1. ¿Kʼusi laj yal Jesus ta sventa ti bakʼin chlaj li kʼusitik chopole, xchiʼuk kʼusi tojobtasel laj yal?

 KʼALAL junchib xa ox kʼakʼal skʼan xcham li Jesuse, jakʼbat yuʼun chanvoʼ yajchankʼoptak kʼusi senyail «kʼalal poʼot xa xlaj skotol li kʼusitik oy ta balumile» (Mat. 24:3). Li jchankʼopetik taje yikʼaluk van la snopilanbeik skʼoplal kʼuxi chakʼik venta kʼalal poʼot xa xichʼ lajesel li Jerusalen xchiʼuk li temploe. Li Jesuse maʼuk noʼox laj yalbe skʼoplal taje, yuʼun laj yal xtok kʼusi senyail kʼalal poʼot xa xichʼ lajesel li kʼusitik oy ta balumil avie. Kʼalal laj yalbe skʼoplal ti bakʼin chlaj li kʼusitik chopole, xi laj yale: «Li skʼakʼalil o li yorail taje, muʼyuk buchʼu snaʼ, mi jaʼuk li anjeletik ta vinajele mi jaʼuk li Nichʼonile, jaʼ noʼox snaʼ li Totile». Xi to la stojobtasane: «Vikʼiluk-o me asatik» (Mar. 13:32-37).

2. ¿Kʼu yuʼun skʼan vikʼiluk-o satik li yajtsʼaklomtak Kristo ta baʼyel sigloe?

² Sventa kuxul xkomik li yajtsʼaklomtak Kristo ta baʼyel sigloe, skʼan vikʼiluk-o satik. Li Jesuse laj yalbe yajchankʼoptak kʼusi skʼan teuk ta sjolik sventa snaʼik mi poʼot xa xichʼ lajesel li Jerusalen xchiʼuk li temploe. Xi laj yale: «Kʼalal mi laj avilik ti joybil ta soltaroetik li Jerusalene, naʼik me ti poʼot xa xichʼ lajesele». Mi laj yilik kʼot ta pasel taje, albatik ti skʼan  xjatavik batel ta vitstike (Luk. 21:20, 21). Li buchʼutik la xchʼunik li kʼusi laj yal Jesuse kolik, yuʼun jatavik batel kʼalal mu to chichʼ lajesel yuʼun jromaetik li Jerusalene.

3. ¿Kʼusi ta jkʼeltik li ta xchanobil liʼe?

³ Li voʼotike kuxulutik xa ta slajebal kʼakʼal. Jaʼ yuʼun, skʼan ti oyuk-o me lek jchʼuleltik xchiʼuk ti vikʼiluk me lek jsatik jech kʼuchaʼal li yajchankʼoptak Kristo ta baʼyel sigloe. Li ta xchanobil liʼe ta jkʼeltik kʼuxi xuʼ ta smeloluk noʼox xkiltik li kʼusitik chkʼotanuk ta pasel ta spʼejel balumile. Jech xtok, chkalbetik skʼoplal kʼuxi xuʼ jkʼeltik li kʼusi ta jpastike xchiʼuk ti kʼuxi xuʼ lekuk jtunes jkʼakʼaltik yoʼ to mu xichʼ lajesel li choplejale.

4. ¿Kʼu yuʼun skʼan jkʼelbetik skʼoplal li kʼusitik chkʼot ta pasel ta balumile?

⁴ Oy lek srasonal kuʼuntik sventa teuk noʼox jsatik ti kʼu yelan chkʼot ta pasel li albil kʼopetik ta Vivliae. Jech kʼuchaʼal liʼe, li Jesuse laj yal kʼusitik chkʼot ta pasel ti jaʼ chakʼ kiltik ti poʼot xa xichʼ lajesel li xchopol balumil Satanase (Mat. 24:3-14). Li jtakbol Pedro eke laj yal ti skʼan oyuk ta koʼontontik skʼelbel skʼoplal ti kʼuxi chkʼot ta pasel li albil kʼopetik ta Vivlia sventa tsotsuk-o li xchʼunel koʼontontike (2 Ped. 1:19-21). Jech xtok, li slajeb livro ta Vivliae xi chale: «Jaʼ li kʼusi laj yakʼ ta naʼel Jesukristo ti akʼbat snaʼ yuʼun Dios sventa chakʼbe ta ilel smosotak li kʼusitik poʼot xa xkʼot ta pasele» (Apok. 1:1). Jaʼ yuʼun, stalel onoʼox ti oy ta koʼontontik skʼelbel skʼoplal li kʼusi chkʼot ta pasel ta balumile, yuʼun jaʼ te chkakʼtik venta ti yakal chkʼot ta pasel li albil kʼopetik ta Vivliae. Jech xtok, lek van chkaʼitik yalbel skʼoplal xchiʼuk li kermanotaktike.

5. ¿Kʼusi skʼan xkichʼ-o jpʼijiltik kʼalal chkalbetik skʼoplal li albil kʼopetik ta Vivliae, xchiʼuk kʼusi skʼan jpastik? (Kʼelo xtok li lokʼoletike).

⁵ Skʼan xkichʼ jpʼijiltik kʼalal chkalbetik skʼoplal ti kʼu yelan chkʼot ta pasel li albil kʼopetik ta Vivliae. ¿Kʼu yuʼun? Yuʼun mu jkʼantik ti xchʼak sba kuʼuntik li ermanoetik ta skoj ti chkaltik li kʼusi ta jnoptik noʼox jtuktike. Jech kʼuchaʼal liʼe, xuʼ van xkaʼitik li kʼusi yakal tsnop tspas li ajvaliletik ta spʼejel balumil sventa xchapanik jtosuk vokolile xchiʼuk ti oyuk jun oʼontonale. Mu me jnop jtuktik ti yakal xa chkʼot ta pasel li albil kʼop chal ta 1 Tesalonisenses 5:3, jaʼ lek ti jkʼelbetik skʼoplal li kʼusi yaloj talel jvuntike. Mi jaʼ noʼox chkaltik li kʼusi yaloj li s-organisasion Jeovae, chijkoltavan sventa koʼoluk kʼusi ta jnoptik xchiʼuk li kermanotaktike (1 Kor. 1:10; 4:6).

6. ¿Kʼusi chakʼ jchantik li 2 Pedro 3:11 kʼalal ta 13?

⁶ (Kʼelo 2 Pedro 3:11-13). Li jtakbol Pedroe tskoltautik yoʼ ta smeloluk noʼox jkʼelbetik skʼoplal li albil kʼopetik ta Vivliae. Tstij koʼontontik ti teuk ta joltik «li skʼakʼalil Jeovae». Pe maʼuk ta skoj ti ta jkʼan ta jnaʼtik «li skʼakʼalil xchiʼuk yorail» Armajedone, moʼoj, yuʼun oy ta koʼontontik ti xkakʼtik ta ilel ti chʼul jtalelaltik xchiʼuk ti kichʼojtik lek ta mukʼ Dios yoʼ to mu xtal slajebal li kʼusitik chopole (Mat. 24:36; Luk. 12:40). Jaʼ xkaltik, ta jkʼantik ti lekuk jtalelaltike xchiʼuk ti jkʼeltik ti skotoluk li kʼusi ta jpastike jaʼuk ta skoj ti jkʼanojtik li Jeovae. Sventa spas kuʼuntike, skʼan jkʼeltik li kʼusi ta jpastike.

7. ¿Kʼusi skʼan jpastik sventa jkʼel jba jtuktike? (Lukas 21:34).

⁷ Li Jesuse maʼuk noʼox laj yalbe yajchankʼoptak ti skʼelik li kʼusitik chkʼot ta pasel ta  spʼejel balumile, yuʼun laj yal xtok ti skʼan skʼelik li kʼusi tspasike. Taje jaʼ jech jamal xvinaj li ta pʼijubtasel laj yal ta Lukas 21:34 (kʼelo). Xi laj yal li Jesuse: «Kʼelo me aba atukik». ¿Kʼusi skʼan xal taje? Jaʼ ti xkichʼ jpʼijiltik ta sventa li kʼusi xuʼ snamajesutik ta stojolal Jeovae xchiʼuk ti mu jpastike. Vaʼun, skʼanojutik-o li Diose (Prov. 22:3; Jud. 20, 21).

8. Li Pabloe, ¿kʼusi laj yalbe li ermanoetike?

⁸ Li jtakbol Pabloe laj yalbe ermanoetik ti skʼan skʼelik li kʼusi tspasike. Jech kʼuchaʼal liʼe, xi laj yalbe li ermanoetik ta Efesoe: «Kʼelik me lek ti mu me bol krixchanouk ti kʼu yelan chapas abaike, jaʼ lek pʼij xapas abaik» (Efes. 5:15, 16). Li Satanase ep kʼusitik tstunes sventa slubtsanutik ta mantal. Jaʼ yuʼun, li Vivliae chalbutik ti jechuk-o xkakʼtik venta «li kʼusi tskʼan yoʼonton Jeovae» sventa xkuch kuʼuntik li prevaetike (Efes. 5:17).

9. ¿Kʼuxi xuʼ jnaʼtik li kʼusi tskʼan yoʼonton Jeovae?

⁹ Muʼyuk tsakal ta Vivlia skotol li kʼusi xuʼ snamajesutik ta stojolal Jeovae. Ep ta veltae oy kʼusi skʼan jnop jtuktik ti muʼyuk te jamal chalbe skʼoplale. Sventa lekuk xkʼot ta nopel kuʼuntike, skʼan jnaʼtik li kʼusi tskʼan yoʼonton Jeovae. ¿Kʼuxi tspas kuʼuntik taje? Jaʼo kʼalal ta jchantik li Vivliae xchiʼuk ti jnopbetik skʼoplale. Kʼalal mas to chkaʼibetik smelolal li kʼusi tskʼan yoʼonton Jeova xchiʼuk ti chkakʼtik persa sventa jechuk jnoptik kʼuchaʼal li Kristoe, mas me kʼun chkaʼitik ti xkakʼ ta ilel jpʼijiltik akʼo mi muʼyuk junuk mantal ti chal li kʼusi skʼan jpastike (1 Kor. 2:14-16). Bakʼintike, ta anil noʼox chkakʼtik venta li kʼusi mu stakʼ jpastike, pe bakʼintike mu ta aniluk chkakʼtik venta.

10. ¿Kʼusitik ti skʼan jkʼel-o jbatike?

¹⁰ Skʼan ti mu buchʼu jloʼlabetik sjole, ti mu xbatuk ta mas li yuchʼel pox o veʼele, ti mu xkaltik li kʼusi kʼuxik ta aʼiele, ti mu jchʼay-o koʼontontik li kʼusitik chalbe skʼoplal majbail, pornografia ti te skʼoplal videoetik, lokʼoletik, musikaetik xchiʼuk kʼusitik tsʼibabil ti tstij oʼontonal sventa mulivajele (Sal. 101:3). Li Diabloe jech-o tskʼel ti kʼu yelan xuʼ snamajesutik ta stojolal li Jeovae (1 Ped. 5:8). Mi muʼyuk la jkʼel jbatike, xuʼ stikʼ ta koʼontontik li itʼixale, li jut kʼope, li pichʼ oʼontone, li pʼajbaile, li toybaile xchiʼuk ti jnakʼ skʼakʼal koʼontontike (Gal. 5:19-21). Ta slikebale, xuʼ van ta jnoptik ti muʼyuk chopole. Pe mi muʼyuk la jlokʼes ta koʼontontik ta anile, xuʼ me sokesutik xchiʼuk xakʼ jvokoltik (Sant. 1:14, 15).

11. ¿Kʼusi ti skʼan mu jpastike, xchiʼuk kʼu yuʼun?

¹¹ Jnopbetik skʼoplal li kʼusi xuʼ xkʼot ta jtojolaltik ti mu ta aniluk chkakʼtik venta ti xuʼ sokesutike: li xchiʼinel li buchʼutik chopolike. Kaltik noʼox ti oy jun jchiʼiltik ta abtel ti maʼuk stestigo Jeovae. Ta skoj ti ta jkʼantik ti lekuk kʼusi snop ta stojolal li stestigoutik Jeovae, chkakʼ ta ilel slekil koʼontontik. Ta slikebale, xuʼ van ta jchiʼintik ta veʼel bakʼintik, pe ta tsʼakale chnop xkaʼitik. Li jchiʼiltik ta abtele oy chalbe skʼoplal li mulivajele, muʼyuk lek chkaʼitik li ta slikebale xchiʼuk te tsʼijil chijkom. Pe ta jelavele, muʼyuk xa chopol chkaʼitik ta skoj ti chnop xkaʼitike. Ta tsʼakale, chbat jchiʼintik kʼalal chikʼutik ta veʼel mi lijlokʼ ta kabteltike. Jaʼ to chkakʼtik ventae, jech xa chlik jnoptik kʼuchaʼal li jchiʼiltik ta abtele. Mu ta sjaliluke, jaʼ xa jech jtalelaltik ek. Melel onoʼox ti skʼan xkakʼ ta ilel slekil koʼontontik xchiʼuk ti xij-ichʼvan ta mukʼe. Pe teuk ta joltik ti tsjel jtalelaltik li buchʼutik ta jchiʼintike (1 Kor. 15:33). Mi ta jkʼel jbatik jech kʼuchaʼal laj yal Jesuse, muʼyuk me mas ta jchiʼintik li buchʼutik muʼyuk chtunik ta stojolal Jeovae (2 Kor. 6:15). Yuʼun muʼyuk ta jpastik li kʼusi xuʼ xakʼ jvokoltike.

12. ¿Kʼusi skʼan spasik li yajchankʼoptak Jesus yoʼ to mu xtal li slajeb kʼusitik chopole?

¹² Li yajchankʼoptak Jesuse, ¿mi te noʼox smeyoj skʼob tsmalaik ti xtal li slajeb kʼusitik chopole? Muʼyuk, yuʼun albatik yuʼun Jesus ti xcholik mantal «ta Jerusalen, ta sjunul Judea, ta Samaria xchiʼuk kʼalal to ta namal balumil» (Ech. 1:6-8). Epal abtel yichʼoj li kʼusi akʼbat sbainike. Pe mi laj yakʼ ta yoʼontonik spasele, lek me tstunes li skʼakʼalilike.

13. ¿Kʼu yuʼun skʼan jtunes lek li jkʼakʼaltike? (Kolosenses 4:5).

¹³ (Kʼelo Kolosenses 4:5). Sventa jkʼeltik li kʼusi ta jpastike, skʼan jnopbetik skʼoplal ti kʼu yelan ta jtunes li jkʼakʼaltike. Li Eklesiastes 9:11 chal ti jkotoltik oy kʼusi xuʼ jnuptantik «ti muʼyuk malabile». Xuʼ van ta anil noʼox xijcham.

14, 15. ¿Kʼuxi xuʼ jtunes lek li jkʼakʼaltike? (Ebreos 6:11, 12; kʼelo xtok li lokʼole).

¹⁴ Ti kʼu yelan lek ta jtunes li jkʼakʼaltike jaʼo kʼalal ta jpastik li kʼusi oy ta yoʼonton Jeovae xchiʼuk ti masuk lek xkil jbatik xchiʼuke (Juan 14:21). Jchʼuntik li kʼusi chal li teksto liʼe: «Junuk-o me avavilik, te me oyanik-o, oyuk-o me ep kʼusi chapasik ta sventa li yabtel Kajvaltike» (1 Kor. 15:58). Vaʼun, mi tal li slajeb kʼusitik chopole o mi lijchame,  jun noʼox koʼontontik, yuʼun lijtun ta stojolal Jeova ti bu kʼalal xuʼ kuʼuntike (Mat. 24:13; Rom. 14:8).

¹⁵ Li Jesuse jech-o yakal tsbeiltas ta cholmantal li yajchankʼoptak jech kʼuchaʼal laj onoʼox yale. Tstunes li s-organisasion Jeova sventa xchanubtasutik ta xcholel mantal xchiʼuk chakʼbutik li kʼusi chtun kuʼuntik sventa jpas li kabteltike (Mat. 28:18-20). Li kʼusi xa noʼox oy ta jbatik spasele jaʼ ti ta sjunuluk koʼontontik jcholtik mantal, xijchanubtasvan xchiʼuk ti vikʼiluk-o jsatik yoʼ to mu xtal li slajeb kʼusitik chopole. Oy-o me spatobil koʼontontik «kʼalal to ta slajeb» mi ta jchʼuntik li kʼusi chal ta Ebreos 6:11 xchiʼuk 12 (k’elo).

16. ¿Kʼusi jpʼel ta koʼontontik spasel?

¹⁶ Li Jeovae yakʼojbe xa yorail ti bakʼin tslajes li sbalumil Satanase. Mi kʼot ta pasel taje, li Jeovae chakʼ kʼotuk ta pasel skotol li albil kʼopetik ta Vivliae. Akʼo mi mu noʼox xtal yaʼeluk li slajeb kʼusitik chopole, teuk ta joltik ti «ta yorail noʼox chvul» li skʼakʼalil Jeovae (Abak. 2:3). Jaʼ yuʼun, jpʼel ta koʼontontik ta jchʼuntik li kʼusi chal ta Mikeas 7:7: «Lek vikʼil jsat ta stojolal li Jeovae. Chkakʼ ta ilel smalael kuʼun ta stojolal li Dios ti jaʼ jkoltavanej kuʼune».