1, 2. 1) ¿Bakʼin mas chvul ta joltik li buchʼu chamem kuʼuntike? 2) ¿Kʼusi la spas Jesus kʼalal jun xa ox akʼobal skʼan xchame?

 KʼALAL oy buchʼu chcham kuʼuntike, muʼyuk chchʼay˗o ta joltik akʼo mi jal xa ox chamem. Mas to chvul ta joltik jujukoj ti chlokʼ jabil ti bakʼin chame.

² Jujun jabile, ta smiyonal xa noʼox ta jtsob jbatik ta spʼejel balumil sventa jvules ta joltik ti cham li Jesukristo ti jkʼanojtik tajeke (1 Ped. 1:8). Jaʼ ta jvules ta joltik ti ay yakʼ xkuxlejal sventa spojutik lokʼel li ta mulil xchiʼuk ta lajelale (Mat. 20:28). Li Jesuse tskʼan ti akʼo svules ta sjolik yajchankʼoptak ti bakʼin chame. Jaʼ yuʼun, jmoj veʼik kʼalal jun xa ox akʼobal skʼan xchame xchiʼuk xi laj yale: «Jech xapasilanik˗o sventa jnaʼobil» (Luk. 22:19).

3. ¿Kʼusi ta jkʼeltik li ta xchanobil liʼe?

³ Li ta smiyonal krixchanoetik chbatik li ta Konmemorasione, junantik noʼox li buchʼutik smalaoj chkuxiik ta vinajele, li yepale liʼ smalaoj chkuxiik ta balumile. Li ta xchanobil liʼe, ta jkʼeltik jayibuk srasonaltak ti kʼu yuʼun chbatik jujun jabil li ta Konmemorasione. Ta jkʼeltik xtok kʼusi sbalil ta jtabetik mi lijbate. Jkʼeltik junchibuk srasonaltak ti kʼu yuʼun chbatik ta Konmemorasion li buchʼutik tʼujbil chbatik ta vinajele.

4. ¿Kʼu yuʼun tsveʼik pan xchiʼuk chuchʼik vino ta Konmemorasion li buchʼutik tʼujbil chbatik ta vinajele?

⁴ Jun srasonal ti kʼu yuʼun chbatik ta Konmemorasion li buchʼutik tʼujbil chbatik ta vinajele jaʼ sventa sveʼik li pan  xchiʼuk ti xuchʼik li vinoe. ¿Kʼu yuʼun ti xuʼ jech tspasike? Sventa jnaʼtike, jvules ta joltik li kʼusi la spas Jesus kʼalal jun xa ox akʼobal kuxule. Kʼalal laj xa ox spasik li Kʼin Koltaele, li Jesuse oy kʼusi la spas ti Veʼlil ta bat kʼakʼal yuʼun Kajvaltik ojtikinbile. Laj yalanbe li 11 ta voʼ yajtakboltak ti akʼo sveʼik li pane xchiʼuk ti akʼo xuchʼik li vinoe. Jech xtok, laj yalanbe skʼoplal chib trato: li achʼ tratoe xchiʼuk li trato sventa Ajvalilale (Luk. 22:19, 20, 28-30). * Li tratoetik taje jaʼ chakʼ ti akʼo xkʼotik ta ajvaliletik xchiʼuk ta paleetik ta vinajel li jtakboletike xchiʼuk junantik yajchankʼoptak Kristo (Apok. 5:10; 14:1). Li buchʼutik tʼujbil chbatik ta vinajel ti liʼ to oyik ta balumile te tsakal skʼoplalik li ta chib trato taje. Jaʼ yuʼun, xuʼ sveʼik li pan xchiʼuk xuʼ xuchʼik li vino ta Konmemorasione.

5. ¿Kʼusi snaʼojik ti tstaik li buchʼutik tʼujbil chbatik ta vinajele?

⁵ Yan srasonal ti kʼu yuʼun chbatik ta Konmemorasion li buchʼutik tʼujbil chbatik ta vinajele jaʼ sventa snopbeik skʼoplal li kʼusi smalaoj tstaike. Toj lek kʼusi ch˗akʼbatik yuʼun li Jeovae: muʼyuk chchamik, muʼyuk chkʼaʼ li sbekʼtalike, jmoj tskolta sbaik ta abtel xchiʼuk li Jesukristoe xchiʼuk chilik li Jeovae (1 Kor. 15:51-53; 1 Juan 3:2). Li buchʼutik tʼujbil chbatik ta vinajele snaʼojik ti xuʼ skʼupinik taje. Pe sventa staike, skʼan tukʼ xakʼ sbaik ti kʼu sjalil kuxulike (2 Tim. 4:7, 8). Xmuyubajik tajek kʼalal tsnopbeik skʼoplal li kʼusi smalaoj tstaike (Tito 2:13). Pe ¿kʼu yuʼun chbatik ta Konmemorasion li yan chijetike? (Juan 10:16). Jkʼeltik junantik srasonaltak.

6. ¿Kʼu yuʼun chbatik ta Konmemorasion jujun jabil li yan chijetike?

⁶ Jun srasonal ti kʼu yuʼun chbatik ta Konmemorasion li yan chijetike jaʼ sventa skʼelik li kʼusi chichʼ pasele, pe muʼyuk tsveʼik li pan xchiʼuk muʼyuk chuchʼik li vinoe. Li ta 1938, te laj yichʼ alel ta sba velta ti xuʼ xbatik ek li buchʼutik smalaoj chkuxiik liʼ ta balumile. Li revista La Torre del Vigía ta avril ta 1938 xi laj yale: «Lek ti xbatik li yan chijetik li ta tsobajel taje sventa skʼelik li kʼusi chichʼ pasele». Xi to laj yale: «Jaʼ sventa xmuyubajik ek li vaʼ orae». Kʼalal chbatik ta jun kʼin nupunel li buchʼutik takbilik ta ikʼele, xmuyubaj tskʼelik li kʼusi chapanbile. Jaʼ noʼox jech ek, li yan chijetike xmuyubaj tskʼelik li kʼusi chichʼ pasel ta Konmemorasione.

7. ¿Kʼu yuʼun tskʼan chchikintaik li mantal ch˗echʼ ta Konmemorasion li yan chijetike?

⁷ Li yan chijetik eke tsnopbeik skʼoplal li kʼusi smalaoj tstaike. Tskʼan chchikintaik li mantal chjelav ta Konmemorasione, yuʼun jaʼ mas chalbe skʼoplal li kʼusi tspasik ta stojolal krixchanoetik li Kristo xchiʼuk li 144 mil mi ajvalilajik ta Jmil Jabile. Li Jesukristoe jaʼ tsbeiltas li 144 mil sventa jmoj spasik ta Paraiso li balumile xchiʼuk ti xtukʼib li krixchanoetike. Li buchʼutik jaʼ noʼox chbat skʼelik li kʼusi chichʼ pasel ta Konmemorasione xmuyubajik tajek kʼalal tsnopbeik skʼoplal kʼuxi chkʼot ta pasel li albil kʼopetik jech kʼuchaʼal chal ta Isaias 35:5, 6; 65:21-23 xchiʼuk Apokalipsis 21:3, 4. Kʼalal tsnopbeik skʼoplal ti te xa oyik ta Paraiso  xchiʼuk li buchʼutik skʼanojike, mas to chchʼunik ti chkʼot ta pasel li kʼusi smalaojike xchiʼuk jpʼel ta yoʼontonik ti jech˗o chtunik ta stojolal Jeovae (Mat. 24:13; Gal. 6:9).

8. ¿Kʼusi yan srasonal ti chbatik ta Konmemorasion li yan chijetike?

⁸ Yan srasonal ti kʼu yuʼun chbatik ta Konmemorasion li yan chijetike jaʼ sventa xakʼik ta ilel ti skʼanojik li buchʼutik tʼujbil chbatik ta vinajele xchiʼuk ti tskʼan tskoltaike. Li Vivliae yaloj xa onoʼox ti jmoj noʼox oyik li buchʼutik chbatik ta vinajele xchiʼuk li buchʼutik chkuxiik liʼ ta balumile. Jkʼeltik junantik albil kʼopetik ti jaʼ jech chakʼ ta ilele.

9. Li yan chijetike, ¿kʼu yelan chilik li buchʼutik chbatik ta vinajel jech kʼuchaʼal chal li albil kʼop ta Sakarias 8:23?

⁹ (Kʼelo Sakarias 8:23). Li albil kʼop liʼe toj kʼupil sba kʼu yelan chalbe skʼoplal ti kʼu yelan ch˗ilatik yuʼun yan chijetik li buchʼutik tʼujbil chbatik ta vinajele. Kʼalal chal «jun juda [vinik]» xchiʼuk «ta atojolalik» xie, jaʼ skʼoplal li buchʼutik tʼujbil chbatik ta vinajel ti liʼ to oyik ta balumile (Rom. 2:28, 29). Li «lajunvoʼ viniketik ta skotol jeltos kʼopetik ta mukʼtik [lumetike]» jaʼ skʼoplal li yan chijetike. Tstsakbeik lek yok skʼuʼ spokʼ li buchʼutik tʼujbil chbatik ta vinajele, jaʼ xkaltik, ti tukʼ chakʼ sbaik ta stojolalike xchiʼuk jmoj chichʼik ta mukʼ li Jeovae. Jaʼ yuʼun, kʼalal chbatik ta Konmemorasion li yan chijetike, jaʼ te chakʼik ta ilel ti jmoj oyik xchiʼuk li buchʼutik chbatik ta vinajele.

10. ¿Kʼusi spasoj Jeova sventa xkʼot ta pasel li albil kʼop chal ta Esekiel 37:15 kʼalal ta 19, 24, 25?

¹⁰ (Kʼelo Esekiel 37:15-19, 24, 25). Sventa xkʼot ta pasel li albil kʼop ti chalbe skʼoplal chaʼtel teʼe, li Jeovae yakʼoj ti akʼo jmoj x˗abtejik li buchʼutik chbatik ta vinajel xchiʼuk li yan chijetike. Li buchʼutik smalaoj chkuxiik ta vinajele jaʼ skʼoplalik xkaltik li teʼ «sventa Juda» ti jaʼ toʼox te chichʼ tʼujel li buchʼu ch˗och ta ajvalil ta Israele. Li buchʼutik chkuxiik ta balumile jaʼik xkaltik li «steʼ Efraine». * Li Jeovae tspas ta jmoj li chaʼtsop krixchanoetik taje sventa «jtel xa noʼox chkʼotik». Taje jaʼ skʼan xal ti jmoj chtunik ta stojolal li Ajvalil yuʼunik ti jaʼ li Jesukristoe. Li buchʼutik chbatik ta vinajel xchiʼuk li yan chijetike muʼyuk chʼakajtik tspasik li Konmemorasione, yuʼun «jtsop noʼox chkʼotik, jun jchabichij chkʼot yuʼunik» (Juan 10:16).

11. Li chijetik chalbe skʼoplal ta Mateo 25:31 kʼalal ta 36, 40, ¿kʼuxi tskoltaik li yermanotak Kristoe?

¹¹ (Kʼelo Mateo 25:31-36, 40). Li chijetik chalbe skʼoplal li lokʼolkʼop liʼe jaʼik li buchʼutik tukʼ chakʼ sbaik li ta slajebal kʼakʼale xchiʼuk ti smalaoj chkuxiik liʼ ta balumile, jaʼ xkaltik, jaʼik li yan chijetike. Ta sjunul yoʼonton tskoltaik li yermanotak Kristo ti liʼ to oyik ta balumile. Mas to tskoltaik sventa spasik li jun mukʼta abtelal ti jaʼ li xcholel mantal ta spʼejel balumile xchiʼuk li ta chanubtasvaneje (Mat. 24:14; 28:19, 20).

12, 13. ¿Kʼusi to yan tspasik li yan chijetik sventa skoltaik li yermanotak Kristoe?

¹² Jujun jabil kʼalal jutuk xa skʼan li Konmemorasione, li yan chijetike chakʼik ta ilel ti tskoltaik li yermanotak Kristoe. ¿Kʼuxi? Jaʼo kʼalal tstakik ta ikʼel yantik sventa xbatik li ta Konmemorasione  (kʼelo li rekuadro « ¿Mi yakal xa chachapan aba sventa li Konmemorasione?»). Ta spʼejel balumil chchapanik li Konmemorasione akʼo mi muʼyuk buchʼu chbat ta vinajel li ta stsobobbailike. Li yan chijetike xmuyubajik ti jaʼ jech tskoltaik li yermanotak Kristoe. Yuʼun snaʼojik ti kʼalal tskoltaik li buchʼutik chbatik ta vinajele, jaʼ yakal chichʼ koltael chaʼi li Jesuse (Mat. 25:37-40).

¹³ ¿Kʼu yuʼun skʼan xijbat jkotoltik li ta Konmemorasion mu ventauk ti bu jmalaoj chijkuxie?

14. ¿Kʼuxi yakʼojik ta ilel Jeova xchiʼuk Jesus ti skʼanojutik tajeke?

¹⁴ Yuʼun jaʼ jech ta jtojtik ta vokol ti skʼanojutik Jeova xchiʼuk Jesuse. Li Jeovae ep ta tos kʼu yelan yakʼojbutik ta ilel ti skʼanojutike. Pe li bu mas jech vinaje jaʼo kʼalal la stak talel li Xnichʼon sventa xcham ta jtojolaltike (Juan 3:16). Li Jesus eke laj yakʼ ta ilel ti skʼanojutik kʼalal laj yakʼ xkuxlejal ta jtojolaltike (Juan 15:13). Mu onoʼox xtoj kuʼuntik li kʼusi spasojik ta jtojolaltike, pe ti kʼu yelan jkuxlejaltike jaʼ te chvinaj ti ta jtojtik ta vokole (Kol. 3:15). Kʼalal chijbat ta Konmemorasione, jaʼ te chkakʼtik ta ilel ti jkʼanojantike xchiʼuk ti ta jtojtik ta vokol ti skʼanojutike.

15. ¿Kʼu yuʼun tstojik ta vokol pojelal li buchʼutik chbatik ta vinajel xchiʼuk li yan chijetike?

¹⁵ Yuʼun ta jtojtik tajek ta vokol ti laj kichʼtik pojele (Mat. 20:28). Li buchʼutik tʼujbil chbatik ta vinajele ep sbalil chilik li pojelale, yuʼun tukʼ ch˗ilatik yuʼun Jeova xchiʼuk chkʼotik ta xnichʼnabtak mi laj yakʼ xchʼunel yoʼontonik li ta matanal laj yakʼ Jesuse (Rom. 5:1; 8:15-17, 23). Li yan chijetik eke ep sbalil chilik li pojelale, yuʼun xuʼ lek x˗ilatik yuʼun Dios, xuʼ lek xtunik ta stojolal xchiʼuk xuʼ kuxul xkomik «li ta mukʼta tsatsal [vokolil]» mi laj yakʼ xchʼunel yoʼontonik ti cham li Jesuse (Apok. 7:13-15). Kʼalal chbatik jujun jabil ta Konmemorasion li buchʼutik chbatik ta vinajel xchiʼuk li yan chijetike, te chakʼik ta ilel ti tstojik ta vokol li pojelale.

16. ¿Kʼusi yan srasonal ti chijbat li ta Konmemorasione?

¹⁶ Yuʼun ta jkʼan ta jchʼuntik li kʼusi laj yal Jesuse. Mu ventauk ti bu jmalaoj chijkuxiutike, jkotoltik tsots skʼoplal chkiltik li kʼusi laj yal komel Jesus kʼalal la slikes li Konmemorasione: «Jech xapasik˗o sventa jnaʼobil» (1 Kor. 11:23, 24).

17. ¿Kʼu yuʼun chijnopaj mas ta stojolal Jeova kʼalal chijbat ta Konmemorasione?

¹⁷ Chijnopaj mas ta stojolal Jeova (Sant. 4:8). Jech kʼuchaʼal laj xa jchantike, kʼalal chijbat ta Konmemorasione, xuʼ te jnopbetik skʼoplal li kʼusi yaloj Jeova chakʼbutike xchiʼuk ti kʼu yelan yakʼoj ta ilel ti skʼanojutike (Jer. 29:11; 1 Juan 4:8-10). Jchʼunojtik ta melel ti chkʼot ta pasel li kʼusi jmalaojtike xchiʼuk ti jech˗o tskʼanutik li Jeovae. Kʼalal ta jnopbetik skʼoplal taje, mas to ta jkʼantik li Jeovae xchiʼuk mas nopol chkaʼi jbatik ta stojolal (Rom. 8:38, 39).

18. ¿Kʼusi tstij koʼontontik spasel kʼalal ta jnopbetik skʼoplal li kʼusi la spas Jesuse?

¹⁸ Tstij koʼontontik yoʼ jchanbetik stalelal li Jesuse (1 Ped. 2:21). Kʼalal jutuk xa ox skʼan li Konmemorasione, ta jkʼeltik li loʼiletik ta Vivlia ti chalbe skʼoplal li  kʼusitik la spas Jesus kʼalal poʼot xa ox xchame, kʼalal laj yichʼ milele xchiʼuk kʼalal chaʼkuxie. Li mantal ch˗echʼ ta Konmemorasione tsvules ta joltik ti kʼu to yepal skʼanojutik li Jesuse (Efes. 5:2; 1 Juan 3:16). Kʼalal ta jchantik xchiʼuk ta jnopbetik skʼoplal ti la spasbe yabtel Jeova akʼo mi xil svokole, tstij koʼontontik sventa jechuk˗o xijxanav jech kʼuchaʼal xanav li stuke (1 Juan 2:6).

19. ¿Kʼusi skʼan jpastik sventa xkamigointik˗o li Jeovae?

¹⁹ Mas to ch˗ayan ta koʼontontik ti xkamigointik˗o li Jeovae (Jud. 20, 21). Kʼalal chkakʼtik persa sventa jchʼunbetik smantale, ti jchʼultajesbetik li sbie xchiʼuk ti xmuyubajuk kuʼuntike, jech˗o me lek chilutik (Prov. 27:11; Mat. 6:9; 1 Juan 5:3). Kʼalal chijbat ta Konmemorasione, jaʼ tskoltautik sventa mas to xkakʼbetik yil Jeova ti ta jkʼan chkamigointike xchiʼuk ti xi chkalbetike: «¡Ta jkʼan chkamigoinot˗o sbatel osil!».

20. ¿Kʼusitik srasonal oy kuʼuntik sventa xijbat li ta Konmemorasione?

²⁰ Mu ventauk mi jmalaoj chijkuxi ta vinajel o liʼ ta balumile, oy lek srasonal kuʼuntik sventa xijbat jujun jabil li ta Konmemorasione. Kʼalal ta jtsob jbatike, jaʼ te ta jvules ta joltik k’alal cham li Jesukristo ti jkʼanojtik tajeke. Te chvul ta joltik xtok ti laj yakʼ ta ilel Jeova ti skʼanojutik tajeke: ti laj yakʼ Xnichʼon sventa spojutike. Li avi jabile, chichʼ pasel li Konmemorasion ta viernes 15 yuʼun avril ta 2022. Ta skoj ti jkʼanojtik Jeova xchiʼuk Jesuse, chkakʼtik persa sventa teuk oyutik li ta Konmemorasione.