1, 2. Sventa xkaʼibetik smelolal kʼu yelan chaʼi sba Jeova ti chjutbat smule, ¿kʼusi xuʼ jkoʼoltastik-o?

 JNOPTIK noʼox ti oy jun avamigo ti oy kʼusi chopol chal ta atojolale. Li voʼote anaʼoj ti maʼuk melel li kʼusi chale, pe li yantike ta xchʼunik xchiʼuk junantike tspukik batel li jecheʼ loʼil taje. ¿Kʼu van yelan chavaʼi aba? ¿Mi mu jechuk ti chopol chavaʼi aba ti tsokesik akʼoplale? (Prov. 22:1).

² Taje jaʼ jech laj yaʼi sba Jeova kʼalal jutbat smul yuʼun jun xnichʼone xchiʼuk ti sokesbat skʼoplale. Li Evae la xchʼun li jutbil kʼope. Ta skoj taje, li baʼyel jtot jmeʼtike la stoy sbaik ta stojolal Jeova. Jech oxal, jkotoltik jpasmulilutik xchiʼuk chijchamutik (Jen. 3:​1-6; Rom. 5:12). Li jutbil kʼop laj yal Satanas ta nichimaltik Edene, sok-o yuʼun li balumile. Jaʼ yuʼun, chijcham, oy paskʼopetik xchiʼuk oy ep vokolil. Li Jeovae chopol tajek chaʼi sba ta skoj li jutbil kʼopetik taje xchiʼuk ti kʼusi kʼotem ta pasel ta skoje. Pe maʼuk ti xkapet xa noʼox sjole. Moʼoj, yuʼun li Vivliae chal ti xmuyubaj noʼox li Diose (1 Tim. 1:11).

3. ¿Kʼusi mukʼta matanal jtaojtik?

³ Li voʼotike jtaojtik jun mukʼta matanal: jaʼ ti xuʼ jchʼultajesbetik skʼoplal xchiʼuk jpakbetik skʼoplal li sbi Jeovae. ¿Kʼuxi ta pasel taje? Jaʼ mi la jchʼuntik li mantal liʼe: «Kʼupil kʼoptabeik li sbi Jeovae» (Sal. 113:1). ¿Kʼuxi ta jkʼupil kʼoptatik? Jaʼo kʼalal lek chkalbetik batel skʼoplal li xchʼul bie. ¿Mi oy ta avoʼonton spasel taje? Jkʼelbetik batel oxib srasonal ti jaʼ tskoltautik sventa ta sjunuluk koʼontontik jkʼupil kʼoptabetik li sbi Diose.

 XMUYUBAJ KU’UNTIK LI JEOVAE

4. Albo junuk skʼelobil kʼu yuʼun chkaltik ti xmuyubaj Jeova kʼalal ta jkʼupil kʼoptatike (kʼelo xtok li lokʼole).

⁴ Li Jeovae jaʼ li Jtotik ta vinajele xchiʼuk lek chaʼi ti jkʼupil kʼoptabetik li sbie (Sal. 119:108). ¿Mi jaʼ skʼan xal ti xkoʼolaj kʼuchaʼal li krixchanoetik ti jaʼ noʼox tskʼanik kʼupil kʼoptael sventa junuk yoʼonton xaʼi sbaike? Moʼoj. Sventa xkaʼibetik smelolale, jnopbetik skʼoplal jun kʼox tseb ti chnopaj batel ta stojolal stote, ti tsmeye xchiʼuk ti xi chalbee: «¡Atuk noʼox jech, kuni tot!». Li totile xmuyubaj ti jech tspas li yuni tsebe. ¿Kʼu yuʼun? ¿Mi yuʼun jaʼ to jech jun yoʼonton xchiʼuk mi jaʼ to jech oy sbalil chaʼi sba ti jech tspas li stsebe? Moʼoj, yuʼun xmuyubaj ta skoj ti kʼanbil yuʼun stsebe xchiʼuk ti chtojbat ta vokol li kʼusi tspase. Jech xtok, snaʼoj ti talelaletik taje jaʼ chkoltaat-o sventa xmuyubaj kʼalal mi chʼie. Jaʼ jech li Jeova eke, xmuyubaj kʼalal ta jkʼupil kʼoptatike, ti jaʼ noʼox stuk lekil totile.

5. ¿Kʼusi chkakʼtik ta ilel kʼalal ta jkʼupil kʼoptatik li Jeovae?

⁵ Li Satanase oy kʼusi mu meleluk yaloj ta jtojolaltik. Laj yal ti mi junuk krixchano tukʼ chakʼ sba xchiʼuk ti muʼyuk tspakbe skʼoplal sbi Dios kʼalal tsnuptan junuk prevae. Jech xtok, laj yal ti chkiktatik Jeova sventa mu xkil jvokoltike (Job 1:​9-11; 2:4). Pe li Jobe laj yakʼ ta ilel ti jaʼ jutkʼop li Satanase. ¿Li voʼotik une? Kʼalal ta jkʼupil kʼoptatik li Jeovae, jaʼ jech chkakʼtik ta ilel ti muʼyuk srasonal li kʼusi laj yal Satanase. Jaʼ jun mukʼta matanal chkaʼitik ti xuʼ jpakbetik skʼoplal li sbi Jeovae xchiʼuk ti tukʼ xkakʼ jbatike, yuʼun jaʼ jech xmuyubaj-o kuʼuntik (Prov. 27:11).

6. ¿Kʼusi xuʼ jchanbetik li ajvalil David xchiʼuk li jlevietike? (Neemias 9:5).

⁶ Li buchʼutik skʼanojik li Diose chtijbat yoʼontonik ta skʼupil kʼoptabel sbi. Li ajvalil Davide xi la stsʼibae: «Akʼo jkʼupil kʼopta li Jeovae; akʼo jkʼupil kʼoptabe xchʼul bi ta sjunul koʼonton» (Sal. 103:1). Li Davide snaʼoj ti kʼalal tskʼupil kʼoptabe li sbie xkoʼolaj ti yakal tskʼupil kʼopta li Jeovae. Kʼalal chalbe batel skʼoplal li sbie, xkoʼolaj ti chalbe batel li skʼupil talelaltake xchiʼuk li kʼusitik labalik sba spasoje. Li Davide tskʼan ti chʼuluk xichʼ ilel li sbi Jeovae xchiʼuk ti skʼupil kʼoptaike. Laj yal ti tskʼan tskʼupil kʼopta Jeova ta sjunul yoʼontone. Li jlevietik eke lokʼ ta yoʼontonik tskʼupil kʼoptaik li Jeovae. Pe bikʼit laj yakʼ sbaik, yuʼun laj yakʼik  venta ti mas toj echʼ noʼox mukʼ sbi li Diose ti jaʼ mu sta li kʼupil kʼoptael chakʼike (kʼelo Neemias 9:5). ¡Xmuyubaj van tajek Jeova ti jech chichʼ ichʼel ta mukʼe!

7. ¿Kʼuxi xuʼ jkʼupil kʼoptatik Jeova li ta cholmantale xchiʼuk li ta kʼusitik ta jpastik jujun kʼakʼale?

⁷ Li ta jkʼopojeltike xuʼ xkakʼtik ta ilel ti jkʼanojtik li Jeovae xchiʼuk ti ta jkʼan ta jtojbetik ta vokol li kʼusitik spasoje. Li kʼusi oy ta koʼontontik kʼalal ta jcholtik mantale jaʼ ti xnopajik ta stojolal Jeova li krixchanoetike xchiʼuk ti xlik skʼanike (Sant. 4:8). Ta jkʼupintik yakʼbel ta ilel ta Vivlia li kʼupil sba stalelaltake, jech kʼuchaʼal ti snaʼ xkʼanvane, ti tukʼ li kʼusitik tspase, ti oy spʼijile xchiʼuk ti oy sjuʼele. Yan ti kʼuxi xuʼ jkʼupil kʼoptatik Jeova xchiʼuk ti xmuyubaj-o kuʼuntike, jaʼ ti xkakʼ kipaltik ta xchanbel stalelaltake (Efes. 5:1). Kʼalal jech ta jpastike, yikʼaluk van jelel chilutik li yantike xchiʼuk tskʼan van tsnaʼik ti kʼu yuʼun jelelutike (Mat. 5:​14-16). Jaʼ yuʼun, xuʼ me xkalbetik srasonal yantik mu ventauk ti bu oyutike. Vaʼun, li krixchanoetik ti oy ta yoʼontonik mantale chnopajik ta stojolal Dios. Kʼalal jech ta jkʼupil kʼoptatik li Jeovae, xmuyubaj kuʼuntik (1 Tim. 2:​3, 4).

XMUYUBAJ KUʼUNTIK LI JESUSE

8. ¿Kʼuxi laj yakʼ ta ilel Jesus ti skʼan jkʼupil kʼoptabetik sbi li Jeovae?

⁸ Ta sjunul li vinajel balumile jaʼ noʼox stuk Jesus xojtikin lek li Jtotik Jeovae (Mat. 11:27). Li Jesuse skʼanoj tajek li Stote, jaʼ yuʼun laj yakʼ kiltik kʼusi smakoj ti ta jkʼupil kʼoptabetik li sbie (Juan 14:31). Kʼalal la skʼopon Stot kʼalal jun xa ox akʼobal skʼan xchame, xi laj yal ta sventa li kʼusi tal spas ta balumile: «Laj kakʼbe snaʼik li abie» (Juan 17:26). ¿Kʼuxi laj yakʼ ta ilel?

9. ¿Kʼusi loʼilal la stunes Jesus sventa xakʼ ta ilel kʼu yelan stalelal li Jeovae?

⁹ Li Jesuse maʼuk noʼox laj yalbe krixchanoetik ti jaʼ Jeova sbi li Diose, yuʼun li judaetike snaʼojik xa onoʼox. Jaʼ yuʼun, jaʼ laj yakʼbe ta ojtikinel li stalelale (Juan 1:​17, 18). Jech kʼuchaʼal li Tsʼibetik ta Ebreo Kʼope chal ti Jeovae jaʼ jun Dios ti oy xkʼuxul yoʼontone xchiʼuk ti oy slekil yoʼontone (Eks. 34:​5-7). Li krixchanoetike mas to laj yaʼibeik skʼoplal kʼalal laj yal li loʼil ta sventa li chʼayemal kereme. Li loʼile chal ti kʼalal la sta ta ilel skerem li totile, kʼalal nom toʼox skʼan xkʼote, bat snup ta be ta anil, la smey xchiʼuk laj yakʼ ta perton. Jamal xvinaj ti oy xkʼuxul yoʼonton xchiʼuk slekil yoʼonton li Jeovae (Luk. 15:​11-32). Li Jesuse jaʼ jech la skolta krixchanoetik sventa xojtikinik lek li Jeovae.

10. 1) ¿Kʼuxi jnaʼojtik ti la stunesbe sbi Stot li Jesuse xchiʼuk ti oy ta yoʼonton ti jechuk akʼo spas li yantik eke? (Markos 5:19; kʼelo xtok li lokʼole). 2) ¿Kʼusi oy ta yoʼonton Jesus ti akʼo jpastik eke?

¹⁰ ¿Mi oy van ta yoʼonton Jesus ti stunesbeik sbi li Stote? Oy. Junantik jnitvanejetik ta relijione chalik ti toj echʼ xa noʼox chʼul li sbi Diose xchiʼuk ti mu stakʼ alele. Pe li Jesuse jech-o laj yichʼbe ta mukʼ li sbi Stote, muʼyuk la stsak ta venta li kʼusi nopem xaʼi tspas judaetik ti muʼyuk bu jech chal ta Vivliae. Kalbetik skʼoplal kʼalal la xpoxta jun vinik ti uʼuninbil yuʼun pukuj li ta steklumal jerasaetike. Li jnaklejetike xiʼik tajek xchiʼuk laj yalbeik Jesus ti xlokʼ batele (Mar. 5:​16, 17). Pe li stuke oy ta yoʼonton ti xojtikinbeik li sbi Jeovae. Jech oxal, kʼalal skʼan toʼox xlokʼ batele, laj yalbe komel li  vinik ti akʼo xalbe batel yantik li kʼusi la spas Jeova ta stojolale, maʼuk li kʼusi la spase (kʼelo Markos 5:19). a Li Jesus ti jaʼ Ajvalil kuʼuntike oy ta yoʼonton ti jechuk jpastik eke, ti xkakʼbetik yojtikin yantik li sbi Jeovae (Mat. 24:14; 28:​19, 20). Kʼalal jech ta jpastike, xmuyubaj kuʼuntik li Jesuse.

11. Li Jesuse, ¿kʼusi laj yalbe yajchankʼoptak ti akʼo skʼan ta s-orasionike? Jech kʼuchaʼal chal Esekiel 36:​23, ¿kʼu yuʼun ti toj tsots skʼoplal taje?

¹¹ Li Jesuse snaʼoj ti oy ta yoʼonton Jeova ti xichʼ chʼultajesbel li sbie, jaʼ xkaltik, ti lekuk xkom skʼoplal ta skoj ti laj yichʼ jutbel smule. Jech oxal, xi laj yalbe yajtsʼaklomtak ti akʼo skʼan ta s-orasionike: «Jtotik ta vinajel, akʼo yichʼ chʼultajesel li abie» (Mat. 6:9). Li Jesuse snaʼoj lek ti jaʼ li kʼusi mas stots skʼoplal skʼan pasele (kʼelo Esekiel 36:23). Stuk xa noʼox jech ti kʼu yelan xchʼultajesojbe sbi Jeova li Jesuse. Akʼo mi jech, kʼalal laj yichʼ chukele la stikʼbeik smul, yuʼun laj la xchopol kʼoptabe sbi li Stote. Toj echʼ xa noʼox chopol laj yaʼi ti jech tikʼbat smule. Kʼalal skʼan toʼox xichʼ chukele, chopol tajek laj yaʼi sba, yuʼun snaʼoj ti chtikʼbat smule xchiʼuk ti chmilat-o ta skoj taje. Jaʼ van yuʼun «mu xa xnel chaʼi li svokole» (Luk. 22:​41-44).

12. ¿Kʼusi la spas Jesus sventa chʼultajesbiluk xkom li sbi Stote?

¹² Sventa chʼultajesbiluk xkom sbi li Stote, li Jesuse la stsʼik majel, utel xchiʼuk muʼyuk la spak skʼoplal kʼalal laj yichʼ jutbel smule. Snaʼoj lek ti la xchʼunbe smantale xchiʼuk ti muʼyuk kʼusi chkʼexav-oe (Ebr. 12:2). Jech xtok, snaʼoj ti jaʼ yakal chkontrainvan li Satanase (Luk. 22:​2-4; 23:​33, 34). Li Diabloe tskʼan ox ti muuk tukʼ xakʼ sba ta stojolal Jeova li Jesuse: ¡pe muʼyuk onoʼox bu spas yuʼun! Li Jesuse jamal laj yakʼ ta ilel ti jaʼ jutkʼop li Satanase xchiʼuk laj yakʼ ta ilel ti oy onoʼox yajtuneltak Jeova ti tukʼ chakʼ sbaik mu ventauk mi tsots li preva tsnuptanike.

13. ¿Kʼusi skʼan jpastik sventa xmuyubaj li Ajvalil kuʼuntike?

¹³ ¿Mi oy ta avoʼonton ti xmuyubaj li Ajvalil Jesukristoe? Mi jeche, jechuk-o  me xakʼupil kʼoptabe li sbi Jeovae xchiʼuk xakolta yantik yoʼ xojtikinik kʼu yelan ta melel. Mi jech chapase, jaʼ me jech yakal chatsʼaklibe batel yav yok li Jesuse (1 Ped. 2:21). Vaʼun, xmuyubaj me avuʼun li Jeova eke xchiʼuk jaʼ jech chavakʼ ta ilel ti jaʼ jun bankilal jutkʼop li Satanase.

XUʼ ME STA XKUXLEJAL LI YANTIKE

14, 15. ¿Kʼusi labalik sba chkʼot ta pasel kʼalal ta jchanubtastik yantik ta stojolal Jeovae?

¹⁴ ¿Kʼu yuʼun chkaltik ti xuʼ sta xkuxlejal yantik kʼalal ta jkʼupil kʼoptabetik sbi Jeovae? Yuʼun li Satanase smakojbe «snopbenik li buchʼutik maʼuk jchʼunolajeletike» (2 Kor. 4:4). Jech oxal, epal krixchanoetik xchʼunojik li kʼusi chal Satanase, tsnopik ti muʼyuk Diose, ti mu stakʼ xijnopaj ta stojolale, ti muʼyuk oyutik ta yoʼontone o ti toj chopole xchiʼuk ti chakʼbe-o svokol ta sbatel osil li buchʼutik chopole. Jaʼ jech chikʼubtasbeik sbi li Jeovae xchiʼuk tsokesbeik skʼoplal. Vaʼun, muʼyuk xa buchʼu tskʼan chnopaj ta stojolal. Pe kʼalal ta jcholtik mantal xchiʼuk ta jchanubtastik yantik ti kʼu yelan ta melel li Jtotike, jaʼ jech ta jmaktik ta be li kʼusitik chal Satanase xchiʼuk jaʼ jech ta jkʼupil kʼoptabetik li xchʼul bi Jeovae. ¿Kʼusi chkʼot ta pasel kʼalal jech ta jpastik taje?

¹⁵ Li kʼusitik melel chakʼ ta chanel li Vivliae toj echʼ xa noʼox tsots yip. Labalik sba kʼusitik chkʼot ta pasel kʼalal chkakʼbetik yojtikin Jeova li krixchanoetike xchiʼuk ti kʼu yelan li stalelaltake. Kʼalal chlik jamuk satik ta skoj ti makbilik toʼox satik yuʼun li Satanase, jech xa chlik yilik Jeova kʼuchaʼal chkiltike. Labal sba chilik ti toj echʼ xa noʼox sjuʼele (Is. 40:26). Jun yoʼonton chaʼi sbaik ta skoj ti tukʼ kʼusitik tspase (Deut. 32:4). Labal sba chilik ti pʼij tajeke (Is. 55:9; Rom. 11:33). Xchiʼuk chpatbat yoʼontonik kʼalal chaʼiik ti jaʼ kʼanelal li Diose (1 Juan 4:8). Kʼalal chnopajik ta stojolal li Jeovae, ta xchʼunik ti xuʼ xkuxiik sbatel osile xchiʼuk ti chkʼotik ta xnichʼnabtake. ¿Mi mu jaʼuk jun mukʼta matanal ti ta jkoltatik krixchanoetik sventa xnopajik ta stojolal  li Jeovae? Mi jech ta jpastike, yakal ta jchiʼintik ta abtel li Jeovae (1 Kor. 3:​5, 9).

16. ¿Kʼu yelan chaʼi sbaik li buchʼu chojtikinbeik sbi li Diose? Albo junuk skʼelobil.

¹⁶ Kʼalal oy buchʼu ta jchiʼintik ta loʼil ta sventa Diose, xuʼ van jaʼ chkakʼbetik xchan ta anil ti Jeova sbie. Mi oy ta yoʼonton mantal li krixchanoe, xuʼ me xjelbat-o xkuxlejal. Kalbetik skʼoplal jun tseb ti Alía sbi b ti muʼyuk tstunesik Vivlia li ta relijion bu chʼi talele. Mu junuk yoʼonton chaʼi sba xchiʼuk li srelijione mi jaʼuk nopol chaʼi sba ta stojolal Dios. Pe mas jun yoʼonton laj yaʼi sba kʼalal lik xchan Vivlia xchiʼuk li stestigotak Jeovae. Kʼalal laj yakʼ venta ti ta epal Vivliaetik slokʼesojbeik sbi Dios ti jaʼ xa noʼox yakʼojbeik Kajval xie, chopol tajek laj yaʼi sba. Pe kʼalal laj yojtikinbe sbi li Diose, jel li xkuxlejale, yuʼun yamigo xa laj yil. Xi laj yale: «Oy sbi li kamigoe». Xi to laj yale: «Avie jun xa koʼonton chkaʼi jba, jaʼ jun matanal ti jnabe xa sbi li Diose». Li Stiv ti tstij sone tsots skʼoplal chil srelijion li yutsʼ yalale ti jaʼ judioetike. Ta skoj ti laj yil ti muʼyuk lek kʼusi tspasik li ta srelijione, kʼot ta nopel yuʼun ti mu xa skʼan xbat ta junuk relijione. Pe kʼalal cham jun yutsʼ yalale, te la xchikinta kʼu yelan chichʼ estudio jun yamigo ti jaʼ ch-akʼbat yuʼun jun stestigo Jeovae. Kʼalal laj yaʼi kʼusi sbi li Diose, kʼot tajek ta yoʼonton. Xi chale: «Mu toʼox jnaʼ kʼusi sbi li Diose». Xi to chale: «Jaʼ to laj kaʼi ti oy jun Dios ta melele, vaʼun laj kakʼ venta ti oy xa jun kamigoe».

17. ¿Kʼu yuʼun oy ta avoʼonton ti jechuk-o xakʼupil kʼoptabe sbi li Jeovae? (Kʼelo xtok li lokʼole).

¹⁷ ¿Mi chkalbetik krixchanoetik kʼusi sbi Dios xchiʼuk kʼu yelan stalelaltak kʼalal ta jcholtik mantal o kʼalal chkakʼtik estudioe? Mi jech ta jpastike, yakal me ta jkʼupil kʼoptabetik li sbie. Jechuk-o me xakolta yantik sventa xojtikinik kʼu yelan stalelal li Jeovae, vaʼun jaʼ jech chakʼupil kʼoptabe li sbie. Kʼalal jech chapase, tsta xkuxlejal li yantike, yakal chachanbe stalelal li Jesukristoe xchiʼuk xmuyubaj avuʼun li Jtotik Jeovae. Vaʼun, xi chkaltik kʼuchaʼal li jtsʼibajom yuʼun salmoe: «Ta jkʼupil kʼopta abi ta sbatel osil» (Sal. 145:2).