Laj yilik ti kʼanbilike
LI Yomara, Marcelo xchiʼuk Ivere jaʼ xchiʼil sbaik ta vokʼel ti maʼsatike, ti te nakalik ta jun bikʼit jteklum li ta yosilal Guatemalae. Li Yomarae lik yichʼ chanubtasel ta Vivlia yuʼun li stestigotak Jeovae, jech lik spasik li yan xchiʼiltak ta vokʼel eke. Pe oy kʼusi chmakatik-o, mu snaʼik skʼelel vun ta braile kʼop. Jaʼ yuʼun, li buchʼu ch-akʼbatik-o estudioe skʼan skʼel li parafoetike xchiʼuk li tekstoetike.
Mu kʼunuk laj yaʼiik xtok kʼalal chbatik li ta tsobajeletike, yuʼun li salon mas nopol xilike 40 minuto snamal xchiʼuk mu stakʼ xbat stukik. Jaʼ yuʼun, li ermanoetik ta tsobobbaile tsjel sbaik sventa xbat ikʼvanikuk talel. Kʼalal lik sta sparte yoxvoʼalik li ta tsobajeletik ta xokol kʼakʼale, chkoltaatik yuʼun li ermanoetik sventa skomtsan ta sjolik li kʼusi chalike.
Li ta mayo ta 2019, lik jelavuk tsobajeletik ti bu nakalike. Jaʼ to laj yaʼiike, te bat naklikuk jun nupultsʼakal ti chtunik ta prekursor regulare. Li nupultsʼakal taje laj yakʼ ta yoʼontonik xchanubtasel ta braile kʼop li Yomara, Marcelo xchiʼuk Ivere akʼo mi mu snaʼik kʼuxi ta pasel ek. Jaʼ yuʼun, batik ta jun vivlioteka sventa xbat sabeik slivroal braile kʼop yoʼ snaʼik kʼuxi xuʼ xchanubtasvanik.
Li Marceloe yakal chakʼ sloʼil ta jun tsobajel.
Ta oxib noʼox u, la xchanik braile kʼop yoxvoʼalik, taje koltaatik-o sventa mas xchʼiik ta mantal. a Avie, li Yomara, Marcelo xchiʼuk Ivere chtunik ta prekursor regular. Li Marceloe chtun ta siervo ministerial. Jujun xemana jaʼ mas yakʼoj ta yoʼontonik li kʼusitik sventa mantale. Ta skoj ti baxbolik tajek ta mantale, jech yakal chchan yuʼunik li yantik eke.
Li oxvoʼ ermanoetik taje tstojbeik tajek ta vokol li ermanoetik ta skoj li kʼusitik la spasike xchiʼuk ti akʼbatik iluk ti kʼanbilike. Xi chal li Yomarae: «Ti kʼuxi laj kojtikinkutik li ermanoetike jech-o yakʼojbunkutik ta ilel melel kʼanelal». Xi to chal li Marceloe: «Ep kamigotakutik li ta jtsobobbailkutike xchiʼuk te jkʼoplalkutik ta jun utsʼ alalil ta spʼejel balumil ti jmoj oyik ta skoj ti skʼanoj sbaik ta jujuntale». Li Yomara xchiʼuk li xchiʼiltak ta vokʼele oy ta tajek ta yoʼontonik ti xilik li balumil ti kʼatajem xa ox ta jun paraisoe (Sal. 37:10, 11; Is. 35:5).
a Li foyeto Aprenda a leer braille yichʼoj pasel sventa xchanik xchiʼuk stsʼibajik ta braile kʼop li maʼsatetike o li buchʼutik mu xilik lek osile.
Xuʼ van chakʼupin skʼelel xtok liʼe
CHKAKʼKUTIK TA OJTIKINEL
Video: «Mu xikuxi yuʼun ti muʼyukuke»
Chikintabo sloʼil xkuxlejal kʼuxi staojbe sbalil Vivlia ta braile kʼop jun maʼsat vinik.
Ti kʼu yelan chichʼ tunesel li matanal takʼine
Kʼox puntoetik ti chjel˗o yuʼun xkuxlejal krixchanoetike
Maʼuk noʼox ta jlokʼeskutik vunetik ta braile, yuʼun ta jchanubtaskutik ta skʼelel yantik xtok.
