KʼALAL oy toʼox buchʼu chnupun ta voʼnee, li kereme chakʼbe takʼin li yutsʼ yalal tsebe. Xuʼ xakʼ kʼusitik toyol stojol, chonbolom o takʼin. Bakʼintik xtoke, xuʼ stojik ta abtel, jech kʼuchaʼal kʼot ta stojolal Jakob sventa xnupun xchiʼuk Rakele. La spas trato xchiʼuk smolniʼ ti vukub jabil ch˗abtej ta stojolale (Jen. 29:17, 18, 20). ¿Kʼu yuʼun ti jech toʼox tspasike?

Xi chal Carol Meyers ti xchanojbe lek skʼoplal Vivliae: «Li takʼin chakʼike jaʼ sventa stojbe yutsʼ yalal tseb ti muʼyuk xa te ch˗abtej li ta snaike. Mas to jech skʼan tojel mi ta tsʼunolajel ch˗abtej yutsʼ yalal li tsebe». Li stojol tseb xtoke jaʼ chtun sventa masuk lek xil sbaik li yutsʼ yalal kerem xchiʼuk tsebe. Vaʼun, kʼalal chil svokolike, xuʼ jmoj skolta sbaik. Jech xtok, li stojol tsebe jaʼ skʼelobil ti ta xa xnupune xchiʼuk ti jaʼ xa chchabiat yuʼun li smalale, maʼuk xa li stote.

Kʼalal chichʼ tojel li jun tsebe, maʼuk skʼan xal ti chichʼ chonel o manel kʼuchaʼal yan kʼusitike. Xi chal li livro Instituciones del Antiguo Testamento: «Kʼalal chichʼ akʼbel takʼin o yan kʼusitik chichʼ akʼbel li yutsʼ yalal tsebe, yileluke yakal tsman yajnil li jun j˗israel kereme. Pe mu jechuk [...], yuʼun jaʼ sventa xichʼ akʼbel smoton li yutsʼ yalal tsebe». *

Li ta junantik lumetik avie, nopem to xaʼiik ti chakʼbeik stojol li tsebe. Mi muʼyuk ep kʼusi tskʼanik li totil meʼiletik ti jaʼik ermanoetike, chakʼik ta ilel ti jaʼik krixchanoetik ti lek xtojobik snopele (1 Kor. 10:32, 33; Filip. 4:5). Jaʼ jech chakʼik ta ilel ti muʼyuk «batem ta yoʼontonik [takʼine]» (2 Tim. 3:2). Jech xtok, mi muʼyuk toj ep kʼusi tskʼanike, li kereme muʼyuk mas chakʼ jalijuk ti bakʼin chnupunik ta skoj ti tsaʼ takʼine. Mi jaʼ prekursor xtoke, mu persauk xikta li prekursoral sventa masuk jal x˗abtej yoʼ saʼ li takʼine.

Ta junantik lumetike, li ajvaliletike yalojik mantaletik ta sventa li takʼin chichʼ akʼel kʼalal chnupun jun tsebe. Li ta lumetik taje, li totil meʼiletik ti jaʼik ermanoetike tstsakik ta venta li mantaletik taje. Jech tspasik ta skoj ti yaloj Dios ti «skʼan xchʼunbeik smantal li buchʼutik oy yabtelik ti mas mukʼ skʼoplalike» xchiʼuk ti xchʼunik li mantaletik ti muʼyuk skontrainoj li kʼusi chale (Rom. 13:1; Ech. 5:29).