1. ¿Kʼuxi xuʼ xmuyubaj kuʼuntik li Jeovae?

 JNOPTIK noʼox ti oy kʼusi chakʼelanbe ti toj kʼupil sba xchiʼuk ti toj tunel yuʼun li buchʼu akʼanoj tajeke. ¿Mi mu jechuk ti chopol chkaʼitik mi naka noʼox la skʼej o ti xchʼay xaʼi li kʼusi la jkʼelanbetike? Pe jaʼ xijmuyubaj kʼalal chkiltik ti tstoj ta vokole xchiʼuk ti tstunese. ¿Kʼusi chakʼ jchantik taje? Jaʼ ti laj yakʼbutik Xnichʼon li Jeovae. Xmuyubaj tajek Jeova kʼalal chil ti ta jtojbetik ta vokol li matanal laj yakʼbutik ti jaʼ li pojelale xchiʼuk ti skʼanojutik tajeke (Juan 3:16; Rom. 5:​7, 8).

2. ¿Kʼusi ta jkʼeltik batel li ta xchanobil liʼe?

² Kʼalal ch-echʼ batel li jabiletike, xuʼ van muʼyuk xa mas sbalil chkiltik li pojelale. Xuʼ van xijmuyubaj-o yuʼun ti jech laj yakʼbutik li Jeovae. Pe jech kʼuchaʼal laj kalbetik skʼoplal li matanal chkakʼtike, xkoʼolaj ti naka noʼox la jkʼejtik xchiʼuk ti chʼay xkaʼitike. Sventa mu jechuk xkʼot ta pasele xchiʼuk ti jechuk-o jtojtik ta vokole, skʼan jechuk-o jnopilanbetik skʼoplal li kʼusitik spasoj Jeova xchiʼuk Jesus ta jtojolaltike. Taje jaʼ li kʼusi ta jkʼeltik batel li ta xchanobil liʼe. Chkalbetik batel skʼoplal kʼusi sbalil ta jtabetik avi li pojelale xchiʼuk ti kʼusi sbalil ta jtabetik ta jelavele. Jech xtok, ta jkʼeltik batel kʼuxi xuʼ jtojbetik ta vokol Jeova li kʼanelal chakʼbutik ta ilele. Taje mas to me jech xuʼ jpastik kʼalal skʼan toʼox junchibuk xemana li Konmemorasione xchiʼuk kʼalal echʼem xa oxe.

¿KʼUSI SBALIL TA JTABETIK LI AVIE?

3. ¿Kʼusi sbalil ta jtabetik avi li pojelale?

³ Yakal xa ta jtabetik sbalil avi ti laj yakʼ ta matanal xkuxlejal li Kristoe. Jech kʼuchaʼal liʼe, koliyal li pojelale, li Jeovae chakʼutik ta perton. Pe ti jech tspase maʼuk ta skoj ti sujbile,  yuʼun chlokʼ ta yoʼonton spasel. Jun velta li Davide xi la stoj ta vokol ta jun kʼejoje: «Kajval Jeova, yuʼun toj lek avoʼonton xchiʼuk chapalot sventa xachʼay mulil» (Sal. 86:5; 103:​3, 10-13).

4. ¿Buchʼutik tstabeik sbalil li pojelal laj yakʼ Jeovae? (Lukas 5:32; 1 Timoteo 1:15).

⁴ Oy buchʼutik tsnopik ti mu staik-o ti x-akʼatik ta perton yuʼun li Jeovae. Pe ti melel xkaltike, chʼabal onoʼox buchʼu ti sta-oe. Li jtakbol Pabloe xi laj yale: «Mu jta-o ti jtakbol chkichʼ albele, yuʼun la jkontrainbe li stsobobbail Diose». Pe xi to laj yal ta tsʼakale: «Ti kʼusi jtaoje jaʼ koliyal li slekil yutsil yoʼonton Diose» (1 Kor. 15:​9, 10). Kʼalal ta jsutes koʼontontike, li Jeovae chakʼutik ta perton. ¿Kʼu yuʼun ti jech tspase? Maʼuk ta skoj ti jtatik-oe, yuʼun jaʼ ta skoj ti skʼanojutike. Jaʼ yuʼun, mi chopol chkaʼi jbatik ta skoj ti ta jnoptik ti mu jtatik-o ti xakʼutik ta perton li Jeovae, teuk ta joltik ti maʼuk laj yakʼbe tukʼil krixchanoetik li pojelale. Yuʼun jaʼ laj yakʼbe li jpasmulil krixchanoetik ti tsutes yoʼontonike (kʼelo Lukas 5:32; 1 Timoteo 1:15).

5. ¿Kʼu yuʼun mu stakʼ ti oy buchʼu xal ti sta-o ti xichʼ kʼuxubinel yuʼun li Jeovae?

⁵ Manchuk mi ep xa jabil chijtun ta stojolal Jeova, mu me stakʼ xkaltik ti sta-o xkʼuxubinutike. Melel onoʼox, li stuke ep sbalil chil skotol li kʼusi ta jpastik ta stojolale (Ebr. 6:10). Ti laj yakʼbutik ta matanal li pojelale, maʼuk sventa stojbutik li kʼusi ta jpastik ta stojolale. Mi ta jnoptik ti jtatik-o ti xkʼuxubinutik li Jeovae, xkoʼolaj ti yakal chkaltik ti mu persauk ti ay chamuk ta jtojolaltik li Kristoe (koʼoltaso xchiʼuk Galatas 2:21).

6. ¿Kʼu yuʼun laj yakʼ yipal Pablo ta spasbel yabtel li Jeovae?

⁶ Li Pabloe snaʼoj ti mu kʼusi stakʼ spas ta yipal stuk sventa x-akʼat ta perton yuʼun li Diose. Mi jaʼ jeche, ¿kʼu yuʼun ti laj yakʼ yipal spasbel yabtel li Jeovae? Yuʼun tskʼan chakʼbe ta ilel ti tstojbe ta vokol li slekil yutsil yoʼonton akʼbat ta ilel yuʼun li Diose (Efes. 3:7). Jaʼ jech li voʼotik eke, ti xijmuyubaj chijtun ta stojolal Jeovae, maʼuk noʼox ta skoj ti ta jkʼantik ti akʼo xkʼuxubinutike. Yuʼun ti jech ta jpastike, jaʼ ta skoj ti ta jkʼan ta jtojbetik ta vokol ti jech chakʼbutik ta ilele.

7. ¿Kʼusi yan sbalil ta jtabetik avi li pojelale? (Romanos 5:1; Santiago 2:23).

⁷ Ta skoj li pojelal xtoke, xuʼ lek tajek xkil jbatik xchiʼuk li Jeovae. a Jech kʼuchaʼal la jchantik li echʼ xchanobile, kʼalaluk chijvokʼ o chij-ayane, muʼyuk lek xkil jbatik xchiʼuk li Diose. Pe ta skoj li pojelale, xuʼ jun koʼontontik ta stojolal Dios xchiʼuk ti xijnopaj ta stojolale (kʼelo Romanos 5:1; Santiago 2:23).

8. ¿Kʼu yuʼun skʼan jtojbetik ta vokol Jeova ti xuʼ jkʼopontik ta orasione?

⁸ Kalbetik skʼoplal jtosuk li kʼusi toj tsots skʼoplal jtaojtik ti jaʼ kamigotik li Jeovae, jaʼ ti xuʼ jkʼopontik ta orasione. Li stuke maʼuk noʼox chchikinta li orasion chichʼ pasel ta tsobajeletike, yuʼun chchikinta xtok li orasion ta jpastik ta jujuntale. Melel onoʼox, kʼalal ta jpastik orasione, jun xa koʼontontik chijkom yuʼun. Pe taje maʼuk li kʼusi mas tsots skʼoplale, yuʼun li orasione tskoltautik sventa masuk to lek xkil jbatik xchiʼuk li Diose (Sal. 65:2; Sant. 4:8; 1 Juan 5:14). Kʼalal ay ta balumil li Jesuse, nopolik noʼox la skʼopon li Jeovae, yuʼun snaʼoj ti chchikintabate xchiʼuk ti jaʼ chkoltaat-o sventa lekuk tajek xil sba xchiʼuke (Luk. 5:16). Koliyal ti laj yakʼ ta matanal xkuxlejal li Jesuse, xuʼ xkamigointik li Jeovae xchiʼuk xuʼ jkʼopontik.

 ¿KʼUXI TA JTABETIK SBALIL TA JELAVEL?

9. Li pojelale, ¿kʼuxi tstabeik sbalil ta jelavel li yajtuneltak Dios ti tukʼ yakʼoj sbaike?

⁹ Li yajtuneltak Dios ti tukʼ yakʼoj sbaike tstabeik sbalil ta jelavel li pojelale, yuʼun xuʼ sta xkuxlejalik sbatel osil. Ta skoj ti ta smilal xa noʼox jabil jech-o chcham li krixchanoetike, epal krixchanoetik tsnopik ti mu xuʼ xijkuxi ta sbatel osile. Pe kʼalal la spas krixchanoetik li Jeovae, jaʼ sventa xkuxiik sbatel osil. Manchuk mi vokol ta chʼunel ti xuʼ jtatik li kuxlejal sbatel osile, xuʼ jchʼuntik ti jech chkʼot ta pasele, yuʼun li Jeovae toyol la stojutik kʼalal laj yakʼbutik xkuxlejal Xnichʼon sventa xkʼot ta pasele (Rom. 8:32).

10. ¿Kʼusi oy tajek ta yoʼontonik tstaik li buchʼutik tʼujbil chbatik ta vinajel xchiʼuk li yan chijetike?

¹⁰ Akʼo mi jaʼ to ta jtabetik sbalil ta jelavel li kuxlejal sbatel osile, li Jeovae tskʼan ti jnopbetik xa noʼox skʼoplal avi kʼu yelan li kuxlejal taje. Li buchʼutik tʼujbil chbatik ta vinajele oy xa tajek ta yoʼontonik ti xkuxiik ta vinajel xchiʼuk ti jmojuk sventainik balumil xchiʼuk li Kristoe (Apok. 20:6). Jaʼuk li yan chijetike oy xa tajek ta yoʼontonik ti xkuxiik ta Paraiso liʼ ta balumile, ti bu chʼabal xa vokolil xchiʼuk ti chʼabal kʼusi kʼux-ipe (Apok. 21:​3, 4). ¿Mi liʼ chakuxi ta balumil ta sbatel osile? Mi jaʼ jeche, maʼuk skʼan xal ti pekʼel skʼoplal li amoton ataoje, yuʼun kʼalal la spas krixchanoetik li Diose, jaʼ sventa xkuxiik ta sbatel osil liʼ ta balumile. Jaʼ yuʼun, chakʼbutik tajek muyubajel mi kʼot ta pasele.

11, 12. ¿Kʼusitik bendisionetik ta jkʼan xa ta jtatik li ta Paraisoe? (Kʼelo xtok li lokʼoletike).

¹¹ Nopbo skʼoplal kʼu van yelan akuxlejal li ta Paraisoe. Chlaj skʼoplal li chamele, li lajele xchiʼuk muʼyuk xa ox me kʼusi chavul-o avoʼonton (Is. 25:8; 33:24). Li Jeovae ta me xakʼbot skotol li kʼusitik lekik chakʼan chapase. ¿Kʼusi oy ta avoʼonton chak’an chachan? ¿Mi chakʼan chachanbe skʼoplal li spasbentak Jeovae? ¿Mi chakʼan chachan stijel guitarra o yan kʼusi? ¿Mi chakʼan chachan spasel divujo? Ta melel, chtun j-arkitektoetik, jmeltsanejnaetik, jtsʼunolajeletik, jpasveʼliletik,  jmeltsanej-abtejebaletik, jtsʼunnichimetik xchiʼuk buchʼutik tskʼelik (Is. 35:1; 65:21). ¡Oy xa ox me avuʼun yorail sventa xachan skotol li kʼusi oy ta avoʼonton chakʼan chachane!

¹² ¡Toj kʼupil xa noʼox sba kʼalal ta jchʼamtik li buchʼutik chchaʼkuxiik tale! (Ech. 24:15). Toj kʼupil sba ti oy to kʼusitik mas xuʼ jchantik ta stojolal Jeova xchiʼuk ta sventa li kʼusitik spasoje (Sal. 104:24; Is. 11:9). Pe li kʼusi mas toj leke, jaʼ ti xuʼ jun koʼontontik xkichʼtik ta mukʼ Jeova xchiʼuk ti chʼabal xa jmul chkaʼi jbatike. Jaʼ yuʼun, ¿mi xlokʼ venta ti jchʼaytik li kuxlejal sbatel osil ta skoj noʼox ti ta jkʼan ta jkʼupintik «kʼuk sjalil li mulile»? (Ebr. 11:25). Li kʼupil sba kuxlejal ta jtatik ta jelavele mas to me lek ti jaʼ mu sta li kʼusi xuʼ jtatik liʼ ta mol balumile. Teuk me ta ajol, mi kʼot yoraile, maʼuk xa noʼox ta jnopbetik skʼoplal ti kʼu yelan li kuxlejal ta Paraisoe, yuʼun te xa ox oyutik. Taje jaʼ noʼox me jech xuʼ xkʼot ta pasel ta skoj ti skʼanojutik tajek li Jeovae, yuʼun la stak talel Xnichʼon sventa xcham ta jtojolaltik.

KAKʼBETIK TA ILEL JEOVA TI TA JTOJBETIK TA VOKOL TI SKʼANOJUTIKE

13. ¿Kʼuxi chkakʼbetik ta ilel Jeova ti ta jtojbetik ta vokol ti skʼanojutike? (2 Korintios 6:1).

¹³ ¿Kʼuxi xuʼ xkakʼbetik ta ilel Jeova ti ta jtojbetik ta vokol ti laj yakʼbutik li pojelale? Jaʼ ti xkakʼtik ta ilel ta jkuxlejaltik ti mas tsots skʼoplal chkiltik ti chijtun ta stojolale (Mat. 6:33). Ti laj yakʼ xkuxlejal li Jesuse, jaʼ «sventa mu xa ta sventauk stuk xkuxi li buchʼu kuxule, jaʼ xa kuxiuk ta stojolal li buchʼu cham ta stojolalike xchiʼuk ti laj yichʼ chaʼkuxesele» (2 Kor. 5:15). Li Jeovae toj lek yoʼonton ta jtojolaltik xchiʼuk chakʼutik ta perton. Kʼalal ta jpastik ti bu kʼalal xuʼ kuʼuntik sventa xijtun ta stojolale, jaʼ jech chkakʼtik ta ilel ti xkaʼibetik smelolal li kʼusitik spasoj ta jtojolaltike xchiʼuk ti ta jkʼan ta jtojbetik ta vokole (kʼelo 2 Korintios 6:1).

14. ¿Kʼuxi xuʼ xkakʼtik ta ilel ti jpatoj koʼontontik li ta smantaltak Jeovae?

¹⁴ Yan ti kʼuxi xuʼ xkakʼbetik ta ilel ti ta jtojbetik ta vokol ti skʼanojutik li Jeovae, jaʼ ti jpat koʼontontik li ta smantaltak Jeovae. ¿Kʼuxi xuʼ jech jpastik taje? Kʼalal oy kʼusi ta jnop ta jpastike, jtsaktik ta venta li kʼusi oy ta yoʼonton Jeovae, jech kʼuchaʼal ti bu to kʼalal chijchanunaje o ti kʼusi abtelal ta jchʼamtike (1 Kor. 10:31; 2 Kor. 5:7). Kʼalal chkakʼtik ta ilel ti oy xchʼunel koʼontontik ta stojolal Jeova kʼalal oy kʼusi ta jnop ta jpastike, li xchʼunel koʼontontik xchiʼuk ti kʼu yelan xkil jbatik xchiʼuke mas to me tstsatsub. Jech xtok, mas to me jpʼel ta koʼontontik ti xuʼ xijkuxi ta sbatel osile (Rom. 5:​3-5; Sant. 2:​21, 22).

15. Li ta Konmemorasione, ¿kʼuxi xuʼ jtojtik ta vokol li pojelal xchiʼuk li kʼanelal yuʼun Jeovae?

¹⁵ Yan ti kʼuxi xuʼ jtojtik ta vokol li pojelal xchiʼuk li kʼanelal yuʼun Jeovae, jaʼ ti oyuk kʼusi jpastik kʼalal skʼan toʼox jun chib xemana li Konmemorasione. Maʼuk noʼox ti xijbate, yuʼun skʼan xkakʼ kipaltik sventa oyuk buchʼu  xkikʼtik batel (1 Tim. 2:4). Mi jech la jpastike, skʼan jchapbetik skʼoplal kʼusi chichʼ pasel li ta tsobajel ti toj tsots skʼoplale. Xuʼ xkakʼbetik yil li video ¿K’u yuʼun cham li Jesuse? xchiʼuk Jvules ta joltik li slajel Jesuse ti te ta jtatik li ta jw.org. Li moletik ta tsobobbaile skʼan me stakik ta ikʼel li buchʼutik chibajemik ta mantale. ¿Mi xnop xa noʼox avuʼun kʼu to yelan xmuyubajik ta vinajel xchiʼuk ta balumil kʼalal oy buchʼu tsut talel ta stojolal Jeova xchiʼuk li ta steklumale? (Luk. 15:​4-7). Li ta yorail Konmemorasione, mu me jaʼuk noʼox xkakʼ ta koʼontontik xchiʼinel ta loʼil li buchʼutik xkojtikintik xa onoʼoxe, jaʼ mas tsots skʼoplal ti jchiʼintik ta loʼil li buchʼutik jaʼ to chkʼotike o li buchʼutik jal xa muʼyuk bu xkʼotike. ¡Kakʼtik persa ti lekuk xaʼi sbaik kʼalal chkʼotike! (Rom. 12:13).

16. ¿Kʼu yuʼun skʼan mas to jcholtik mantal kʼalal jutuk xa ox skʼan li Konmemorasione?

¹⁶ ¿Mi xuʼ van mas to jcholtik mantal kʼalal skʼan toʼox junchib xemana li Konmemorasione? Kʼalal jech ta jpastike, jech chkakʼbetik ta ilel Jeova xchiʼuk Jesus ti ta jtojbetik ta vokol skotol li kʼusi spasoj ta jtojolaltike. Kʼalal mas ta jcholtik mantale, mas me chkiltik kʼu yelan tskoltautik li Jeovae xchiʼuk mas to tstsatsub ti kʼu yelan xkil jbatik xchiʼuke (1 Kor. 3:9). Jech xtok, mu me xchʼay xkaʼitik skʼelel Vivlia sventa Konmemorasion ti te chlokʼ li ta Programa xchiʼuk bu chijtsʼibaje xchiʼuk jkʼeltik me li tekstoetik ti te talem li ta foyeto Jkʼeltik skotol kʼakʼal li Skʼop Diose. Li loʼiletik ta Vivlia taje xuʼ me jtunestik sventa jsabetik mas skʼoplal.

17. ¿Kʼuxi xuʼ xmuyubaj kuʼuntik li Jeovae? (Kʼelo xtok li rekuadro « Ti kʼutik yelan xuʼ xatojbe ta vokol Jeova ti skʼanojote»).

¹⁷ Yikʼaluk van mu spas avuʼun skotol li kʼusi laj xa yichʼ chanel talel li ta xchanobil liʼe. Pe teuk me ta ajol ti muʼyuk tskoʼoltas Jeova li kʼusi spas avuʼun xchiʼuk li kʼusi spas yuʼun yantike. Li stuke xil li kʼusi oy ta avoʼontone xchiʼuk xmuyubaj avuʼun. Yuʼun snaʼoj ti chatoj tajek ta vokol li matanal laj yakʼbutik ti jaʼ li pojelale (1 Sam. 16:7; Mar. 12:​41-44).

18. ¿Kʼu yuʼun oy tajek ta koʼontontik ta jtojbetik ta vokol li Jeova xchiʼuk li Jesuse?

¹⁸ Ta skoj li pojelale, xuʼ jtatik perton, xijkʼot ta yamigo Jeova xchiʼuk ti xijkuxi ta sbatel osile. Jechuk-o xkakʼbetik ta ilel ti ta jtojbetik ta vokol Jeova li kʼanelal laj yakʼbutik ta ilele, ti jaʼ tijbat-o yoʼonton sventa xakʼbutik li bendisionetik taje (1 Juan 4:19). Jech xtok, kakʼtik ta ilel ti ta jtojtik ta vokol ti la skʼanutik tajek li Jesuse xchiʼuk ti laj yakʼ xkuxlejal ta jtojolaltike (Juan 15:13).