia yilele (w24.04, paj. 12).

¿Kʼusi jnaʼojtik xchiʼuk kʼusi mu jnaʼtik ti kʼu yelan chchapan Jeova li ajvalil Salomone, li krixchanoetik ti chamik ta Sodoma xchiʼuk Gomorra xchiʼuk li ta Nojelal ta voʼe?

Mu xuʼ xkaltik ti laj yakʼbe slajeb Jeova ta sbatel osile, pe li kʼusi jnaʼojtike jaʼ ti xojtikin Jeova li krixchanoetike xchiʼuk echʼem xkʼuxul yoʼonton (w24.05, paj. 3, 4).

¿Kʼusi chakʼ jchantik ti jaʼ Mukʼta Ton li Jeovae? (Deut. 32:4).

Xuʼ jnakʼ jbatik ta stojolal Jeova. Xuʼ jpat koʼontontik ta stojolal, yuʼun xuʼ xkʼot ta pasel yuʼun li kʼusitik yaloje. Jech xtok, muʼyuk jelem-o li stalelaltak xchiʼuk li kʼusitik oy ta yoʼontone (w24.06, paj. 26-28).

¿Kʼusi tskoltautik sventa xijnop noʼox mi la jel jtsobobbailtike?

Pato avoʼonton ta stojolal Jeova ti tskoltaote xchiʼuk teuk ta ajol ti kʼuxi la skolta yajtuneltak ta voʼnee, mu xakoʼoltas ti kʼu toʼox yelan li atsobobbaile, oyuk kʼusitik xapas li ta atsobobbaile xchiʼuk akʼo persa saʼel avamigotak (w24.07, paj. 26-28).

¿Kʼusi chakʼ jchantik li oxib lokʼol kʼopetik laj yal Jesus ta kapitulo 25 ta Mateo?

Ta sventa li chijetik xchiʼuk li tentsunetike, laj yakʼ jchantik ti skʼan tukʼ xkakʼ jbatike; li lajunvoʼ tojol tsebetike laj yakʼ jchantik ti skʼan xvinaj ti chapalutik xchiʼuk ti vikʼil jsatike; ta sventa li talentoetike, laj yakʼ jchantik ti skʼan baxbolutik ta abtele (w24.09, paj. 20-24).

¿Kʼu staylej li yochebal templo la spas Salomone?

Junantik tsʼibetik ta voʼnee chal 120 xukʼubil li ta 2 Kronikas 3:​4, taje jaʼ skʼan xal ti xkoʼolaj ta jun torre ti 53 metro stayleje. Pe oy junantik voʼneal tsʼibetik chal «20 xukʼubil», jaʼ xkaltik, 9 metro staylej. Taje jaʼ mas sta-o ta skoj ti kʼu spimil li spakʼbal temploe (w24.10, paj. 31).

¿Kʼusi smakoj ti skʼan jun noʼox yajnil li siervo ministeriale? (1 Tim. 3:12).

Li siervo ministerial ti nupuneme skʼan jun noʼox yajnil xchiʼuk mu stakʼ xmulivaj xchiʼuk yan antsetik. Jech xtok, mu stakʼ sloʼlabe sjol yan antsetik (w24.11, paj. 19).

¿Kʼuxi jnaʼojtik ti maʼuk te la slikes Jesus li Veʼlil ta bat kʼakʼal yuʼun Kajvaltik li kʼusi laj yal ta Juan 6:53?

Li ta Juan 6:​53, li Jesuse laj yalbe skʼoplal ti skʼan xichʼ tibel sbekʼtal xchiʼuk xichʼ uchʼbel li xchʼichʼele. Taje jaʼ laj yalbe li epal judaetik ta Galilea ta sjabilal 32 ti chʼabal toʼox yakʼoj ta ilel xchʼunel yoʼontonike. Pe kʼalal la slikes li Veʼlil ta bat kʼakʼal yuʼun Kajvaltik ta Jerusalen ta sjabilal 33, jaʼ laj yalbe skʼoplal li buchʼutik koʼol ch-ajvalilajik xchiʼuk ta vinajele (w24.12, pajina 10, 11).