1. Albo junuk skʼelobil ti kʼu yuʼun jaʼ mas lek ti kʼu yelan tsbeiltasutik li Jeovae.

 JNOPTIK noʼox ti chʼayemot ta teʼtike. Ti noj ta chonbolometik ti xibalik sbae, ta tsʼiʼleletik xchiʼuk ta jeltos bikʼtal chonetik. Jech xtok, xuʼ xamak avok o ti xapʼaj yalel ta chʼentikaltike. ¿Mi mu jechuk ti xamuyubaj ti oy buchʼu sbeiltasot batel ti xojtikin lek li bee? Jaʼ jech li balumil avi eke. Noj ta kʼusitik xibalik sba ti xuʼ slubtsanutik ta mantale, pe oy buchʼu xuʼ lek sbeiltasutik: jaʼ li Jeovae. Jaʼ tsbeiltasutik batel sventa mu kʼusi chopol jnuptantik xchiʼuk jaʼ tsbeiltasutik batel li ta achʼ balumil ti bu xuʼ xijkuxi ta sbatel osile.

2. ¿Kʼuxi tsbeiltasutik li Jeovae?

² Li kʼusi mas tstunes Jeova sventa sbeiltasutike, jaʼ li Skʼope. Pe tstunes viniketik xtok ti kʼotemik kʼuchaʼal yajkʼopojeltake. Jech kʼuchaʼal «li tukʼil xchiʼuk pʼijil mosoil» ti chakʼbutik jveʼeltik ta mantal sventa lekuk kʼusi xkʼot ta nopel kuʼuntike (Mat. 24:45). Pe tstunes yan viniketik xtok sventa sbeiltasutike. Li jkʼelvanejetik ta sirkuito xchiʼuk li moletik ta tsobobbaile tspat koʼontontik xchiʼuk tstojobtasutik kʼalal oy kʼusitik ta jnuptantike. Ta jtojbetik tajek ta vokol Jeova ti jech tsbeiltasutik avi li ta slajebaltik xa kʼakʼal kuxulutike, yuʼun jaʼ jech xuʼ xkamigoin jbatik-o xchiʼuk Jeova xchiʼuk ti te oyutik-o li ta sbelel kuxlejale.

3. ¿Kʼusitik ta jchanbetik batel skʼoplal li ta xchanobil liʼe?

³ Bateltike, vokol chkaʼitik xchʼunel ti kʼu yelan tsbeiltasutik li Jeovae, mas to kʼalal jaʼ chalbutik viniketik ti jpasmuliletike. ¿Kʼu yuʼun? Yuʼun xuʼ van jaʼ chalbutik li kʼusi mu lekuk chkaʼitike o ta jnoptik ti mu toj lekuk ti kʼu yelan tstojobtasutike.  Vaʼun, ta jnoptik ti maʼuk te likem talel ta stojolal Jeovae. Mi jech la jnuptantike, jaʼo me skʼan mas jpat koʼontontik ti jaʼ jech yakal tsbeiltas steklumal li Jeovae xchiʼuk ti jaʼ mas lek ti jchʼuntike. Sventa spas kuʼuntik taje, jkʼeltik batel: 1) kʼu yelan la sbeiltas steklumal li ta voʼnee, 2) kʼuxi yakal tsbeiltasutik avie xchiʼuk 3) kʼusi sbalil ta jtabetik kʼalal chkakʼtik sbeiltasutike.

TI KʼU YELAN LA SBEILTAS LI JTEKLUM ISRAELE

4, 5. ¿Kʼuxi laj yakʼ ta ilel Jeova ti jaʼ yakal tstunes Moises sventa sbeiltas li jteklum Israele? (Kʼelo li lokʼol ta pajina 1).

⁴ Li Jeovae la stʼuj Moises sventa slokʼes ta jteklum Ejipto li j-israeletike xchiʼuk jamal laj yakʼ ta ilel ti jaʼ yakal tstunese. Jtos ti kʼusi la stunes sventa xakʼ ta ilele, jaʼ li jvol tok ta kʼakʼaltike xchiʼuk li jvol kʼokʼ ta akʼobaltike (Eks. 13:21). Li Moisese la stsʼakli batel, vaʼun te kʼotik li ta Tsajal nabe. Kʼalal te xa ox oyik ta tiʼ nab li j-israeletike xchiʼuk ti joyobtabilik yuʼun li soltaroetik ta Ejiptoe, xiʼik tajek. La snopik ti muʼyuk lek xbeiltasvan batel li Moisese. Pe taje mu jechuk, yuʼun jaʼ Jeova la sbeiltas batel stuk Moises sventa te xbatike (Eks. 14:2). Ta tsʼakale, toj labal sba ti kʼu yelan la skoltae (Eks. 14:​26-28).

⁵ Li Moisese 40 jabil la stsʼakli batel li jvol tok sventa sbeiltas ta takixokol balumil li steklumal Diose. a Bateltike, li Jeovae te chakʼ ta sba skarpana Moises li jvol tok sventa xil skotolike (Eks. 33:​7, 9, 10). Vaʼun, li Jeovae te to chchiʼin tal ta loʼil li Moisese. Laje, jaʼ xa chalbe jteklum li kʼusi skʼan spasike (Sal. 99:7). Jaʼ yuʼun, li j-israeletike laj yakʼik venta ti jaʼ yakal tstunesat yuʼun Jeova li Moises sventa xbeiltasatike.

6. ¿Kʼu yelan laj yil j-israeletik ti kʼu yelan beiltasatik yuʼun Jeovae? (Numeros 14:​2, 10, 11).

⁶ Jutuk mu skotol li j-israeletike muʼyuk la stsakik ta venta li sprevailtak laj yakʼ Jeova ti jaʼ yakal tstunes Moises sventa xbeiltasatike (kʼelo Numeros 14:​2, 10, 11). Ta skoj ti ep ta velta muʼyuk la stsakik ta venta li yabtel yichʼoj Moisese, muʼyuk x-akʼe ochikuk li ta Albil Balumile (Num. 14:30).

7. ¿Buchʼutik ti laj yakʼ sbaik ta beiltasel yuʼun li Jeovae? (Numeros 14:24; kʼelo xtok li lokʼole).

⁷ Pe oy junantik j-israeletik ti la xchʼunik li beiltasel laj yakʼ Jeovae. Jech oxal xi laj yale: «Li kajtunel Kalebe [ . . . ] ta sjunul yoʼonton la stsʼakliun [batel]» (kʼelo Numeros 14:24). Li Jeovae laj yakʼbe bendision xchiʼuk laj yakʼbe stʼuj ti bu tskʼan chnaki li ta Kanaane (Jos. 14:​12-14). Jech kʼuchaʼal li Kalebe, li yan j-israeletik ti jaʼik tsʼakal jchʼieletike laj yakʼ sbaik ta beiltasel yuʼun Jeova, yuʼun «lek laj yichʼik ta mukʼ Josue ti kʼu sjalil [kuxule]» ti jaʼ kom ta xkʼexol Moises sventa sbeiltas li jteklume (Jos. 4:14). Jaʼ yuʼun, li Jeovae laj yakʼanbe bendision xchiʼuk laj yakʼ ti x-ochik li ta Albil Balumile (Jos. 21:​43, 44).

8. ¿Kʼu yelan la sbeiltas steklumal Jeova li ta skʼakʼalil ajvaliletike? (Kʼelo xtok li lokʼole).

⁸ Kʼalal echʼ jayibuk jabile, li Jeovae la svaʼan jchapanvanejetik sventa sbeiltas li jteklume. Ta mas tsʼakale, li ta skʼakʼalil ajvaliletike la stʼuj j-alkʼopetik sventa xbeiltasvanik. Li ajvaliletik ti tukʼ laj yakʼ sbaik ta stojolal Diose la xchʼamik li tojobtasel laj yal j-alkʼopetike. Jech kʼuchaʼal li Davide bikʼit laj yakʼ sba kʼalal tukʼibtasat yuʼun li j-alkʼop Natane (2 Sam. 12:​7, 13; 1 Kron. 17:​3, 4). Li ajvalil Jeosafate la xchʼun li kʼusi albat yuʼun li j-alkʼop Jaasiele xchiʼuk la stijbe yoʼonton jnaklejetik ta Juda sventa spat yoʼontonik ta stojolal li yaj-alkʼoptak Diose (2 Kron. 20:​14, 15, 20). Li ajvalil Esekiase la skʼanbe vokol j-alkʼop Isaias  kʼalal jaʼo chil svokolike (Is. 37:​1-6). Kʼalal tskʼanbeik koltael Jeova li ajvaliletike, ch-akʼbatik bendision xchiʼuk chchabibat li steklumalike (2 Kron. 20:​29, 30; 32:22). Jamal vinaj ti jaʼ la stunes j-alkʼopetik sventa sbeiltas steklumal li Jeovae. Akʼo mi jech, jutuk mu skotol li ajvaliletik xchiʼuk li j-israeletike muʼyuk la stsakik ta venta (Jer. 35:​12-15).

TI KʼUXI LA SBEILTAS JEOVA LI BAʼYEL YAJTS’AKLOMTAK KRISTOE

9. ¿Buchʼu la stunes Jeova sventa sbeiltas li jchʼunolajeletik ta baʼyel sigloe? (Kʼelo xtok li lokʼole).

⁹ Li ta baʼyel sigloe, li Jeovae la svaʼan li tsobobbail yuʼun yajtsʼaklomtak Kristoe. ¿Buchʼu la stʼuj sventa sbeiltas li steklumal vaʼ orae? Jaʼ la stʼuj Jesus sventa xkʼot ta jolil li ta tsobobbaile (Efes. 5:23). Pe taje maʼuk skʼan xal ti ta jujuntal xa chchiʼin ta loʼil jchʼunolajeletik Jesus sventa xalbe li kʼusi skʼan spasike, yuʼun jaʼ la stunes jtakboletik xchiʼuk moletik ta Jerusalen sventa sbeiltasik li abtelale (Ech. 15:​1, 2). Jech xtok, li ta jujun tsobobbaile la svaʼan moletik sventa sbeiltasik li ermanoetike (1 Tes. 5:12; Tito 1:5).

10. 1) ¿Kʼu yelan laj yilik jutuk mu skotoluk li yajtsʼaklomtak Kristo ta baʼyel siglo ti kʼu yelan beiltasatike? (Echos 15:​30, 31). 2) ¿Kʼu yuʼun oy junantik muʼyuk la stsakik ta venta li buchʼutik svaʼanoj Jeova ta voʼnee? (Kʼelo li rekuadro « ¿Kʼu yuʼun oy junantik ti muʼyuk la stsakik ta venta li kʼusi laj yil ta sat stukike?»).

¹⁰ Jutuk mu skotoluk li yajtsʼaklomtak Kristo ta baʼyel sigloe ta sjunul yoʼonton la xchʼamik li beiltasel akʼbatike. Yuʼun «xkuxet likel yoʼontonik ta skoj ti patbat yoʼontonike» (kʼelo Echos 15:​30, 31). Avie, ¿kʼu xa yelan tsbeiltas steklumal li Jeovae?

TI KʼU YELAN TSBEILTASUTIK JEOVA AVIE

11. Albo junuk skʼelobil ti chakʼ ta ilel ti jech-o tsbeiltas tal Jeova li buchʼutik svaʼanoje.

¹¹ Li avie, li Jeovae jech-o tsbeiltas li steklumale, yuʼun jech-o tstunes Skʼop xchiʼuk Xnichʼon ti jaʼ jolil ta tsobobbaile. ¿Mi oy sprevailtak kuʼuntik ti jech-o yakal tstunes viniketik sventa sbeiltasutik li Jeovae? Oy. Kalbetik skʼoplal li kʼusi kʼot ta pasel li ta slajebaltik sjabilal 1800. Li Charles Russell xchiʼuk li xchiʼiltak ta abtele laj yaʼibeik smelolal ti toj tsots skʼoplal li sjabilal 1914 ta sventa li Ajvalilal yuʼun Diose (Dan. 4:​25, 26). ¿Kʼuxi laj yaʼibeik  smelolal taje? Jaʼ ti la xchanbeik skʼoplal li albil kʼopetik chal ta Vivliae. Ta melel, li Jeovae la skoltaan sventa xaʼibeik smelolal. Li kʼusi kʼot ta pasel ta 1914 jamal laj yakʼ ta ilel ti lik ventainvanuk li Ajvalilal yuʼun Diose, yuʼun jaʼo te lik li Baʼyel Mukʼta Paskʼop ta spʼejel Balumile, tsatsal chamel ta buyuk noʼox, tsatsal nikeletik xchiʼuk viʼnal (Luk. 21:​10, 11). Jamal vinaj ti Jeovae jech-o la stunes viniketik ti oy ta yoʼontonik mantal sventa sbeiltasik li steklumale.

12, 13. ¿Kʼusi laj yichʼ pasel li ta Xchibal Mukʼta Paskʼop ta spʼejel Balumil sventa masuk to xichʼ cholel mantal xchiʼuk xichʼ akʼel li chanubtasele?

¹² Kalbetik skʼoplal li kʼusi kʼot ta pasel kʼalal jaʼo li Xchibal Mukʼta Paskʼop ta spʼejel Balumile. Li ermanoetik ti sbainojik li smeʼ nail abtelale la xchanbeik skʼoplal li kʼusi chal Apokalipsis 17:8. Vaʼun, laj yaʼibeik smelolal ti muʼyuk to chtal Armajedon kʼalal mi echʼ xa ox li Xchibal Mukʼta Paskʼop ta spʼejel Balumile, yuʼun laj yakʼik venta ti oy jun oʼontonal kʼuk sjalil sventa xcholbeik mantal li krixchanoetike. Jaʼ yuʼun, li s-organisasion Jeovae oy kʼusi kʼot ta nopel yuʼun ti mu toj lekuk yilele. La slikesik li chanob vun Colegio Superior Bíblico de la Watchtower de Galaad b sventa xchanubtasik misioneroetik yoʼ xbat xcholik mantal xchiʼuk xchanubtasik krixchanoetik ta spʼejel balumil. Kʼalal jaʼo li paskʼop xtoke, la stakik bal ermanoetik ta jeltos lumetik. Jech xtok, li tukʼil mosoile la slikes li chanob vun Curso en el Ministerio Teocrático c sventa skolta skotol li jcholmantaletik yoʼ xtojobik ta chanubtasvaneje. Li chanob vunetik taje jaʼ sventa skoltaik li yajtuneltak Jeova yoʼ spas yuʼunik li abtelale.

¹³ Akʼo mi laj yil svokol li yajtuneltak Jeova ta voʼnee, pe jamal vinaj ti jaʼ beiltasvan li Jeovae. Li yajtuneltak Jeovae xuʼ xa ox jun yoʼonton xcholik mantal ta epal lumetik k’alal tsuts xa ox li Xchibal Mukʼta Paskʼop ta spʼejel Balumile. Jaʼ yuʼun, epal krixchanoetik laj yojtikinik Jeova, avie chichʼ xa cholel mantal ta spʼejel balumil.

14. ¿Kʼu yuʼun xuʼ jpat koʼontontik ti kʼu yelan tsbeiltasutik li s-organisasion Jeova xchiʼuk li moletik ta tsobobbaile? (Apokalipsis 2:1; kʼelo xtok li lokʼole).

¹⁴ Li Jtsop Jbeiltasvanej avie jech-o chakʼ sbaik ta beiltasel yuʼun li Kristoe. Jech xtok, k’alal tsbeiltasik li ermanoetike, chakʼik persa ti jaʼuk jech spasik kʼuchaʼal lek chil Jeova xchiʼuk Jesuse. Jaʼ yuʼun, tstunesik li jkʼelvanejetik ta sirkuito xchiʼuk li moletik ta tsobobbail sventa xalbeik tsobobbailetik li kʼusi chkʼot ta nopel yuʼunike. d Li moletik ta tsobobbail ti tʼujbil chbatik ta vinajel xchiʼuk li yan moletike te oyik ta sbatsʼikʼob li Kristoe (kʼelo Apokalipsis 2:1). Oy onoʼox bu chʼayik li moletik taje, yuʼun jaʼik jpasmuliletik jech kʼuchaʼal kʼot ta stojolal Moises, Josue xchiʼuk li jtakboletike (Num. 20:12; Jos. 9:​14, 15; Rom. 3:23). Manchuk mi jech, jnaʼojtik lek ti jaʼ tsbeiltasatik yuʼun Jesus li tukʼil mosoil xchiʼuk li moletike xchiʼuk ti jaʼ jech tspas-o «skotol kʼakʼal jaʼ to mi poʼot xa ox xlaj skotol li kʼusitik oy ta balumile» (Mat. 28:20). Jaʼ yuʼun, oy lek srasonal kuʼuntik yoʼ jpat koʼontontik ta stojolal li ermanoetik taje.

OY SBALIL MI CHKAKʼ-O JBATIK TA BEILTASELE

15, 16. ¿Kʼusi chakʼ achan ta stojolal li buchʼutik yakʼoj sbaik ta beiltasel yuʼun Jeovae?

¹⁵ Ta me jtabetik sbalil mi jech-o chkakʼ jbatik ta beiltasel yuʼun Jeovae. Taje jaʼ jech la spasik li Andy xchiʼuk li yajnil ti Robin sbie, yuʼun la sjutukajes li kʼusitik x-ayan yuʼunik sventa lekuk noʼox sba li xkuxlejalike (Mat. 6:22). Ta skoj taje, mas xa xuʼ yuʼun xkoltavanik li ta svaʼanel salonetik xchiʼuk yan naetik sventa yichʼobil ta mukʼ Jeovae. Xi chal li Robine: «Bateltike toj bikʼit ti bu linakikutike xchiʼuk ep ta velta chʼabal bu xuʼ jpas jveʼelkutik. Jech xtok, ta jkʼupin li lokʼtavaneje, pe la jchon jutuk mu skotol li jkamaratake xchiʼuk li yan kabtejebtake. Akʼo mi xi-okʼ xa kʼalal la jchone, pe jpʼel ta koʼonton ta jchanbe stalelal Sara, li yajnil Abraane, yuʼun muʼyuk la jchaʼnaʼ li kʼusitik la jpase» (Ebr. 11:15). ¿Mi xmuyubajik ti jech kʼot ta nopel yuʼunike? Xi to chal li Robine: «Ximuyubajkutik tajek, yuʼun jnaʼojkutik ti yakal chitunkutik ta stojolal Jeova ti bu kʼalal xuʼ kuʼunkutike. Kʼalal oy kʼusi chakʼ jbainkutik spasel li Jeovae, xkoʼolaj xa yaʼel ti ta jpaskutik preva ti kʼu yelan li kuxlejal ta achʼ balumile». ¿Kʼu yelan chaʼi sba li Andy eke? Xi chale: «Ximuyubaj tajek ti ta jtunes kipal ta spasel li yabtel Jeovae».

¹⁶ ¿Kʼusi to yan sbalil ta jtabetik mi chkakʼ jbatik ta beiltasel yuʼun Jeovae? Kalbetik skʼoplal li ermana Marciae. Kʼalal tsuts li xchanune,  la snop ti chlik tunuk ta prekursorae (Mat. 6:33; Rom. 12:11). Xi chale: «Jun universidad laj yalbun ti chakʼbun jveka chanib jabile, pe li voʼone oy kʼusi ta jkʼan ta jta ta mantal. Jaʼ yuʼun, la jnop chi-och ta jun eskuela ti bu xuʼ jchan jtosuk abtelal yoʼ jpas kanal takʼin xchiʼuk ti xitun ta prekursorae. Lek tajek ti jech kʼot ta nopel kuʼune. Avie chitun ta prekursora regular. Ta skoj li kabtele, xuʼ xikoltavan jayibuk kʼakʼal ta Betel xchiʼuk oy kʼusitik yan ta jpas ta stojolal Jeova ti ta jkʼupin tajeke».

17. ¿Kʼusi yan sbalil ta jtabetik mi jech-o chkakʼ jbatik ta beiltasel yuʼun Jeovae? (Isaias 48:​17, 18).

¹⁷ Bateltike, li s-organisasion Jeovae tstojobtasutik sventa mu jaʼuk xbat ta koʼontontik li saʼel kʼulejale xchiʼuk mu jpastik li kʼusi mu jechuk chal ta smantal Diose. Mi jech kʼot ta jtojolaltike, jtunel me tajek ti xkakʼ jbatik ta beiltasel yuʼun Jeovae, yuʼun jaʼ jech jun noʼox koʼontontik xchiʼuk muʼyuk chkil jvokoltik ta jech noʼox (1 Tim. 6:​9, 10). Jech xtok, jaʼ me tskoltautik sventa xkakʼ ta koʼontontik spasbel yabtel li Jeovae. Mi jech la jpastike, xijmuyubaj noʼox me xchiʼuk jun noʼox koʼontontik (kʼelo Isaias 48:​17, 18).

18. ¿Kʼu yuʼun oy ta avoʼonton ti jechuk-o sbeiltasot li Jeovae?

¹⁸ Li Jeovae jech-o me tstunes krixchanoetik sventa sbeiltas steklumal kʼalal jaʼo li mukʼta tsatsal vokolile xchiʼuk mi ajvalilaj ta Jmil Jabil li Kristoe (Sal. 45:16). Li vaʼ kʼakʼale, ¿mi jech-o chkakʼ jbatik ta beiltasel manchuk mi mu lekuk chkaʼitik? Mi jech-o ta jchʼuntik mantal avie, mu me toj tsotsuk chkaʼitik li ta jelavele. Jaʼ yuʼun, jechuk-o me xkakʼ jbatik ta beiltasel yuʼun li Jeovae. Taje te me smakoj ti jchʼunbetik smantal li viniketik ti jaʼ svaʼanoj sventa xchabiutike (Is. 32:​1, 2; Ebr. 13:17). Oy ep srasonal kuʼuntik ti jaʼ noʼox xuʼ lek sbeiltasutik li Jeovae, yuʼun jaʼ tskoltautik sventa mu xijlubtsaj ta mantal xchiʼuk ti xijkuxi ta sbatel osil li ta achʼ balumile.