LI TA museo ti te oy ta Jerusalen ti Tierras de la Biblia sbie, oy jpech ton ti laj yichʼ tsʼibael ta sjabilaltik 700 kʼalal ta 600 kʼalal muʼyuk toʼox talem Jesuse. Li ton taje laj yichʼ tael ta jun chʼen ti jaʼ toʼox mukinale xchiʼuk ti mu toj nomuk xil li lum Hebrón ta Israele. Xi chal li tsʼibe: «Li Yahweh Sabaot chal ti chopoluk xkom skʼoplal li Hagaf xnichʼon Hagave». Li tsʼib taje, ¿kʼuxi chakʼ ta ilel ti melel li kʼusi chal Vivliae? Chakʼ ta ilel ti sbi Dios ti jaʼ Jeova o Yahweh ti ta xichʼ tsʼibael kʼuchaʼal YHWH li ta ebreo ta voʼnee lek ojtikinbil kʼalal laj yichʼ tsʼibael li Vivliae xchiʼuk jech nopem xaʼi tstunesik li krixchanoetike. Oy onoʼox yichʼoj tael yan tsʼibetik li ta chʼenetik ti bu tsmuk yanimaike. Taje chakʼ ta ilel ti buchʼutik chkʼot stsob sbaik o tsnakʼ sbaik teye nopem xaʼiik tstsʼibabeik sbi Dios li ta yibel chʼenetike xchiʼuk sbi krixchanoetik ti xkoʼolajtik ta tsʼibael kʼuchaʼal li sbi Diose.

Li Rachel Nabulsi ti xchanojbe lek skʼoplal li jeltos kʼopetike xchiʼuk ti te ch-abtej li ta Universidad ta Georgiae xi laj yalbe skʼoplal li tsʼibetik taje: «Tsots skʼoplal kʼusi chakʼ kiltik ti nopolik noʼox chichʼ tunesel li biil YHWH [...]. Chakʼ ta ilel ti tsots skʼoplal chilik li krixchanoetik ta Israel xchiʼuk ta Juda li YHWH». Taje chakʼ ta ilel ti melel li kʼusi chal Vivliae, yuʼun ta smilal xa noʼox ta velta chvinaj li sbi Dios ti tsʼibabil ta ebreo YHWH. Jech xtok, li sbi epal krixchanoetik ti te chalbe skʼoplale jaʼ jechtik ta tsʼibael kʼuchaʼal li sbi Diose.

Li Yahweh Sabaot ti te tsʼibabil li ta ton laj kalbetik skʼoplal ta slikebale jaʼ skʼan xal: «Jeova ti jaʼ bankilal yuʼun soltaroetike». Taje chakʼ ta ilel ti kʼalal jaʼo laj yichʼ tsʼibael Vivliae chichʼ tajek tunesel li sbi Dios xchiʼuk li biil «Jeova ti jaʼ bankilal yuʼun soltaroetike». Jech xtok, chakʼ ta ilel ti oy lek srasonal ti xi chal li Vivliae: «Jeova ti jaʼ bankilal yuʼun soltaroetike». Taje chvinaj mas ta 250 ta velta li ta Tsʼibetik ta Ebreo Kʼope, jutuk mu skotoluke te chvinaj li ta slivroal Isaias, Jeremias xchiʼuk Sakariase.